1 Ɛbyoŋ ɛ emapa di ààbɛ nɛ leviid, di djóoaa Pak ɛ, nabɛ ɛ́ yɛ eezekunaa. 2 Eboo bɛghaa-Zɛɛb nɛ bɛghaŋ ɛ mɛkana mɛ etsi nadi esaa mɛpek étɛp bɛ neemɛt Yezu, etɛɛ náá, bɛ neegó nyɛ. Tin, bɛ nadi ekaab zukamwaa nɛ mot nadi tin ɔ.

3 Tin, Satan eezɛni tɔ bum lyem ɛ Yudas mot di edjóoaa Iskaliɔt ɔ, ngɔt tɔ bɛdjekel kam nɛ bɛbá ɛ Yezu. 4 Yudas naazɛtɔ́ pɛ daa eboo bɛghaa-Zɛɛb nɛ bot ɛ di kɔ elo e bɛmbaalel ɛ kok Ndjaa-ebuwa ɔ, étɛp nyɛ neelɛɛ bɛ dáa nyɛ aasa étɛp ɛka bɛ Yezu ɛ. 5 Tin, bot ɛ di kɔ elo e bɛghaa-Zɛɛb ɔ naadyeebamyaala. Wɔ gwaa, bɛ zɛkɛk Yudas epata. 6 Yudas eezɛmyaal, nyɛ moo tin esaa mɛpek mɛ nyɛ ka bɛ Yezu gha tɔ syaab ekaab náá, mɛdhuu mɛ bot ɛ́ ɛzɛkɛgu.

7 É dwoo ɛbyoŋ ɛ emapa di ààbɛ nɛ leviid ɛ, dwoo ebhata e Pak di ekaaa é buwa ɛ eezɛkum. 8 Yezu eezɛkyeed Pyɛɛd bɛ nɛ Zaŋ pɛ sok. Nyɛy nɛ nɔɔ náá: «Tɔ́ka, kɛkoobalka mena edee e ɛbyoŋ ɛ Pak.» 9 Tin, bɛ eezɛdji Yezu náá: «Wɔ kwyɛl náá, bis kɛkoobal wɔ di mena aakɛdɛka edee e ɛbyoŋ ɛ Pak ɛ wo?» 10 Yezu eezɛbɔɔza nɛ nɔɔ náá: «Gwakeka, é sok bi aakum kɔ dɛl ɛ, bi ɛ́ waaboma nɛ dhiiti mot nɛ bhe mɛdii. Duka nyɛ, é di nyɛ aadjɛl ɔ, 11 lɛɛka nakuma ndjaa náá: "Lyoel ke ɛ́, bis dji wɔ náá, ndjaa nyɛ aadɛ ɛbyoŋ ɛ Pak tɔ tak bɛ nɛ bɛdjekel bɛ ɛ́ wo é?" 12 Tin, nyɛ waalyaal bin pɛ ɛko ɛ ndjaa, boo koo koobela nɛ esa djas tɔ tak. Tin ɛ bi aasa esesɛɛ e ɛbyoŋ ɛ Pak.» 13 Bɛdjekel eezɛtɔ́ pɛ dɛl ɛ tak. Bɛ kabela djas ɛ́ dáa Yezu nalɛɛ bɛ ɛ. Bhii tak, bɛ eezɛni ekoobal ɛbyoŋ ɛ Pak.

