मत्ती 9

मर्री कुई ते बिमार कुआन्श

18 यीशु एन गल्‍लां हेजू मसां ज़ोने लगोरो थियो, त प्राथना घरेरो अक प्रधान अव ते यीशु कां मथ्थो टेकतां ज़ोने लगो, मेरी कुई मेरि जेवरीए, "पन तू अगर एइतां तैस पुड़ हथ रख्खस त तै हुन्ना ज़ींती भोइ गानीए।" 19 यीशु तैस सेइं साथी च़लो जेव, ते चेले भी तैस सेइं साथी जे। 20 ते एरू भोवं कि अक कुआन्श भी थी, ज़ैस 12 सालां केरि खून च़लनेरी बिमारी थी। तैसां यीशु पत्पती एइतां तैसेरे चोगे सेइं हथ लाव। 21 किजोकि तै अपने दिले मां एन ज़ोती थी, कि अगर अवं यीशुएरे चोगे सेइं हथ लाएली त अवं बेज़्झ़ोईं गानीं। 22 यीशुए बेदलोइतां तैस कुआन्शरे पासे तक्‍कू ते ज़ोवं, "हे कुइये, हिम्मत रख, तेरे विश्वासे सेइं तू बेज़्झ़ोरोस" ते तै तैखने बेज़्झ़ोइ जेई। 23 ज़ैखन यीशु तैस प्रधानेरे घरे पुज़ो, त लोक नगारो बज़ाते ते लेरां देंते लाहे। 24 तैखन यीशुए तैन लोकन सेइं ज़ोवं, "दूर भोथ, किजोकि कुई मर्री नईं, बल्के झ़ुल्‍लोरीए।" एन शुन्तां तैना लोक हसने लग्गे। 25 पन ज़ैखन लोक तैट्ठां दूर कढे, त यीशुए अन्तर गेइतां कुइयरो हथ ट्लाव, त तै ज़ींती भोइ। 26 ते एस गल्‍लरी खबर सारे इलाके मां फैली जेई।