1 पिलातुसे सिपेहिन हुक्म दित्तो, कि यीशु नेइतां कोड़े बान। 2 ते सिपाहीयेइं कंटां केरू ताज बनेइतां यीशुएरे दोग्गे पुड़ रख्खू, ते तैस बैंगनी रंगेरां लिगड़ां लुवां। 3 ते तैन केरे सामने तैन कां एइतां ज़ोने लगो, "हे यहूदी केरे राज़ा, नमस्कार!" ते तैस थप्पड़ बाहे। 4 तैखन पिलातुसे फिरी बेइर गेइतां लोकन सेइं ज़ोवं, हेरा, "अवं तैस तुसन कां फिरी बेइर आनताईं, तुसन पतो लगे कि मीं एसमां कोई जुर्म न लेइहोव।" 5 ज़ैखन यीशु कंटां केरू ताज दोग्गे पुड़ रेखतां ते बैंगनी लिगड़ां लेइतां बेइर आनो त पिलातुसे तैन सेइं ज़ोवं, "हेरा ई मैन्हु।" 6 ज़ैखन प्रधान याजक ते मन्दरेरे पहरदारेईं यीशु लाव त ज़ोरे-ज़ोरे चिन्डां मैरतां ज़ोने लगे, "एस क्रूसे पुड़ च़ाढ़ा, एस क्रूसे पुड़ च़ाढ़ा!" पिलातुसे तैन सेइं ज़ोवं, "तुस्से एस नेथ ते क्रूसे पुड़ च़ाढ़ा, किजोकि अवं एसमां कोई दोष न लेहीं।" 7 यहूदी लीडर ज़ोने लगे, "इश्शो भी कानूने, ते तैसेरे कानूनेरे मुताबिक ऐह मौतरे सज़ाहरे काबले। किजोकि ऐह अपने आपे जो परमेशरेरू मट्ठू ज़ोते।" 8 ज़ैखन पिलातुसे एन शुनू त तै मन्ना डरो। 9 ते फिरी अपने मेहले मां जेव ते यीशु सेइं फिरी ज़ोवं, "तू कोट्ठां एवरोस?" पन यीशुए तैस किछ जुवाब न दित्तो। 10 पिलातुसे तैस सेइं ज़ोवं, "तू मीं सेइं गल कि न केरस? कुन तीं पतो नईं कि मीं अधिकार कि अवं तीं हथरां छ़ेडी या क्रूसे पुड़ च़ैढ़ेईं।" 11 यीशुए जुवाब दित्तो, "अगर ऐह अधिकार तीं परमेशरे करां न भोथो मैल्होरो त तेरो कोई अधिकार मीं पुड़ न थियो भोनो, पन ज़ैनी अवं तेरे हवाले कियोरोईं ते हछे पापेरो हकदार भोवरोए।"

12 तैसेरां बाद पिलातुसे यीशु हथरां छ़डनो चाव, पन यहूदी लोक चिन्डां मेरतां ज़ोने लगे, "अगर तू एस मैन्हु हथरां छ़डेलो त तू महाराज़ेरे पासे नईं, ज़ै कोई अपनो आप राज़ो बनाते तै महाराज़ेरे खलाफ भोते।" 13 ज़ैखन पिलातुसे एन शुनू त तैनी यीशु बेइर कुजेइतां अपने आदालतरे तखते पुड़ बिश्शो ज़ैस जो इब्रानी भाषाई मां, गब्बता, ज़ोतन। 14 तै फ़सह तिहारेरी तियैरारी दिहाड़ी थी ते दुपहरां केरे करीब थियो, तैखन पिलातुसे यहूदी लोकन जो ज़ोवं, "हेरा, ई तुश्शो राज़ो!" 15 पन तैना ज़ोरे-ज़ोरे सेइं ज़ोने लगे, "एस इट्ठां दूर ने! इट्ठां दूर ने! ते एस क्रूसे पुड़ च़ाढ़!" पिलातुसे ज़ोवं, "कुन अवं तैस ज़ै तुश्शो राज़ो क्रूसे पुड़ च़ैढ़ी?" प्रधान याजकेईं ज़ोवं, "महाराज़ेरे अलावा इश्शो कोई राज़ो नईं।" 16 एसेरां बाद पिलातुसे यीशु तैन केरे हवाले कियो, ताके तैना तैस क्रूसे पुड़ च़ाढ़न।