14 Dáa ɛwala tak nakadjala ɛ, Yezu eezɛdi kɔ mesa bɛ nɛ bot ɛ lwoma. 15 Nyɛ eezɛke nɛ nɔɔ náá: «Mɛ bɛ ɛ́, mɛ eedyeebakwyɛl náá, mena dɛka ɛbyoŋ ɛ Pak’ak é di wat, ɛsok nɛ náá, mɛ zuk! 16 Etɛɛ náá, ye goka ɛ́ mɛ lɛɛ bin náá, mɛ aanàkabaadɛ ɛbyoŋ ɛlak, kana mos, kɛyaka nɛ dwoo ɛsuk ɛ tak aabela lo tɔ Ɛyoŋ ɛ Zɛɛb ɛ. Tin ɛ́ mɛ aakabaadɛ.» 17 Nyɛ eezɛnɔɔ bɛɛlɛ nadi nɛ vin tɔ tak ɛ, nyɛ eezɛghaapɛɛ Zɛɛb, nyɛ eezɛke nɛ nɔɔ náá: «Nɔɔka bɛɛlɛ vin’ak. Kaaka yɛ pak’en, da bi ɛ́ dɛ, 18 etɛɛ náá, ye goka ɛ́ mɛ lɛɛ bin náá, kana dwoo pan mos’ak, kɛyaka nɛ dwoo Ɛyoŋ ɛ Zɛɛb aazyɛ ɛ, mɛ aanàkabaadɛ mɛnyok mɛ vin.» 19 Bhii tak, nyɛ eezɛnɔɔ mapa, nyɛ eebaazɛghaapɛɛ Zɛɛb, nyɛ eezɛpyak yɛ, nɔɔ yɛ, djɛ bɛdjekel bɛ. Nyɛy nɛ nɔɔ náá: «Yak ɛ́ nyel’am zekaaa kɔ ɛsu ɛ len ɛ. Gheesesaka deenek étɛp bi neetetaala mɛ.» 20 Nyɛ eebaazɛdjɛ bɛ bɛɛlɛ tak wat bhii dek. Nyɛy nɛ nɔɔ náá: «Bɛɛlɛ yak ɛ́ bɛɛlɛ ɛbhɛŋ ɛ na bes nɛ Zɛɛb, ɛbhɛŋ ɛ kwyalel nɛ ghiya yam see kɔ ɛsu ɛ len ɛ. 21 Tin, guka náá, mot aaka mɛ ɔ, nyɛ ɛ́ wak, bis nɛ nɛ ɛ́ kɔ mesa yak! 22 Yɛ ɛ́ tsɛɛtsɛ náá, Sɛɛŋɛlɛ Mɔn Mot ɛ́ waagwyɛ, dáa Zɛɛb nazekoobal ɛ. Tinaak, haaa kpaa-ghoŋ nɛ mot aakɛka nyɛ ɔ!» 23 É di’enek, bɛdjekel moo tin edjinel pak’ɔɔ náá, ɛzɛ aakɛka Yezu!

24 Bɛdjekel ɛ Yezu moo tin ebe mɛso pak’ɔɔ, etɛɛ náá, bɛ nadi ekwyɛl ɛgu, mot di dhil mot pak’ɔɔ ɛ. 25 Yezu eezɛbɔɔza nɛ nɔɔ náá: «Bɛmɛkoozi mɛ bot ɛ membyak mɛ sis ɛ́ waakokɔk kɔ bot ɛ bɛ di edjɛɛd ɔ. Bɛmɛkoozi menɔk ɛ di enyal bot bɔɔ, bɛ kwyɛl ɛdjóoaa ɛ́, bot ɛ enɛm esa. 26 Tin, yɛ ààgoka deenek pɛ yebɔ kyee. Etɛɛ náá, pɛ yebɔ, mot di dhil mot ɔ, nyɛ goka nɛ ɛdi tɔ bɛsɔ ɛ́, dáa mɔɔ dhyeeb. Deenek, mot ɛ́ kwyɛl ɛdi dhil mot ɔɔ, nyɛ goka ɛ́ nɛ di mot-mɛsa mɛ bɛsɔ. 27 É di’enek, ɛzɛ di dhil mot, yɛ ɛ́ mot di kɔ mesa ohoo, mot di elaa edee kɛl bɛsɔ yɛ ɛ kɔ mesa ɔ? Yɛ ɛ́ mot di kɔ mesa ɔ, etsal é? Beeka, mam ɛ́ tɔ len ɛ dáa mot di elaa edee kɛl bin yɛ ɛ kɔ mesa ɔ! 28 Bi ɛ́ bot ɛ nadi mɛlu djas é ngwoob’am tɔ mɛbhowal ɔ. 29 Tyee wat nɛ dáa Saagam nadjɛ mɛ Ɛyoŋ ɛ lɛ ɛ, tyee tak wat, mɛ ɛpedjɛ bin Ɛyoŋ ɛ tak. 30 Bi ɛ́ waadɛ edee nɛ mɛdii kɔ mesa yam, tɔ Ɛyoŋ ɛ lam. Bi ɛ́ waadi kɔ mɛbhóó mɛ mɛkoozi kam nɛ ebá, étɛp bi neepɛ́ɛ membyak kam nɛ ebá ɛ Yisalaɛl.»

