1 Mɛlu mɛtɛn nɛ wat ɛsok nɛ dwoo ɛbyoŋ ɛ Pak kum, Yezu eezɛtɔ́ pɛ Bhetani, dɛl ɛ Lazaad, mot nagwyɛ, da nyɛ ɛ́ gomal nyɛ ɔ. 2 Tin, bɛ eezɛdjaab edee étɛp Yezu. Maat ɛ́ nadi esa mɛsa mɛ ɛkɛkaa edee. Lazaad nadi ɛ́ tɔ sama bot ɛ nadi kɔ mesa nɛ Yezu ɔ. 3 Wɔ gwaa, Maali zokanɔɔ pes litɛlɛ tɔɔɔ nɛ mɛnanas na boo mɛtaŋ nadi edjóoaa naad* ɛ. Nyɛ eezɛkɔ ɛlas ɛ tak, so kɔ mɛko ɛ Yezu. Bhii tak, nyɛ moo esuŋal yɛ nɛ bhoo lo’ɛ. Tin, mɛnuub mɛ mɛnanas menek zokadjala ndjaa djas. 4 Mot ngɔt tɔ bɛdjekel ɛ Yezu, Yudas Iskaliɔt, mot aakɛka Yezu ɔ, eezɛke náá: 5 «Étɛp yé mena di ààbɔmsa mɛnanas mɛ tak nɛ boo mɛtaŋ* da nɔɔ edhenye bɛdhet-ɛtɛn nɛ wat e epata (300) tak, djɛ nɛ bɛdjel ɛ bot?» 6 Nyɛ nabɛ ɛ́ ààke deenek, etɛɛ náá, nyɛ nadi egek bɛdjel ɛ bot ghoŋ. Nyɛ nadi eke deenek ɛ́, etɛɛ náá, nyɛ nadi ɛ́ mot djii. Nyɛy ɛ́ nadi emɛt kpa epata. Nyɛ nadi edjii epata ee bot nadi ewa tɔ tak ɛ. 7 Tin, Yezu ɛ́ boobɔɔza nɛ nɔɔ náá: «Betka moma yak gwyem, etɛɛ náá, nyɛ nakwom mɛnanas menek ɛ étɛp dwoo mɛdela mam. 8 Etɛɛ náá, bi nɛ bɛdjel ɛ bot ɛ́ waadi é di wat mɛlu djas. Yɛ kabɛ mam ɔɔ, bi aanàkwaakabaadi sama nɛ nam mɛlu djas.»

9 Bɛtɛ nɛ mɛdhuu mɛ bot ɛ mbyak eYuda zokazɛgwak náá, Yezu nadi ɛ́ pɛ Bhetani. Bɛ naazɛtɔ́, bɛ nabɛ ɛ́ ààtɔ́ étɛp ɛkɛboma nɛ Yezu nyɛy nyɛ ɛmet. Bɛ nabaatɔ́ ɛ́, étɛp ɛkɛbee Lazaad, mot Yezu nagomal ɔ. 10 Tin, eboo bɛghaa-Zɛɛb zokabaagwakel náá, ye goka ɛ́, bɛ gó dɔɔ nɛ Lazaad. 11 Etɛɛ náá, yɛ ɛ́ kɔ ɛsu ɛ lɛ ɛ eYuda ɛbuɛpe nadi edus tɔ ɛdhuu ɛ lɔɔ étɛp ɛdum ɛ koŋ nɛ Yezu.

12 Tɔ yii mɛlem, zukamwaa nɛ mot nazyɛ étɛp ɛbyoŋ ɛ Pak ɔ zokagwak náá, Yezu nadi ezyɛ pɛ Yeluzalɛm. 13 Wɔ gwaa, bɛ zokawyis nɛ mɛmbɔ mɛ mɛbhi é mɛmbɔ.* Bɛ eezɛdus kɔ ghaada, étɛp ɛkɛboma nɛ Yezu. Ɛni ɛ Yezu tɔ Yeluzalɛm dáa mɛkoozi

Bɛ eezɛni tɔ ghaada sok bhwoob ɛ Yezu, é tsim náá: «Duu nɛ Zɛɛb! Zɛɛb goka ɛ́ nɛ ɛsɛɛ mot di ezyɛ nɛ din ɛ Ghɛŋ ɔ mɛtel. Zɛɛb sɛɛ mbɛɛ mɛtel pɛ kɔ Mɛkoozi mɛ Yisalaɛl!»

