1 ज़ैखन यीशु मन्दरे मरां निस्तां च़लोरो थियो, ते तैसेरे चेले तैस कां आए, ताके तैस मन्दरेरे रोड़े-रोड़े भवन हिरान। 2 तैनी तैन सेइं ज़ोवं, "कुन तुस एन सब किछ हेरने लगोरेथ? अवं तुसन सेइं सच़ ज़ोताईं कि इड़ी कोई घोड़े पुड़ घोड़ बाकी न रालो, ज़ै बछ़ोड़ो न गालो।"

3 ज़ैखन तै ज़ैतून पहाड़े पुड़ बिशोरो थियो, त तैसेरे चेले अलग ज़ेरे तैस कां एइतां तैस सेइं ज़ोने लग्गे, "असन ज़ो कि एन गल्‍लां केइस भोनिन? ते तेरे एजनेरो ते दुनियारो अन्त भोनेरो कुन निशान भोनोए?" 4 यीशुए तैन जुवाब दित्तो, "खबरदार राथ, कोई तुसन न टपलाए! 5 किजोकि बड़े मेरे नंव्वे सेइं एजनेन ते तैनेईं ज़ोनूए कि, ‘अवं मसीह आईं,’ ते तैनेईं बड़े लोक टपलानेन। 6 तुस लड़ाई ते लड़ैई केरि अफवाह शुनेले, खबरदार डेरथ नन्ना, किजोकि एन गल्‍लां ज़रूरी भोनिन, पन तैस वक्ते खातमों नईं भोनो। 7 किजोकि कौमी पुड़ कौम, ते राज़्ज़े पुड़ राज़ चढ़ाई केरेलू, ते ठारी-ठारी काल पेलो, ते भुंज़ल एज्जेले। 8 मुसीबतां केरि शुरुआत भी एन्ने गल्‍लेईं सेइं भोनीए। 9 तैखन ज़ैना तुश्शे खलाफन तैना तुसन ट्लेइतां बड़ी सखत सज़ा देले, ते कत्ल केरेले, ते मीं पुड़ विश्वास केरनेरे वजाई सेइं, सैरी कौमां केरे लोक तुसन सेइं बैर रखेले। 10 तैखन बड़े लोक मीं पुड़ विश्वास केरनो शारेले, एक्‍की होरि ट्लुवाले, ते एप्पू मांमेइं भी बैर रखेले। 11 ते बड़े झूठे नबी दुनियाई मां निसनेन ते बड़े लोक टपलानेन। 12 अधर्म बधने सेइं बड़े लोक एप्पू मांमेइं प्यार केरनो शारेले। 13 पन ज़ै कोई आखरी दम्में तगर मीं पुड़ विश्वास केरेलो, त तैस्से मुक्ति मैल्हनी। 14 ते परमेशरेरे राज़्ज़ेरी ई खुशखबरी दुनियारे हर पासे शुनाई गाली, ताके सैरी कौमां केरे लोकन मौको मैल्हे कि तैना इस कबूल केरन, तैखन दुनियारो खातमों भोल्हो।"

15 "ज़ैखन तुस तैस उज़ड़ाने बाली भिट्टी चीज़ी, ज़ेसेरे बारे मां दानिय्येल नेबे ज़ोवरू थियूं, पवित्र ठैरी खड़ी लाएले, (त पढ़नेबालो भी समझ़े)। 16 कि ज़ैना तैस मौके यहूदिया इलाके मां भोल्हे तैना पहाड़न पुड़ जो नश्शन। 17 ते ज़ैना लाए पुड़ भोन त तैना कोई चीज़ नेने अन्तर न एज्जन। 18 ते ज़ै मैन्हु ऊडारे मां भोल्हो, त तै लिगड़ां नेने अन्तर न एज्जे।"

19 तैन दिहाड़न मां ज़ैना दोज़ींती त दुद्ध पियाती कुआन्श भोल्ही, तैन केरे लेई अफ़सोस! 20 "ते प्राथना केरा कि तुसन हिंवतड़े या आरामेरी दिहाड़ी नश्शनू न पे। 21 किजोकि तेइस एत्री बड्डी मुसीबत भोल्ही, ज़ेरि दुनियारे शुरू करां अज़ तगर नईं एवरी, ते न कधी एज्जेली। 22 अगर तैन दिहाड़ां केरि तैधात घटेवरी न भोथी, त कोई प्राणी न थियो बच़ानो, पन च़ुनोरां केरे लेई तैना दिहाड़े घटेवरेन। 23 अगर कोई तुसन सेइं ज़ोए कि, ‘तक्‍का, मसीह इड़ी आए! या उड़ी आए!’ त तुस विश्वास न केरथ।"

24 "किजोकि झूठे मसीह ते झूठे नबी दुनियाई मां निसनेन, ते तैनेईं निशान ते बड्डे-बड्डे चमत्कार हिरानेन, ते भोइसखे त च़ुनोरे लोक भी टेपलोनेन। 25 हेरा, मीं तुसन सैरी गल्‍लां भोनेरे पेइले ज़ोवरिन। 26 अगर कोई तुसन सेइं ज़ोए कि, ‘हेरा तै जंगले मांए,’ त तुस बेइर न गेइयथ; ‘हेरा, तै घरे मांए,’ त तुस विश्वास न केरथ।

27 "किजोकि ज़ेन्च़रे बिजली पूर्बेरां, पछमें तगर चमकतीए एन्च़रे मैन्हेरू मट्ठू भी एज्जेलू। 28 ज़ैड़ी ज़िग्ग भोते तैड़ी इल्‍लां जम्हां भोइचन।"

29 "तैन दिहाड़ना बाद दिहाड़ो कालो भोइ गालो, त चाँदनी लौ न देली, त कने अम्बरेरां तारे बिछ़ड़ने लग्गेले, त अम्बरेरी सैरी शेक्ति हिलेइ गेली। 30 तैखन मैन्हेरे मट्ठेरो निशान अम्बरे मां लेइहोनोए, ते दुनियारी सैरी कौमां छाती पिट्टेली, ते मैन्हेरू मट्ठू अम्बरे मरां बिदलारी पुड़ बेड़ि शेक्ति ते महिमा सेइं एइते लाएले। 31 ते तै अपने स्वर्गदूत ते नरशिंगेरी बड़ी आवाज़ी सेइं साथी भेज़ेलो, ते तैसेरे च़ुनोरे लोकन च़ेवरे पासन अम्बरेरे एक्‍की पासेरां होरि पासे तगर सेब्भन जम्हां केरेले।"

32 "फैगेरे बुट्टे करां ई सबक शिखा, ज़ेरे तैसेरे डाल नर्म भोतन ते पट्लां निसतन त तुस बुझ़तथ कि गेर्मेरो मौसम एजनेबालो आए। 33 एसेरो ज़ेरो, ज़ैखन तुस एना गल्‍लां, ज़ैना मीं ज़ोई, भोते हेरेले, त तुस बुज़्झ़ी छ़ड्डा कि मैन्हेरू मट्ठू, यानी अवं बड़े नेड़े पुज़ोरोईं। 34 अवं तुसन सेइं सच़ ज़ोताईं, कि ज़ांतगर एन सब किछ पूरू न भोए, तांतगर एस पीड़रो खातमों न भोल्हो। 35 अम्बर ते धरती टेली गाली पन मेरी गल्‍लां कधे न टेलेली।"

36 "मेरे वापस एजनेरे दिहाड़ेरे बारे मां, या तैस वक्तेरे बारे मां कोई भी न ज़ाने कि तै कताली भोल्हो, सुर्गेरे स्वर्गदूते भी न ज़ानन त कने परमेशरेरू मट्ठू यानी अवं भी न ज़ैनी, पन सिर्फ मेरो बाजी परमेशर ज़ानते। 37 ज़ेन्च़रे नूहेरे ज़माने मां भोरू थियूं, तेन्च़रे मैन्हेरे मट्ठेरे एजनेरे वक्ते भोनूए। 38 किजोकि हड़ाई एजने करां पेइले भी लोक खाते पीते थिये, ते ड्लाह भी बनाते थिये, ते नूहेरे किश्ती मां गाने तगर एन सब किछ भोतू रावं। 39 तैन पतो भी न थियो कि कुन भोनेबालूए, इड़ी तगर कि हड़ाई अव ते तैनी सब किछ रुड़ेइतां नेव, ते मैन्हेरे मट्ठेरू यानी मेरू एजनू भी एरू भोनूए। 40 तैखन ऊडारे मां दूई मैन्हु कम केरते भोल्हे ते अक नियो गालो, ते दूइयोवं तैड़ी रालो। 41 ते दूई कुआन्शां ढ्लाट पीती भोल्ही त अक नी गाली ते होरि तैड़ी राली। 42 तुस बींझ़े राथ किजोकि तुस न ज़ानथ कि तुश्शो प्रभु केइस एजनोए। 43 पन याद रखा, अगर घरेरे मालिके पतो भोए कि च़ोर कताली एजनो, त तै बींझ़े बिशेथो ते अपने घरे च़ोरी न भोने देथो। 44 एल्हेरेलेइ तुस भी तियार राथ, किजोकि ज़ैखन तुसन शक भी नईं भोनी त मैन्हेरू मट्ठू यानी अवं एज्जी गानोईं।"

45 "ईमानदार ते अक्लमन्द नौकर तैसेरो ज़ेरोए, ज़ेसेरो मालिक तैस अपने नौकरन पुड़ पुछ़नो गन्ने रख्खे ताके तै तैन मौके पुड़ रोट्टी दे, ते फिरी दूर सफरे पुड़ गाए। 46 तै नौकर धने ज़ेसेरो मालिक एइतां तैस करां एरू ज़ेरू केरतो लाहे।" 47 अवं तुसन सेइं सच़ ज़ोताईं कि तै मालिक अपने घरेरो सारो अधिकार तैसेरे सुपुर्द केरेलो। 48 "पन अगर तै बुरो नौकर अपने दिले मां एन ज़ोए कि मेरे मालिकेरे एजने हेजू बड़ू च़िरे। 49 ते अपने सैथन मारने कुटने ते शरैपण सेइं खाए ते पीए। 50 त तैसेरो मालिक कोस्कोई एरी दिहैड़ी एज्जे ज़ेइस तैस नौकरे उमीदे न भोए, ते तैसेरो मालिक वापस एज्जी गाए। 51 ते मालिक तैस पक्‍की सज़ाह देलो, ते तैसेरो हिस्सो पाखंडी लोकन सेइं साथी भोल्हो, ज़ैड़ी लेरां देनी ते दंत च़ापने भोल्हे।"