Ester 7

हामाने मोर्दकैरी ठारी पुड़ फांसी

1 एल्हेरेलेइ क्षयर्ष राज़ो ते हामान एस्तेर रैनरे धामी मां जे। 2 तैखन राज़े शराब पीते-पीते एस्तेर रैनी फिरी पुछ़ू, "हे एस्तेर रानी! तेरी कुन बिनतीए? तै पूरी की गाए। ते तू कुन मगतिस? मग, ते अधे राज़े तगर अवं तीं देइलो।" 3 एस्तेर रैना जुवाब दित्तो, "हे राज़ा! अगर तू मीं पुड़ खुश आस, त राज़े एन मन्ज़ूर भोए, ते मेरे बिनती सेइं मीं, ते मेरे मगने सेइं मेरे लोकां केरे प्राण बच़ाए गान। 4 किजोकि अवं ते मेरी कौमरे लोक बेच़े जेवरेम, ते असां सब मरने ते नाश भोने बालेम। अगर असां गुलाम बनानेरे लेई बेच़ोरे भोथे, त अवं च़ुप राथी। चाए तैस हालती मां भी दुश्मन राज़ेरो नुकसान न भेरि सकेथो।" 5 तैखन क्षयर्ष राज़े एस्तेर रैनी पुछ़ू, "तै कोड़ि ए? ते तै कौने ज़ैनी एन केरनेरो इरादो कियोरोए?" 6 एस्तेर रैना जुवाब दित्तो, "तै मुखालफ ते दुश्मन एहे दुष्ट हामाने।" तैखन हामान राज़े ते रैनरे सामने डेरि जेव। 7 राज़े बड़ो क्रोध अव, राज़ो शराब पीने लगोरो थियो, ते उठतां मेहलेरे बागी मां च़लो जेव। ते हामाने बुझ़ू कि राज़े मीं नुकसान पुज़ानेरे लेई थापेरू भोल्हु, हामान अपने प्राण बच़ानेरे लेई एस्तेर रैनरे सामने खड़ो भोइतां बिनती केरने लगो। 8 ज़ैखन राज़ो मेहलेरी बागी मां वापस शराब पीनेरे जगाई पुड़ अव, त कुन हेरते, कि हामान तैस चौवकी पुड़ ज़ैड़ी एस्तेर रानी बिशोरी थी तैड़ी झुकोरोए, ते राज़े ज़ोवं, "ऐह मेरे घरे मां एइतां ते मेरे सामने रैनरी सेइं ज़बरदस्ती केरनी चाते?" राज़ो एन ज़ोई राहोरो थियो, कि राज़ेरे सेवकेईं हामानेरू तुत्तर ढक्‍कू। 9 तैखन हर्बोना नंव्वेरे एक्‍की खोजे ज़ोवं, ज़ै तैसेरे सेवकन मरां अक थियो, "हामानेरे कां 50 हथ उच्‍चो फांसी देनेरो खम्भो खड़ोए, ज़ै तैनी मोर्दकैरे लेई बनावरोए, ज़ैनी राज़ेरी जान बच़ावरी थी।" राज़े ज़ोवं, "एस तैस्से पुड़ टेंगी देथ।" 10 तैखन हामान तैस्से खम्भे पुड़ ज़ै तैनी मोर्दकैरे लेई तियार कियोरो थियो, टेंगी दित्तो। तैखन राज़ेरो क्रोध ठंडो भोव।