Lucas 23

Yezu sok bhwoob ɛ Pilat

1 Bot ɛ zɛɛga djas eezɛwyɛl, bhii tak, beezɛtɔ́ nɛ nɛ pɛ daa kukuma Pilat. 2 É di’enek, bɛ moo tinaak esu nyɛ etɛp. Bɔɔ náá: «Bis bela mot’ak ɛ́, ebesal bot ɛ mbyak’es bɛ kus ɛghuub. Nyɛ ɛpelu bot náá, bɛ nàdjɛ epata e lapo nɛ Sezaad. Nyɛ ke ɛ́ náá, yɛ ɛ́ nyɛy ɛ di Mɛsia, nɛghu "mɛkoozi".» 3 Kukuma Pilat eezɛdji nyɛ náá: «Wɔy ɛ́ di mɛkoozi mɛ eYuda?» