1 यीशु तैना हछे लोक लेइतां एक्‍की पहैड़ी पुड़ च़लो जेव, ते ज़ैखन तै शिखालनेरे लेई बिश्शो त तैसेरे चेले तैस कां आए। 2 तैखन यीशु तैन लोकन शिक्षा देने लगो,

3 "परमेशर तैन लोकन बरकत देते, ज़ैना ज़ानतन कि तैन परमेशरेरी ज़रूरते,

किजोकि तै तैन पुड़ राज़ केरेलो।

4 परमेशर तैन लोकन बरकत देते, ज़ैना दुखी आन,

किजोकि परमेशर तैन तसल्‍ली देलो।

5 परमेशर तैन लोकन बरकत देते ज़ैना नम्र आन,

किजोकि परमेशर तैन, तैना सैरी बरकतां देलो ज़ैन केरो तैनी वाधो कियोरोए।

6 परमेशर तैन लोकन बरकत देते, ज़ैना परमेशरेरी नज़री मां रोड़ी गल्‍लां केरनेरी बड़ी इच्छा रखतन, (ज़ेन्च़रे कोई ढ्लुखोरो खाने पीनेरी इच्छा रखते)

तैन परमेशर अपनि मेर्ज़ी पुड़ च़लनेरे लेई शक्ति देते।

7 परमेशर तैन लोकन बरकत देते, ज़ैना दया केरतन,

किजोकि परमेशर भी तैन पुड़ दया केरेलो।

8 परमेशर तैन लोकन बरकत देते, ज़ैन केरे मन साफ आन,

किजोकि तैन परमेशर दर्शन देलो।

9 परमेशर तैन लोकन बरकत देते, ज़ैना शैनतरां कम्मां केरतन,

किजोकि तैन जो परमेशरेरे बच्‍चे ज़ोले।

10 परमेशर तैन लोकन बरकत देते, ज़ैना परमेशरेरी नज़री मां रोड़ि गल्‍लां केरनेरे वजाई सेइं सताए गातन,

किजोकि परमेशर तैन पुड़ राज़ केरते।"

11 "परमेशर तुसन बरकत देलो, ज़ैखन लोक तुसन मेरे चेलो भोनेरे वजाई सेइं तुश्शी तुहीन केरन ते स्तान ते झूठ ज़ोइतां हर किसमेरी बुरी गल्‍लां तुश्शे बारे मां ज़ोन। 12 तैखन तुस खुशी रेइयथ ते मघन भोइयथ, किजोकि परमेशरे ज़ैन इनाम सुर्गे मां तुश्शे लेई रखेरूए तैन बड़ू बड्डूए, किजोकि लोकेईं बड़े पेइले तैना नबी भी एन्च़रे स्तावरे थिये।"

13 "तुस इस दुनियारे लोकां केरे लेई लूनेरे ज़ेरे आथ, पन अगर लूनेरो सुवाद च़ेलि गाए, त फिरी दुबारां केन्च़रे तैसेरो सुवाद वापस आनेले? फिरी तैन कोन्ची कम्मेरू न राए, सुवाए बेइरोवं शारनेरां ते लोकां केरे पांवेइं सेइं ढ्लेन्च़ोनेरां।"

14 "तुस इस दुनियारे लोकां केरे लेई लौअरे ज़ेरे आथ। ज़ैन नगर पहाड़े पुड़ बसते तैन कधे भी छ़ेप्पी न सके। 15 लोक बलतो दीयो हेटी मां न रखन, पन तैस उच्‍ची ठैरी रखतन ताके घरेरे सैरी मैन्हन लौ पुज़्ज़े। 16 ते एन्च़रे तुश्शी लौ मैन्हु केरे सामने एरी चमके, ताके तैना तुश्शां रोड़ां कम्मां हेरतां तुश्शे सुर्गेरे बाजेरी तारीफ़ केरन।"