31 Yezu eezɛke náá: «Simɔŋ, Simɔŋ, gwaka! Satan eesaa ze étɛp ɛsyaal ɛ wɔ dáa embɛɛ mɛbhek di esyaalaa tɔ zyaagal étɛp ɛdis ezeeza ɛ. 32 Tin, ye bɛ ɛ́, mɛ eedjaala étɛp’ɔ, ekaab náá, ɛdum ɛ koŋ ɛ lɔ nɛ Zɛɛb ɛzɛkɛwyii. Tin, é ghɛŋ wɔ aabulal lyem’ɔ pɛ yam ɛ, da wɔ ɛ́ djɛ bɔn-nyoog ghwyil.» 33 Pyɛɛd eezɛke nɛ Yezu náá: «Ghɛŋ, é di mɛ di’aak, mɛ eezemyaal ɛtɔ́ membok menabɛl, nɛghu ɛsyee menabɛl.» 34 É di’enek, Yezu eezɛbɔɔza nɛ nɛ: «Beta mɛ lɛɛ wɔ, Pyɛɛd, sa di tsɛɛtsɛ ɛ: É pum’ak mos, ɛsok nɛ kuu nɛ kɔk, yɛ aabela ɛ́, wɔ eezeswonal mɛ esok elɛl.»

35 Bhii tak, Yezu eezɛke nɛ nɔɔ náá: «É sok mɛ nalwom bin, bi kɛsa mɛsa, toto ààbɛ nɛ ekpa, àànɔɔ ngwyɛ epata, àànɔɔ ekoko ɛ, ye nabɛ ɛ́ sa wat nasu bin é?» Bɔɔ náá: «Ààbɛ, bis nabɛ ɛ́ ààsu sa wat.» 36 Deenek nyɛ eezɛke nɛ nɔɔ náá: «Nenak ye tokapɛ deenek, ye moo ɛ́ náá, mot di nɛ ngwyɛ epata bɛ ɔ, nyɛ nɔɔ yɛ. Tyee wat nɛ mot di nɛ kpa ɔ, nyɛ nɔɔ kpa yɛ, dɔɔ nɛ mot di ààbɛ nɛ pɛl ɔ, nyɛ goka ɛ́ nɛ ɛbɔmsa ndjookuwa yɛ étɛp ɛkɛbɔm pɛl. 37 Etɛɛ náá, nɛ tsɛɛtsɛ betka mɛ lɛɛ bin náá, ye goka ɛ́ náá, etɛp ee Ekwyala nalɛɛ kɔ ɛsu ɛ lam náá: "Nyɛ naalaŋaa tɔ lɔɔg bot ɛ di ààlooba nɛ etsi ɔ." Nɛ tsɛɛtsɛ etɛp ee naliiel kɔ ɛsu ɛ lam ɛ, yɛ waasael.» 38 Bhii tak, bɛdjekel eezɛke nɛ nɛ náá: «Ghɛŋ, beea! Bis ɛ́ nɛ epɛl ebá.» Yezu eezɛke nɛ nɔɔ náá: «Yenek eedjala.»

39 Yezu eezɛwyis, nyɛ eezɛtɔ́ pɛ kɔ ɛtsok ɛ pyeeb oliv, dáa nyɛ nazyɛ nɛ ɛsesa sok ɛ. Bɛdjekel bɛ zokadu nyɛ. 40 Bhii bɛ nakum é di tak ɛ, Yezu ɛ́ booke nɛ bɛdjekel bɛ náá: «Djaalaka Zɛɛb étɛp bi ɛ́ zɛkɛkwyɛ tɔ mɛbhowal.» 41 Bhii tak, nyɛ eezɛtiila ba ziii tyee wusa pwak, nyɛ eezɛkwyit mɛboŋ si, nyɛ moo edjaala. 42 Nyɛ nadi ekeke tɔ mendjaala mɛ ɛ́ náá: «Saagam, wɔ kwyɛl ɔɔ, wɔ ɛ́ nɛ ghwyil ɛdis bɛɛlɛ mezuk mak sok bhwoob’am. Ye nakoozodi, ye goka ɛ́ náá, ɛkwosak ɛ lɔ sael, ààkabɛ yam.» [43 Tin, wɔ gwaa fofop ngɔt zokadus tɔ gwoo, zɛdjɛ nyɛ mɛghaaz. 44 Yezu, tɔ bɛbebwol nɛ bwoo, nyɛ eebaazɛnenal nyel tɔ mendjaala. Wɔ gwaa edidyok moo tin epak nyɛ é nyel, see é bɔs dáa mɛtɔ mɛ ghiya.]

