1 Yezu eezɛke nɛ bɛdjekel bɛ náá: «Dhiiti kum mot nadi ɛ́ nɛ ndɔmbɛ. Bot eezɛlɛɛ kum mot’enɔk náá, ndɔmbɛ yɛ ɛpesaab nyɛ esa. 2 Kum mot tak eezɛdjóo ndɔmbɛ yɛ, nyɛ eezɛke nɛ nɛ náá: "Mɛ ɛpedyeebagwak embee menduk dum nɛ din ɛ lɔ. Pookobaŋa mɛ dáa wɔ di ebaal esa bam ɛ, etɛɛ náá, wɔ aanàkabaadi ndɔmbɛ yam." 3 Ndɔmbɛ eezɛke tɔ lyem’ɛ met náá: "Mɛ sa dáa, dáa ye di náá, kukuma yam moo zɛdɛk esa bɛ é mɛmbɔ mam’aak. Mam ɛ́ di ààbɛ nɛ ghwyil mɛsa mɛ epyeeb’aak, ebeyak nɛ sa mam sen. 4 Mɛ nɛ gu dáa mɛ aasa étɛp bot neemyaal mɛ tɔ mendjaa mɔɔ bhii kukuma yam aadis mɛ é mɛsa ɛ." 5 Tin, nyɛy zokazɛdjóo mot nɛ mot nadi nɛ kola esa e kukuma yɛ ɔ. Nyɛ eezɛke nɛ mot ɛsok náá: "Wɔ ɛ́ nɛ kola kukuma yam edhen?" 6 Nyɛ eezɛbɔɔza náá: "Yɛ ɛ́ etondo e bɛmul mɛ bhum oliv dhet (100)." Ndɔmbɛ eezɛke nɛ mot’enɔk náá: "Lela ɛdisi, ba mɛkana mɔ, kwyala tɔ tak mɛkam-mɛtɛn (50)." 7 Bhis yenɔk, nyɛ eebaake nɛ nwyak tak náá: "Haaa wɔy, wɔ ɛ́ nɛ kola kukuma yam edhen?" Mot tak eezɛbɔɔza náá: "Yɛ ɛ́ eghuudɛ e mɛbhisa dhet (100)". Ndɔmbɛ eezɛke nɛ mot’enɔk náá: "Ba mɛkana mɔ, kwyala mɛkam-mɛtɛn nɛ mɛkam-mɛlɛl (80)." 8 Tin, wɔ gwaa kukuma zokazɛduwal mbee ndɔmbɛ yenɔk dum nɛ mɛsa mɛ etsoŋ nyɛ sa nɛ bot étɛp nyɛ needi ààbyenaa bhii nyɛ aasɔaa é mɛsa ɛ. Etɛɛ náá, bot ɛ bɔs’ak nɛ gu ɛkwyeel pak’ɔɔ dhaa-dhaŋak bot ɛ di ekɛ tɔ gwyɛ ɔ.»

9 Yezu eebaazɛbil náá: «Deenek, mam lɛɛ bin ɛ́ náá, beka ɛsɔ nɛ mɛvu mɛ di ekɔɔ bot kɔ bɔs’ak ɛ. Etɛɛ náá, é di mɛvu menek aadi náá, ye tokapɛ ɔ, Zɛɛb ɛ́ waamyaal náá, bi di tɔ ndjaŋ’ɛ di na kɔm-kɔm. 10 Mot di sosoob tɔ esa e dem ɔ, mot tak ɛ́ waadi pe sosoob tɔ eboo mɛkɛɛ. Mot aadi ààdi sosoob tɔ esa e dem ɔ, nyɛ aanàkwaadi sosoob tɔ eboo mɛkɛɛ. 11 Yɛ bɛ náá, bi nabɛ ààdi sosoob nɛ dáa bi nadi ebe mɛvu mɛ mɛkɔŋ di kɔ bɔs’ak ɔɔ, ɛzɛ aadjɛ bin tɛtɛ mɛvu? 12 Yɛ bɛ náá, bi nabɛ ààgu ɛdi sosoob dum nɛ esa e bot ɛ sis ɔɔ, ɛzɛ aadjɛ bin embɛɛ esa yii di náá, yɛ ɛ́ yebɔ ɛ?

13 Ye tok nɛ mot-mɛsa ngɔt aadi nɛ ghwyil ɛsa mɛsa mɛ ekukuma ebá. Deenek nyɛ waabhina ngɔt, da nyɛ ɛ́ kwyɛl nwyak ngɔt, nɛghu nyɛ kaseya nɛ ngɔt, da nyɛ ɛ́ byasal nwyak mot. Bi tok nɛ ghwyil ɛsa é di wat mɛsa mɛ Zɛɛb nɛ mɛsa mɛ epata.»

14 EFalizyɛ naagwak etɛp ee Yezu nadi elii ɛ djas. Bɛ ɛ́ boozɛni eduk nyɛ etɛɛ náá, elyem bɔɔ naadyeebakwyɛl epata dhaa nyel. 15 Yezu eezɛbɔɔza nɛ nɔɔ náá: «Bi ɛ́ bot ɛ di etelaa mɛnyel é mis mɛ bot náá, bi ɛ́ bot ɛ epiki ɔ. Guka náá, Zɛɛb nɛ gu ebhum e elyem bin. Etɛɛ náá, esa ee bot di ebee náá, yɛ ɛ́ embɛɛ esa ɛ, Zɛɛb bee yɛ ɛ, embee esa é mis mɛ.