17 यीशु अपनु क्रूस छ़ुइतां खोपड़ी जो च़लो ज़ैस जो इब्रानी मां गुलगुता ज़ोतन। 18 तैड़ी तैनेईं यीशु ते तैस सेइं साथी दूई डैकू भी क्रूसे पुड़ च़ाढ़ो, अक तैसेरे देइने पासे होरो बांए पासे ते यीशु मझ़ाटे। 19 पिलातुसे एक्‍की पेखड़ी पुड़ तैसेरो दोष लिखतां क्रूसे पुड़ लाई तैस पुड़ लिखोरू थियूं, "यीशु नासरी यहूदी केरो राज़ो।" 20 काई यहूदेईं तैन पढ़ू, किजोकि ज़ैस जगाई यीशु क्रूसे पुड़ च़ढ़ोरो थियो ते जगाह यरूशलेम नगरेरे नेड़े थी, ते पेखड़ी पुड़ इब्रानी, लातीनी ते यूनानी भाषाई मां लिखोरू थियूं। 21 यहूदी केरे प्रधान याजकेईं पिलातुसे कां दरखुवास की, "यहूदी केरो राज़ो न लिखा पन एन लिखा कि ऐह ज़ोते, ‘अवं यहूदी केरो राज़ोईं।’" 22 पिलातुसे जुवाब दित्तो, "मीं ज़ैन लिखी छ़ड्डू, तैन लिखू।"

23 ज़ैखन सिपेहियेई यीशु क्रूसे पुड़ च़ाढ़ो त तैनेईं यीशुएरे लिगड़ां बंटां ते तैन केरे च़ेवरे हिस्से किये, ताके सेब्भन अक-अक हिस्सो मैल्हे सिर्फ तैसेरू कोट बाकी रावं, ज़ैन बा ते बुना तगर अक्‍के थियूं। 24 तैना एप्पू मांमेइं ज़ोने लगे, "एसेरे टोटे केरनेरे बजाए ज़ेसेरे नंव्वे पुड़ परची निसेली लिगड़ां तैसेरां भोल्हां।" एन एल्हेरेलेइ भोवं कि ज़ैन पवित्रशास्त्रे मां लिखोरू थियूं तैन पूरू भोए कि, "तैनेईं मेरां लिगड़ां बन्टा ते मेरे कोटेरे लेई चिट्ठी छ़डी ते सिपैहीयेइं एन कियूं।"

25 यीशुएरे क्रूसे कां तैसेरी अम्मा ते तैसेरी अम्मरी बेइन मरियम ज़ै क्लोपासेरी कुआन्श थी, मरियम मगदलीनी खड़खड़ी थी। 26 यीशुए अपनि अम्मा ते अक अपनो चेलो ज़ैस सेइं तै प्यार केरतो थियो, तैस कां नेड़े खड़खड़ो लाव त तैनी अपने अम्मा सेइं ज़ोवं, "हे कुआन्श, हेर, तेरू मट्ठूए।" 27 ते चेले जो ज़ोवं, "अज़्ज़ेरां बाद, ई तेरी अम्मा आहे, तैनी चेले तैखने तै अपने घरे नेइ।"

