प्रेरित 16

पौलुस तीमुथियुसे एप्पू सेइं साथी नेते

1 तैना फिरी दिरबे नगरे ते लुस्त्रा नगरे मां आए, तैड़ी अक चेलो तीमुथियुस नव्वेंरो रहतो थियो, तैसेरी अम्मा यहूदी थी, ते तै मसीह पुड़ विश्वास केरती थी, पन तैसेरो बाजी यूनान मुल्खेरो रानेबालो थियो। 2 तीमुथियुस लुस्त्रा नगरे मां ते इकुनियुम नगरेरे विश्वासी ढ्लान मां बड़ो रोड़ो मैन्हु थियो। 3 पौलुसेरी इच्छा ई थी, कि तै तैस साथी ने, तैन यहूदी केरि वजाई ज़ैना तैड़ी रहते तैसेरो खतनो कियो, किजोकि तैना सब ज़ानते थी कि तैसेरो बाजी यूनान मुल्खेरो रानेबालो थियो। 4 पौलुस ते तैसेरे साथी नगर-नगरे मांमेइं च़लते जे, तैट्ठेरे विश्वासी लोकन तैना हुक्मां केरे बारे मां ज़ोंते जे, ज़ैना यरूशलेम नगरे मां प्रेरितेईं ते बुज़ुर्गेईं मिलतां ठहरावरे थिये, ताके लोक तैन पुड़ अमल केरन। 5 बस्सा कलीसियां विश्वासे मां पेक्‍की भोती जेई, ते तैन केरि कलीसियां केरि तैधात बद्धती जेई।

पौलुसेरू दर्शन

6 पौलुस ते तैसेरे साथी फ्रूगिया ते गलातिया इलाकन मांमेइं निस्तां जे, किजोकि पवित्र आत्मा तैना आसिया इलाके मां वचन शुनाने करां रोकोरे थिये। 7 ते तैना मूसिया इलाकेरे नेड़े पुज़तां, बितूनिया इलाके मां गानू चाते थिये, पन यीशुएरे आत्मा गाने न दित्ते। 8 एल्हेरेलेइ तैना मूसिया इलाकेरे नेड़ेरां त्रोआस नगरे मांजो च़ले जे। 9 राती पौलुसे अक मैन्हु दर्शने मां लाव, "तै मकिदुनी इलाकेरो थियो, तै खड़ो भोइतां पौलुसे कां मिन्नत केरने लगोरो थियो, कि पार समुन्दरेरे मकिदुनिया इलाके मां एइते इश्शी मद्दत केर।" 10 तैसेरे इस दर्शन हेरनेरां पत्ती लूशी अस पार मकिदुनिया इलाके मां गानेरे लेई तियार भोइ जे, किजोकि असेईं बुझ़ू कि परमेशरेरी असां तैड़ी खुशखबरी शुनानेरे लेई कुजेवरेम।

फिलिप्पी मां लुदियारो मन बेदलोते

11 असां त्रोआस नगरेरां ज़िहाज़े मां जे, ते पैनेरू सफर केरतां सुमात्राके टैपू पुड़ आए, ते तैट्ठां होरसां नियापुलिस नगरे मां आए। 12 तैट्ठां असां फिलिप्पी नगरे मां पुज़े, ज़ैन मकिदुनिया इलाके मां खास नगरे, ते रोमी केरि बेसती मांए, ते अस तैस नगरे मां किछ दिहाड़े राए। 13 आरामेरे दिहाड़े असां नगरेरे फाटके मरां निस्तां दरियाए पुड़ पुज़्ज़े, किजोकि असन उमीद थी कि तैड़ी यहूदी केरि प्राथना केरनेरी कोई ठार भोनीए, असां तैड़ी गेइतां बिश्शी जे, तैड़ी किछ कुआन्शां थी, असां तैन सेइं गल्‍लां केरने लगे। 14 इश्शी गल्‍लां शुन्ने बैली कुआन्शन मां अक परमेशरेरी भक्त लुदिया नव्वेंरी थी, तै थुआतीरा नगरेरी रानेबाली थी, ते बैंगनी लिगड़ां बेच़ने बाली थी, ते प्रभुए तैसेरो मन खोल्‍लो, कि तै पौलुसेरे गल्‍लन पुड़ ध्यान केरे। 15 ज़ैखन तैसां ते तैसारे पूरे टब्बरे बपतिस्मो नियो त तै बिनती केरतां ज़ोने लगी, "अगर तुस लोक मीं प्रभुएरी ईमानदार दासी समझ़तथ, त मेरे घरे च़ला ते बिश्शी राथ," ते तैसारी मिन्नत शुन्तां असां खुशी भोए।

पौलुस ते सीलास कैदखाने मां

16 एक्‍की फेरे असां प्राथना केरनेरी ठारी जो च़लोरे थिये त असन अक दासी मैल्ही ज़ै भूतां केरे मद्दती सेइं एजने बाले वक्तेरे बारे मां ज़ोती थी। ते अपने मालिकां केरे लेई बड़े पेइंसे कमाती थी। 17 तै पौलुसे पत्ती ते असन पत्ती च़ली ते ज़ोने लगी, "ऐह मैन्हु परमप्रधान परमेशरेरो दासे, ते एना असन पापां केरि मुक्तरी बत हिरातन।" 18 तै काई दिहाड़े एन्ने केरती राई, पन पौलुसे जिच भोव, ते मुड़तां तैस भूते जो ज़ोवं, "अवं तीं यीशु मसीहेरे नंव्वे सेइं हुक्म देताईं निस्सी गा, ते तै तैखने तैस मरां निस्सी जेई।"

