1 एन सब किछ मीं मन लेइतां सोचू कि एन गल्‍लां केरो भेद घिन्नी, कि कौस तरीके सेइं धर्मी ते अक्लमन्द लोकां केरां कम्मां परमेशरेरे हथ्थे मां भोतन मैन्हेरे सामने सेभी किसमेरी गल्‍लां भोइचन, पन तै न ज़ाने कि तै प्यारे कि बैरे। 2 सभे गल्‍लां सेभी केरे लेई अक्‍कां ज़ेरि भोइचन, धर्मी भोए या दुष्टी भोए, चाए शुद्ध भोए या अशुद्ध, बलि देनेबालो ते बलि न देनेबालेरी हालत अक्‍कां ज़ेरि भोचे। ज़ेरि भले मैन्हेरी हालत भोचे तेरही पापी मैन्हेरी भी हालत भोचे, ते तेरही हालत तैसेरी भी भोतीए ज़ै कसम केरने करां डरते। 3 ज़ैन किछ दुनियाई मां भोते, तैस मां अक्‍के बुराई आहे, कि सेभी लोकां केरी अक्‍के हालत भोचे; कि मैन्हु केरे मने मां बुराई भरोरी रहचे, ते ज़ांतगर तै ज़ींतो रहते तैसेरे मने मां पागलपन रहते, ते तैसेरां बाद तै मुओरे लोकन मां मिली गाते। 4 पन ज़ैना ज़ींतेन तैन उमीदे, किजोकि ज़ींतू कुतर मुओरे शेरे करां बेद्धतां भोते। 5 किजोकि ज़ींते एत्रू त ज़ानतन कि तैना मेरि गाले, पन मुओरे किछ भी न ज़ानन, ते न तैन किछ होरो बदलो मैल्ही सकते, किजोकि तैन केरी याद मुक्‍की जेवरीए। 6 तैन केरो प्यार ते बैर ते तैन केरो क्रोध नाश भोइ जेवरोए, ते हुन्ना ज़ैन किछ दुनियाई मां भोते तैस मां हमेशारे लेई तैन केरो कोई हिस्सो न भोल्हो।

7 एपनी बत्तां च़लो गा, अपनि रोट्टी आनन्दे सेइं खा, ते अपने मने मां सुख मेनतां दाछ़रो रस पी; किजोकि परमेशर तेरे कम्मन पुड़ खुशी भोइ जेवरोए।

8 तेरां लिगड़ां हमेशा साफ सुथरां रान, ते तेरे दोग्गे पुड़ तेलेरी कमी न भोल्ही।

9 अपने बेकार ज़िन्दगरे सारे दिहाड़े ज़ैना दुनियाई मां तेरे लेई ठहरावरेन, एपनी ट्लेरी कौन्शी सेइं साथी बीता, किजोकि तेरी ज़िन्दगी ते तेरी मेहनती पुड़ ज़ै तू दुनियाई मां केरतस एहे तेरो हिस्सोए। 10 ज़ैन कम तीं मैल्हे, तैन एपनी शेक्ति सेइं केरां, किजोकि अधलोके मां ज़ैड़ी तू गाने बालोस, तैड़ी न कम्मे, न कोई योजना, ते न तैड़ी ज्ञान ते न अक्ले।

11 फिरी मीं दुनियाई मां एन भी लावं, कि दौड़ी मां तेज़ दौड़ने बाले ते न जंगी मां बहादर ज़ीते; ते न अक्लमन्द लोकन रोट्टी मैल्हे, ते न समझ़ी बाले धन मैल्हे, ते न इज़्ज़तदारन पुड़ अनुग्रह भोए, तैना सब वक्तेरे ते संयोगेरे बस्से मां आन। 12 किजोकि मैन्हु अपने मरनेरो वक्त न ज़ाने। ज़ेन्च़रे मेछ़ली दुखेरे जाले मां ते च़ुड़ोली फंदे मां फेसतिन, तेन्च़रे मैन्हु दुखेरे मौके ज़ै तैस पुड़ एइते फेसी गातन।

13 मीं दुनियाई मां एस किसमेरी अक्ल भी लाहोरीए, ज़ै अवं खरी समझ़ताईं। 14 अक निकड़ू ज़ेरू नगर थियूं, ज़ैस मां थोड़े ज़ेरे लोक रहते थिये; ते केन्चे बड्डे राज़े तैस पुड़ हमलो केरतां तैन घेरू, ते तैसेरे खलाफ मोरच़े खड़े किये। 15 पन तैस मां अक गरीब मड़द मैल्हो, ते तैने तैन नगर अपने अक्ली सेइं बच़ाव। त फिर भी तैस गरीब मड़देरी याद न रख्खी। 16 तैखन मीं ज़ोवं, "अगर गरीब मैन्हेरी अक्ल घट समझ़ी गातीए, ते तैसेरी गल कोई न शुने फिर भी अक्ल ज़ोरे करां रोड़ी भोचे।"

17 अक्लमन्दा केरी गल्‍लां ज़ैना बल्हे-बल्हे ज़ोतन, तैना बेवकूफां केरे दरमियान हुकूमत केरनेबालेरे ज़ोरे-ज़ोरे सेइं ज़ोने करां जादे शुने गातन। 18 लड़ैइयरे हथियारन करां अक्ल रोड़ीए, पन अक पापी बेड़ि भलियाई नाश केरते।