1 हेजू पतरस ते यूहन्ना लोकन सेइं गल्‍लां केरते थिये, त किछ याजक ते मन्दरेरे पेरहेदार ते किछ सदूकी लोक तैड़ी पुज़्ज़े। 2 तैना बड़े सेरकोए, कि पतरस ते यूहन्ना लोकन एरी शिक्षा देते कि परमेशरे मर्रे लोकन ज़ींतो केरेलो, ज़ेन्च़रे तैनी यीशु मुड़दन मरां ज़ींतो कियोरोए। 3 तैनेईं तैना दूइयोवं दिहैड़ी तगर गिरफ्तार रख्खे, किजोकि तै ड्लोझ़रो मौको थियो। 4 पन केही लोकेईं वचन शुन्तां यीशु पुड़ विश्वास कियो, ते तैन केरि तैधात 5000 मड़द भोइ।

5 होरसां एरू भोवं कि तैन केरे लीडर ते बुज़ुर्ग ते शास्त्री यरूशलेम नगरे मां जम्हां भोए। 6 हन्ना महायाजक तैड़ी थियो, ते कैफा ते यूहन्ना ते सिकन्दर ते महायाजकेरे घरानेरे होरे लोक भी तैड़ी थिये। 7 तैनेईं पतरस ते यूहन्ना मझ़ाटे खड़े किये ते तैन पुछ़ू, "तुसेईं केसेरे शेक्ति या केसेरे अधिकारे सेइं एन कम कियोरूए?" 8 तैखन पतरस पवित्र आत्माई सेइं भरपूर भोइतां तैन एन्च़रे सेइं ज़ोने लगो, "हे कौमरे लीडरव ते बुज़ुर्गव। 9 अगर अज़ असन एल्हेरेलेइ पूछ ताछ की गातीए, कि असां एक्‍की रोड़े कम्मेरो जुवाब देम, ज़ैन असेईं एक्‍की टोन्टे मैन्हेरे लेई कमाव ते तैस शिफ़ा दित्ती। 10 ते तुसन ते सारे इस्राएलिन ऐह पतो लग्गे, कि ऐह मैन्हु यीशु मसीह नैसरेरे नव्वेंरी शक्ति सेइं बेझ़ोइतां तुश्शे सामने खड़ोए, ज़ै यीशु तुसेईं क्रूसे पुड़ च़ाढ़ोरो थियो, पन परमेशरे तै मुड़दन मरां ज़ींतो कियोरोए। 11 ऐह तैए घोड़े, ज़ै तुसेईं मिस्त्रेईं रद कियोरो थियो, पन तैए घोड़ कूनेरो खास घोड़ भोइ जेव। 12 ते पापां केरि माफ़ी केन्ची होरेरे ज़िरिये सेइं नईं, किजोकि अम्बरेरां बुन मैन्हन मां कोई होरू दूइयोवं नवं नईं दित्तेरू, ज़ेसेरे ज़िरिये सेइं मुक्ति मैल्हे, सिर्फ यीशुएरे नंव्वे सेइं मुक्ति आहे।"

13 ज़ैखन तैनेईं पतरस ते यूहन्नारी दिलेरी हेरी, त तैखन तैन पतो लगो, कि एना त अनपड़ ते आम मैन्हु आन ते तैना बड़े हैरान भोए, तैखन तैनेईं बुझ़ू कि एना लोक यीशु सेइं साथी राहोरेन। 14 तैनेईं पतरस ते यूहन्नारे खलाफ किछ न ज़ोई बटु, एल्हेरेलेइ कि ज़ै मैन्हु बेज़्झ़ोरो थियो, तै मैन्हु तैन सेइं साथी खड़खड़ो थियो। 15 तैखन तैनेईं पतरस ते यूहन्ना महासभा करां बेइर नेनेरे लेई ज़ोवं, ते एप्पू मांमेइं मुशोरो केरने लगे, 16 "असां एन लोकन सेइं कुन केरम? यरूशलेम नगरेरे सब लोक ज़ानतन कि एन लोकेईं अक बड़ो चमत्कार कियोरोए, ज़ेसेरो अस इन्कार न केरि बटम। 17 पन एल्हेरेलेइ अस एन न चाम कि ऐह गल लोकन मां जादे मुशूर भोए, रोड़ू त एन्ने कि अस एन धमकेइतां ज़ोम कि अज़ेरे बाद एन नवं घिन्तां केन्ची सेइं गल न केरन।" 18 तैखन तैनेईं पतरस ते यूहन्ना अन्तर कुजेइतां हदायत दित्ती, "यीशुएरू नवं घिन्तां केन्ची सेइं गल न केरथ, ते न शिक्षा देइयथ।" 19 पन पतरस ते यूहन्ना तैन जुवाब दित्तो, "तुस एप्पू ऐह फैसलो केरा, कि कुन ऐह गल परमेशरेरी नज़री मां ठीके, फिरी अस तुश्शी गल मन्नम कि परमेशरेरी? 20 किजोकि एन नईं कि ज़ैन किछ असेईं शुनू ते लाहू, ते तैसेरे बारे मां ज़ोतम।" 21 तैखन तैनेईं पतरस ते यूहन्ना धमकेइतां हथरां छ़डे, द्रासले मां तैना फैसलो न केरि सके, कि एन सज़ाह त देम पन केन्च़रे देम, किजोकि तमाम लोक ऐह चमत्कार हेरतां परमेशरेरी महिमा केरते थिये। 22 किजोकि ज़ैस मैन्हु पुड़ शिफ़ा देनेरो चमत्कार हिरावरो थियो, तै 40 सालन करां जादे उमरारो थियो।