28 ज़ैखन यीशुए ज़ांनू कि हुनी सैरी गल्‍लां पूरी भोइजेइ, एल्हेरेलेइ ज़ेन्च़रे पवित्रशास्त्रेरे मां लिखोरू थियूं तैन पूरू भोवं त तैनी ज़ोवं, "मीं ट्लिश लग्गोरीए।" 29 तैड़ी अक भांड सिरके सेइं भेरतां रखोरू थियूं, केन्चे जूफारी डालड़ी तैस मां डोबतां यीशुएरे ऐशी सेइं हुराई। 30 ज़ैखन यीशुए च़ख्खू त तैनी ज़ोवं, "पूरू भोवं" ते क्रोड़ी ट्लोड़तां अपने प्राण दित्ते।

31 ते एल्हेरेलेइ कि तै तियैरारी दिहाड़ी थी, होरसां आरामेरी दिहाड़ी ते कने फ़सह तिहार थियूं। ई यहूदी केरे लेई खास दिहाड़ी थी, यहूदी न थिये चाते कि आरामेरे दिहाड़े लाशां क्रूसन पुड़ टंगोरी रान, एल्हेरेलेइ तैनेईं पिलातुसे कां गेइतां ज़ोवं, कि मुर्ज़मां केरि ज़ंघां ट्लोड़तां तैन केरि लाशां उन्ढी उसालम। 32 सिपाही आए तैनेईं पेइले मैन्हेरी ज़ंघां ट्लोड़ी, फिरी होरेरी भी, ज़ैना यीशु सेइं साथी क्रूसे पुड़ च़ाढ़ोरे थिये। 33 पन ज़ैखन यीशुएरी बारी अई त तैनेईं हेरू कि ते पेइले मेरि जेवरोए, ते तैनेईं तैसेरी ज़ंघां न ट्लोड़ी। 34 पन सिपेहिन मरां एक्‍के अपनि बलम एन्हतां यीशुएरे देल्‍लोड़ी मां बाई ते तैखने खून त पानी बगने लगू। 35 ज़ैनी मैन्हे एन हेरू, तैनी गवाही दित्ती, ते तैसेरी गवाही सच़्च़ीए, ते तै ज़ानते, कि सच़ ज़ोते कि तुस भी विश्वास केरा। 36 एना सैरी गल्‍लां एल्हेरेलेइ भोइ कि पवित्रशास्त्रे मां लिखोरू पूरू भोए, "तैसेरी कोई हड्डी न ट्लोड़ी गाए।" 37 पवित्रशास्त्रेरे एक्‍की होरि वचने मां लिखेरूए, "तैस ज़ैनेईं बलमी सेइं बाई तैना तैस हेरेले।"

38 एना गल्‍लां केरे पत्ती अक मैन्हु यूसुफ नंव्वेरो ज़ै अरिमतियाह ड्लोंव्वेरो रानेबालो थियो, पिलातुसे कां बिनती केरने लगो, कि यीशुएरी लाश दे, ऐह मैन्हु यहूदी लोकां केरे प्रधानां केरे डरे सेइं छ़ेपतां यीशुएरो चेलो थियूं, तै पिलातुसे तैस अज़ाज़त दित्ती, ते तैनी यीशुएरी लाश नेही। 39 नीकुदेमुस भी अव, ज़ैनी एक्‍की बार राती यीशु सेइं मुलाकात कियोरी थी, तैनी गन्धरस ते एलवा आनोरे थिये, एन लगभग 33 किल्‍लो थियूं। 40 तैखन तैनेईं यीशुएरी लाश नेइतां यहूदी केरे दबनेरे रसमरे मुताबिक तैस खुशबूदार चीज़ां लेइतां कफने मां पलेटतां रख्खी। 41 ज़ैड़ी यीशु क्रूसे पुड़ च़ाढ़ोरो थियो तैड़ी बागी मां अक नंव्वी कब्र थी, ज़ैस मां पेइली कोई लाश न थी। 42 ते ऐह यहूदी केरि आरामेरी तियैरारी दिहाड़ी थी ते कब्र भी नेड़े थी तैनेईं यीशुएरी लाश तैड़ी रख्खी।