1 तैखन महायाजके स्तिफनुसे सवाल पुछ़ो, "कुन एना इलज़ाम सच़्च़े आन?" 2 तैनी ज़ोवं, "हे ढ्लाव ते मेरे बुज़ुर्गव, मेरी गल शुना, इश्शो पूर्वज अब्राहमे हारान नगरे मां बस्सने करां पेइलो मेसोपोटामिया प्रदेशे मां थियो, ते महिमा बाले परमेशरे तैस दर्शन दित्तू, 3 ते परमेशरे तैस सेइं ज़ोवं, ‘अपनो मुल्ख त अपने रिश्तेदारन शैरतां तैस मुल्खे मां गा, ज़ै अवं तीं हरेइलो।’ 4 तांए तै कसदी केरे मुल्खे शैरतां हाराने मां बस्सोरो थियो, तैसेरे बाजेरे मरनेरां पत्ती परमेशरे तै तैस मुल्खे मां आनो ज़ैस मां अज़ तुस बसोरेथ। 5 पन परमेशरे तैस इड़ी किछ भी जेइदात न दित्ती, बल्के पव रखने जो भी ज़मीन न दित्ती, पन वाधो ज़रूर कियो कि ई ज़मीन अवं तीं ते तेरी औलादी कब्ज़े मां देलो हालांकी तेइस अब्राहमे कोई औलाद न थी। 6 परमेशरे इन भी ज़ोवं, तेरी औलाद एक्‍की बखले मुल्खे मां परदेशी भोल्ही, तैना तैन गुलाम बनाले, ते 400 सालन तगर तैन दुख देले। 7 फिरी परमेशरे ज़ोवं, ज़ै कौम तैन गुलाम बनाली तैस अवं सज़ाह देइलो, ते तैसेरां बाद तैना तैस मुल्खे मरां निस्सतां इड़ी एज्जेले ते मेरी आराधना केरेले। 8 ते परमेशरे अब्राहमे सेइं करार कियो ते तैस सेइं ज़ोवं, कि निशानेरे रूपे मां सेब्भी घरानेरे नर मैन्हु केरो खतनो केर। ज़ैखन इसहाक ज़र्मो ते अठ दिहैड़ी केरो भोव, त अब्राहमे तैसेरो खतनो कियो, ते एन्च़रे इसहाके अपने मट्ठे याकूबेरो खतनो कियो, ते याकूबे अपने 12 मट्ठां केरो खतनो कियो। 9 याकूबेरे मट्ठेईं जलनी सेइं अपनो ढ्ला यूसुफ मिस्र मुल्खे जो गानेबालन जो बेच़ो, ते तैनेईं यूसुफ मिस्रे मां नेइतां गुलाम बनाव? पन परमेशर यूसुफे सेइं साथी थियो। 10 परमेशरे तै सैरी मुसीबतन करां छुटेइतां, ते तैस अनुग्रह ते बड़ी अक्ल दित्ती, ते मिस्रेरे राज़े फ़िरौनेरे सामने बड़ी काबलीत दित्ती, ते फ़िरौन राज़े, यूसुफ मिस्र मुल्खेरो ते अपने मेहलेरो गवर्नर बनावं। 11 ज़ैस वक्ते यूसुफ थियो त मिस्र मुल्ख ते कनानारे सारे मुल्खे मां काल पेव, ते बड़ी मुसीबत आई, ते इश्शे दादे-पड़दादन खाने जो अन न मैल्हू। 12 ज़ैखन याकूबे शुनू कि मिस्रे मां अन्न आहे, त तैनी इश्शे पूर्वज मिस्र मुल्खे मां पेइली बार भेज़े, तैना यूसुफे सेइं मिले ते अन आनू पन तैनेईं तै न पिशानो। 13 ज़ैखन तैना दूइयोवं फेरे मिस्र मुल्खे मां अन्न आन्ने जे, त यूसुफे अपनो आप तैन पिशानाव, ते फ़िरौने भी यूसुफेरी कौमरो पतो लगो कि ऐह इब्रानी आहे। 14 तैसेरां बाद यूसुफे अपनो बाजी याकूब ते तैसेरे 75 मैन्हु केरू टब्बर मिस्र मुल्खां मांजो एजनेरो बिस्तार भेज़ो। 15 किछ वक्तेरां बाद याकूब मिस्र मुल्खे मां जेव, ते तै त इश्शे दादे-पड़दादे तैड़ी मेरि जे। 16 तैन केरि लाशां तैट्ठां इश्शे मुल्ख कनाने मां वापस एन्ही, ते तैनेईं याकूब, तैस ठैरी दफन कियो, ज़ै ठार अब्राहमे चाँदी देइतां घिन्नोरी थी, ते याकूबेरां मट्ठां शेकेम नगरेरे तैस ठैरी दफन कियां, ज़ै याकूबे हामोरेरी औलादी करां घिन्नोरी थी।

17 "परमेशरे अब्राहमे सेइं अक वाधो कियोरो थियो, तैस वाधेरो पूरो भोनेरो मौको अव त मिस्रे मां इश्शे लोकां केरि गिनती भी बड़ी बेद्धी जेई। 18 तैस मौके अक होरो राज़ो मिस्र मुल्खे मां राज़ केरने लगो, ज़ै यूसुफे न थियो ज़ानतो। 19 तैनी इश्शी कौमी सेइं एरी च़लाकी कि ते इश्शे दादन-पड़दादन सेइं एरी बदसलूकी की, तैना एत्रे मजबूर किये कि तैना अपने ज़र्मते बच्‍चे बेइरोवं शारन ताके तैना मेरि गान। 20 तैन्ने दिहैड़न मां मूसा पैदा भोव, तै परमेशरेरी नज़री मां बड़ो रोड़ो थियो, ते तै ट्लाई महीन्न तगर अपने बाजेरे घरे मां छ़ेपतां पलतो राव। 21 पन ज़ैखन जादे च़िरे तगर छ़ुपेई न बटे, तै दरियाए मां शारो त फ़िरौनेरे कुइयां तै नेव ते अपने मट्ठेरो ज़ेरो पालो। 22 मूसा नबी मिस्री केरि सैरी शिक्षारो ते तैन केरि सैरी गल्‍लां केरि वाकफीत भोइजेइ, ते गलबाती ते कम्मे मां मज़बूत थियो।"

23 "ज़ैखन मूसा नबी 40 सालां केरो भोव, त तैसेरे मने मां ऐह गल आई, कि अवं अपने इस्राएली ढ्लां केरो हाल पतो केरि। 24 मूसा एक्‍की इस्राएली मैन्हु पुड़ ज़ुलम भोतो लाव त तैनी तै बच़ाव, ते तै ज़ालम मिस्री मैरतां ज़ैस पुड़ ज़ुलम भोवरो थियो बदलो घिन्नो। 25 तैनी सोचू, कि तैसेरे ढ्लां समझ़ेले, कि परमेशरे तैसेरे ज़िरिये सेइं तैन मिस्री केरि गुलैमी करां तैन मुक्ति देलो, पन तैनेईं न समझ़ू। 26 मूसा होरसां दूई इस्राएली एप्पू मांमेइं लड़ते लाहे, ते तैन समझ़ानेरी कोशिश की, ते मूसा तैन ज़ोवं, हे जुवानव तुस त एप्पू मांमेइं ढ्ला भोतथ, ते तुस किजो एक्‍की होरि पुड़ ज़ुलम केरतथ? 27 पन ज़ै मैन्हु अपने पड़ोसी पुड़ ज़ुलम केरने लेवरो थियो, त तैनी मैन्हे मूसा जो धमकेइतां ज़ोवं, तू केनि असन पुड़ हुकूमत केरनेबालो या हाकिम बनेवरोस? 28 ज़ेन्च़रे तीं तै मिस्रेरो रानेबालो हीज मारोरो थियो, तेन्च़रे तू अज़ मीं मारने चातस? 29 ऐह गल शुनते मूसा तैट्ठां नश्शो, ते मिद्यान मुल्खे मां परदेशी भोइतां राने लगो, ते तैड़ी तैसेरां दूई मट्ठां पैदा भोआं। 30 40 साल मिद्यान मुल्खे मां रानेरे बाद तैस सीनै पहाड़ेरे सुनसान ठारी मां एक्‍की झ़ल्‍लेरी मां अग्गी स्वर्गदूत लाव, ते परमेशरे स्वर्गदूतेरे ज़िरिये तैस सेइं गल की। 31 मूसा झ़ल्‍लेरी अग्गी लेइतां कि झ़ल्‍ल फुकोने नईं लेवरू त तै हैरान रेइ जेव, ते ज़ैखन तै हेरनेरे लेई नेड़े जेव त तैनी प्रभुएरी आवाज़ शुनी। 32 ‘अवं तेरे दादे-पड़दादां केरो यानी अब्राहम, इसहाक ते याकूबेरो परमेशर आईं।’ तैखन मूसा डेरतां कम्बने लगो, इड़ी तगर कि तैस हेरनेरी हिम्मत न भोइ। 33 तैखन प्रभुए तैस जो ज़ोवं, ‘अपने पव्वां केरि जुट्टी खोल्‍ल, किजोकि ज़ैस ठैरी तू खड़ोस तै पवित्र ठारे। 34 मीं मिस्र मुल्खे मां अपने लोकां केरि बुरी हालत हेरी, मीं तैन केरू करलानू ते लेरां शुनोरिन, एल्हेरेलेइ अवं तैन छुटानेरे लेई उन्ढो एवरोईं, हुनी एई अवं तीं फिरी वापस मिस्र मुल्खे जो भेज़ताईं।’

