प्रेरित 28

माल्टा टैपू मां पौलुस

1 ज़ैखन असां सुखे सेइं बन्ने पुड़ पुज़े, त असन पतो च़लो कि इस टैपू जो माल्टा ज़ोतन। 2 तैट्ठेरे रानेबालेईं असन सेइं बड़ो रोड़ो बर्ताव कियो, झ़ड़ी लग्गोरी थी, ते ठंढ भी बड़ी थी, तैनेईं अग बाली ते इश्शी बड़ी आदर कमाई।

3 पौलुसे कैड़ु केरो अक लेग्गु बनावं, ते ज़ैखन तै तैना कैड़ु अग्गी मां छ़डने लगो त अग्गरे सेके सेइं तैन कैड़न मरां अक सप निस्सो, ते पौलुसेरे हथ्थे सेइं पलेटोव। 4 ज़ैखन तैन लोकेईं सप पौलुसेरे हथ्थे सेइं पलेटोरो लव, त एप्पू मांमेइं ज़ोने लगे, "ऐह मैन्हु ज़रूर कोई खूनी आहे, ऐह समुन्दरे मां गर्क भोने करां त बच़ोरोए, पन न्याये ऐह ज़ींतो राने न दित्तो।"

5 पन तैनी तैस सप्पे अग्गी मांजो घिल दित्तो, ते तैस किछ नुकसान न भोव। 6 तैना लोक बलगने लग्गोरो थिये, कि एसेरी सारी जान एफरी गानीए ते ऐह मेरि गानोए, ते बड़े च़िरे तगर बलगनेरे बाद पौलुसे किछ न भोवं, त तैना लोक सोचने लगे, "ऐह ज़रूर कोई देबतोए।"

7 तैस ठैरारे आसे-पासेरे टैपेरी प्रधान पुबलियुसेरी ज़मीन थी, तैनी असां अपने घरे ने ते ट्लाई दिहाड़े इश्शी आदर खातर की। 8 पुबलियुसेरे बाजी भुखार ते पैचसी सेइं बड़ो बिमार भोवरो थियो, ते पौलुसे तैस कां गेइतां तैसेरेलेइ प्राथना की, ते तैस पुड़ हथ रेखतां तै बझ़ाव। 9 फिरी तैस टैपेरे बाकी बिमार लोक आए ते तैना ठीक भोइ जे। 10 तैन लोकेईं इश्शी बड़ी इज़्ज़त की, ते असां तैट्ठां अग्रोवं गानेरे लेई तियार भोए, त तैनेईं इश्शी ज़रूरतरी सैरी चीज़ां ज़िहाज़े मां छ़ेडी दित्ती।

माल्टा टैपू मरां रोमेरे पासे

11 इश्शू ज़िहाज़ बिगड़नेरे ट्लेइ महीनां बाद असां सिकन्दरियारे एक्‍की ज़िहाज़े मां च़ले जे, ज़ैन ठंढ मुकने तगर तैस टैपू मां रुकोरू थियूं, तैस मां यूनैनी केरि दूई अकोट्ठी देबतेरी मूरतां बनोरी थी। 12 पेइले असां सुरकूसा नगरे मां पुज़्ज़े, ते ट्लाई दिहाड़े तैड़ी राए। 13 तैट्ठां असां च़लते-च़लते रेगियुम नगरे मां पुज़्ज़े, ते होरसां दक्षिणी हवा च़लने लगी ते असां होरसां पुतियुली नगरे मां पुज़्ज़े। 14 तैड़ी असन किछ ढ्ला भी मैल्हे, तैनेईं असां कुजाए ते असां तैड़ी सत दिहाड़े राए, ते तैसेरां बाद असां रोमे मां पुज़्ज़े। 15 तैट्ठेरे मसीही ढ्लान पतो लगो, कि असां एवरेम त तैना असन अगराने अप्पियुसेरे चौके ते ट्लेइ धर्मशालन तगर आए, पौलुसे तैना लेहितां परमेशरेरू शुक्र कियूं ते तैस बड़ी हिम्मत भोइ।

16 ज़ैखन अस रोम नगरे मां पुज़्ज़े ते पौलुसे अज़ाज़त मैल्ही, कि तै एक्‍की पहरेदारेरी निगरेंनी मां ज़ैड़ी चाए गेइ सकते।

