Eclesiastes 11

मईणता री कीमत

1 आपणी रोटी पाणिए पाँदे पाई दे, कऊँकि से ताखे बऊत दिना ते बाद फेर मिली जाणी।*11:1 मतलब आपणा पैसा जो तैं कमाई राखेया तेस दूर देशो दे बपारो दे लगाई दे तो से ताखे फेर मिली जाणा।

2 तूँ आपणा पैसा सात नि बल्कि आठा जणेया खे बांडी दे, कऊँकि तूँ नि जाणदा कि तरतिया पाँदे मुसीबत कदी बी आई सकोई। एड़िया जरूरती रे बखते देणे ते तेरिया मुसीबता रे बखते तिना तेरी मताद करनी।

3 ये हमेशा सच्च ओआ कि जेबे बादल़ पाणिए साथे परोए, तेबे सेयो आपू ई तरतिया पाँदे बरसी जाओए ओर ईंयाँ ई डाल़ जेते तरफा खे पड़ना तेथी पड़ेया रा रणा।

4 जो अवा खे देखदा रओआ, से बेजा नि बाई सकदा, जो बादल़ा खे देखदा रओआ, से फसल बाडी नि सकदा।

5 जिंयाँ तूँ अवा रे चलणे री बाट नि जाणदा ओर गर्भवतिया रे पेटो रे बच्चे रिया आड्डिया किंयाँ बढ़ोईया नई जाणदा, तिंयाँ ई तूँ परमेशरो रा काम पनि जाणदा, जिने सब कुछ बणाई राखेया।*11:5 यूह. 3:8

6 प्यागा ऊट्ठी की आपणा बेजा बा ओर साँजा बी आपणा काम करदे रणा, कऊँकि तूँ नि जाणदा कि कुण जा बीज सफल ऊणा, ये या से या दोनो के दोनो अच्छे निकल़ने।

7 दिनो रा प्रयासा देखणा कितणी खुशिया री गल्ल ओई। जिऊँदा रणा बऊत ई अचम्बा ए।

8 पले ई लोक कईया साला तक जिऊँदे रओ, पर तिना खे ये नि पुलणा चाईयो कि कदी सेयो बी मरने ओर फेर तिना बी कदी प्रयासा नि देखणा, ओर आसे नि जाणदे कि मारे मरने ते बाद आसा साथे क्या ऊणा।

जवान लोका खे सलाह्

9 ओ जवान, आपणियां जवानिया दे मौज कर ओर आपणी जवानिया रे दिनो रे मगन रओ; आपणी मनमानी कर ओर आपणियां आखी रिया इच्छा रे मुताबिक चल, पर ये जाणी लया कि इना सबी गल्ला रे बारे दे परमेशरो तेरा न्याय करना।

10 आपणे आपू खे सबी चिन्ता ओर दु:ख दर्दो ते दूर राख, कऊँकि जवानिया रे लक्षण बऊत ई छोड़ राची जाओए।