Esdras 3

परमेशरेरी वेदी बनाई गानी

1 बाबेलेरे गुलैमी मरां वापस एजनेरे बाद ज़ैखन सत्तोवं महीनो अव, ते इस्राएली लोक अपने-अपने नगरन मां बेस्सी जे, त लोक यरूशलेम नगरे मां अक मन भोइतां अकोट्ठे भोए। 2 तैखन योसादाकेरे मट्ठे येशुअ ते बाकी याजकन समेत ते शालतीएलेरे मट्ठे जरुब्बाबेले अपने साथी लोकन समेत कमर केस्तां इस्राएलेरे परमेशरेरी वेदी बनाई कि तैस पुड़ होमबलि च़ाढ़न, ज़ेन्च़रे कि परमेशरेरे भक्त मूसेरे कानूने मां लिखोरू थियूं।✝3:2 मत. 1:12;लूक. 3:27. 3 तैखन गुलैमी मरां वापस एवरे लोकेईं वेदी तैसेरी जगाई पुड़ खड़ी की, किजोकि तैन केरे पुज़ने करां पेइले तैस ठारारे गैर कौमरे रानेबाले लोकां केरो डर राव, ते तैना तैस पुड़ यहोवारे लेई रोज़ झ़ेझ़री ते ड्लवझ़ी होमबलि च़ाढ़ने लगे। 4 तैनेईं झोफड़ी केरू तिहार भी मनावं, ज़ेन्च़रे मूसेरे कानूने मां लिखेरूए, ते रोज़ेरी होमबलि एक्‍की-एक्‍की दिहैड़ारे गिनती ते नियमेरे मुताबिक च़ाढ़ी। 5 तैसेरे बाद लगातार होमबलि ते नंव्वे-नंव्वे चाँद ते यहोवारे पवित्र कियोरे सारे तिहारां केरि बलि ते अपने-अपने इच्छाई सेइं यहोवारे लेई सब अपने मेर्ज़ी सेइं बलि हर एक्‍केरे लेई बलि च़ाढ़ी।✝3:5 गिन. 28:11-15. 6 सालेरे सत्तोवं महीनेरे पेइले दिहैड़ी करां यहोवा जो होमबलि च़ाढ़ने लगे। पन यहोवारे भवनेरी मुनीयाद तांतगर कढोरी न थी। 7 तैखन तैन लोकेईं मिस्त्री ते कारीगिरन रुपेइये दित्ते, ते सीदोनी ते सोरी लोकन खाने-पीनेरी चीज़ां ते तेल दित्तो, कि तैना फारसेरे राज़े कुस्रूएरे मट्ठेरे मुताबिक गैइड़ेरी लकड़ी लबानोने करां याफा नगरेरे नेड़े समुन्दरे मां पुज़ाए 8 तैन केरे परमेशरेरे भवने मां, ज़ै यरूशलेम नगरे मांए, बाबेले मरां एजनेरे दूइयोवं सालेरे दूइयोवं महीने मां, शालतीएलेरे मट्ठे जरुब्बाबेले ते योसादाकेरे मट्ठे येशुअ ऐह ते तैन केरे बाकी साथी ज़ैना याजक ते लेवी थी, ते ज़ेत्रे गुलैमी मरां*3:8 ज़ेत्रे गुलैमी मरां दूइयोवं सालेरे दूइयोवं महीने बाद लोक बाबेलेरे गुलैमी मरां वापस आए। यरूशलेम नगरे मां एवरे थिये तैनेईं भी कम शुरू कियूं, ते 20 सालन करां जादे उमरारे लेवी यहोवारे भवनेरे कम्मेरी निगरानी केरन। 9 त येशुअ ते तैसेरां मट्ठां ते भियाल, ते कदमीएल ते तैसेरां मट्ठां, ज़ैना यहूदारे खानदाने मरां थिये, ते हेनादादेरू खानदान ते तैन केरां मट्ठां परमेशरेरे भवने मां कारीगिरां केरे कम्मे पुड़ निगरान खड़े भोए।

10 ज़ैखन मिस्त्रेईं यहोवारे भवनेरी मुनीयाद रख्खी, तैखन याजक अपने चोगे लेइतां ते नरशिंगे नेइतां, ते झ़ेल्‍ली ट्लेइतां आसापेरे खानदानेरे लेवी लोक एल्हेरेलेइ ठहराए कि इस्राएलेरे राज़े दाऊदेरी किछ साल पेइले दित्तोरी हदायतां केरे मुताबिक यहोवारी तारीफ़ केरन। 11 ते तैना इन ज़ोइतां यहोवारी तारीफ़ ते शुक्र केरने लगे, "यहोवा भलोए, ते तैसेरी दया इस्राएले पुड़ हमेशा बनोरीए।" ते ज़ैखन तैना यहोवारी तारीफ़ केरने लगे तैखन सेभी लोकेईं एन बुझ़तां कि यहोवारे भवनेरी मुनीयाद हुन्ना रखी जेवरीए, तैखन तैना बेड़ी उच्‍ची आवाज़ी सेइं जयजयकार केरने लगे।*3:11 जयजयकार केरने लगे। गीतां ज़ोनेबाले दूई टोलन मां बन्टे जे, ज़ैन पेइली टोली ज़ोती थी तैन दूइयोवं टोली पत्पती ज़ोती थी। 12 पन बड़े याजक ते लेवी ते पूर्वजां केरे घराना केरे खास मैन्हु, मतलब बुढे लोक ज़ैनेईं यहोवारो पेइलो भवन लाहोरो थियो, ज़ैखन एस भवनेरी मुनीयाद तैन केरि एछ़्छ़ी केरे सामने रखी जेई तैखन तैना ज़ोरे-ज़ोरे सेइं लेरां देने लगे। पन बाकी लोक खुशी भोइतां उच्‍ची आवाज़ी सेइं जयजयकार केरने लगे। 13 एल्हेरेलेइ लोक, खुशी सेइं जयजयकार केरनेरी आवाज़, ते लोकां केरे लेरां देनेरी आवाज़ी करां अलग पिशैनी न सके, किजोकि लोक उच्‍ची आवाज़ी सेइं जयजयकार केरि राहोरे थिये, ते तै आवाज़ दूर तगर शुनाने लगोरी थी।