45 Bhii nyɛ zedjaala ɛ, nyɛ eezɛwyɛl, sik pɛ kyee bɛdjekel bɛ nadi ɛ́. Nyɛ kakɛbela bɔɔ djas ɛ́ mendjaamesi é egɔ́ nɛ ghoŋ nazekwyɛsa bɛ tɔ elyem ɛ. 46 Nyɛ eezɛke nɛ nɔɔ náá: «Étɛp yé bi di edja egɔ́? Wyɛlka, da bi ɛ́ djaala Zɛɛb étɛp ɛkaab náá, bi ɛzɛkɛkwyɛ tɔ mɛbhowal.»

47 Ye nabela ɛ́, Yezu dinaa elii, tin, Yudas, ngɔt tɔ bɛdjekel bɛ kam nɛ bɛbá eezɛtuula nɛ ɛdhuu ɛ bot. Bhii tak, Yudas eezɛtiila pɛ daa Yezu étɛp nyɛ neebeedal nyɛ. 48 Tinaak, Yezu zokake nɛ nɛ náá: «Yudas, yɛ ɛ́ nɛ mɛbeedela menek ɛ wɔ di eka Sɛɛŋɛlɛ Mɔn Mot é?» 49 É ghɛŋ bot ɛ nadi egyee nɛ Yezu nabee sa nadi ekwyɛl ɛsael é di’enek ɛ, bɛ ɛ́ boozɛdji nyɛ náá: «Ghɛŋ, wɔ ɛpekwyɛl náá, bis lum bɛ nɛ epɛl é?» 50 Ngɔt pak’ɔɔ zokakwyal mot-mɛsa ɛ boo ghaa-Zɛɛb, zɛtsaal nyɛ ɛlɔ pɛ kyee mbɔ eghɛŋ. 51 Tin, Yezu ɛ́ booke nɛ nɔɔ náá: «Betka, yɛ eedjala.» Bhii tak, Yezu eezɛmɛt ɛlɔ ɛ mot tak, wɔ gwaa pyoŋ tak zɛgel. 52 Bhii tak, Yezu eezɛke nɛ eboo bɛghaa-Zɛɛb, nɛ bɛmbaalel ɛ kok Ndjaa-ebuwa zɛnɔɔ bɛpaa ɛ eYuda zyɛ zɛmɛt nyɛ ɔ náá: «Bi zyɛ ɛ́ nɛ epɛl nɛ eghwyɛs ɛkɛɛ náá, bi zɛmɛt ɛ́ mot djii. 53 Mɛlu djas, mɛ nadi ɛ́, nɛ nen tɔ kok Ndjaa-ebuwa. Bi nabɛ ɛ́ ààsaa náá, bi mɛt mɛ. Tin, yak ɛwala ɛ́ yebɔ, yɛ ɛ́ ɛwala ɛ ghwyil ɛgwyitok.»