17 "एन न समझ़ा कि अवं मूसेरो कानून या नेबी केरे किताबन मां लिखोरी गल्‍लां रद केरने एवरोईं। अवं तैन रद केरने नईं बल्के पूरी केरने एवरोईं। 18 किजोकि अवं तुसन सेइं सच़ ज़ोताईं, कि ज़ांतगर धरती त अम्बर खतम न भोए, तांतगर परमेशरेरे कानूने मरां अक मात्रा या बिंदी भी न टलेली, ज़ांतगर सब किछ लिखोरू पूरू न भोए। 19 एल्हेरेलेइ ज़ै कोई इन निकड़े करां निकड़े हुक्मन मरां केन्ची एक्‍की ज़ेरे ट्लोड़ते ते होरन भी एन्ने केरनू शिखालते, तै सुर्गेरे राज़्ज़े मां सेब्भन करां निकड़ो भोल्हो, पन ज़ै तैन हुक्मन पुड़ अमल केरते ते होरन भी एन हुक्मन पुड़ च़लनेरे बारे मां शिखालते त तै सुर्गेरे राज़्ज़े मां बड्डो भोल्हो। 20 किजोकि अवं तुसन सेइं ज़ोताईं कि ज़ांतगर तुस शास्त्री ते फरीसी लोकन करां रोड़े च़ारे कानूने न मन्नेले, तांतगर तुस सुर्गेरे राज़्ज़े मां दाखल न भोइ सकतथ।"

21 "तुसेईं शुनेरू थियूं कि परमेशरे इश्शे दादे-पड़दादन सेइं ज़ोवरू थियूं, ‘खून नईं केरनो, ते ज़ै खून केरेलो त तैस आदालत सज़ाह देली।’ 22 पन मेरू ज़ोनू एने कि ज़ै कोई अपने ढ्लाए पुड़ क्रोध केरते, परमेशर तैसेरो न्याय केरेलो, ते ज़ै कोई अपने ढ्लाए जो निकम्मो ज़ोते त तैस भी महासभा मां जुवाब देनो पेनोए, ते ज़ै कोई अपने ढ्लाए जो ‘बेवकूफ’ ज़ोलो त परमेशर तैस नरकेरे अग्गरी सज़ाह देलो। 23 एल्हेरेलेइ अगर तू अपनि च़ढ़तल मन्दरे मां आनस, ते तैड़ी तीं याद एज्जे कि मीं अपने ढ्लाए सेइं किछ गिलोए। 24 त तू अपनि च़ढ़तल बलिदान च़ाढ़नेरि ठैरी पुड़ छ़ेडतां पेइले अपने ढ्लाए सेइं मेल-मलाप केरां, फिरी अपनि च़ढ़तल च़ैढ़ां। 25 अगर कोई मैन्हु तीं पुड़ दाओ केरतां तीं आदालती मां नेनो चाते, त तू बत्तां तैस सेइं मेल-मिलाप केरां न त तैनी तू हाकिमे कां खड़ो केरनोस, ते तैनी तू सिपाहीएरे हवाले केरनोस ते सिपैहिए तू कैद केरतां छ़डनोस। 26 अवं तुसन सेइं सच़ ज़ोताईं कि ज़ांतगर तू पाई-पाई न देलो त तांतगर तैट्ठां छुट्टी न सकेलो।"

27 "तुसेईं शुनेरू थियूं, कि ई हुक्म दित्तोरो थियो, ‘बदमाशी नईं केरनि।’ 28 पन अवं तुसन इन भी ज़ोताईं कि ज़ै कोई केन्ची कुआन्शी पुड़ गेन्दी नज़रां सेइं तकते, तैनी अपने दिले मां पेइली तैस सेइं बदमाशी केरि छ़डी। 29 अगर तेरी देइनी अछ़ तीं पाप केरनेरे लेई ठोकर खुवाए, त तैस केढतां शार, किजोकि तेरी पूरी जान नरके मां छ़ड्डे गाने करां तेरे लेई एन्ने रोड़ूए कि तेरी जानी मरां अक अंग नाश भोए 30 अगर तेरो देइनो हथ तीं पाप केरनेरे लेई ठोकर खुवाए त तैस केटतां शार, किजोकि तेरी पूरी जान नरकेरी अग्गी मां गाने करां तेरे लेई एन्ने रोड़ूए कि तेरी जानी मरां अक अंग नाश भोए।"