35 "एहे तै मूसा आहे ज़ेसेरो इस्राएली लोकेईं पेइलो इन्कार कियोरो थियो, कि तू केनि असन पुड़ हुकूमत केरनेबालो या हाकिम बनेवरोस, ते एहे तै मूसा परमेशरे अपने स्वर्गदूतेरे ज़िरिये सेइं ज़ै तैनी बलते झ़ैल्‍ले मां लाहोरो थियो, ते छुटानेबालो बनेइतां भेज़ो। 36 एनी मैन्हे मिस्र मुल्खे ते लाल समुन्दरे मां 40 सालन तगर सुनसान ठैरी मां चमत्कार ते निशान हिराए। 37 एनी मूसा इस्राएली लोकन सेइं ज़ोवरू थियूं, परमेशर तुश्शे ढ्लान मरां तुश्शे लेई अक मेरो ज़ेरो नबी खड़ो केरेलो। 38 एहे मूसा, इश्शे दादा पड़दादां केरो नबी राव, ज़ैखन तैना सुनसान ठारी मां अकोट्ठे भोवरे थिये, परमेशरे एक्‍की स्वर्गदूतेरे ज़िरिये सीनै पहाड़े पुड़ मूसे कानून दित्तो ते तैनी इश्शे दादे पड़दादन तै कानून दित्तो, मूसे ज़िन्दगी देनेबाले वचन मैल्हे, तैनी तैना असन तगर पुज़ाए। 39 पन इश्शे दादे-पड़दादेईं तैसेरो हुक्म न मन्नो चाव, बल्के इन्कार कियो, ते तैना मिस्र मुल्खे जो वापस गानू चाते थिये। 40 तैनेईं मूसेरे ढ्लाए हारूने सेइं ज़ोवं, तू इश्शे लेई अक देबतो बना, ज़ै असन अग्री-अग्री मिस्र मुल्खे जो च़ले, किजोकि अस न ज़ानम कि मूसा ज़ैनी असां मिस्र मुल्खे मरां केढतां आनोरेम, तैस कुन भोवं? 41 तैस वक्ते तैनेईं बछ़ड़ेरी अक मूरत बनाई, ते तैस कां बलिदान च़ाढ़ू, ते अपने हथ्थां केरे बनेवरी मूरती कां बड़ी खुशी मनाने लगे। 42 एल्हेरेलेइ परमेशरे तैन करां अपनु तुत्तर फिराव, ते तैना दिहाड़ेरी ते चैंदनरे ते अम्बरेरे तारां केरि ईश्वरेरे रूपे मां आराधना केरनेरे लेई शारे, ज़ेन्च़रे नेबी केरि किताबी मां लिखेरूए,

‘हे इस्राएली लोकव,

कुन तुस 40 सालन तगर सुनसान ठैरी मां जानबरां केरू बलिदान ते होरू बलिदान मेरे लेई केरते राए?

