1 ज़ैखन इसहाक बुढो भोव त तैस एछ़्छ़ेईं सेइं लेइहोतू न थियूं, त तैनी अपनु बड्डू मट्ठू एसाव एप्पु कां कुजेइतां ज़ोवं, "हे मेरा मट्ठा," तैनी ज़ोवं, "हाँ बाजी कुन हुक्मे।" 2 तैनी ज़ोवं, "शुन अवं बुढो भोवरोईं, ते ऐह पतो नईं कि किताली मीं मरनुएं। 3 एल्हेरेलेइ तू अपनो तरकश अपनु धनुष नेइतां जंगले मां गा, ते मेरे लेई कोई शिकार मैरतां आन। 4 ते मेरू मन पसंद मास बनेइतां सुवैदली रोट्टी मीं कां आन, ते अवं तैस खेइतां अपने मरने करां पेइले दिल खोलतां तीं बरकत देइ सेखी।" 5 ज़ैखन इसहाक अपने मट्ठे सेइं गल्‍लां केरने लग्गोरो थियो, त रिबका शुन्ने लगोरी थी, ते एसाव शिकार मारनेरे लेई जंगलेरे पासे च़लो जेव।

6 तैखन रिबका अपने मट्ठे याकूबे सेइं ज़ोवं, "हेर मीं तेरे बाजी करां एसावे सेइं एन ज़ोतू शुनेरूए। 7 ‘कि तू शिकार मैरतां मेरे लेई खूब रोड़ेच़ारे मास बना, ते अवं तैस खेइतां अपने मरने करां पेइले यहोवा परमेशरेरी हज़ूरी मां तीं बरकत देइ सेखी।’ 8 हे मेरा मट्ठा, मेरी गल शुन, ते ज़ैन अवं तीं ज़ोचां, तैन केर। 9 गब्बन मरां दूई छ़ेड़ां आन, ते अवं तैन केरू मास तेरे बाजी केरे लेई मन पसंद सुवैदली रोट्टी बनाली। 10 ते फिरी तू तैन अपने बाजी कां नेइयां, तै तैन खेइतां अपने मरने करां पेइले तीं बरकत देलो।" 11 याकूबे एपनी अम्मा रिबका सेइं ज़ोवं, "पन मेरे ढ्ला एसावेरी जानी पुड़ घने बाल आन, ते अवं त एरहो मैन्हु नईं मेरी जान त साफ मुलाइमे। 12 अगर मेरो बाजी मीं सेइं हथ लाएलो त अवं झूठो भोनोईं, ते मीं बरकतरे बदले लानत मैल्हनीएं।" 13 तैसेरी अम्मा तैस सेइं ज़ोवं, "हे मेरा मट्ठा, लानत तीं पुड़ नईं मीं पुड़ भोए, तू सिर्फ मेरी गल शुन, तू गेइतां दूई छ़ेड़ां मीं कां एन्हतां दे।" 14 तैखन तै जेव ते तैनी तैना एन्हतां एपनी अम्मा कां दित्तां, ते तैसां तैन केरू मास बनेइतां तैसेरे बाजी केरि मन पसंद सुवैदली रोट्टी तियार की। 15 फिरी रिबका एन कियूं कि अपने बड्डे मट्ठे एसावेरां रोड़ां ज़ेरां लिगड़ां ज़ैना घरे थियां याकूबे लुआं। 16 ते तैसां तैसेरे हथ्थन ते गले तैन छ़ेड़ां केरि खाड़ी पलैटी। 17 फिरी तैसां तै सुवादली रोट्टी ते ज़ैन मास बनेवरू थियूं, याकूबेरे हथ्थे मां दित्तू।

