उत्पत्ति 26

इसहाकेरे बारे मां ज़िक्र

1 किछ वक्तेरां बाद फिरी बिरलाहेरोई मुल्खे मां काल पेव, ज़ै पेइले काले करां भी जादे थियो, ज़ै अब्राहमेरे दिहैड़न मां पेवरो थियो। एल्हेरेलेइ इसहाक गरार मुल्खे जो पलिश्ती केरे राज़े अबीमेलेके कां जेव। 2 तैड़ी यहोवा परमेशरे तैस दर्शन देइतां ज़ोवं, "मिस्र मुल्खे मां न गेइयां, ज़ैस मुल्खे मां अवं तीं गानेरे लेई ज़ोइलो, तैस्से मां रह। 3 तू तैस्से मुल्खे मां रह ते अवं तीं सेइं साथी भोइलो, ते अवं तीं बरकत देइलो; ते ऐह सब मुल्ख अवं तीं ते तेरी औलादी देइलो, ते ज़ै कसम मीं तेरे बाजी अब्राहमे सेइं कियोरी थी तैस पूरी केरेलो। 4 ते अवं तेरू खानदान अम्बरेरे तारां केरू ज़ेरू बनेइलो, ते अवं ऐह सब मुल्ख तेरे खानदाने देइलो; ते दुनियारी सैरी कौमन तेरी कौमरे ज़िरिये सेइं बरकत मैल्हेली। 5 किजोकि अब्राहमे मेरो हुक्म मन्नो, ते मेरी विधन पुड़ ते मेरे कानूने पुड़ बराबर अमल केरतो ते च़लतो राव।" 6 एल्हेरेलेइ इसहाक यहोवारी गल मेनतां गरार नगरे मां राव।

इसहाकेरि च़लाकी

7 ज़ैखन तैट्ठेरे लोकेईं तैसेरी कौन्शरे बारे मां पुछ़ू, त तैनी एन सोचतां कि अगर अवं ज़ोइलो कि ऐह मेरी कौन्शे, त रिबकारे वजाई सेइं एना मीं मैरी देले, किजोकि तै बड़ी खूबसूरत ते हेरनी रोड़ी थी, तांए तैनी ज़ोवं, "कि ऐह मेरी बेइने।" 8 ज़ैखन तैस तैड़ी रहंते बड़े दिहाड़े भोइ जे त एक्सां पलिश्ती लोकां केरे राज़े अबीमेलेके दैरी मरां बेइरोवं तक्‍कू कि इसहाक एपनी कौन्शी रिबका सेइं लाड प्यार केरने लगोरोए। 9 तैखन अबीमेलेक राज़े इसहाक एप्पु कां कुजव, ते ज़ोवं, "कि ज़रूर ऐह तेरी अपनि कौन्शे ते फिरी तीं एन किजो ज़ोवं कि ऐह मेरी बेइने, इसहाके जुवाब दित्तो, किजोकि मीं एन सोचू कि एरू न भोए कि एसारे वजाई सेइं कोई मीं मैरी छ़डे।" 10 अबीमेलेके ज़ोवं, "तीं असन सेइं एन कुन कियूं? अगर एन मरां कोई तेरी कौन्शी सेइं साथी झ़ुलेथो, त तीं असन पुड़ इलज़ाम लानो थियो।" 11 एल्हेरेलेइ अबीमेलेक राज़े अपने सारे लोकन हुक्म दित्तो कि, "ज़ै कोई एस मैन्हु या एसेरी कौन्शी सेइं हथ भी लाएलो, तै पक्‍को मारो गालो।"

इसहाक महान बनते

12 ते इसहाके तैस साल ज़ेत्री फसल बेवरी थी, 100 गुणा फल लग्गो, ते यहोवा परमेशरे तैस बड़ी बरकत दित्ती। 13 ते तै बड़ो मालदार भोइ जेव ते तैसेरी धन-दौलत बड़ी बद्धती जेई, ते एड़ी तगर कि तै बड़ो अमीर भोइ जेव। 14 ज़ैखन तैसेरां गोरू-गब्बां ते नौकर नौकरैनी भोइ जेई, त पलिश्ती लोक तैस पुड़ ज़लने लगे।

