Atos 26

अग्रिप्पा राज़ेरे सामने पौलुसेरू बियान

1 अग्रिप्पा राज़े पौलुसे जो ज़ोवं, "तीं अपने बारे मां ज़ोनेरी अज़ाज़त आहे।" तैखन पौलुस अपने हथ्थे सेइं इशारो केरतां अपनि सफाई पेश केरने लगो।

2 "हे अग्रिप्पा राज़ा, अवं अपनो आप खुश किस्मत समझ़ताईं, कि तेरे सामने खड़ो भोइतां यहूदी लोकां केरे प्रधानां केरे इलज़ामा केरे खलाफ अपनि सफाई पेश केरने लगोरोइं। 3 खास केरतां तू सारे यहूदी केरि रीति रुवाज़ेरे बारे मां ज़ानतस, ते एल्हेरेलेइ अवं तीं कां मिन्नत केरताईं, कि तू सबरी सेइं मेरी गल शुन। 4 यहूदी मेरो चाल चलन रोड़ेच़ारे ज़ानतन कि पेइले अवं अपने लोकन मां ते यरूशलेम नगरे मां ते मेरी जुवानेरो चाल चलन केरहो थियो। 5 तैना पेइले देंते मीं ज़ानतन ते अगर चान त मेरे हके मां गवाही देइ सकतन, कि अवं अपने पंथेरे मुताबिक फरीसी भोइतां अपने धर्मेरे सच़्च़े पंथे सेइं ज़िन्दगी गुज़ारतो एवरोईं। 6 परमेशरे इश्शे दादे-पड़दादन सेइं अक वाधो कियोरो थियो, मीं उमीदे कि तै पूरो भोल्हो, तैस उमीदारी वजाई सेइं मीं पुड़ मुकदमो च़लेवरोए। 7 एस वाधेरे पूरे भोनेरी उमीद इश्शे 12 केरे 12 गोट्लने, एल्हेरेलेइ तैना दिले सेइं रात दिहाड़ी परमेशरेरी सेवा केरते रहतन। हे अग्रिप्पा राज़ा मेरी इस उमीदरे लेई यहूदी मीं पुड़ दोष लातन। 8 ज़ां कि परमेशर मुड़दन फिरी ज़ींते केरते, तुस इस गल्‍ली पुड़ विश्वास कि न केरथ?

9 "पेइले अवं भी समझ़तो थियो, कि यीशु नैसरेरे नव्वेंरी हर तरीके मुखालफत केरनि मेरो फर्ज़े। 10 एल्हेरेलेइ अवं यरूशलेम नगरे मां एन्ने केरतो राव, मीं प्रधान याजकन करां अधिकार एन्हतां बड़े परमेशरेरे सेवक कैद केरतां छ़डे, ते ज़ैखन तैना मारे गाते थिये, त अवं भी तैड़ी खलाफत केरतो थियो। 11 अवं प्राथना घरन मां गातो थियो, ते तैन केरि तुहीन केरतो थियो। ते लोकन यीशुएरे खलाफ तुहीन केरनेरे लेई मजबूर केरतो थियो। ते मसीही लोकां केरि मुखालफत केरने सेइं मीं एत्री खुशी भोती थी, कि अवं दूर-दूर नगरन मां गेइतां तैन सतातो थियो।

पौलुस अपनो मन बेदलोनेरे बारे मां ज़ोते

12 "एक्‍की बार प्रधान याजकन करां अधिकार एन्हतां एस्से कम्मेरे लेई दमिश्क नगरेरे सफर केरने लग्गोरो थियो। 13 त हे राज़ा अवं हेजू बत्तां थियो, त मीं दुपहरां केरे मौके अम्बरेरां अक लौ एंइती लाही, ज़ै दिहाड़ेरी लौई करां भी जादे थी, ते तै इश्शे च़ेवरे पासन चमकने लगी। 14 असां सब ज़मीनी पुड़ बिछ़ड़ी जे, ते मीं अक आवाज़ शुनी, ज़ै मीं सेइं इब्रानी भाषाई मां एन ज़ोने लगोरी थी, ‘हे शाऊल, हे शाऊल तू मीं किजो सतातस? मीं सेइं लड़ाई केरनि तेरे लेई बेकारे।’

