1 फिरी मीं लाव, कि गबड़े तैन सत मोहरन मरां अक खोल्‍ली; ते तैन च़ेवरे प्रैणन मरां एक्‍केरी गुड़नेरी ज़ेरि आवाज़ शुनी कि, "एई।" 2 ते मीं नज़र की, ते अक छ़ितो घोड़ोए, ते तैसेरे सुवारे कां धनुष थियूं, ते तैस अक ताज दित्तू, ते तै ज़ींतो निस्सो कि होरि भी ज़ीत हासिल केरे।

3 ज़ैखन गबड़े दूइयोवं मोहर खोल्‍ली, त मीं होरो प्राणी इन ज़ोते शुनू कि, "एई।" 4 फिरी अक होरो घोड़ो निस्सो, ज़ै लाल रंगेरो थियो; ते तैसेरे सुवारे ई अधिकार दित्तो, कि धेरतली पुड़ां मेल-मिलाप सल्‍ले, ताके लोक एक्‍की होरि मारन; ते तैस अक बड्डी तलवार दित्ती। 5 ते ज़ैखन गबड़े ट्लेइयोवं मोहर खोल्‍ली, त मीं ट्लेइयोवं प्राणी इन ज़ोते शुनू कि, "एई।" ज़ैखन मीं तक्‍कू त अक कालो घोड़ो निस्सो; ते तैसेरे सुवारेरे हथ्थे मां ट्लकड़ीए। 6 ते मीं तैन च़ेवरे प्रैणन मरां मैन्हेरी ज़ेरि ई गल ज़ोते शुनी, कि दीनारेरो गेहुं, "ते दीनारेरे ट्लाई सेर जौ, तेल, ते कने दाछ़रो रसेरो नुकसान न केरथ।"

7 ज़ैखन तैने च़ेवरोवं मोहर खोल्‍ली, त मीं च़ेवरोवं प्राणी इन ज़ोते शुनो कि, "एई।" 8 ते मीं नज़र की, ते हेरा, अक हेइढ्लो घोड़ोए; तैसेरे सुवेरारू नवं मौते, ते पाताल तैस पत्ती-पत्तीए, ते तैन ई अधिकार मैल्हो कि धेरती पुड़ रानेबाले लोकन मरां हर च़ेवरोवं मैन्हु मारन, कि तैना तैन तलवारी सेइं मारन, ते ढ्लुखी सेइं मारन, ते बुरी बिमैरी सेइं मारन, ते तैन जंगली जानबरन सेइं भी मारन।

9 ज़ैखन गबड़े पंच़ोंव मोहर खोल्‍ली, त मीं बलिदान केरनेरी ठारी करां बुन आत्मां लेही, ज़ैना परमेशरेरे वचनेरे वजाई सेइं, ते तैस गवाहेरी वजाई सेइं ज़ै तैनेईं दित्तोरी थी, कि यीशु मसीह तैन केरो प्रभुए मारोरो थियो। 10 ते तैनेईं बड़े ज़ोरे सेइं हक देइतां ज़ोवं, "हे पवित्र, ते सच़्च़े प्रभु; तू केइस तगर इश्शो न्याय न केरेलो? ते धेरतलरे रानेबालन सेइं इश्शे खूनेरो बदलो केइस नेलो?" 11 ते तैन सेब्भन छ़ित्तां लिगड़ां दित्तां, ते तैन सेइं ज़ोवं, कि थोड़े च़िरेरे लेई आराम केरा, ज़ांतगर तुश्शे साथी दास, ते विश्वासी साथी, ज़ैना तुश्शे ज़ेरे मारे गानेन, तैन केरि भी गिनती पूरी न भोए।

12 ज़ैखन गबड़े शेइयोवं मोहर खोल्‍ली, त मीं हेरू, कि अक बड़ो भुंज़ल अव; ते दिहाड़ो कमलेरो ज़ेरो भोव, ते चाँदनी पूरी खूनेरी ज़ेरि भोइ। 13 ते अम्बरेरे तारे धेरतली पुड़ां झ़ड़े ज़ेन्च़रे बड़े तूफाने सेइं फैगेरे बुट्टे मरां कच़्च़े फल झ़ड़तन। 14 ते अम्बर एरू घिशकू, ज़ेन्च़रे बरको पलेटोते ते हर अक पहाड़, ते टैपू, अपने-अपने ठारारां घिशके। 15 ते धेरतलरे राज़े, प्रधान, सरदार, धनी ते सामर्थी लोक, ते हर अक दास, ते हर अक आज़ाद पहाड़ां केरे कुढन मां, ते शफड़न मां छ़प्पे। 16 ते पहाड़न, ते शफड़न सेइं ज़ोने लाए, "कि असन पुड़ झ़ड़ा; ते असन तैसेरे ऐशी सेइं ज़ै तखते पुड़ बिशोरोए ते गबड़ेरे सरकी करां छ़ुपा। 17 किजोकि तै खतरनाक दिहाड़ी एज्जेली ज़ेइस परमेशर ते गबड़ू हर एक्‍की सज़ाह देले, ते कोई भी तैस झ़ैल्‍लनेरे काबल नईं।"