31 "एन भी ज़ोवरू थियूं, ‘ज़ै कोई अपनि कुआन्श शारे त एन ज़रूरीए कि फारख्ती लिखतां हावाले केरे।’ 32 पन अवं तुसन सेइं ज़ोताईं, कि ज़ै कोई अपने कुआन्शी बदमैशरे अलावा होरि केन्ची गल्‍ली पुड़ फारख्ती दे, त तै तैस करां बदमाशी करावाते। ते ज़ै कोई तैस शैरोरी कुआन्शी सेइं ड्लाह बनाते, त तै भी तैस सेइं बदमाशी केरते।"

33 "तुसेईं शुनोरू, कि ई हुक्म दित्तोरो थियो, ‘झूठी कसम नईं केरनि, पन कसम प्रभुएरे लेई पूरी केरथ।’ 34 पन अवं तुसन सेइं ज़ोताईं कि कधे कसम न केरथ, न सुर्गेरी, किजोकि तै परमेशरेरो तखत आए। 35 न ज़मीनरी किजोकि परमेशर तैड़ी पव रखते, ते न यरूशलेम नगरेरी किजोकि तैन महा राज़ां केरू नगर आए। 36 ते न अपने दोग्गेरी कसम केरथ, किजोकि तुस अपनो अक बाल भी छ़ित्तो या कालो न केरि सकतथ। 37 पन हांएरी ठैरी हाँ ते नाएरी ठैरी न ज़ोथ, किजोकि ज़ैन किछ एस करां जादे तैन बुरैई यानी शैतानेरे पासेरां आए।"

38 "तुसेईं शुनोरूए, कि मूसेरे कानूने मां लिखेरूए, कि अछ़रे बदले अछ़ ते दंतेरे बदले दंत। 39 पन अवं तुसन सेइं ज़ोताईं कि, बुरे मैन्हु करां बदलो न नेइयथ। अगर कोई तेरे देइनी खैखोड़ी पुड़ थप्पड़ बालो त तू बांए पासो भी तैसेरे पासे रेखां। 40 ते अगर कोई मुकदमो केरतां तेरी कमीज़ नेनी चाए त तू कोट भी तैसेरे हवाले केरां। 41 ते अगर कोई सिपाही तीं भारो छ़ूने अक मील नेने चाए त तू दूई मील गेइयां। 42 ज़ै कोई तीं करां किछ मग्गे, तैस दे। ते ज़ै कोई तीं करां ओधार मग्गे त तुत्तर न फिरेइयां।"

43 "तुसेईं शुनोरूए, कि मूसेरे कानूने मां लिखेरूए, कि ‘अपने पड़ोसी सेइं अपनो ज़ेरो प्यार केरथ ते दुश्मने सेइं बैर रेखथ।’ 44 पन अवं तुसन सेइं ज़ोताईं, कि अपने दुश्मन सेइं प्यार केरा, ते ज़ैना तुसन सतातन तैन केरे लेई प्राथना केरा। 45 ज़ैस सेइं तुस अपने सुर्गेरे बाजी केरे बच्‍चे बेनि सकतथ, ज़ै अपनो दिहाड़ो अपने रोड़े लोकन पुड़ चमकाते ते बुरे लोकन पुड़ भी, ते धेर्मी लोकन पुड़ झ़ड़ी देते ते बुरे लोकन पुड़ भी। 46 किजोकि अगर तुस तैन्ने लोकन सेइं प्यार केरथ ज़ैना तुसन सेइं प्यार केरतन त तुसन कुन इनाम मैल्हेलू? कुन चुंगी घिन्ने बाले भी एन्ने न केरन?" 47 "ते अगर तुस सिर्फ अपने ढ्लान जो नमस्कार ज़ोथ, त तुस होरन करां जादे कुन केरतथ? कुन गैर कौमां केरे लोक ज़ैना परमेशरेरे कानूने न मन्न तैना भी एरू न केरन? 48 तुसन तैन लोकन सेइं प्यार केरनेरी ज़रूरत आए, ज़ैना तुसन सेइं प्यार न केरन, एन्च़रां तुस सिद्ध भोल्हे ज़ेन्च़रे सुर्गे मां रानेबालो तुश्शो बाजी सिद्ध आए।"