15 "त मीं जुवाब दित्तो, ‘हे प्रभु तू कौन आस,’ त प्रभुए मीं जुवाब दित्तो, ‘अवं यीशु आईं ज़ैस तू सतातस? 16 पन उठ ते अपने पव्वन पुड़ खड़ो भो, किजोकि मीं तीं एल्हेरेलेइ दर्शन दित्तोरूए, कि तीं अवं अपनो सेवक बनेइं, ते ज़ैन किछ तीं लाहेरूए तू तैसेरो गवाह बनस। 17 अवं तीं तेरे लोकन करां ते गैर कौमन करां बच़ातो रेइलो अवं तीं तैन मां भेज़ताईं। 18 ताके तू तैन केरि एछ़्छ़ी खोल्‍लस ते तैन आंधरे मरां लौई मां आनस ते कने शैताने करां छुटेइतां परमेशरेरे पासे आनस, ताके तैना मीं पुड़ विश्वास केरन ते परमेशर तैन केरे पाप माफ़ केरे, ते तैन लोकन मां शामल भोन ज़ैना पवित्र कियोरेन, तैना विरासत हासिल केरन।’

अपने कम्मां केरे बारे मां

19 "ते एल्हेरेलेइ, हे अग्रिप्पा राज़ा मीं एस सुर्गेरे दर्शनेरो इन्कार नईं कमेवरो। 20 ते पेइले मीं दमिश्क नगरेरे लोकन मां ते फिरी यरूशलेम नगरेरे ते सारे यहूदिया इलाकेरे रानेबालो ते गैर कौमन भी प्रचार केरतो कियो। कि पापन करां मन फिराथ, ते परमेशरेरे पासे फिरा ते अपने स्भावे सेइं साबत केरा कि तुसेईं पापन करां मन फिरावरोए। 21 एन्ने गल्‍लां केरे लेई यहूदेईं अवं मन्दरे मां ट्लातो ते मारनेरी कोशिश की।

22 "पन अवं परमेशरेरी किर्पाई सेइं अज़ तगर ज़ींतोईं, ते सेब्भी निक्‍के बड्डन कां अवं गवाही देताईं, कि ज़ैना गल्‍लां अवं ज़ोताईं कि ज़ैना नेबेईं ज़ोवरी थी, ते मूसा नेबे भी ज़ोवरी थी। 23 कि मसीह बड़ो दुख भोगेलो, ते सेब्भन करां पेइलो मुड़दन मरां ज़ींतो भोइतां यहूदी कौमी त गैर कौमां केरे लोकन बच़ालो ज़ै लौअरो ज़ेरोए।"

24 ज़ैखन पौलुस एन ज़ोने लग्गोरो थियो, त फेस्तुस ज़ोरे सेइं ज़ोवं, "तू पागल भोइ जेव। जादे ज्ञाने सेइं तू पागल भोइ जेवरोस।" 25 पौलुसे जुवाब दित्तो, "जनाब फेस्तुस साहब अवं पागल नईं भोवरो, अवं ज़ैन किछ ज़ोने लगोरोइं तैन सच़्च़े ते ज्ञाने सेइं आहे। 26 राज़ो भी ज़ेसेरे सामने अवं निडर भोइतां एन गल्‍लां ज़ानते, ते मीं याकीने कि एन मरां कोई भी गल तैस करां छ़पोरी नईं, किजोकि ऐह चमत्कार कोई एरो नईं भोवरो। 27 हे अग्रिप्पा राज़ा कुन तू नेबी केरो विश्वास केरतस, अवं ज़ानताईं कि तू विश्वास केरतस?" 28 अग्रिप्पा राज़े पौलुसे सेइं ज़ोवं, "कुन थोड़ी ज़ेरि गल्‍लेईं सेइं मीं तू मसीही बनानो चातस?" 29 पौलुसे जुवाब दित्तो, "चाए थोड़ी ज़ेरि या जादे गल्‍लेईं सेइं, पन अवं त परमेशरे कां प्राथना केरताईं कि, न सिर्फ तू बल्के ज़ेत्रे भी अज़ मेरी गल्‍लां शुनी राहोरेन सब मेरे ज़ेरे मसीही भोन, पन इन शंगलां केरे बगैर।"

30 तैखन अग्रिप्पा राज़ो ते गवर्नर ते बिरनीके ते तैस सेइं साथी होरे भी खड़े भोए ते च़ले जे। 31 ते बेइर निस्तां एक्‍की होरि सेइं ज़ोने लगे, "कि ऐह मैन्हु कोई एरू कम त नईं लगोरो केरने, कि एस मौतरी सज़ाह दित्ती गाए, या कैदखाने मां रख्खो गाए। 32 अग्रिप्पा राज़े फेस्तुसे सेइं ज़ोवं, अगर एनी मैन्हे महाराज़े कां फरियाद न भोथी कियोरी त ऐह छुटी सकतो थियो।"