14 Tin, Yezu eezɛbela mɔɔ swooz an. Nyɛ eezɛdisi kɔ lɛ dáa Ekwyala e Mɛkana ɛ Zɛɛb di elɛɛ ɛ:

15 «Nàbem ba, wɔy, ɛsyees ɛ ghaada Siyɔŋ!

Beea, mɛkoozi mɔ ɛpezyɛ,

ndiindel kɔ mɔɔ swooz an*.»

16 É di’enek, bɛdjekel bɛ nabɛ ɛ́ àànyɔ ɛtiibal etɛp binek. É sok Zɛɛb naniigal Yezu tɔ duma ɛ, tin ɛ bɛ nakazɛtaala náá, Ekwyala naazelɛɛ etɛp binek kɔ ɛsu ɛ lɛ. Bɛ nasa ɛ́ esa ee nagoka nɛ ɛsael dum nɛ nɛ ɛ.

17 Bot ɛ nadi lɔɔg wat bɛ nɛ Yezu ɔ, é sok nyɛ nadjóo Lazaad wyis tɔ ɛvit, da nyɛ ɛ́ gomal nyɛ ɛ, bot ɛ tak moo tin elɛɛ bot esesɛɛ djas nadhaŋ ɛ. 18 Yɛ ɛ́ étɛp tak ɛ mɛdhuu mɛ bot nazyɛ, zɛboma nɛ nɛ. Bot naagwak náá, nyɛ naasa ndem e mɛbwala menek. 19 Tin, eFalizyɛ moo esɔs pak’ɔɔ náá: «Bot eebee náá, bot tokapɛ nɛ ghwyil ɛbaasa dhiiti sonok, etɛɛ náá, bot djas moo ɛ́ bhii koŋ’ɛ!»

20 Bɛdhiiti bot ɛ mbyak eGhɛlɛk, nadi ɛ́ tɔ sama bot ɛ nazyɛ pɛ Yeluzalɛm zɛduwal Zɛɛb tɔ ɛbyoŋ ɔ. 21 Tin, bɛ eezɛtiila pɛ daa Filip mot dɛl Bhɛtsaida pɛ kyee dik Ghalile. Bɔɔ nɛ nɛ náá: «Ghɛŋ, bis ɛpekwyɛl ɛbee Yezu.»

22 Tin, Filip eekɛlɛɛ Andele, bhii tak, bɔɔ djas bɛbá eezɛtɔ́, kɛlɛɛ Yezu. 23 É di’enek, Yezu zɛbɔɔza nɛ nɔɔ náá: «Ɛwala ɛ Zɛɛb aadjɛ Sɛɛŋɛlɛ Mɔn Mot duma ɛ, eezedjala. 24 Mɛ lɛɛ bin ɛ́ etɛp e tsɛɛtsɛ, ndu bhisa ɛ kwyit é bɔs, da yɛ di ààbɔ ɔɔ, yɛ aazodi ɛ́ deenek ààdjɛ ebhum. Yɛ bɛ náá, yɛ eewaaa tɔ bɔs ɔɔ, yɛ waabɔ, da bhii tak, yɛ ɛ́ djɛ ebhum ɛbuɛpe. 25 Mot di ekwyɛl tsik’ɛ ɔ, nyɛ waasu yɛ. Tin, mot ɛ kwyɛl Zɛɛb dhaa dáa nyɛ di ekwyɛl tsik’ɛ kɔ bɔs’ak ɔɔ, mot yenɔk ɛ́ waabaal tsik’ɛ. Nyɛ waadi é di wat bɛ nɛ Zɛɛb kɔm-kɔm. 26 Mot ɛ di ekwyɛl ɛsa mɛsa mam ɔɔ, ye goka ɛ́ náá, mot tak du mɛ. Yɛ ɛ́ deenek ɛ́ mot-mɛsa mam aadi, é di mɛ di ɔ. Yɛ ɛ́ deenek ɛ́ Saagam aadjɛ duu nɛ mot di esa mɛsa mam ɔ.»

