1 ज़ैखन तै पहैड़ी पुड़ां उन्ढो अव, त बड़े लोक तैस पत्पती च़ले। 2 तैखन एक्‍की कोढ़े यीशु कां ज़ैन्धु केरे भारे बिशतां तैस कां मिन्नत केरतां ज़ोवं, "हे प्रभु अगर तू चास त मेरू कोढ़ बज़्झ़ेई सकतस।" 3 यीशुए तैस पुड़ हथ रेखतां ज़ोवं, "अवं चाताईं, तू बज़्झ़ोस।" ते तै कोढ़ी तैखने साफ भोइ जेव। 4 यीशुए तैस सेइं ज़ोवं, "हेर, एस गल्‍लरे बारे मां केन्ची सेइं किछ न ज़ोइयां। बल्के अपनो आप याजके हिरा। तैल्‍ला पत्ती, तू अपने बेज़्झ़ोनेरे वजाई सेइं च़ढ़तल च़ाढ़, ज़ेसेरे बारे मां मूसा नेबे कानूने मां हुक्म दित्तोरोए, ताके लोकन पतो च़ले कि तू बेज़्झ़ोरोस।"

5 ज़ैखन यीशु कफरनहूम नगर मां अव त अक रोमी सूबेदार ज़ै 100 सिपेहिन केरो अफसर थियो, तैनी यीशु कां एइतां बिनती की। 6 "हे प्रभु, मेरो नौकर अधरंगेरो मरीज़ घरे बिमार भोवरोए, तै च़लनेरे काबल नईं, ते तै बेड़ि तकलीफी मांए।" 7 तैनी तैस सेइं ज़ोवं, "अवं एज्जेलो ते तैस बज़्झ़ेइलो।" 8 सूबेदार* ज़ोने लगो, हे प्रभु अवं एस काबल नईं कि तू मेरे घरे मां एज्जी सकस; पन तू अगर सिर्फ ज़बाना सेइं ज़ोस त मेरो नौकर बेज़्झ़ोलो। 9 किजोकि अवं भी केन्चेरे अधिकारे मां कम केरताईं, ते सिपाही मेरे अधीन आन, ते ज़ैखन एक्‍की जो ज़ोताईं कि गा, त तै गाते ते होरि जो ज़ोतां एई, त तै एइते, ते अपने सेवके जो ज़ोताईं इन कम केर त तै केरते।

10 यीशु एन शुन्तां हैरान रेइ जेव, ते एप्पू पत्ती च़लनेबाले मैन्हन सेइं ज़ोने लगो, "अवं तुसन सेइं सच़ ज़ोताईं, कि मीं इस्राएल मुल्खे मां इस गैर यहूदी मैन्हेरो ज़ेरो मैन्हु नईं लवरो ज़ै मीं पुड़ एत्रो विश्वास केरे।" 11 अवं तुसन सेइं ज़ोताईं कि बड़े गैर कौमां केरे लोक पूर्बेरां ते पछमेरां एइतां अब्राहमे, इसहाक ते याकूबे सेइं साथी परमेशरेरे राज़्ज़ेरी धामी मां शामल भोल्हे। 12 पन इस्राएली लोक बेइर आंधरे मां छ़ड्डे गाले ज़ैड़ी तैना लेरां देते ते दंत च़ापते राले। 13 ते यीशुए तैस सूबेदारे सेइं ज़ोवं, "घरे जो गा, ज़ेरो तेरो विश्वासे तेरे लेई तेरहु भोल्हु," ते तैखने तैसेरो नौकर बेज़्झ़ोइ जेव।

14 ज़ैखन यीशु पतरसेरे घरे जेव, त तैनी हेरू, कि पतरसेरी शिखी बड़ो भुखारे, ते तै लेटोरी थी। 15 तैनी तैसारो हथ ट्लातो ते अकदम तैसारो भुखार उतरी जेव, ते तै खड़ी उट्ठतां तैसेरी सेवा केरने लग्गी। 16 ज़ैखन ड्लोझ़ भोइ त लोकेईं बड़े बिमार, ज़ैन पुड़ भूतां केरो सायो थियो तैस कां आने, ते तैनी तैना भूतां अपने वचने सेइं कढां, ते सारे बिमार बज़्झ़ाए। 17 ताके यशायाह नेबेरी ज़ोवरी तै गल पूरी भोए कि, "तैनी एप्पू इश्शी कमज़ोरी हटेइ ते इश्शी बिमैरी भी मुकेइ।"