18 तैखन याकूब अपने बाजी कां जेव, ते ज़ोवं, "हे मेरे बाजी," तैनी ज़ोवं, "कुन गल्‍ले? हे मेरे मट्ठा, तू कौनस?" 19 याकूबे अपने बाजी सेइं ज़ोवं, "अवं तुश्शू बड्डू मट्ठू एसाव आईं, मीं तुश्शे ज़ोनेरे मुताबिक कियोरूए, एल्हेरेलेइ उठ ते बिशतां मेरे शिकारेरू मास खा, कि तू दिले सेइं मीं बरकत दे।" 20 इसहाके अपने मट्ठे पुछ़ू, "हे मेरा मट्ठा, तीं ऐह शिकार एत्रो लूशी कोड़ि मैल्हो?" तैनी जुवाब दित्तो, "तुश्शे यहोवा परमेशरे मीं कामयाबी दित्ती।" 21 तैखन इसहाके याकूबे सेइं ज़ोवं, "हे मेरा मट्ठा, नेड़े एई, अवं तीं सेइं हथ लेइतां हेरी कि तू सच़्च़े मेरू मट्ठू एसाव आस या नईं।" 22 तैखन याकूब अपने बाजी इसहाके कां नेड़े जेव, तैनी तैस सेइं हथ लाव ते ज़ोने लगो, "गल्‍लां त याकूबेरी ज़ेरिन, पन हथ एसावेरेन ज़ेरेन।" 23 तैनी तै न पिशानो, किजोकि तैसेरे हथ तैसेरे ढ्लाएरे एसावेरेन ज़ेरे बालन बाले थिये, एल्हेरेलेइ तैनी तैस बरकत दित्ती। 24 पन एसावे फिरी तैस पुछ़ू, "कुन तू सच़्च़े मेरू मट्ठू एसाव आस?" तैनी जुवाब दित्तो, "हाँ अवं आईं"

25 इसहाके तैस जो ज़ोवं, हे मेरा मट्ठा, अपने आनोरे शिकारे मरां किछ बनेवरू मास मीं कां नेड़े आन, ताके अवं तैस खेइतां तीं बरकत देइ सेखी, याकूबे तैन तैस कां आनू ते तैनी तैन खाऊं, ते तैनी किछ दाछ़रो रस भी आनो, ते तैनी तै भी पीयो। 26 तैखन तैसेरे बाजी इसहाके तैस सेइं ज़ोवं, हे मेरा मट्ठा, मीं कां इड़ी नेड़े एई, "ते अवं तीं फुम्मड़ी देईं।" 27 तैखन तै तैस कां नेड़े जेव, ते तैनी तैस फुम्मड़ी दित्ती "तैनी तैसेरे लिगड़ां केरि खुशबू शिंघी ते तैस बरकत दित्ती, ते ज़ोवं,

हेर ऐह मेरे मट्ठेरी खुशबू आहे

ज़ै तैस उडारेरी ज़ेरिए, ज़ैस यहोवा परमेशरे

बरकत दित्तोरी भोए।

28 परमेशर तीं अम्बरे मरां ओश

ते ज़मीनरे अन्नेरी पैदावार,

ते बड़ू अन्न ते नंव्वो दाछ़रो रस दे।

29 सैरी कौमां तेरी सेवा केरेली,

ते मुल्खां-मुल्खां केरे लोक तीं कां झुकन।

ते तू अपने ढ्लां केरो मालिक भोस,

ते तेरी अम्मरां मट्ठां तीं कां झुकन,

ते ज़ैना तीं लानत देन, तैना एप्पु लानती भोन,

ते ज़ैना तीं बरकत देन तैन बरकत मैल्हे।"