खुहां केरे लेई लड़ाई

15 एल्हेरेलेइ ज़ेत्रां खुहां तैसेरे बाजी अब्राहमेरे नौकरेईं अब्राहमेरे ज़ींते दम्में घड़ेवरां थियां, तैना सब पलिश्ती लोकेईं मित्ती सेइं भेरतां छ़डां। 16 तैखन अबीमेलेके इसहाके सेइं ज़ोवं, "कि तू इट्ठां च़लो गा; किजोकि तू असन करां बड़ो ताकतबर भोइ जेवरोस।" 17 एल्हेरेलेइ इसहाक तैट्ठां च़लो जेव, ते गरारेरी वैदी मां अपनो डेरो लेइतां राने लग्गो। 18 इसहाके तैना खुहां ज़ैना अब्राहमेरे दिहाड़न मां घड़ेवरां थियां, ते ज़ैना पलिश्ती लोकेईं मित्ती सेइं भेरतां छ़डोरां थियां फिरी घड़ा ते तैन केरां तैन्ना नव्वां रखां ज़ैना तैसेरे बाजी अब्राहमे रख्खोरां थियां। 19 ज़ैखन इसहाकेरे नौकर वैदी मां पैनेरी तलाशी मां खुहां घड़ने लग्गोरो थिये त तैन तैड़ी पैनेरो अक बड्डो नाग मैल्हो। 20 पन गरार नगरेरे पुहाल इसहाकेरे पुहालन सेइं लड़ाई केरतां ज़ोने लगे कि, "एन पानी इश्शू आहे।" एल्हेरेलेइ इसहाके तैस खुहेरू नवं एसेक*26:20 एसेक मतलब लड़ाई केरनि। रख्खू; किजोकि तैना तैस सेइं लड़ोरे थिये। 21 फिरी तैनेईं अक होरू खुह घड़ू ते तैनेईं फिरी तैसेरेलेइ भी लड़ाई की, एल्हेरेलेइ तैनी तैसेरू नवं सित्ना*26:21 सित्ना मतलब बैर। यानी मुखालफत रख्खू। 22 फिरी तैनी तैट्ठां अग्गर गेइतां अक होरू खुह घड़ू, ते तैसेरेलेइ केन्चे भी लड़ाई न की, एल्हेरेलेइ तैनी तैसेरू नवं रहोबोत*26:22 रहोबोत मतलब बड़ी जादे ज़मीन। रख्खू "कि यहोवा परमेशरे इश्शे लेई खुल्‍ली ठार दित्तोरीए ते असां इस मुल्खे मां फलेले-फुलेले।"

परमेशर इसहाके दर्शन देते

23 ज़ैखन तै तैट्ठां बेर्शेबा मां पुज़्ज़ो। 24 त तैस्से राती यहोवा परमेशरे तैस दर्शन देइतां ज़ोवं, "अवं तेरे बाजी अब्राहमेरो परमेशर आईं; डर न, किजोकि अवं तीं सेइं साथी आईं, ते अपने सेवक अब्राहमेरी वजाई सेइं अवं तीं बरकत देइलो, ते तेरू खानदान खूब बधेइलो।" 25 तैखन इसहाके तैड़ी अक वेदी बनेइतां यहोवा परमेशरे कां प्राथना की, ते तैनेईं अपने डेरे तैड़ी लाए, फिरी तैसेरे नौकरेईं तैड़ी अक खुह घड़ू।

अबीमेलेके सेइं करार

26 एक्सां अबीमेलेक अपने सलाहकार अहुज्जत, ते अपने सेनापति पीकोले सेइं साथी गरार नगरे मरां इसहाके कां जेव। 27 इसहाके तैस पुछ़ू, "तुस मीं कां किजो एवरेथ? तुसेईं त मीं सेइं बैर रेखतां अवं अपने इलाके मरां कढोरो थियो?" 28 तैनेईं जुवाब दित्तो, "असेईं एन रोड़ेच़ारे बुझ़ू कि यहोवा परमेशर तीं सेइं साथीए; कि न भोए कि असां कसम केरतां तीं सेइं ऐह करार केरनो चातम। 29 कि ज़ेन्च़रे असेईं तीं कोई नुकसान न पुज़व, बल्के हमेशा तीं सेइं रोड़ो सलूख कियोरो थियो, ज़ेन्च़रे असेईं तू सुखे सेइं भेज़ोरो थियो, एन्च़रे तू भी असन कोई नुकसान न पुज़ेइयां, ते हुन्ना त तीं यहोवा परमेशरे खूब बरकत दित्तोरीए।" 30 तैखन इसहाके तैन केरे लेई अक बड़ी धाम तियार की, ते तैनेईं खाइ पी ते बड़ी खुशी मनाई। 31 दूइयोवं दिहाड़े झ़ेझ़ां उठतां तैनेईं कसम केरतां अक लिखत बनाई, ते इसहाके तैना तैट्ठां सुखे सेइं भेज़े ते तैना तैट्ठां वापस च़ले जे। 32 तैस दिहाड़े इसहाकेरे नौकरेईं तैस कां एइतां तैस खुहेरे बारे मां ज़ोवं, ज़ैन तैनेईं एप्पु घड़ेरू थियूं कि, "असन पानी मैल्ही जेवं।" 33 तैखन तैनी तैस खुहेरू नवं शिबा*26:33 शिबा मतलब कसम। रख्खू, तांए अज़ तगर तैस नगरेरू नवं बेर्शेबा*26:33 बेर्शेबा मतलब कसम। ज़ोतन।

एसावेरी कौन्शां

34 ज़ैखन एसाव 40 सालां केरो भोव त तैनी हित्ती बेरी एरी कुई यहूदीत, ते हित्ती एलोनेरी कुई बासमत सेइं ड्लाह बनाव। 35 ते एना कौन्शां केरि वजाई सेइं इसहाक त तैसेरी कौन्शी रिबकारो दिल बड़ो दुखी भोव।