18 यीशुए अपने च़ेवरे पासन मैन्हु केरि भीड़ लेइतां अपने चेलन, गलील समुन्दरे पार गानेरो हुक्म दित्तो। 19 ज़ैखन तैना पार गानेरी तियारी केरने लग्गे, त तैखन अक शास्त्री मैन्हु तैस कां एइतां ज़ोने लगो, "गुरू, तू ज़ेरहां भी गालो त अवं तीं पत्ती च़लेलो।" 20 यीशुए तैस जो ज़ोवं, "लौई केरि कुढां, ते अम्बरेरे च़ुड़ोलू केरे आल्हे भोतन, पन मैन्हेरे मट्ठे यानी मीं कां कोई ठार नईं ज़ैड़ी अवं झ़ुल्‍ली सेखी।" 21 चेलन मरां एक्‍के होरे तैस सेइं ज़ोवं, "हे प्रभु, मीं घरे गानेरी अज़ाज़त दे, मेरे बाजेरे मरनेरां बाद अवं तैस देबतां एज्जेलो ते फिरी तीं पत्ती च़लेलो।" 22 यीशुए तैस जो ज़ोवं, "तू मेरो चेलो बन ते मीं पत्ती च़ल, ते ज़ैना लोक आत्मिक तरीके सेइं मर्रेन तैन अपने मैन्हु मरने बलगने दे।"

23 ज़ैखन यीशु किश्ती मां च़ढ़ो त तैसेरे चेले भी तैस सेइं साथी च़ले। 24 ते अचानक समुन्दरे मां अक बड़ो तूफान अव ते किश्ती छ़ेलहेईं सेइं छ़पने लग्गी ते यीशु तैस मां झ़ुल्‍लोरो थियो। 25 तैखन चेलेईं तै बींझ़ेइतां तैस सेइं ज़ोवं, "हे प्रभु, असन बच़ा! अस त डुबने लगोरेम!" 26 तैनी तैन सेइं ज़ोवं, "हे घट विश्वासे बालाव, तुस किजो डरतथ?" तैखन तैनी खड़े उट्ठतां तूफान त समुन्दर डांटो, तैखने तूफान रुकी जेव त समुन्दर बड़े शांत भोव। 27 लोक हैरान भोइतां ज़ोने लग्गे, "ऐह मैन्हु कौन आए कि तूफान त समुन्दर भी एसेरो हुक्म मनतन!"

28 ज़ैखन तै गलील समुन्दरेरे पार, गिरासेनी इलाके मां पुज़ो, त दूई मैन्हु ज़ैन पुड़ भूतां केरो सैयो थियो कब्रन मांमेइं यीशु कां मिलने आए। तैना एत्रे निग्गर थिये, कि कोई भी तैस बत्तां निस्सी न थियो बटतो। 29 तैना ज़ोरे-ज़ोरे चिन्डां मारने लग्गे ते ज़ोने लग्गे, हे परमेशरेरा मट्ठां, तीं असन सेइं कुन कम्मे? कुन तू वक्ते करां पेइले असन नरके मां छ़डने एवरोस? 30 तैन करां दूर सूरां केरो अक बड़ो घान च़रने लगोरो थियो। 31 भूतेईं यीशु कां मिन्नत केरतां ज़ोवं, "अगर तू असन कढने चातस त उन सूरां केरे घाने मांजो भेज़।" 32 तैखन यीशुए ज़ोवं, "गाथ," तैना भूतां तैट्ठां निस्तां तैन सूरां केरे घाने मां जेआं, ते सूरां केरो सारो घान उछ़ड़तो-उछ़ड़तो डैल्‍ले मां गेइतां सारे सूर मेरि जे। 33 तैखन सूरां केरे च़ारनेबालेईं एन हेरू, त तैना डेरि जे, ते तैनेईं नगरेरे लोकन सेइं सारो बिस्तार दित्तो, ते ज़ैन पुड़ भूतां केरो सैयो थियो तैन केरो हाल भी शुनाव। 34 तैस नगरेरे सारे लोक यीशु सेइं मिलनेरे लेई आए ते यीशु लेहितां लोक मिन्नत केरतां ज़ोने लग्गे, इश्शे इलाके मरां च़लो गा।