1 दारा राज़ेरी हुकूमतरे च़ेवरोवं सालेरे किसलेव नंव्वेरे महीनेरे च़ेवरोवं दिहाड़े यहोवा फिरी जकर्याहे सेइं ज़ोवं। 2 बेतेल नगरेरे रानेबाले शरेसेर ते रेगेम्मेलेक, एल्हेरेलेइ भेज़ोरे थिये कि यहोवा कां बिनती केरन, 3 ते सेना केरे यहोवारे भवनेरे याजकन ते नेबन भी एन पुछ़न, "कुन असेईं बरत रेखतां लेरां दित्तोरी लोड़न ज़ेन्च़रे कि केत्रे सालां केरे देंते असां पंच़ोंव महीने मां केरते एवरेन?"✝ 4 तैखन सेना केरे यहोवा मीं सेइं ज़ोवं; 5 "सब यहूदारे सारे आम लोकन सेइं ते याजकन सेइं ज़ो, कि इन 70 सालां केरे दरमियान ज़ैखन पंच़ोंव ते सत्तोवं महीने मां बरत ते मातम केरते थिये, तैखन कुन तुस सच़्च़े मेरे लेई बरत रखते थिये? 6 ते ज़ैखन तुस खातथ ते पीतथ, त कुन तुस अपने लेई न खाथ, ते कुन अपने लेई न पीथ? 7 कुन ऐह तैए वचन नईं, ज़ै यहोवा पुराने ज़माने मां नेबी केरे ज़िरिये तैस मौके ज़ोतो राव ज़ैखन यरूशलेम नगर अपने च़ेवरे पासां केरे नगरन समेत चैनी सेइं बस्सोरू थियूं, ते दक्षिण मुल्ख ते बुनियों मुल्ख भी बस्सोरो थियो?"

8 फिरी यहोवा परमेशरे जकर्याहे सेइं ज़ोवं, "सेना केरे यहोवाए एन ज़ोवरूए, 9 सच़्च़ैई सेइं न्याय केरा, ते हर अक मैन्हु एक्‍की होरि पुड़ दया ते महरबानी केरतां कम केरे, 10 न त विधवा कौन्शी पुड़ अंधेर केरा, ते न अनाथ बच्‍चन पुड़, ते न परदेशी पुड़, ते न गरीब लोकन पुड़; ते न अपने-अपने मने मां एक्‍की होरि नुकसान पुज़ानेरी कोशिश केरा।" 11 पन तैन लोकेईं मन लानो न चाव, ते ज़िद की, ते अपने कन बन्द किये ताके शुन्नी न सकन। 12 बल्के तैनेईं अपनो दिल एल्हेरेलेइ घोड़ेरो ज़ेरो सखत कियो, कि तैना तैस कानूने ते वचन न मेन्नी सखन, ज़ैना सेना केरे यहोवाए एपनी आत्मारे ज़िरिये पुराने वक्तेरे नेबन केरे ज़िरिये ज़ोवरे थिये। एस वजाई सेइं सेना केरे यहोवारी तरफां तैन पुड़ बड़ो क्रोध भड़को। 13 सेना केरो यहोवा एन ज़ोते, "ज़ेन्च़रे मेरे ज़ोने पुड़ तैनेईं न शुनू, तेन्च़रे तैन केरे ज़ोने पुड़ भी अवं भी न शुनेलो; 14 बल्के अवं तैन्न तैन सैरी कौमन मां ज़ैन तैना न ज़ानन, ऐंधरे ज़िरिये तितर-बितर केरेलो, ते तैन केरो मुल्ख तैन केरि वजाई सेइं एरहो बेरान भोइ गालो, कि तैस मां कोई एज्जी-गेइ न बटेलो; एस तरीके सेइं तैनेईं अक हरो भरो मुल्ख बेरान केरि छ़डो।"