1 आमोस ज़ोते, हे इस्राएली लोकव, इस मातमेरे गीतेरे वचन शुना ज़ैना अवं तुश्शे बारे मां ज़ोताईं: 2 "इस्राएलेरी कुवारी कुई*5:2 इस्राएलेरी कुवारी कुई मतलब इस्राएली लोक। बिछ़ड़ी जेई, ते फिरी उठी न बटेली; तै अपने ज़मीनी पुड़ तलवारी सेइं मारी जेई, ते तैस खड़ो केरनेबालो कोई नईं।"

3 किजोकि परमेशर यहोवा एन ज़ोते, "ज़ैस नगरे मरां 1000 सिपाही निस्ते थिये, तैस मरां इस्राएलेरे 100 सिपाही बच़ेले, ते ज़ैस मरां 100 निस्ते थिये, तैस मरां 10 बच़ेले।"

4 यहोवा इस्राएली लोकन सेइं एन ज़ोते, मीं कां वापस एज्जा, तैखन ज़ींते राले। 5 बेतेल नगरे मां गेइतां मरां मद्दत न तोप्पा, गिलगाल ते बेर्शेबा नगरन मां आराधना केरनेरे लेई न गाथ; किजोकि गिलगाल पक्‍कू गुलैमी मां गालू, ते बेतेल खाली भोइ गालू।

6 यहोवा कां वापस एज्जा, तैखन ज़ींते राले, नईं त तै यूसुफेरे लोकन पुड़ अग्गरो ज़ेरो भड़केलो, ते अग तैस भस्म केरेली, ते बेतेले मां तैस कोई हिशाने बालो न भोल्हो। 7 हे न्याय बिगाड़ने बालाव ते धार्मिकताई मित्ती मां मिलाने बालाव!

8 यहोवा ज़ै हर किसमेरे तारे बनानेबालोए, तै बड़े आंधरे झ़ेझ़री लौई मां बदलते, तै दिहैड़ी आंधरे मां बेदलतां रात बनाते, तै समुन्दरेरू पानी हिलाते, ते ज़मीनी पुड़ बरसाते, तैसेरू नवं यहोवाए। 9 तै ताकतबरे लूशी नाश केरतां छ़डते, ते क़िले भी सत्यानाश केरतां छ़डते।

10 ज़ै मैन्हु सभाई मां सच़्च़ैई सेइं नगरेरे फाटके मां न्याय केरते, तुसां तैस सेइं बैर रखतथ, ते सेच़्च़ी गल्‍लन सेइं नफरत केरतथ।✝5:10 गल. 4:16. 11 तुसां ज़ैना गरीबन पुड़ ज़ुलम केरतथ, ते भेंटरे नंव्वे पुड़ अन्न नेतथ, एल्हेरेलेइ ज़ैना घरां तुसेईं तराशोरे घोड़न सेइं बनेवरेन, तैन मां रेई न बटेले। ते ज़ैना खूबसूरत दाछ़री बागां तुसेईं लेवरिन, तैन केरे दाछ़रो रस पी न बटेले। 12 किजोकि अवं ज़ानताईं कि तुश्शे पाप भरी आन। तुस धर्मी लोकन सतातथ ते रिश्पत नेतथ, ते फाटकन मां गरीब लोकन सेइं अन्याय केरतथ। 13 एल्हेरेलेइ ज़ै अक्लमन्द भोए, तै एरे वक्ते च़ुप राए, किजोकि वक्त बुरोए।✝5:13 इफि. 5:16.

14 हे लोकव, बुराई नईं, बल्के भलियाई तोप्पा, ताके तुस ज़ींते राथ; ते तुश्शू इन ज़ोनू सच़ भोए कि सेना केरो परमेशर यहोवा तुसन सेइं साथी आहे। 15 बुरैई सेइं बैर ते भलियाई सेइं प्यार रखा, ते फाटकन मां न्याय कायम केरा; भोइ सकते सेना केरो यहोवा यूसुफेरे खानदानेरे बच़ोरे लोकन पुड़ अनुग्रह केरे।✝5:15 रोम. 12:9.

16 एल्हेरेलेइ सेना केरो परमेशर, प्रभु यहोवा एन ज़ोते: "सब चौकन मां लेरां ते शोर भोनीए; ते सेभी सड़कन मां लोक हाय, हाय केरेले! तैना ज़मीनदारन मातम केरेनेरे लेई, ते ज़ैना लोक मातम केरने मां माहिरन, तैन लेरां देनेरे लेई कुजाले। 17 ते सेभी दाछ़री बागन मां लेरां केरि शोर भोल्ही," किजोकि यहोवा एन ज़ोते, "अवं तुश्शे मझ़मेइं निस्तां गालो।"

18 फिरी आमोस ज़ोते, हाय तुसन पुड़, ज़ैना यहोवारे दिहाड़ां केरि इच्छा रखते भोन! यहोवारे न्यायेरे दिहाड़े तुश्शो कुन फैइदो भोल्हो? तै त लौअरी नईं बल्के आंधरेरी दिहाड़ी भोल्ही। 19 ज़ेरो कोई शेरे करां नश्शे ते तैस इछ़ मैल्हे; या घरे मां एइतां कंथी पुड़ हथ लाए ते तैस सप खाए। 20 कुन एन सच़ नईं कि यहोवारी न्यायेरे दिहाड़ी लौअरी नईं, बल्के आंधरेरी भोल्ही? हाँ, एरू आंधरेरू ज़ैस मां किछ भी चमक न भोल्ही।

21 "अवं तुश्शे तिहारन सेइं बैर रखताईं, ते तैन निकम्मे समझ़ताईं, ते तुश्शी महासभान सेइं अवं खुश नईं। 22 चाए तुस मेरे लेई होमबलि ते अन्नबलि च़ाढ़थ, फिरी भी अवं खुश न भोल्हो, ते तुश्शे पालोरे जानबरां केरि मेलबलि केरे पासे न तकेलो। 23 अपने गीतां केरि शोर मीं करां दूर केरा; तुश्शे सारेंगी केरो सुर अवं न शुनेलो। 24 पन न्याय दरियाएरो ज़ेरो, ते धार्मिकता बड्डे दरियाएरो ज़ेरो बगने देइयथ।

25 "हे इस्राएली लोकव, तुसां सुनसान ठैरी मां 40 सालन तगर जानबरां केरि बलि ते अन्नबलि कुन मेरे लेई च़ाढ़ते राए? 26 नईं, तुसां त अपने राज़ेरो तेम्बु, ते एपनी मूरती, ते अपने देबतां केरो तारो साथी नेइतां फिरते राए, ज़ैना तुसेईं अपने लेई बनेवरेन✝5:26 प्रेरित. 7:42-43.। 27 एल्हेरेलेइ अवं तुसन दमिश्क नगरेरे उस पासे गुलैमी मां पुज़ेइलो, सेना केरो परमेशर यहोवा एन ज़ोते।