प्रेरित 21

यरूशलेम नगरेरू सफर

1 ज़ैखन असां तैन करां च़ले जे त समुन्दरेरू सफर शुरू कियूं, त सिद्धे बत्तां कोस जज़ीरे मां आए, ते होरसां अस रूदुसे मां पुज़्ज़े, ते फिरी तैट्ठां पतरा जज़ीरे मां च़ले जे। 2 ते अक ज़िहाज़ फीनीके इलाके जो गांतू मैल्हू, त असेईं तैस पुड़ च़ेढ़तां सफर शुरू कियूं। 3 ज़ैखन इश्शी नज़र साइप्रस जज़ीरे पुड़ पेई, त अस तैस बांए हथ्थे ओसैलतां सीरिया इलाके जो च़ले जे, सूर नगरे मां ओस्से, किजोकि इश्शे ज़िहाज़े तैड़ी किछ बोझ उसालनो थियो। 4 तैड़ी असन चेले मैल्हे ते तैन कां असां सत दिहाड़े राए। तैनेईं पवित्र आत्मारे ज़ोने मुताबिक पौलुसे यरूशलेम नगरे मां गानेरे लेई ठाकू। 5 सत दिहाड़ना बाद कुआन्शां मट्ठन समेत नगरेरे बेइर तगर साथी आए, ते समुन्दरेरे बन्ने पुज़तां असेईं ज़ैधू केरे भारे बिशतां प्राथना की। 6 फिरी असां तैन करां अलग भोए त ज़िहाज़े मां च़ेढ़तां च़ले जे, ते तैना भी अपने-अपने घरजो च़ले जे।

7 ज़ैखन असां सूर नगरे मरां सफर पूरू केरतां पतुलिमयिसे मां पुज़े, ते विश्वासी ढ्लान जो नमस्कार केरतां तैन सेइं साथी अक दिहाड़ी राए। 8 ते होरसां असां तैट्ठां च़ेलतां कैसरिया नगरे मां आए, ते फिलिप्पुस खुशखबरी प्रचार केरनेबालेरे घरे जे ते तैड़ी राए, ज़ै सत्तन मरां अक थियो। 9 तैसेरी च़ेवरे कुवैरी कुइयां थी, ते तैना भविष्यिवाणी केरती थी। 10 ज़ैखन अस तैड़ी काई दिहाड़े राए, त तैड़ी अक नबी थियो, ज़ेसेरू नवं अगबुस थियूं, तै यहूदिया इलाकेरां एवरो थियो। 11 तैनी असन कां एइतां पौलुसेरे मज़े सेइं अपने हथ पव बन्धे ते ज़ोने लगो, "पवित्र आत्मा इन ज़ोतीए कि ज़ैस मैन्हेरू इन मज़े, तैस यरूशलेम नगरेरे यहूदी इसेरे ज़ेरे बन्धेले, ते गैर कौमां केरे लोकां केरे हवाले केरेले।" 12 ज़ैखन असेईं एना गल्‍लां शुनी, त असेईं ते होरि लोकेईं पौलुसे कां मिन्नत की, कि यरूशलेम नगरे मां न गेइयां। 13 पन पौलुसे जुवाब दित्तो, "तुस एन कुन केरने लगोरेथ? तुस किजो लेरां देइ-देइ मेरो दिल ट्लोड़ने लगोरेथ? अवं यरूशलेम नगरे मां प्रभु यीशु मसीहेरे नंव्वे सेइं सिर्फ बेंधोनेरे लेई नईं बल्के मरनेरे लेई भी तियार आईं।" 14 ज़ैखन तैनी न मन्नू त असां च़ुप राए, "कि प्रभुएरी मर्ज़ी पूरी भोए।"

15 किछ दिहाड़ना बाद असां सफरेरी तियारी केरने लगे, ते फिरी असां यरूशलेम नगरे जो च़ले जे। 16 कैसरिया नगरेरे किछ चेले असन सेइं साथी च़ले, ते असेईं मनासोन नंव्वेरो साइप्रसेरो अक पुरानो चेलो साथी आनो कि अस तैसेरे घरे रहम।

पौलुसेरी याकूबे सेइं मुलाकात

17 ते ज़ैखन असां यरूशलेम नगरे मां पुज़्ज़े, त इश्शे विश्वासी ढ्ला बड़े खुशी सेइं असन सेइं मिलने आए। 18 होरसां असां पौलुसे साथी नेइतां याकूबे सेइं मिलने जे, तैड़ी सब बुज़ुर्ग अकोट्ठे भोवरे थिये। 19 तैखन तैनी नमस्कार केरतां, ज़ैना-ज़ैना कम्मां परमेशरे तैसेरी सेवारे ज़िरिये सेइं गैर कौमन मां कियोरां थियां, अक-अक केरतां सब ज़ोआं। 20 तैनेईं इन शुन्तां परमेशरेरी तारीफ़ की, ते फिरी पौलुसे सेइं ज़ोने लगे, "हे ढ्ला तू ज़ानतस, कि यहूदन मरां हज़ारेईं लोकेईं विश्वास कियोरोए, ते तैना सब मूसेरे कानूने पुड़ अमल केरने मां मघन आन। 21 ते तैन तेरे बारे शिखालेरू कि तू गैर कौमन मां रानेबाले सारे यहूदन ऐह शिक्षा देंतो एवरोस, कि मूसा नेबेरे कानूने शारन, ते अपने मट्ठां केरो खतनो न केरा, ते यहूदी केरे रीतन पुड़ न च़ला। 22 त फिरी कुन कियूं गाए? लोक ज़रूर शुनेले कि इड़ी एवरोस। 23 एल्हेरेलेइ ज़ैन अस तीं सेइं ज़ोतम, तैन केर। इश्शे इड़ी च़ेवर मैन्हु आन ज़ैनेईं मिन्नत मगोरीए। 24 तू तैन एप्पू सेइं साथी ने ते तैन सेइं मिलतां अपनो आप शुद्ध केर, ते तैन केरो खर्च़ो भी दे, ताके तैना अपने दोग्गेरी टिन्ड बनान। तैखन सेब्भन पतो लगनोए कि ज़ैना गल्‍लां तेरे खलाफ फैलेवरिन, तैन केरि कोई बुनीयाद नईं, ते तू एप्पू भी सच़्च़े दिले सेइं मूसेरे कानूने पुड़ अमल केरतस। 25 ते ज़ैड़ी तगर तैन गैर कौमां केरो सवाले, कि ज़ैनेईं विश्वास कियोरोए, तैन केरे बारे मां असेईं पेइलो फैसलो केरतां लिखतां भेज़ू, कि तैना मूरतन कां बलिदान कियोरू मास ते खूने करां ते गलचैटी देइतां मारोरे जानबरां केरे मासे करां परहेज़ केरन, ते बदमाशी न केरन। 26 होरसां पौलुसे तैना मैन्हु साथी ने, ते तैन सेइं साथी अपने आपे शुद्ध केरतां मन्दरे मां जेव, ते खबर दित्ती कि तैन केरे शुद्ध भोनेरे बाद च़ढ़तल च़ाढ़नेरे दिहाड़े केइस पूरे भोनेन।"

