प्रेरित 27

पौलुस रोमे जो भेज़ो गानो

1 ज़ैखन फेस्तुस हाकिमेरे ज़िरिये ऐह बिस्तार बनो कि असां लोक ज़िहाज़े मां इतालिया जो गाम, त पौलुस त होरे कैदी यूलियुस नंव्वे औगुस्तुस फौजी पलटनरे सरदारेरे एक्‍की सूबेदारेरे सुपुर्द किये। 2 असां अद्रमुत्तियुम नगरेरां एक्‍की समुन्दरी ज़िहाज़े मां च़ेढ़तां आसिया इलाकेरे नेड़ेरे ठैरी गानेबाले थिये, त अरिस्तर्खुस नंव्वे थिस्सलुनीके नगरेरो अक मकिदुनी असन सेइं साथी थियो।

3 होरसां ज़ैखन ज़िहाज़ सैदा मां रुकी जेवं, त यूलियुसे पौलुसे पुड़ महरबानी केरतां तैस अपने दोस्तन सेइं मुलाकात केरनेरी अज़ाज़त दित्ती, ताके तैसेरे ज़िरिये सेइं पतो लग्गे। 4 तैट्ठां फिरी असां ज़िहाज़े मां च़ेढ़तां च़ले जे, ते साइप्रसेरे आड़ी मांमेइं निस्से, किजोकि हवा बड़ी ज़बरदस्त थी। 5 फिरी किलिकिया नगरे ते पंफूलिया नगरेरे नेड़े समुन्दरेरी बत्तां निस्तां अग्रोवं च़ले जे, त लूसिया इलाकेरे मूरा नगरे मां ओस्से। 6 तैड़ी सूबेदारे सिकन्दरिया नगरेरू अक ज़िहाज़ इतालिया इलाके जो च़लेरू मैल्हू, तैनी असां तैस मां च़ाढ़े।

7 असां बड़े दिहाड़न तगर बल्हे-बल्हे अग्रोवं च़लते राए, ते कनिदुस नगरेरे सामने पुज़्ज़े। पन तेज़ हवा च़लने सेइं असन अग्रोवं गानेरी मुश्किल भोइजेइ, ते एल्हेरेलेइ असां सलमोनेरे सामने निस्तां क्रेतेरी आड़ी मां निस्से। 8 ते बेड़ि मुश्किली सेइं समुद्रेरे बन्ने-बन्ने अग्रोवं च़लते शुभलंगरबारी नंव्वेरी एक्‍की ठैरी पुज़्ज़े, ज़ैट्ठां लसया नगर नेड़ू थियूं।

9 तैड़ी असन कही दिहाड़े बीते, पैनेरे सफरे मां मुश्किल एल्हेरेलेइ भोती थी, कि छुटकारेरी दिहाड़ी तिहारेरे बरतेरे दिहाड़ो बीतोरे थी, ते पौलुसे तैन एन ज़ोइतां खबरदारी दित्ती, 10 "जनाब मीं एरू लगते कि इश्शू सफर बड़ू खतरनाक भोल्हु, कि न सिर्फ इश्शे माल सबाब ते ज़िहाज़े बल्के इश्शी जानी भी खतरोए।" 11 पन सूबेदारे कपताने ते ज़िहाज़ेरे मालिकेरी गल पौलुसेरी गल्‍ली करां जादे मन्नी।

12 किजोकि तै बंदरगाह ठंढारो मौसम कटनेरे लेई रोड़ी न थी, एल्हेरेलेइ इश्शो फैसलो ऐह थियो, कि असां केन्ची तरीके सेइं अग्रोवं निस्सम ते असन उमीद थी, कि फीनिक्से मां पुज़तां हीवतड़ेरो मौसम तैड़ी गुज़ैरी गामेले। ऐह क्रेते अक बंदरगाह थी, ज़ैसेरां दारां दक्षिण-पश्चिम ते उत्तर-पश्चिम पासे खुलतां थियां।

समुद्रे मां तूफान

13 ज़ैखन दक्षिणी पासेरां हवा च़लने लगी, त तैनेईं सोचू कि तैन केरि मर्ज़ी पूरी केरनेरे लेई रोड़ो वक्ते, ते तैनेईं ज़िहाज़ेरू लैंग्र तैट्ठां खड़ू कियूं, ते समुन्दरेरे बन्ने अग्रोवं च़लते जे। 14 पन लूशी अक बड़ी तूफानी हवा च़ली ज़ैस जो यूरकुलीन ज़ोतन। 15 ज़ैखन तैने ज़िहाज़ अपने पलैट्टे मां कियूं, ते ज़िहाज़ ढ्लैक्‍कां खाने लगू, ते असेईं ज़िहाज़ हवारे बहावे पुड़ छ़डू। 16 तैखन कौदा नंव्वेरो अक निकड़ो टैपू अव, त असेईं भी रुड़ते-रुड़ते तै डोंगी ज़ै ज़िहाज़ेरे पतोरां बन्धोरी थी, त बेड़ि मुश्किली सेइं कैबू मां की।

17 ते ज़िहाज़ेरे टोलरे मैन्हेईं तै उब्री च़ेढ़तां ज़िहाज़ ट्लुटने करां बच़ानेरे लेई रेस्सेइं सेइं बेन्धतां छ़डू। किजोकि तैन डर थियो, कि एरू न भोए, कि ज़िहाज़ सुरतिसेरे रेती मां डुबी गाए, एल्हेरेलेइ तैनेईं भारी सामान उसालू ते ज़िहाज़े मां रुड़ते-रुड़ते च़ले जे। 18 ज़ैखन तूफानी हवाई सेइं ज़िहाज़ जादे ढ्लैक्‍कां खाने लगू, त होरसां असेईं ज़िहाज़ेरो माल समुन्दरे मांजो शारनो शुरू कियो, 19 ट्लेइयोवं दिहाड़े तैनेईं ज़िहाज़ेरू सामान भी समुन्दरे मांजो शैरी छ़डू। 20 त काई दिहाड़े न असेईं दिहाड़ो लाव ते न तारे ते तूफान भी मना जादे ज़ोर केरने लग्गोरो थियो, ते असन बच़नेरी हुनी कोई उमीद न राई।

21 रोट्टी खाने काई दिहाड़े भोवरे थिये, एल्हेरेलेइ पौलुसे तैन मां खड़े भोइतां ज़ोवं, "ढ्लाव अगर तुसेईं मेरू ज़ोनू मन्नोरू भोथू, ते क्रेते मरां अग्रोवं न एवरे भोथे, त ई नुकसान ते ई तकलीफ किजो भोनी थी?

22 "पन अवं तुसन कां मिन्नत केरताईं कि, हिम्मत न हारा तुसन मरां कोई भी न मरेलो, चाए ज़िहाज़ डुबी किना गाए। 23 किजोकि ज़ैस परमेशरेरी अवं आराधना केरताईं, तैसेरो स्वर्गदूत हीज राती मीं कां एवरो थियो। 24 ते तै ज़ोने लगो, ‘हे पौलुस डर नन्ना तू महाराज़े कां ज़रूर पेश भोल्हो ते परमेशर तेरी वजाई सेइं एन सेब्भी केरि जान बच़ालो, ज़ैना ज़िहाज़े मां तीं सेइं साथी आन।’ 25 एल्हेरेलेइ हे जनाब तुस हिम्मत रखा कि मेरे परमेशरे ज़ैन किछ मीं सेइं ज़ोवरूए तैन्ने भोल्हु। 26 असां ज़रूर केन्ची टैपू पुड़ पुज़ी गामेले।"

ज़िहाज़ ट्लुटनू

27 च़ेवधोवं राती ज़ैखन असां अद्रिया समुन्दरे मां इरां उरां फिरते थिये, त ज़िहाज़े बाले मैन्हेईं अंदाज़ो लाव कि असां बन्नेरे नेड़े पुज़ी जेवरेम। 28 तैनेईं पानी रेस्सी सेइं नापू त 37 मीटर निस्सू ते थोड़े अग्गर गेइतां नापू त 27 मीटर निस्सू। 29 एस डरे सेइं कि कोस्कोई शफ़ड़ी सेइं न बज़म, ते तैनेईं ज़िहाज़ेरे पेत्रीं पासे च़ेवरे लैंग्रां समुन्दरे मां छ़डां ते झ़ेझ़ेरे लौअरे लेई प्राथना केरने लगे।

30 ज़िहाज़ च़लानेबाले मझ़ाटेरां बेइरोवं निसनेरे लेई डोंगी उन्ढी ओसाली। पन तैना ज़िहाज़ेरे एग्री पासेरां लैंग्र पैनी मां छ़डनू चाते थिये। 31 तैखन पौलुसे सूबेदारे ते सिपेहिन सेइं ज़ोवं, "अगर इना लोक ज़िहाज़े मां न भोल्हे त तुश्शू लोकां केरू बच़नू मुश्किले।" 32 एल्हेरेलेइ सिपैहीयेइं डोंगी रेस्सी केटतां समुन्दरे मांजो शैरी दित्ती।

33 झ़ेझ़ भोने करां पेइले पौलुसे सेब्भन कां मिन्नत कमाई, कि तुस किछ रोट्टी खाथ। तैनी ज़ोवं, "तुस च़ेवधे दिहैड़ी केरे देंते बच़नेरे खियाले मां पेवरेथ, ते तुस रोट्टी सेइं हुरोरे भी नईं। 34 अवं तुसन कां मिन्नत केरताईं कि तुस रोट्टी खाथ, किजोकि तुश्शे लेई रोड़ू एन्ने कि याकीन केरा कि तुश्शो बाल बिंगो न भोल्हो।" 35 ज़ैखन तैनी एन ज़ोवं, त तैनी रोट्टी ट्लाई ते सेब्भी केरे सामने परमेशरेरू शुक्र केरतां ट्लोड़ी ते खाने लगो। 36 तैस करां लेहितां होरन भी हिम्मत आई, ते तैना भी रोट्टी खाने लगे। 37 असां सब मिलतां कोई 276 मैन्हु थिये, ज़ैना इस ज़िहाज़े मां सुवार थिये। 38 ज़ैखन तैनेईं रेज़्ज़तां रोट्टी खाइ त तैनेईं सारे गेहुं समुन्दरे मांजो शारने शुरू किये, ताके ज़िहाज़ पोल्‍लू भोए।

39 ज़ैखन दिहाड़ो निस्सो त तैनेईं तै ठार न पिशानी, पन अक ठार लाही ते तै पासो साफ थियो, तैनेईं बिस्तार कमाव कि अगर भोइसखे त असां ज़िहाज़ एस पुड़ च़ाढ़म। 40 बस्सा लैंग्र खोलतां समुन्दरे मां छ़ेडी दित्तू, ते पतवारां केरि रेस्सी भी ढिल्‍ली छ़ेडी, एग्रीयों बादबांन भी बा च़ैढ़ी छ़डो, ते एप्पू बन्नेरे पासे जो च़ले। 41 पन ज़िहाज़ खुशकी पुड़ गेइतां रेती पुड़ टिकी जेवं, ते ज़िहाज़ेरो एग्रीयों पासो रेती मां डुबी जेवं ते पेत्रियों पासो छ़ेल्‍लेईं सेइं बज़कने लगो।

42 सिपेही केरि सलाह थी कि कैदन मारम ताके तैन मरां कोई तारी देइतां नेश्शी न गान। 43 पन सूबेदारे पौलुसेरी जान बच़ांनेरे लेई एन न दित्तू केरने, ते हुक्म दित्तो कि ज़ै तारी ज़ानते त तै पेइलो छाल मारे, ते खुशकी पुड़ पुज़तां अपनि जान बच़ाए। 44 ते बाकी होरे लेकड़ारे तखतन पुड़ ते ज़िहाज़ेरी होरि चीज़ां केरि मद्दती सेइं अपनि जान बच़ाथ, ते बस्सा सब एस तरीके सेइं खुशकी पुड़ ठीक ठाक पुज़ी जे।