19 ज़ैखन तैसेरे मालिकेइं हेरू कि इश्शी कमैइयरी उमीद ट्लुटी जेई, त तैनेईं पौलुस ते सीलास ट्लेइतां चौके मां प्रधानां केरे हवाले किये। 20 तैनेईं पौलुस ते सीलास हाकिमन कां पेश किये, ते ज़ोने लगे, "एना यहूदीन ते इश्शे नगरे मां बड़ी खलबली मच़ाने लगोरेन। 21 ते एरे रुवाज़ेरी शिक्षा देतन, ज़ैन केरू केरनू ते मन्नू असन रोमे मां रानेबालां केरे इश्शे लेई बिलकुल भी ठीक नईं।" 22 एन शुन्तां सारे लोक पौलुस ते सीलासेरे खलाफ अकोट्ठे भोए, ते हाकिमेईं तैन केरां लिगड़ां खोलतां छ़िन्दां ते सोटेईं बानेरो हुक्म दित्तो। 23 सिपैहीयेइं तैन खूब बेंतेइं बैही ते कैदखाने मां छ़डे, ते कैदखानेरे प्रधाने हुक्म दित्तो, कि रोड़ेच़ारे पेरहो दित्तो गाए। 24 तै हुक्म शुन्तां तैना आंधरी कोठी मां छ़डे, ते तैन केरे पव्वन लेकड़री बेड़ि लेई।

पौलुस ते सीलासेरी कैदखाने मरां आज़ादी

25 एध्धी राती पौलुस ते सीलास प्राथना केरने मां मघन थिये, ते परमेशरेरां भजना लगोरे थिये ज़ोने, ते होरे कैदी भी शुन्ने लगोरे थिये। 26 अचानक अक भुंज़ल अव, ते कैदखानेरे बुनीयाद हिल्‍ली ते सारां दारां खुल्‍ली जेआं, ते सैरी कैदी केरि बेड़ि भी खुल्‍ली जेई। 27 कैदखानेरो प्रधान बींझ़ो ते खड़ो उठो, ते तकने लगो, ते हेरते कि कैदखानेरां दारां खुल्‍ली जेवरेन, त तैनी समझ़ू कि सारे कैदी नश्शोरेन, ते तैनी अपनि तलवार खिच्‍ची कि अवं अपनो आप मैरी छ़ेड्डी। 28 पन पौलुसे ज़ोरे सेइं ज़ोवं, "अपनो आप न मार किजोकि असां सब इड़ी आम।" 29 तैखन तै दीयो बैलतां अन्तर जेव, ते पौलुसे ते सीलासेरे पव्वन पुड़ पेव, 30 फिरी तैनी तैना बेइर आने ते ज़ोने लगो, "जनाब अवं कुन केरि, कि मेरी मुक्ति भोए?" 31 तैनेईं ज़ोवं, "प्रभु यीशु मसीह पुड़ विश्वास केर, त तीं ते तेरे टब्बरे पापन करां मुक्ति मैल्‍लनीए।" 32 ते तैनेईं तैस त तैसेरे टब्बरे प्रभुएरू वचन शुनाव। 33 तैखने तैने राती पौलुस ते सीलास नेइतां तैन केरे ज़खम धोए, ते तैनी तैसेरे सारे टब्बरे बपतिस्मो नियो। 34 फिरी तैनी तैना अपने घरे ने, ते तैन खाने जो रोट्टी दित्ती, ते सारे टब्बरे परमेशरे पुड़ विश्वास केरतां बड़े खुशी थिये।

35 होरसां झ़ेझ़ हाकिमेईं सिपाही भेज़तां बिस्तार भेज़ो, कि तैन मैन्हन हथरां छ़ेडी देथ। 36 दरोगा पौलुसे जो ज़ोवं, "हाकिमे हुक्म दित्तोरोए कि पौलुस ते सीलास कैदखाने मरां हथरां छ़डा, एल्हेरेलेइ तुस खुशी सेइं च़ले गाथ।" 37 पन पौलुसे तैन सेइं ज़ोवं, "तैनेईं अस ज़ैना रोम मुल्खेरे राने बालेम, बगैर कसूरे सेब्भी केरे सामने मारे कुटे ते कैदखाने मां छ़डे, ते हुनी च़ुपच़ारे हथरां छ़डने चाते? पन एन न भोइसखे, तै एप्पू एज्जे ते असन बेइर कढे।" 38 सिपैहीयेइं गेइतां हाकिमन बिस्तार दित्तो, कि पौलुस ते सीलास रोम मुल्खेरे रानेबालेन, ते तैना डेरि जे। 39 तैनेईं तैड़ी एइतां तैन करां माफ़ी मग्गी, ते फिरी तैना कैदखाने मरां बेइर आने ते मिन्नत की, कि नगरे मरां च़ले गाथ। 40 बस्सा पौलुस ते सीलास कैदखाने मरां बेइर निस्से ते लुदियारे घरे जे, ते तैड़ी विश्वासी ढ्लान सेइं मिले ते तैन शान्ति देइतां च़ले जे।