एलीपज का इलजाम
1 फेर तेमानी एलीपज नै कह्या
2 "के अकलमंद नै उचित सै के वो अज्ञानता कै गेल्या जवाब दे,
या अपणे अन्तर-आत्मा नै पूर्वी हवा तै भरै?
3 के वो नाकामयाब वचनां तै,
या बेकार की बात्तां तै वाद-विवाद करै?
4 बल्के तू परमेसवर का भय मानणा ए छोड़ देन्दा,
अर परमेसवर की भगति करणा औरां तै भी छुड़ावै सै।
5 तू अपणे मुँह तै अपणा अधर्म प्रगट करै सै,
अर चलाक माणसां की तरियां बोल्लै सै।
6 मै तो न्ही पर तेरा मुँह ए तन्नै दोषी ठहरावै सै;
अर तेरे बोल तेरै खिलाफ गवाही देवै सै।"
7 के पैहला माणस तू ए पैदा होया?
के तेरी शरुआत पहाड़ां तै भी पैहले होई?
8 के तू परमेसवर की सभा म्ह बैठ्या सुणै था?
के बुद्धि का ठेक्का तन्नै ए ले राख्या सै
9 तू इसा के जाणै सै जिसनै हम न्ही जाणदे?
तेरे म्ह इसी कौण सी समझ सै जो म्हारे म्ह कोनी?
10 हम माणसां म्ह तो पक्के बाळ आळे अर घणे बुजुर्ग माणस सां,
जो तेरे बाप तै भी भोत घणी उम्र के सां।
11 परमेसवर की शान्तिदायक बात,
अर जो वचन तेरे खात्तर नाजुक सै, के ये तेरी निगांह म्ह घाट सै?
12 तेरा मन क्यूँ तन्नै खींच ले जावै सै?
अर तू आँख तै क्यूँ इशारे करै सै?
13 तू भी अपणी आत्मा परमेसवर कै खिलाफ करै सै,
अर अपणे मुँह तै बेकार बात लिकड़ण देवै सै।
14 माणस के सै के वो बेदाग हो?
अर जो औरत तै पैदा होया के वो बेकसूर हो सकै सै?
15 देख, परमेसवर अपणे पवित्रां15:15 पवित्रां सुर्गदूत पै भी बिश्वास न्ही करदा,
अर सुर्ग भी उसकी निगांह म्ह शुद्ध न्ही सै।
16 फेर माणस घणा घिनोणा अर भ्रष्ट सै जो
कपटता नै पाणी की तरियां पीवै सै।
17 "मै तन्नै समझा दियुँगा, इस करकै मेरी सुण ले,
जो मन्नै देख्या सै, उस्से का बखान मै करुँ सूं।
18 वोए बात जो बुद्धिमानां नै अपणे बुजुर्गां तै सुणकै
बिना लहकोए बताई सै।
19 सिर्फ उन ताहीं देश दिया गया था,
अर उनकै बीच म्ह कोए भी अनजाण माणस आवै-जावै न्ही था।
20 दुष्ट माणस जिन्दगी भर दर्द तै तड़फै सै, अर
उपद्रवी के जीवन के साल्लां की गिणती ठहराई होई सै।
21 उसके कान म्ह डरावणा शब्द गूँजदा रहवै सै,
ठीक-ठाक बखत पै भी नाश करण आळा15:21 नाश करण आळा चोरी करण आळा उसपै आ पड़ै सै।
22 उस नै अन्धेरै म्ह तै फेर लिकड़ण की किमे आस न्ही होन्दी,
अर तलवार उसकी घात करण की टोह म्ह रहवै सै।
23 वो रोट्टी कै खात्तर मारया-मारया फिरै सै, के कित्त मिलैगी?
उसनै पक्का बेरा रहवै सै, के अन्धकार का दिन मेरै धोरै ए सै।
24 मुसीबत्त अर हादसे तै उस नै डर लागदा रहवै सै,
इसे राजा की तरियां जो युद्ध कै खात्तर तैयार होवै, वो उसपै हावी होवै सै।
25 उसनै तो परमेसवर कै खिलाफ हाथ बढ़ाया सै,
अर वो सर्वशक्तिमान कै खिलाफ ताल ठोक्कै सै,
26 अर सिर ठाकै अर अपणी मोट्टी-मोट्टी
ढाल दिखान्दा होया घमण्ड तै उसपै हमला करै सै;
27 इस खात्तर के उसके मुँह पै चिकणाई छागी सै,
अर उसकी कमर म्ह चर्बी चढ़री सै।
28 अर वो उजाड़े होए नगरां म्ह बस ग्या सै,
अर जो घर रहण लायक न्ही,
अर उजाड़ होण नै छोड्डै गए सै, उन म्ह बस ग्या सै।
29 वो धनी ना रहवैगा, अर ना उसकी जायदाद बणी रहवैगी,
अर इस तरियां के माणसां के खेत की उपज धरती की ओड़ झुकण ना पावैगी।
30 वो अन्धेरै तै कदे न्ही लिकड़ैगा,
अर उसकी डाळी आग की लपट तै झुळस जावैगी,
अर परमेसवर के मुँह की सास तै वो उड़ ज्यागा।
31 वो अपणे आप नै धोक्खा देकै बेकार बात्तां का भरोस्सा ना करै,
क्यूँके उसका नतिज्जा धोक्खा ए होवैगा।
32 वो उसके ठहराए होये दिन तै पैहलाए पूरा हो ज्यागा;
उसकी डाळी हरी ना रहवैगी।
33 दाख की तरियां उसके कच्चे फळ झड़ैगें,
अर उसके फूल जैतून के दरखत्त की तरियां गिरैंगे।
34 क्यूँके भगतिहीन के परिवार तै कुछ न्ही बण पावैगा,
अर जो रिसवत लेवै सै, उनके तम्बू आग तै जळ जावैंगे।
35 उन म्ह उपद्रव का गर्भ रहवै, अर वो अनर्थ नै जन्म देवै सै
अर वो अपणी अन्तर-आत्मा म्ह छळ की बात बणावै सै।"