1 तैस्से वक्ते मां हेरोदेस राज़े कलीसियारे किछ मैन्हन दुख देनेरे लेई तैना ट्लाने शुरू किये। 2 ते यूहन्ना प्रेरितेरो ढ्ला याकूब तलवारी सेइं मराव। 3 ज़ैखन तैनी हेरू कि यहूदन ऐह गल बड़ी खुशी अई, त तैन दिहाड़न मां पतरस भी ट्लाव। तैना दिहैड़ी अखमीरी रोट्टरी तिहारेरी थी। 4 ते तैस गिरफ्तार केरनेरां बाद हेरोदेस तै कैदखाने मां छ़डो, ते तैसेरी पहरदारी केरनेरे लेई च़ेवरे टोली बनाई, हर टोली च़ेवर-च़ेवर सिपाही केरि थी, हेरोदेसेरो खियाल थियो कि फ़सह तिहारेरे बाद तै कैदे मरां केढतां लोकां केरे सामने पेश केरे। 5 कैदखाने मां पतरस बड़े दिहाड़न तगर पेरहे मां थियो, पन सारी कलीसिया तैसेरेलेइ परमेशरे कां प्राथना केरने लगोरी थी।

6 हेरोदेसे, पतरस लोकां केरे सामने आन्ने करां पेइले अक रात ज़ैखन पतरस दूई पहरेदारां केरे मझ़ाटे बंधोरो झ़ुलोरो थियो, ते सिपाही कैदखानेरे डेवढी पुड़ पेरहो देते थिये। 7 त अचानक परमेशरेरो स्वर्गदूत कैदखाने मां अव, ते सारो कैदखानो ट्लकड़ो भोइ जेव, स्वर्गदूते पतरसे खित्ती देइतां बींझ़ाव ते ज़ोवं, "उठ, ते लूश केर।" ते शंगलां पतरसेरे हथ्थन सैहींयेरां खुल्‍ली जेई। 8 स्वर्गदूते पतरसे सेइं ज़ोवं, "अपनु मज़ बन्ध ते बूट ला।" पतरसे तैन्ने कियूं, ते फिरी ज़ोवं, "अपनो चोगो ला ते मीं पत्पती एई।" 9 पतरस स्वर्गदूते पत्पती कैदखाने मरां बेइर अव, पन तैस ऐह पतो न थियो, कि स्वर्गदूत ज़ैन केरने लगोरोए एन सच़्च़े या कोई दर्शन हेरने लगोरोइं। 10 तै दूइयोवं पेरहेदारे करां बेइर निस्तां अव, ते लोंहेरे फाटके कां पुज़्ज़ो, ज़ै नगरेरे पासे खुलतो थियो, तै फाटक तैन केरे लेई अपने आप खुल्‍लो, ते तैना तैट्ठां निस्तां दूर पुज़्ज़े, स्वर्गदूत पतरसे तैड़ी पुज़ेइतां गैइब भोइ जेव। 11 तैखन पतरस होशी मां अव, ते ज़ोने लगो, "हुनी मीं पूरू याकीन भोवं, कि परमेशरे अपनो स्वर्गदूत भेज़तां अवं हेरोदेसेरे हथ्थे मरां छुटाव, ते यहूदी लीडरेईं ज़ैन सोचोरू थियूं, तैन बन्ने न दित्तू।"

12 ज़ैखन तै एस बारे मां सोचने लग्गोरो थियो, त मरियमरे घरे पुज़्ज़ो, ज़ै यूहन्ना ज़ैस जो मरकुस ज़ोते थिये तैसेरी अम्मा थी। तैड़ी बड़े विश्वासी लोक अकोट्ठे भोइतां प्राथना केरने लग्गोरो थिये। 13 पतरसे बेइरियोवं दार गुड़कावं त अक नौकरानी ज़ेसारू नवं रूदे थियूं, तै दार खोलने आई। 14 तैसां पतरसेरी गल शुनी ते तैसां गल पिशानी ते बगैर दार खोलनेरां दौड़ती खुशी भोइतां आई, ते ज़ोने लगी, पतरस बेइर दारे मां एवरोए। 15 तैना मैन्हु ज़ोने लगे, "तू कुन पागल भोवरिस।" पन ज़ैखन तैसां रोड़ेच़ारे ज़ोवं, कि तै पतरसे, त तैना ज़ोने लगे "पतरस त नईं पन पतरसेरो स्वर्गदूत भोल्हो।" 16 ते पतरस बेइर दार गुड़कातो राव, ते ज़ैखन तैनेईं दार खोल्‍लू त पतरस लेहितां हैरान रेइजे। 17 पतरसे तैन जो हथ्थे सेइं इशारो कियो, कि च़ुप राथ, ते फिरी अन्तर एइतां सारो बिस्तार शुनाव, कि अवं केन्च़रे परमेशरे कैदखाने मरां बेइर कढो, ते फिरी ज़ोवं, "याकूबे त तैसेरे होरि मसीह ढ्लान भी पतो देइयथ।" ते एप्पू केन्ची होरि जगाई जो च़लो जेव।

18 ज़ैखन झ़ेझ़ भोइ त सिपेहिन एप्पू मांमेइं खलबली मेच़ि जेई, कि पतरस कोरहां जेव। 19 ज़ैखन हेरोदेसे तैस तोप्पनेरो हुक्म दित्तो त तैनी सिपेही केरू बियान घिन्नेरां पत्ती तैन जो कत्लेरो हुक्म दित्तो, ते पतरस यहूदिया इलाके मरां कैसरिया नगरे जो च़लो जेव, ते किछ च़िरे तगर तैड़ी राने लाव।

20 हेरोदेस सूर ते सैदारे नगरेरे लोकन पुड़ बड़ो नाराज़ थियो, तैखन तैना लोक मिलतां तैस कां आए, ते बलास्तुसे ज़ै राज़ेरो खास मैन्हु थियो, मनेइतां मेल केरनो चाव, किजोकि राज़ो एरे मुल्खेरां तैन केरे मुल्खे खर्च़ो मैलतो थियो। 21 तैखन तैनी अक दिहाड़ी ठुवहलाई ते हेरोदेस राज़ो अपना राज़ेरां लिगड़ां लेइतां आदालतरे तखते पुड़ बिशतां लोकन सेइं ज़ोने लगो। 22 तैनेईं ज़ैखन शुनू त ज़ोने लगे, "ऐह मैन्हु केरि आवाज़ नईं बल्के परमेशरेरी आवाज़े।" 23 किजोकि हेरोदेसे परमेशरेरी तारीफ़ न की, तैल्हेरेलेइ तैस परमेशरे स्वर्गदूतेरी एरी मार पेई कि तैसेरी सैरी जानी कीड़े लग्गे, ते तै मेरि जेव।

24 पन परमेशरेरू वचन अग्रोवं बद्धतू जेवं, ते विश्वासी लोकां केरि गिनती बद्धती जेई।

25 ज़ैखन बरनबास ते शाऊल अपनि सेवा ज़ै तैन केरे सुपुर्द कियोरी थी, तैनेईं पूरी की त अन्ताकिया नगरेरां यरूशलेम नगरे जो वापस आए, ते यूहन्ना ज़ैस जो मरकुस ज़ोते थिये, एप्पू सेइं साथी आनो।