Amós 4

1 "हे सामरिया पहाड़ेरी कौन्शव तुस ज़ैना बाशानेरी बेछ़ी केरि ज़ेरि आथ, एन वचन शुना, तुस ज़ैना सामरियारे पहाड़े पुड़ आथ, ज़ैना कंगालन पुड़ आंधरे केरतिथ, ते गरीबन ढ्लेंच़तीथ, ते अपने-अपने मुन्शे सेइं ज़ोतिथ, ‘पीनेरे लेई दाछ़रो रस आनां!’ 2 परमेशर यहोवा अपनि पवित्रतारी कसम खेइतां ज़ोते, हेरा, तुसन पुड़ एरी दिहाड़ी एजने बालीए, कि तुसां कंटन सेइं, ते तुश्शी औलाद मेछ़लरे कंटन सेइं गुलैमी मांजो खिची गाली। 3 ते तुसां नगरेरे दिवारां केरे गत्तन मांमेइं सिद्धी निस्तां गैली ते हेर्मोने मां छ़ेडी गैली," यहोवा एन ज़ोते।

सज़ाह मैल्हने पुड़ भी इस्राएल न सुधरे

4 यहोवा ज़ोते, "बेतेल नगरे मां एइतां पाप केरा; ते गिलगाल नगरे मां एइतां बड़े पाप केरा; अपनि च़ढ़तल झ़ेझ़ां, ते अपने फसलरो दशोवं हिस्सो ट्लेइयोवं दिहाड़े आनां; 5 शुक्रेरी च़ढ़तल खमीर मिलेइतां च़ाढ़ा, ते अपने मेर्ज़ी सेइं दित्तोरे बलिदानेरी चर्चा च़लेइतां तैसेरो प्रचार केरा; किजोकि हे इस्राएली लोकव, एरू केरनू तुसन पसंदे," परमेशर यहोवा एन ज़ोते।

6 "मीं तुश्शे सेभी नगरन मां काल भेज़ो, ते तुश्शे सैरी ठारन पुड़ मीं रोट्टरो घाटो कियोरोए, फिर भी तुसां मेरे पासे मुड़तां न आए," यहोवा एन ज़ोते।

7 "ते ज़ैखन फसल कटनेरे लेई ट्लाई महीने बाकी राए, तैखन मीं तुश्शे लेई झ़ड़ी न भेज़ी; मीं एक्‍की नगरे पुड़ झ़ड़ी दित्ती ते होरि पुड़ न्ना; एक्‍की उडारे पुड़ झ़ड़ी बख्खी, ते होरि उडारे पुड़ न्ना; तैन शुक्‍की जेवं। 8 एल्हेरेलेइ दूई-ट्लाई नगरां केरे लोक पानी पीनेरे लेई दरबदर फिरते एक्‍की नगरे मां आए, पन रज़्ज़े न; फिर भी तुसां मेरे पासे न फिरे," यहोवा एन ज़ोते।

9 "मीं तुसन लूह ते गेरूई सेइं सज़ाह दित्ती; ते ज़ैखन तुश्शी बागां ते दाछ़री बागां, ते फैगेरे ते ज़ैतूनेरे बड़े बुट भोइ जे, तैखन टिट्टां तैन खेइ जेआं फिरी भी तुस मेरे पासे न फिरे," यहोवा एन ज़ोते।

10 "मीं तुश्शे दरमियान मिस्र मुल्खेरी ज़ेरि महामारी फैलाई; मीं तुश्शे घोड़े थुसोड़तां तुश्शे जुवान जंगी मां तलवारी सेइं माराए; ते तुश्शे डेरां केरि मुशक तुसन कां पुज़्ज़ी; फिर भी तुसां मेरे पासे मुड़तां न आए," यहोवा एन ज़ोते।

11 "मीं तुसन मरां किछ एन्च़रे उलटाए, ज़ेन्च़रे सदोम ते गमोरा नगरां उलटेवरां थियां। तुसां तैस अग्गी मरां निस्सोरां मोछ़ू केरे ज़ेरे भोए; फिर भी तुसां मेरे पासे न फिरे," यहोवा एन ज़ोते।✝4:11 उत्प. 19:24-25.

12 "एल्हेरेलेइ, हे इस्राएल अवं तीं सेइं एरू केरेलो, ते एल्हेरेलेइ कि अवं तीं सज़ाह देने बालोईं, हे इस्राएल, अपने परमेशरेरे सामने एजनेरे लेई तियार भोइ गा!"

13 हेर, पहाड़ां केरो बनानेबालो ते हवा बनानेबालो, ते मैन्हु तैसेरो मनेरो विचार ज़ोने बालो ते झ़ेझ़ां अंधकार केरनेबालो, ते उच्‍चे ठैरन पुड़ च़लने बालोए, तैसेरू नवं सेना केरो परमेशर यहोवाए!✝4:13 2 कुरि. 6:18.