16 Ɛwala ɛ etsi ɛ Moiiz nɛ Ekwyala e bɛngoolel ɛ Mɛkpa ɛ Zɛɛb naabɔya, kɛsik é ɛzyɛ ɛ Zaŋ nduuel-bot. Kana é ɛwala lenek, Mbɛɛ Bhaadal Ɛyoŋ ɛ Zɛɛb ɛpegoolaaa, mot nɛ mot goka ɛ́ nyɛ sa yɛ mɛghaaz étɛp ɛbela di tɔ tak. 17 Ye nakoozobɛ náá, gwoo nɛ bɔs ɛ́ nɛ ghwyil ɛdum, tɛp tok. Yɛ kabɛ mɛkpa mɛ etsi ɔɔ, yɛ aanàkwaakodisaa-disak ba mɔɔ ɛkyɛ wat tɔ tak.

18 Motom ɛ pɛɛ myɛl, da nyɛ ɛ́ kɛba dhiiti moma sis ɔɔ, motom tak eesa ɛzɔ. Tin, motom ɛ ba moma nazepɛɛaa é ɛba ɔɔ, nyɛy pe baasa ɛ́ ɛzɔ.»

19 «Ye nabɛ ɛ́ nɛ dhiiti mot ekum. Mot ekum tak nabebɔt ɛ́ embɛɛ ekaad bɛ na eboo mɛtaŋ. Nyɛ nadidi ɛ́ tɔ wolo ndjaa, nyɛ nadedɛ mɛlu djas ɛ́ embɛɛ edee. 20 É ɛniel ɛ ndjaŋ’ɛ, ye nabɛ ɛ́ nɛ dhiiti djel mot nadi edjedjaasi tin ɔ. Din ɛ mot tak nabɛ ɛ́ Lazaad. Nyɛ nabɛ ɛ́ nɛ mɛpyoŋ kpeeeŋ é nyel djas. 21 Djel mot’enɔk nabɛ ɛ́ nɛ gwyes ɛdedɛ bɔɔ eghutu-ghutu edee nadi ekwyit é mesa e mot ekum’enɔk ɛ. Tin, bela náá, bɛbhyɛ nadi ezyɛ, zɛwyiiz mɛpyoŋ mɛ. Mot ekum bɛ nɛ Lazaad mot edjel

22 Tin, djel mot eezɛkpaa nɛ mɛsyee, gwyɛ. Efofop naazɛnɔɔ nyɛ, kɛnɛɛg nyɛ é bhaaz ɛ Abalaam. Wɔ gwaa, mot ekum zokabaazɛgwyɛ yɛ, nyɛy kɛdelaa. 23 Mot ekum tak nadi ezuk ɛbuɛpe tɔ dɛl ɛ edim e bot ɛ nazegwyɛ ɔ. Nyɛ ɛ́ boozɛben mis, nyɛ kabee nɛ ɛtseta ɛ́, Abalaam zɛnɔɔ Lazaad é bhaaz’ɛ. 24 Bhii tak, nyɛ eezɛbo tsim: "Saagam Abalaam! Geka mɛ ghoŋ. Lwoma Lazaad, nyɛ duu djin tɔ mɛdii, da nyɛ ɛ́ zɛtɔlal mɛ ɛtɔ ɛ tak kɔ djem. Etɛɛ náá, mɛ ɛpezuk ɛbuɛpe nɛ mɛgoo mɛ du’ak." 25 Tin, Abalaam eezɛbɔɔza nɛ nɛ náá: "Mɔn’am, taala náá, wɔ naabela bɛtɛ nɛ ekum é sok wɔ nabɛ, wɔ dinaa nɛ tsik ɛ. Yɛ kabɛ Lazaad ɔɔ, nyɛ nabɛ ɛ́ mot mezuk. É di nyɛ di wak’aak, nyɛ ɛpebela yɛ mɛnyɔ. Yɛ kabɛ wɔy ɔɔ, wɔ moo ɛ́ tɔ mezuk. 26 Baabela náá, yɛ ɛ́ nɛ boo guk na dim-dim pak’ena. Etɛɛ náá, mot ɛ kwyɛl ɛtsaal étɛp ɛzyɛ penek ɔɔ, nyɛ aanàkwaak. Baabela náá, mot ɛ kwyɛl ɛdus penek, zyɛ pɛ kak ɔɔ, nyɛ aanàkwaak pe." 27 Mot ekum zokazɛke náá: "Saagam, mɛ ɛpedjaala nɛ nɔ, kyeeda Lazaad tɔ ndjaa saagam, 28 penek, mɛ ɛ́ nɛ bɛdhyeeb ɛtɛn. Nyɛ kɛdul bɛ mɛlɔ ekaab náá, bɛ ɛzɛkɛzyɛ pɛ yak di mezuk." 29 Abalaam eezɛbɔɔza nɛ nɛ náá: "Bɔɔ penek, bɛ ɛ́ nɛ etsi ɛ Moiiz nɛ bɛngoolel ɛ Mɛkpa ɛ Zɛɛb étɛp ɛdul ɛ bɛ mɛlɔ. Bɛ gwak mɛlyo mɔɔ!" 30 Mot ekum eezɛke náá: "Saagam Abalaam, yenek djas aanàkwaadjala! Ye nyɔ ɛ́ náá, mot dus tɔ edim ɔ, da nyɛ ɛ́ kɛlii nɛ nɔɔ, tin ɛ́ bɛ aaswoola mɛfulu mɔɔ nɛ tsɛɛtsɛ." 31 Deenek Abalaam eebaazɛke nɛ nɛ náá: "Bɛ di ààgwak Moiiz nɛ bɛngoolel ɛ Mɛkpa ɛ Zɛɛb ɔɔ, bɛ aanàkwaakomyaal, ye nakoozodi mot dus tɔ edim ɔ."»