27 «É di mena kadi wak nenak’aak, lo’am moo ɛ́ zɛm-zɛm nɛ bɛtɛ nɛ esiiza ɛbuɛpe. Mɛ goka nɛ ɛke dáa? Mɛ ke náá: "Saagam, pɛka mɛ é sa di ekwyɛl ɛzyɛ mɛ é nyel é ɛwala ɛlak nenak’aak?" Tin, yɛ ɛ́ étɛp ɛwala ɛlak ɛ mɛ nazyɛ. 28 Saagam, djɛa din ɛ lɔ duu!» É di’enek, wɔ gwaa gwood wat zɛgék tɔ gwoo náá: «Mɛ naaloozedjɛ yɛ duu. Mɛ ɛpebaadjɛ yɛ duu djɛa sis.» 29 Ɛdhuu ɛ bot ɛ nadi tin, nakwak gwood tak ɔ, moo tin eke náá: «Yɛ ɛ́ ndum bhi!» Bak bot náá: «Yɛ ɛ́ dhiiti fofop ngɔt ɛ lii nɛ Yezu!» 30 É di’enek, Yezu eezɛke nɛ nɔɔ náá: «Gwood yenek ààpagék étɛp’am. Gwood tak gék ɛ́ étɛp’en. 31 Mena mooka ɛ́ é ɛwala bot ɛ bɔs’ak aapɛ́ɛaa ɛ. Deenek, mɛkoozi mɛ bɔs’ak moo zɛsɔaa. 32 Tin, é sok mam aadus kɔ bɔs, da mɛ ɛ́ benaa ɛ, mɛ waadul bot ɛ bɔs djas pɛ daa lam.» 33 Tɔ mɛkpa menek, Yezu nadi elɛɛ ɛ́ kɔkɔ ɛsyee nabɛ náá, nyɛ waagwyɛ ɛ.

34 Tin, mɛdhuu mɛ bot binɔk eezɛke nɛ nɛ náá: «Bis djek tɔ mɛkana mɛ etsi bis ɛ́ náá, Mɛsia aadi ɛ́ nɛ tsik na kɔm-kɔm. Haaa étɛp ye wɔ ke náá, "Sɛɛŋɛlɛ Mɔn Mot aadus kɔ bɔs, da nyɛ ɛ́ benaa pɛ ɛko"? Yenɔk "Sɛɛŋɛlɛ Mɔn Mot" ɛ́ zɛ?» 35 Yezu eezɛbɔɔza nɛ nɔɔ náá: «Gwyɛ ngel dinaa pak’en, étɛp ba mɔɔ ɛwala batsa. Kɛka é di bi dinaa tɔ gwyɛ ngel yenek, ekaab náá, ɛgwyitok ɛzɛkɛbela bin zaka. Etɛɛ náá, mot di ekɛ tɔ ɛgwyitok ɔ, nyɛ ààgu ze nyɛ di etɔ́ ɛ. 36 Dumka koŋ nɛ gwyɛ ngel é sok bi dinaa, bi nɛ yɛ é di wat yenek, etɛɛ náá, bi needi bɔn gwyɛ ngel.»

Bhii nyɛ nalii nɛ nɔɔ deenek ɛ́, Yezu eezɛnɔɔ nyel, tɔ́, kɛsɔwa ɛtsetaɛpe nɛ nɔɔ. 37 Bela náá, yɛ ɛ́ tsɛɛtsɛ náá, nyɛ naasa bɛtɛ nɛ endem e mɛbwala é mis mɔɔ, bɛ nabɛ ɛ́ ààdum koŋ nɛ nɛ. 38 Yɛ ɛ́ deenek ɛ́ etɛp ee ngoolel-Mɛkpa ɛ Zɛɛb Ezayi nalɛɛ ɛ, aabela ɛsuk. Nyɛ nake ɛ́ náá:

«Ghɛŋ, ɛzɛ myaal Mbɛɛ Bhaadal bis goola ɛ?

Ghɛŋ lyaal zɛ ghwyil’ɛ*?»