23 पतरस ते यूहन्ना तैट्ठां छुटनेरे बाद अपने लोकन कां च़ले जे, ते ज़ैन किछ प्रधान याजक ते बुज़ुर्गेईं तैन ज़ोवरू थियूं, तैन सेइं शुनावं। 24 ज़ैखन तैनेईं एना गल्‍लां शुनी त अक भोइतां बड़े ज़ोरे सेइं परमेशरे कां प्राथना केरने लगे, तीं धरती त कने अम्बर ते समुन्दरे ते ज़ैन किछ एसमां आहे बनेवरूए। 25 तीं पवित्र आत्मारे ज़िरिये सेइं अपने सेवक इश्शे पूर्वज दाऊदेरी ज़िरिये ज़ोवरू थियूं,

"‘कि कौमेईं किजो हैल्‍लो मच़ाव?

ते मुल्खां-मुल्खां केरे लोक किजो बेफैइदे खियाल केरतन?

26 ज़मीनरे राज़े, प्रभु ते तैसेरे मसीहेरे खलाफ खड़े भोए ते हाकिम साथी खड़े भोए।’

27 "एन सच़्च़े कि हेरोदेस पुन्तियुस ते पिलातुस भी गैर यहूदी ते सब इस्राएली लोकन सेइं साथी तेरे पवित्र सेवक यीशुएरे खलाफ नगर-नगरे मां खड़े भोए, ज़ै तीं मसीह ठहरावरो थियो। 28 तैना एल्हेरेलेइ अकोट्ठे भोवरे थिये कि ज़ैन किछ तू अपनि कुदरतरे इरादेरे मुताबिक पेइले तैनी ठहरावरू थियूं, तैस पुड़ अमल केरम। 29 हुनी हे प्रभु, तैन केरि धेमकी शुन, ते अपने दासन इन वरदान दे, कि तेरू बच्‍चन बेड़ि दिलेरी सेइं लोकन शुनेई बटम। 30 अपनो हथ अग्रोवं रख, ते अपने पवित्र सेवक यीशुएरे नंव्वे सेइं शिफ़ा दे, ते चमत्कार ते निशान हिरा।"

31 ते ज़ैखन तैनेईं प्राथना की, त ज़ैस ठैरी तैना अकोट्ठे जम्हां थिये, त तै ठार हिल्‍ली, ते तैना सब पवित्र आत्माई सेइं भेरोए, ते परमेशरेरू बच्‍चन बेड़ि दिलेरी सेइं शुनाने लगे।

32 विश्वास केरनेबालां केरि मण्डली अक मन ते अक जान थी, कोई भी एरो न थियो ज़ै अपनो माल अपनो समझ़तो भोए, बल्के होरन भी सैरी चीज़न मां शामल रखते थिये। 33 ते प्रेरित बेड़ि शेक्ति सेइं प्रभु यीशुएरे मुड़दन मरां ज़ींते भोनेरी गवाही देते थिये, ते तैन पुड़ परमेशरेरो बड़ो अनुग्रह थियो। 34 तैन मरां कोई भी गरीब न थियो, किजोकि ज़मीनां केरे त घरां केरे मालिक तैन बेच़तां तैन केरि कीमत प्रेरितन कां आनते थिये। 35 ते तैना तै रकम प्रेरितन देते थिये, ते हर केन्ची तैसेरी ज़रूरतरे मुताबिक बेंटतां देते थिये। 36 यूसुफ नंव्वेरो अक लेवी थियो, ज़ै साइप्रसेरो रानेबालो थियो, ते प्रेरितेईं तैसेरू नवं बरनबास रखेरू थियूं, (ज़ेसेरो मतलबे शैन्तरू मट्ठू)। 37 तैनी अपनु ऊडार बेच़ू, ते कीमत एन्हतां प्रेरितन दित्ती।