रोम नगरे मां पौलुस

17 ज़ैखन ट्लाई दिहाड़े बीते त पौलुसे यहूदी केरे प्रधान कुजाए, ते ज़ैखन तैना अकोट्ठे भोए त पौलुसे तैन सेइं ज़ोवं, "ढ्लाव मीं अपनि कौमरे ते अपने दादे-पड़दादां केरि रसमरे खलाफ कोई कम नईं कियेरू त फिर भी अवं पाबंद केरतां यरूशलेम नगरे मां रोमी सरकारारे हवाले कियो। 18 तैनेईं पुछ़ गन केरनेरे बाद अवं हथरां छ़डनो थियो। किजोकि मीं कोई एरू कम न थियूं कियेरू कि ज़ैस सेइं मीं मौतरी सज़ाह देथे। 19 पन ज़ैखन यहूदेईं मुखालफत की, त मीं महाराज़े कां बिनती की। पन एल्हेरेलेइ नईं कि अवं अपनि कौमी पुड़ कोई इलज़ाम लानो चातो थियो। 20 एल्हेरेलेइ मीं एन रोड़ू समझ़ू, कि तुसन सेइं मिलतां गल केरि, अवं इस्राएलेरी एक्‍की उमीदी ज़ै मसीहे शंगलन सेइं बंधोरोइं।" 21 तैनेईं तैस सेइं ज़ोवं, "असन यहूदन करां न कोई चिट्ठी मैल्ही ते न तैट्ठां एजने बाले इश्शे लोकेईं तेरे बारे मां कोई खबर दित्ती, ते न तेरे खलाफ किछ ज़ोवं। 22 पन असां तेरे बारे मां ज़ाननू चातम, ऐह त असन पत्तोए, कि लोक सेब्भी ठैरन एस पंथेरे खलाफ गल्‍लां केरतन।"

23 तैखन यहूदी लोकेईं पौलुसेरी गल्‍लां शुन्नेरे लेई अक दिहाड़ी ठुवहलाई, ज़ैखन तै दिहाड़ी आई, त लोक पेइले लोकन करां भी जादे अकोट्ठे भोए। पौलुसे तैन परमेशरेरे राज़्ज़ेरे बारे मां समझ़ाव, ते साथी यीशुएरे बारे मां मूसेरे कानूने ते नेबी केरे किताबन मरां तैन रोड़ेच़ारे समझ़ेइतां झ़ेझ़ां करां ड्लवझ़ी तगर गल्‍लां शुनातो राव। 24 किछ तैसेरी गल्‍लां शुन्तां मघन भोइ जे ते मन्नू ते किछेईं विश्वास न कियो। 25 ज़ैखन तैना एप्पू मांमेइं अक न भोए, त पौलुसे तैन गाने करां पेइले अक गल ज़ोई, "पवित्र आत्मारे ज़िरिये यशायाह नबी तुश्शे दादे-पड़दादां केरे बारे मां ठीके ज़ोवरू थियूं,

26 "‘एन लोकन कां गा, ते एन ज़ो कि,

तुस शुन्ते त राले, पन समझ़ेले न,

ते तकते त राले पन पिशानेले न।

27 किजोकि एन लोकां केरे दिल मोट्टे भोवरेन,

ते एना टोव्ने भोवरेन,

ते एनेईं अपनि एछ़्छ़ी निकोल कियोरिन।

किजोकि एरू न भोए,

कि एना लहन ते कन्न सेइं शुन्न ते दिले सेइं समझ़न,

ते एना मेरे पासे फिरन ते अवं एन शिफ़ा देईं।’

28 "एल्हेरेलेइ अवं चाताईं कि तुस ज़ानथ कि परमेशरेरी मुक्ति गैर कौमन कां भी भेज़ोरोए ते तैना तैस शुनेले।" 29 ज़ैखन पौलुसे एन ज़ोवं, त यहूदी एप्पू मांमेइं बेंस केरते तैट्ठां च़ले जे।

30 पौलुस पूरे दूई सालन तगर क्रैइयेरे मुकाने मां राव, 31 ते ज़ै भी तैस सेइं मिलने एइतो थियो, पौलुस तैस सेइं मिलतो थियो, ते बेधड़क भोइतां परमेशरेरे राज़्ज़ेरी खुशखबरी शुनातो थियो, ते प्रभु यीशु मसीहेरे बारे मां शिक्षा देंतो राव।