मन्दरे मां पौलुस ट्लानो

27 ज़ैखन शुद्ध भोनेरे सत दिहाड़े पूरे भोनेबाले थिये, त आसिया इलाकेरे यहूदेईं पौलुस मन्दरे मां लाव त लोक भड़काए, ते तैस ट्लेइतां चिन्डां मारने लगे, 28 "हे इस्राएली लोकव इश्शी मद्दत केरा, ईए तै मैन्हुए, ज़ै हर ठैरी लोकन इश्शे कानूनेरे खलाफ ते मन्दरेरे खलाफ शिक्षा देंतो रहते, ते एनी एसेरां अलावा गैर कौमां केरे लोक इश्शे मन्दरे मां एन्हतां तै पवित्र ठार अपवित्र कराई।" 29 तैनेईं एन एल्हेरेलेइ ज़ोवं कि तैनेईं पौलुस इफिसुस नगरेरे रानेबाले त्रुफिमुस सेइं साथी लाहोरो थियो, ते समझ़ते थिये कि पौलुसे तै ज़रूर मन्दरे मां नीयोरो भोनोए। 30 तैखन सारे नगरे मां हलचल मेच़ि जेई, ते मैन्हु देवड़तां जम्हां भोए, ते पौलुस ट्लेइतां मन्दरे मरां घसीटतां बेइर आनो, ते लूशी दारां बंद कियां। 31 ज़ैखन तैना तैस मारनेरी कोशिश केरने लगोरे थिये, त फौजी टोलरे सरदारे कां खबर पुज़ी, कि बड़े लोकेईं यरूशलेम नगरे मां खलबली मच़ोरीए। 32 तैखन तैना सिपेहिन ते सूबेदारन एन्हतां तैन कांजो दौड़ो, ते तैनेईं फौजी टोलरे सरदारे ते सिपाही लेइतां पौलुस मारनो कुटनो बंद कियो। 33 फौजी टोलरे सरदारे नेड़े गेइतां पौलुस अपने कब्ज़े मां कियो, ते तैस दूई शंगलेइं सेइं बंधनेरो हुक्म दित्तो, ते फिरी तैनी पुछ़ू, "ऐह मैन्हु कौने ते एनी कुन कियोरूए?" 34 तैस भीड़ी मां किछ लोक चिन्डां मारते थिये, ते एत्री शौर मच़ोरी थी, कि तैस पूरो पतो न लगो ते तैनी हुक्म दित्तो, कि पौलुसे क़िले मां पुज़ाथ। 35 ज़ैखन पौलुस सिपाहीयेइं पेवड़न उबरो च़लेवरो थियो, त लोकां केरे वजाई सेइं सिपाहीयेइं पौलुस उबरो छ़ुइतां नेव। 36 सारे लोक ज़ैना पौलुसे पत्ती पेवरे थिये, तैना चिन्डां मारते थिये, "एस मार।"

37 पौलुसे सिपाही क़िले मां पुज़ाने बाले थिये, त तैनी फौजी टोलरे सरदारे सेइं ज़ोवं, "कुन मीं अज़ाज़त आहे कि अवं तीं सेइं किछ ज़ोईं?" ते तैनी पुछ़ू, "तू यूनानी भाषा ज़ानतस?" 38 कुन तू तै मिस्र मुल्खेरो रानेबालो नईं, ज़ैनी किछ च़िरे पेइले सरकारारी खलाफत कियोरी थी, ते 4000 मैन्हन ज़ैन कां हथियार थिये तैना जंगले मां नियोरे थिये? 39 पौलुसे ज़ोवं, "अवं त यहूदी आईं, ते तरसुस नगरेरो राने बालोईं, ज़ैन किलिकिया इलाकेरू मुशूर नगरे, अवं तीं कां मिन्नत केरताईं मीं लोकन सेइं गल केरने दे।" 40 ज़ैखन तैनी अज़ाज़त दित्ती, त पौलुसे पेवड़न पुड़ खड़ो भोइतां लोकन जो हथ्थे सेइं इशारो कमाव कि च़ुप रान। ते ज़ैखन तैनेईं च़ुप कमाई त पौलुसे इब्रानी भाषाई मां ज़ोनू शुरू कमाव: