प्रेरित 23

1 पौलुसे महासभारे लोकां केरे पासे रोड़ेच़ारे तेकतां ज़ोवं, "हे ढ्लाव अवं बेड़ि नेक नीती सेइं परमेशरेरे हुक्मां केरे मुताबिक ज़िन्दगी गुज़ारतो एवरोईं।" 2 महायाजक हनन्याह पौलुसेरी एना गल्‍लां शुन्तां पौलुसे कां खड़े भोवरे लोकन हुक्म दित्तो, कि एसेरे तुत्तरे पुड़ थप्पड़ बाथ। 3 पौलुसे तैस सेइं ज़ोवं, "हे पाखंडी, परमेशर तीं बाए। तू इड़ी बिशोरोस कि मूसेरे कानूनेरे मुताबिक मेरो न्याय केरस, ते कुन तू मूसेरे कानूनेरे खलाफ बानेरो हुक्म देतस?" 4 ज़ैना तैड़ी खड़खड़े थिये, त तैना ज़ोने लगे, "कुन तू परमेशरेरे महायाजकेरी तुहीन केरतस?" 5 पौलुसे तैन सेइं ज़ोवं, "ढ्लाव मीं पतो न थियो, कि ऐह महायाजक, किजोकि लिखेरूए,

‘तू अपने लोकां केरे प्रधाने जो बुरू न ज़ो।’"

6 पौलुस ज़ानतो थियो, कि तैन मां किछ सदूकी भी आन, ते किछ फरीसी लोक भी आन ते तै महासभाई मां ज़ोरे सेइं ज़ोने लगो, "हे ढ्लाव अवं त फरीसी लोकां केरे खानदेंनी मरां आईं, ते मीं पुड़ एनेईं एल्हेरेलेइ मुकदमो च़लेवरोए, कि अवं उमीद रखताईं कि मुड़दे फिरी ज़ींते भोल्हे।" 7 पौलुस एन ज़ोते फरीसी ते सदूकी लोकन एप्पू मांमेइं लड़ाई शुरू भोइजेइ, ते सेब्भन एप्पू मांमेइं खल बनो। 8 किजोकि सदूकी ज़ोतन कि मुड़दे ज़ींते नईं भोने, ते न स्वर्गदूतन ते न कोई आत्मा आए, पन फरीसी लोक एन दूईये गल्‍लन पुड़ विश्वास केरतन। 9 तैखन तैना बेंस केरने लग्गे, शास्त्री लोकन मरां ज़ैना फरीसी लोकन मां थिये, तैना खड़े भोइतां लड़ाई केरतां ज़ोने लगे, "असां इस मैन्हु मां कोई कसूर न लहम, अगर केन्ची आत्मा या स्वर्गदूते एस सेइं कोई गल कियोरीए त फिरी कुन भोवं?" 10 गल एत्री बेद्धी जेई, कि फौजी पलटनरे सरदारे बुझ़ू, कि एरू न भोए कि पौलुसेरे टोटे-टोटे बनान, त तैनी हुक्म दित्तो कि बुन गाथ ते पौलुसे ज़बरदस्ती तैट्ठां कढा ते क़िले मांजो आनां। 11 तैस्से राती प्रभु यीशुए पौलुसे कां एइतां ज़ोवं, "हे पौलुस हिम्मत रख ज़ेन्च़रे तीं यरूशलेम नगरे मां मेरी गवाही दित्तोरीए, तेन्च़रे तीं रोमे मां भी गवाही देनी भोल्ही।"

पौलुसेरे मौतरे लेई साज़िश

12 होरसां झ़ेझ़ां किछ यहूदी मैन्हेईं मिलतां फैसलो कियो, ते कसम कमाई कि ज़ांतगर असां पौलुसे कत्ल न केरम, तांतगर किछ न खाम ते न पीम। 13 एस साज़िशी मां 40 मैन्हन करां जादे थिये। 14 तैना प्रधान याजकन ते बुज़ुर्गन कां जे, ते ज़ोने लगे, "असन पुड़ लानत भोए, अगर असां पौलुसे मारनेरे बगैर किछ खाम या पीम, असेईं त तैस खतम केरनेरी कसम कमेवरीए। 15 एल्हेरेलेइ तुस सब महासभा मां मिलतां फौजी पलटनरे सरदारे कां दरखुवास देथ, कि तै पौलुसे लोकां केरे सामने आने, ताके एस मुकदमेरी सारी हकिकत फिरी पतो च़ले, एस करां पेइले पौलुस इड़ी पेश कियो गाए, असां तियार आम, कि तैस मारम।"

16 पन ज़ैखन पौलुसेरे बेइनरे मट्ठे एस साजिशरो पतो लगो, त तैनी क़िले मां गेइतां पौलुसे पतो दित्तो, कि तैना लोक तैस मारनो चातन। 17 तैखन पौलुसे सूबेदारन मरां अक कुजव, ते तैस सेइं ज़ोवं, "कि इस जुवाने फौजी पलटनरे सरदारे कां नेथ, किजोकि ऐह किछ ज़ोनेरे लेई एवरोए।" 18 बस्सा, तैनी तै फौजी पलटनरे सरदारे कां साथी नियो, ते ज़ोने लगो, "अवं पौलुसे ज़ै कैदी आहे, तैनी अवं कुजव, ते तैनी मीं कां दरखुवास कियोरीए, कि इस जुवाने अवं तीं कां एन्ही, किजोकि ऐह किछ तीं सेइं ज़ोनू चाते।" 19 फौजी पलटनरे सरदारे तैस जुवानेरो हथ ट्लेइतां तै कनारे ज़ेरे नियो ते तैस पुछ़ने लगो, "तू मीं सेइं कुन ज़ोनू चातस?" 20 तैनी जुवाने ज़ोवं, "यहूदी लीडरेईं अकोट्ठे भोइतां तीं कां दरखुवास देनेरो फैसलो कियोरोए। कि तू पौलुसेरी पुछ़ गन केरनेरे बहाने तैस महासभा मां आनस। 21 तू तैन केरि गल न मेन्नां, किजोकि कोई 40 मैन्हन करां जादे यहूदी तैस पुड़ हमलो केरनेरी कोशिशी मां आन, तैनेईं कसम कमेवरी कि ज़ांतगर असां पौलुसे न मारम तांतगर असां किछ खाम या पीम, त असन लानत भोए, हुनी तैना तियारन, सिर्फ तेरे वाधेरो इंतज़ारे।" 22 फौजी पलटनरे सरदारे तै जुवान वापस भेज़ो, ते तैस ज़ोवं कि गा, "एना गल्‍लां केरो ज़ैना तीं मीं सेइं ज़ोई, होरि केन्ची पतो न लोड़े लग्गोरो।"

पौलुस कैसरिया मां भेज़नो

23 तैखन तैनी दूई सूबेदार कुजाए, ते तैन सेइं ज़ोवं, "तुस 200 सिपाही ते 70 सुवार ते 200 भाले च़लानेबाले तियार रखा, तैनेईं राती 9 बज़ेई कैसरिया नगरे मां गानूए। 24 ते पौलुसेरे लेई घोड़े तियार रखा, ताके तै गवर्नर फेलिक्से कां हिफाज़ती सेइं पुज़व गाए।" 25 ते फौजरे प्रधाने अक चिट्ठी एस तरीकेरी लिखी,

26 "जनाब फेलिक्स गवर्नर क्लौदियुस लूसियासे जो नमस्कार। 27 ऐह तै मैन्हुए, ज़ै यहूदेईं ट्लातोरो थियो, ते एस तैना मारनेबाले थिये, त अवं सिपाही नेइतां साथी जेव, ते तै छुटाव, किजोकि मीं पतो थियो, कि तै अक रोमेरो रानेबालोए, त फौजी पलटन नेइतां छुटाव। 28 लिहाज़ा एन ज़ान्नेरी कि तैना तैस पुड़ कुन इलज़ाम लातन, मीं तै तैन केरि महासभा मां पेश कियो। 29 ते पतो लगो, कि तैन केरो इलज़ाम तैन केरे कानूनेरे मुताबिक एसेरे खलाफ कोई एरो इलज़ाम नईं, कि ज़ेसेरे ज़िरिये सेइं असां तैस कैद केरम या मौतरी सज़ाह देइ सखम। 30 मीं पतो लग्गोरोए कि एसेरे खलाफ कोई साज़िश भोइ राहोरीए, ते मीं ऐह जल्दी तीं कांजो भेज़ोरोए, ते मीं तैस पुड़ दाओ केरनेबालन भी ज़ोवरूए, कि तैना भी तीं कां अपनो मुकदमो पेश केरन।"

31 सिपाही, फौजी पलटनरे सरदारेरे हुक्मेरे मुताबिक पौलुसे एप्पू सेइं साथी नेइतां रातो रात अन्तिपत्रिस नगरे मां पुज़व। 32 होरसां दीसां घोड़ सुवारन तैस सेइं साथी अग्री-अग्री गानेरो हुक्म दित्तो, ते तै एप्पू क़िले मांजो वापस च़लो जेव। 33 ज़ैखन घोड़ सुवार कैसरिया नगरे मां पुज़्ज़े त तैनेईं गवर्नरे कां चिट्ठी देइतां पौलुस तैस कां पेश कियो। 34 गवर्नरे चिट्ठी पेढ़तां पुछ़ू, "ऐह कौस इलाकेरो रानेबालोए?" ज़ैखन तैस पतो लगो कि ऐह किलिकिया इलाकेरो रानेबालोए। 35 त तैनी ज़ोवं, "कि अवं तेरो मुकदमो तैखन शुनेलो, ज़ैखन तीं पुड़ दोष लाने बाले भी इड़ी हाज़र भोल्हे।" तैखन तैनी हुक्म दित्तो कि पौलुसे हेरोदेसेरे पहेरे मां रखा।