39 Ngoolel-Mɛkpa ɛ Zɛɛb Ezayi naalɛɛ étɛp yé bot bak di ààdum koŋ nɛ Zɛɛb:

40 «Zɛɛb naasa náá, bɛ di bot ɛ edhim.

Nyɛ naadiyal etsoŋ bɔɔ,

etɛɛ náá, mis mɔɔ needi àànyaasok.

Etsoŋ bɔɔ aanàkwaadjɛ ghwyil ɛmɛt etɛp djas mɛ nasa nɛ nɔɔ ɛ.

Bɛ ààbula dum koŋ nɛ nam,

étɛp mɛ neetsik bɛ*.»

41 Ngoolel-Mɛkpa ɛ Zɛɛb Ezayi nake deenek ɛ́, etɛɛ náá, nyɛ nabɛ ɛ́, nyɛ eebee duma ɛ Yezu. Yɛ ɛ́ étɛp tak ɛ nyɛ nadi elii kɔ ɛsu ɛ lɛ.

42 Ghuna tɔ sama ekukuma eYuda, bɛtɛ nɛ bɛdhiiti nadi edum koŋ nɛ Yezu. Tin, dáa bɛ nadi ekaab náá, eFalizyɛ ɛ́ zɛkɛsɔ bɛ tɔ mendjaa mɛ mendjaala mɛ eYuda ɛ, bɛ nabɛ ɛ́ ààdi elyaal ɛmyaal ɛ lɔɔ popoopwon. 43 Deenek etɛɛ náá, bɛ naadyeebakwyɛl náá, bot duwal bɛ ɛbuɛpe, dhaa-dhaŋak duu Zɛɛb di edjɛ bot ɛ.

44 Yezu eezɛben gwood tuud náá: «Mot ɛ́ dum koŋ nɛ nam ɔɔ, nyɛ ààpadum koŋ nɛ mam mɛ ɛmet. Tin, nyɛ baadum koŋ ɛ́ nɛ mot lwom mɛ ɔ. 45 Mot ɛ́ bee mɛ ɔɔ, nyɛ eebee mot lwom mɛ ɔ. 46 Mam zyɛ kɔ bɔs ɛ́ dáa gwyɛ ngel. Deenek etɛɛ náá, mot aadum koŋ nɛ nam ɔ needi ààdi tɔ ghooghom.

47 Mot ɛ di egwak mɛlyo mam da nyɛ ɛ́ di, ààkɛ dáa mɛkpa mɛ tak di ekwos ɔɔ, ye tok mam di ekwyesal nyɛ ndjɛ sɔs. Etɛɛ náá, mɛ nazyɛ, zɛtsik bot ɛ bɔs. Mɛ nabɛ ɛ́ ààzyɛ, zɛpɛ́ɛ bot ɛ bɔs’ak. 48 Mot ɛ byen mɛ, nyɛ pɛɛ ɛmyaal mɛkpa mam ɔɔ, nyɛ eebela lo mɛsɔ mɛ nyɛ aapɛ́ɛaa dum nɛ tɛp tak ɛ. Yɛ ɛ́ mɛlyo mɛ mɛ di elyo ɛ, aapakwyesal nyɛ ndjɛ sɔs é dwoo Zɛɛb aapɛ́ɛ bot ɛ bɔs ɛ. 49 É di’enek, mɛ aanàkwaalii kɔ ɛkwosak ɛ lam. Etɛɛ náá, Saagam mot nadhis mɛ ɔ, nabɛ ɛ́, nyɛ eedjɛ mɛ ɛlee dum nɛ mɛkpa mɛ mɛ di egoka nɛ ɛlɛɛ ɛ, nɛ etɛp mɛ di egoka nɛ ɛlyo ɛ. 50 Deenek, mɛ nɛ gu náá, mɛtiŋ mɛ nyɛ di edjɛ bot ɛ, djɛ ɛ́ tsik na kɔm-kɔm. Etɛp tak ɛ́ di náá, etɛp ee mɛ di elɛɛ bin ɛ, mɛ dyeebalɛɛ ɛ́ dáa Saagam nalɛɛ mɛ ɛ.»