43 बल्के तुसेईं एप्पू सेइं साथी मोलेक देबतेरी मूरती ते रिफान देबतेरे तारे छ़ुइतां च़लते थिये,

एना तैना मूरतिन ज़ैन कां तुस मथ्थो टेकते थिये,

एल्हेरेलेइ अवं तुसन बाबेले करां भी दूर बसेइलो।’

44 "सुनसान ठारी मां इश्शे दादन पड़दादन कां गवाहेरो तेम्बु थियो, परमेशरे तै ठहराव ते तैनी मूसा सेइं ज़ोवं, ‘ज़ेन्च़रे तीं लाहेरूए तैसेरे मुताबिक बना।’ 45 बड़े सालना बाद तैए तेम्बु इश्शे दादे-पड़दादेईं यहोशू सेइं साथी इड़ी आनो, ज़ैस वक्ते तैनेईं गैर कौमन पुड़ अधिकार हासिल कियो, ज़ैना परमेशरे इश्शे दादे-पड़दादां केरे सामने कढे, ते तै तेम्बु दाऊद राज़ेरे वक्ते तगर राव। 46 दाऊदे पुड़ परमेशरे अनुग्रह कियो, ते तैनी मिन्नत की, कि अवं याकूबेरे परमेशरेरे लेई अक घर बनेइं। 47 पन तैसेरे मट्ठे सुलैमाने तैसेरेलेइ मन्दर बनाव। 48 पन परमप्रधान परमेशर हथ्थां केरे बनेवरे मन्दरन मां न राए, ज़ेन्च़रे यशायाह नेबेरे किताबी मां लिखेरूए,

49 ‘प्रभु ज़ोते, सुर्ग मेरो तखते,

ते ज़मीन मेरे पव्वां केरि चौकीए,

तुस फिरी मेरे लेई केरू ज़ेरू मन्दर बनाले?

ते मेरे आराम केरनेरी ठार केरही ज़ेरि भोल्ही?

50 कुन मीं एप्पू सैरी चीज़ां नईं बनेवरी?’

51 "हे ढीठ लोकव, तुस तैसेरी शुन्नी ते मन्नी न चाथ, तुस पवित्र आत्मारी हमेशा खलाफत केरतथ। ज़ेन्च़रे तुश्शे दादे-पड़दादे केरते थिये, तुस भी तेन्च़रे केरतथ। 52 नेबन मरां को तुश्शे दादे-पड़दादेईं नईं स्तेवरो? ज़ैनेईं तैस एजने बाले मसीहेरे बारे मां ज़ोवं ज़ै धर्मी आहे, ते ज़ैखन मसीह अव ते तुसेईं धोखे सेइं तै ट्लुवेइतां मारो। 53 तुसन स्वर्गदूतन करां मूसेरे कानून त मैल्हो, पन तैस पुड़ अमल न कियूं।"

54 ज़ैखन तैनेईं एना गल्‍लां शुनी त यहूदी लीडर फुकोई जे, ते स्तिफनुसे जो दंत लगे च़ापने। 55 पन तैनी पवित्र आत्माई सेइं भेरोइतां अम्बरेरे पासे तक्‍कू, ते तैनी परमेशरेरी महिमा ते यीशु परमेशरेरे देइने पासे खड़खड़ो लाव। 56 तैनी ज़ोवं, "हेरा, अवं सुर्ग खुल्‍लू लहताईं, ते मैन्हेरे मट्ठे परमेशरेरे देइने पासे खड़खड़ो लहताईं।" 57 एन शुन्तां तैना ज़ोरे सेइं चिन्डां मारने लगे, ते अक भोइतां सेब्भेईं तैस पुड़ हमलो कियो। 58 ते तै दीलतां यरूशलेम नगरे करां बेइर नियो ते तैस जो घोड़ेईं बाने लगे ते तै मारो, तैखन तैस पुड़ दोष लाने बालेईं अपने चोगे खोलतां शाऊल नव्वेंरे एक्‍की मैन्हु कां रख्खे। 59 ते ज़ैखन तैना स्तिफनुसे जो घोड़ेईं बाने लग्गोरो थिये, ते तै स्तिफनुस इन ज़ोइतां प्राथना केरने लगो, "हे प्रभु यीशु, मेरी आत्मा कबूल केर। 60 फिरी तैनी ज़ैंधू केरे भारे बिशतां ज़ोरे सेइं ज़ोवं, ‘हे प्रभु एन इस पापेरो दोषी न बनेइयां।’" एन ज़ोनेरां पत्ती तैनी प्राण दित्ते।