54 Dáa bɛ namɛt Yezu ɛ, bɛ eezɛtɔ́ nɛ nɛ pɛ ndjaa boo ghaa-Zɛɛb. Kabela tin ɛ, Pyɛɛd ɛpedu bɛ pɛ bhii koŋ, ba ɛtsetaɛpe nɛ nɔɔ. 55 Ye nabɛ ɛ́, bɛ naapaada du kuku ɛbɛsɛɛ ɛ peeb. Tin, Pyɛɛd zokazɛdisi egɔɔl du bɛ nɛ bot ɛ nadi tin ɔ. 56 Dhiiti moma nadi esa mɛsa tɔ ndjaa boo ghaa-Zɛɛb ɔ zokazɛbee nyɛ ndiindel egɔɔl du. Moma tak eezɛgwyák nyɛ kpɛɛɛ, nyɛy nɛ nɛ náá: «Mot’ak pe nadi ɛ́, bɛ nɛ Yezu!» 57 Wɔ gwaa, Pyɛɛd zɛswonal, nyɛy náá: «Mɔɔ moma, mam ààgu nyɛ.» 58 Ba mɔɔ ɛwala bhii tak, dhiiti mot-mɛsa eebaazɛgwyák nyɛ. Mot tak nɛ Pyɛɛd náá: «Dɔɔ nɛ wɔy pe, wɔ ɛ́ mot’ɔɔ.» Tin, Pyɛɛd eezɛbɔɔza nɛ mot tak náá: «Ààbɛ, Mam ààgyee bis nɛ nɛ.» 59 Tyee ba ɛwala wat bhii tak, wɔ gwaa dhiiti baazɛke nɛ ghwyil djas náá: «Yɛ ɛ́ tsɛɛtsɛ náá, mot’ak nadi ɛ́, bɛ nɛ nɛ, etɛɛ náá, nyɛ ɛ́ mot kyee dik Ghalile.» 60 Tin, Pyɛɛd eebaazɛbɔɔza náá: «Mɛ ààgu sa wɔ di ekwyɛl ɛlii yenek.» É di’enek, Pyɛɛd dinaa elii deenek, kuu eezɛkɔk. 61 Ghɛŋ zokazɛliig mis, gwyák Pyɛɛd, bhii tak mis mɔɔ eezɛboma. É di’enek, Pyɛɛd eezɛtaala sa Ghɛŋ nalɛɛ nyɛ ɛ: «Ɛsok nɛ kuu kɔk mos, yɛ aabela ɛ́, wɔ eezeswonal mɛ esok elɛl.» 62 Tin, Pyɛɛd eezɛwyis, tɔ́, nyɛ moo tin edjii ɛbuɛpe.

63 Bot ɛ nadi ebaal Yezu ɔ moo tin eduk nyɛ. Bhii tak bɛ eezɛnyuu nyɛ. 64 Bɛ eezɛbutal nyɛ kaad é mis. Bhii tak, bɛ moo edji nyɛ náá: «Naŋa! Ɛzɛ nyuu wɔ?» 65 Tin, bɛ naalee nyɛ ɛbuɛpe.

66 Tɔ mɛlem kɛɛŋ, bɛpaa ɛ eYuda, bɛ nɛ eboo bɛghaa-Zɛɛb, zɛnɔɔ bɛghaŋ ɛ mɛkana mɛ etsi eezɛsɛɛga. Bɛ eezɛtel Yezu kuku boo kwan eYuda, é di etɛp di epɛ́ɛaa ɔ. 67 Tin, bɛ eezɛdji nyɛ náá: «Yɛ bɛ náá, wɔ ɛ́ Mɛsia ɔɔ, lɛɛa bis!» Yezu eezɛbɔɔza nɛ nɔɔ náá: «Mɛ lɛɛ bin náá, mɛ ɛ́ Mɛsia ɔɔ, bi aanàkwaamyaal mɛ. 68 Mɛ kodji bin kiya ɔɔ, bi aanàkwaabɔɔza mɛ. Bi nakoodi ààmyaal, mɛ ɛpelɛɛ bin náá, 69 kana dwoo pan mos’ak, Sɛɛŋɛlɛ Mɔn Mot aadi ɛ́ ndiindel pɛ mbɔ eghɛŋ ɛ Zɛɛb Mɛkaake.» 70 É di’enek, bɔɔ djas eezɛdji Yezu náá: «Wɔ ɛ́ Mɔn ɛ Zɛɛb é?» Yezu zɛbɔɔza nɛ nɔɔ náá: «Yɛ ɛ́ dáa bi zoke yenek, yɛ ɛ́ mam.» 71 Wɔ gwaa, bɛ zɛtsim náá: «Mena tokapɛ nɛ gwyes nɛ mot aapit nyɛ ɔ. Nɛ tsɛɛtsɛ menabɛl bɛmet eegwak mɛkpa mɛ nuub’ɛ.»