Lucas 15

Kana mɔn motom nawo, da nyɛ ɛ́ baazɛbelaa ɔ

11 Yezu eebaazɛke náá: «Dhiiti mot nadi ɛ́ nɛ bɔn botom ɛbá. 12 Yɛ ɛ́ dhyeeb tak kazyɛ, zɛke nɛ sɛɛg náá: "Saagam, djɛ mɛ yam ɛkɛɛ lyak di náá, mɛ waaboobela ɛ́, nɛ djheed." É di tak ɛ́, sɛɛg’ɔɔ nazɛkaa ekum bɛ, pak bɔn bɛ bɛbá. 13 Yɛ eezɛkpaa ba mɛlu bhii tak, yɛ ɛ́ dhyeeb kazɛnɔɔ yɛ kyee náá, bɔmsa yɛ, nɔɔ epata e tak, tɔ́ nɛ yɛ pɛ dhiiti kyee dik ɛtsetaɛpe. Penek, wɔ gwaa nyɛ kɛbɔya tɔ mɛdjemel, zɛsaab esa e lyak bɛ. 14 Bhii nyɛ nakazesaab esa bɛ djas ɛ, boo pwom naazɛtuula pɛ kyee dik tak. Nyɛ nakadi ɛ́, nyɛ moo tɔ edjel. 15 Nyɛ ɛ́ boozɛtɔ́, kɛsa mɛsa pɛ daa dhiiti mot kyee dik tak. Mot’enɔk ɛ́ bookyeed nyɛ, nyɛ kɛbaal bɛghwyee tɔ epyeeb bɛ. 16 Nyɛ nadi ɛ́, nɛ gwyes ɛdɛ bhum le kalubye*15.16 kalubye yɛ ɛ́ kɔkɔ mbi le di dhatyee le ebha ɛ. yii bɛghwyee nadi ededɛ ɛ́, ye nakasa ɛ́, nɛ nyɛy ààbɛ nɛ mot djɛ nyɛ yɛ.

17 É di’enek, nyɛ moo tin zibiliii esiiza etɛp e nyel’ɛ. Nyɛy náá: "Bot ɛ di esa mɛsa pɛ daa saagam ɔ, djas ɛ lɔɔ ɛpedɛ edee kat, dhi mam egwyɛ nɛ za wak. 18 Mɛ pookosik pɛ daa saagam, da lɛɛ nyɛ náá: Saagam! Mɛ naasa mesyem sok bhwoob ɛ Zɛɛb, nɛ sok bhwoob’ɔ. 19 Mɛ ààpakabaagoka náá, mɛ djóoaa mɔn’ɔ. Nɔŋa mɛ tyee ngɔt tɔ bot ɛ mɛsa mɔ." 20 Nyɛ eezɛsik pɛ daa sɛɛg.

Dáa nyɛ nadi, nyɛ dinaa ba ɛtsetaɛpe nɛ ndjaŋ ɛ, sɛɛg eezɛbee mɔn, nyɛ ɛ́ boogek nyɛ ghoŋ. Wɔ gwaa Sɛɛg zɛtɔ́ kaab, kɛboma nɛ mɔn, nyɛ eezɛbeedal nyɛ. 21 Mɔn eezɛke nɛ sɛɛg náá: "Saagam, mɛ eesyem sok bhwoob ɛ Zɛɛb, nɛ sok bhwoob’ɔ. Mɛ ààpagoka náá, mɛ djóoaa mɔn’ɔ." 22 Wɔ gwaa sɛɛg zɛke nɛ bot ɛ mɛsa mɛ náá: "Lelka ɛzyɛ mɛ nɛ kaad, lɔbɔ na nyenyɔ-nyɔ. Bétka nyɛ yɛ ɛ. Sɔmka nyɛ ɛsum é djin. Bétka nyɛ ekoko. 23 Kɛ mɛtka mɔɔ ngɔmbɛ na mɛdɛl, da bi ɛ́ gó nyɛ, mena neesaka ɛbyoŋ, 24 etɛɛ náá, mɔn’am nwyak naazegwyɛ, nenak, nyɛ eegom. Nyɛ naazewo, nenak mɛ eebatabela nyɛ." Wɔ gwaa bɛ zɛkan mbɛɛ ɛbyoŋ.

25 É sok tak, mɔn mɛgwyak mɛ nadi ɛ́, pɛ epyeeb. É ɛbula ɛ lɛ, dáa nyɛ nadi nyɛ moo ekunaa nɛ ndjaŋ ɛ, nyɛ kagwak ɛ́ dhok ɛtap, kul nɛ ghom, nɛ mɛzɛŋ. 26 Nyɛ eezɛdjóo dhiiti mot-mɛsa, dji nyɛ náá: "Yenek ɛ́ yaa?" 27 Yɛ ɛ́ mot-mɛsa menɔk kabɔɔza nɛ nɛ náá: "Dhyeeb’ɔ eebula. É di tak, soog ɛ́ boogó mɔɔ ngɔmbɛ na mɛdɛl, etɛɛ náá, mɔn eebula nyel ɛnyɔɛpe." 28 Mɔn mɛgwyak ɛ́ boogwak ɛbuk, nyɛ eezɛbyen ɛni-niak tɔ ndjaa. Yɛ ɛ́ sɛɛg kawyis kɛdjaala nɛ nɛ, étɛp nyɛ neeni tɔ ndjaa. 29 Wɔ gwaa, mɔn zɛbɔɔza nɛ sɛɛg náá: "Gwaka, mɛ moo ɛ́ nɛ zukamwaa nɛ membu mɛ di esa wɔ mɛsa tyee kwom ɛ. Mɛ ààbyen dhiiti lwomel’ɔ wat. Wɔ bee ɔɔ, wɔ dinaa ààpakodjɛ mɛ djɛak ba mɔɔ ngɔmbɛ étɛp mɛ neesa ɛbyoŋ, bis nɛ bɛsɔ bam. 30 Beea, é di mɔn’ɔ nwyak kabula ɔ, nyɛy mot naasaab esa e lyak bɔ djas nɛ boa mɛzɔ ɔ, étɛp’ɛ, wɔ eebatalwom náá, bɛ gó nyɛ mɔɔ ngɔmbɛ na mɛdɛl!" 31 Yɛ ɛ́ sɛɛg kalɛɛ nyɛ náá: "Mɔn’am! Menabɛl ɛ́ di mɛlu djas. Mɛ bee ɛ́ náá, esa ee mɛ di nɛ yɛ djas ɛ, yɛ ɛ́ yɔ. 32 Mena goka ɛ́ nɛ ɛsa tɛtɛ ɛbyoŋ, da mena ɛ́ myaala, etɛɛ náá, dhyeeb’ɔ nwyak naazegwyɛ, nenak nyɛ eegom. Nyɛ naazewo, mos mena eebela nyɛ."»