30 इसहाके करां बरकत मैल्हनेरे पत्ती याकूब मसां बेइरोवं निस्सोरो थियो त तैसेरो ढ्ला एसाव शिकार घिन्तां वापस अव। 31 तैनी भी खूब रोड़ेच़ारे मास बनेइतां अपने बाजी कां आनू, तैखन तैनी ज़ोवं, "हे मेरे बाजी, उठ ते मेरे आनोरे शिकारेरू मास खा ते फिरी मीं दिल खोलतां बरकत देथ।" 32 तैसेरे बाजी इसहाके तैस पुछ़ू, "तू कौनस?" तैनी ज़ोवं, "अवं तुश्शू बड्डू मट्ठू एसाव आईं।" 33 एन शुन्तां इसहाके थेरकतां तैस सेइं ज़ोवं, "फिरी तै कौन थियो, ज़ैनी शिकार मैरतां मीं कां आनोरो थियो? मीं तैन शिकारेरू मास तेरे एजने करां हुन्ना ज़ेरू खावं, ते तैस बरकत दित्ती, ते तै तैस मैल्ही जेई।" 34 ज़ैखन एसावे अपने बाजी केरि एना गल्‍लां शुनी त तै बड़े ज़ोरे सेइं चिन्डां मारने लगो, ते अपने बाजी जो ज़ोने लगो, "हे मेरे बाजी मीं बरकत दे, हाँ मेरे बाजी मीं बरकत दे!" 35 पन तैनी ज़ोवं, "तेरो ढ्ला धोखे सेइं अव, ते तेरी बरकत घिन्नी जेव।" 36 एसावे ज़ोवं, "ठीक तैसेरू नवं तांए याकूब* नईं रखोरूए? तैनी मीं दूई फेरेईं धोखो दित्तोरोए" अक त तैनी मेरे बड्डे भोनेरू हक नियोरू थियूं, ते हुन्ना मेरी बरकत भी घिन्नी जेव? फिरी तैनी पुछ़ू, "कुन मेरे लेई हुनी कोई बरकत नईं राहोरी।" 37 इसहाके एसावे जुवाब दित्तो, "शुन, मीं तै तेरो मालिक बनेवरोए, मीं तैसेरे सारे रिश्तेदार तैसेरे नौकर बनेवरेन, मीं तै अन्न ते ताज़े दाछ़रे रस्से सेइं भरपूर कियोरोए, एल्हेरेलेइ हे मेरा मट्ठा हुनी अवं तेरे लेई कुन केरि?" 38 एसावे अपने बाजी सेइं ज़ोवं, "हे मेरे बाजी, तीं कां कुन सिर्फ अक्‍के बरकत थी? हे मेरा बाजी मीं भी बरकत दे।" तैखन एसाव ज़ोरे-ज़ोरे सेइं लेरां लगो देने। 39 तैसेरे बाजी इसहाके तैस जुवाब दित्तो,

"शुन, तेरी रानेरी ठार रोड़ी फसल देने बैली ज़मीनी करां दूर भोए,

अम्बरेरी ओश बैंधोरां तैस पुड़ न पे।

40 तू तलवारारे बले पुड़ ज़ींतो रालो,

तू अपने ढ्लाएरी सेवा केरेलो,

पन ज़ैखन तीं मां बरदाशत केरनेरी ताकत न राहेली,

तैखन तू अपने ढ्लाएरो जुओ अपने कंधे पुड़ेरां शैरी छ़डेलो।"

41 एसाव त याकूबे सेइं अपने बाजी केरि दित्तोरी बरकतरी वजाई सेइं बैर केरने लगो, "तैनी एन सोचू कि मेरे बाजी केरे मरनेरे दिहाड़े नेड़े एवरेन, तैना बीती गाले त मीं अपनो ढ्ला याकूब मैरी छ़डनोए।" 42 ज़ैखन रिबका अपने बड्डे मट्ठेरी गल्‍लां केरो पतो लग्गो त तैसां अपनु निकड़ू मट्ठू याकूब एप्पु कां कुजव, ते ज़ोने लगी, "शुन तेरो ढ्ला एसाव तीं मारनेरी साज़िश केरि राहोरोए। 43 हे मेरा मट्ठा, अवं ज़ैन ज़ोचां तू तैन केर, तू लूशी-लूशी हारान सूबे मां मेरे ढ्लाए लाबाने कांजो नेश्शी गा। 44 ज़ांतगर तेरे ढ्लाएरी सरक ठंडी न भोए तांतगर तू तैड़ी रेइयां। 45 ज़ैखन तेरे ढ्लाएरी सरक तीं पुड़ेरां ठंडी भोल्ही ते ज़ैन तीं तैस सेइं कियोरूए, ते ज़ांतगर तै तैन बिसरे नन्ना? तैखन अवं तीं तैट्ठां कुजाली, एरू किजो भोने देईं कि अवं तुसन दूईने एक्सां गुवेइं।"

46 फिरी रिबका इसहाके सेइं ज़ोवं, "इन हित्ती कुइयां केरि वजाई सेइं मेरी ज़िन्दगी तंग भोवरीए एल्हेरेलेइ अगर एरी हित्ती कुइयां ज़ैना इस मुल्खे मां आन ते याकूब भी एन मरां एक्‍की सेइं ड्लाह बनालो त मेरे ज़ींनेरो कुन फैइदो भोल्हो?"