26 फिरी परमेशरे ज़ोवं, "अस मैन्हु अपने रूपे मां ते अपनो ज़ेरो बनाम; ते तैना समुन्दरेरी मेछ़लन, ते अम्बरेरे च़ुड़ोलन, ते पैलतू जानबरन, ते सारे धेरती पुड़, ते सब रेंगनेबाले जीप जन्तून पुड़ ज़ैना ज़मीनी पुड़ पेटेरे भार च़लने बालेन, अधिकार रखन।" 27 तैखन परमेशरे अपने रूपे मां इन्सानेरी रच़ना की, ते अपने रूपे मां परमेशरे इन्सानेरी रच़ना की; नर ते नारी बनेइतां तैनी तैन केरि रच़ना की। 28 ते परमेशरे तैन्न बरकत दित्ती; ते तैन सेइं ज़ोवं, "फुल्‍ला-फल्‍ला, ते धेरती पुड़ भेरोई गाथ, ते तैस अपने कैबू मां केरा; ते समुन्दरेरी मेछ़लन, ते कने अम्बरेरां च़ुड़ोलन, ते धेरती पुड़ रेंगनेबाले सब जीप जन्तून पुड़ अधिकार रखा।"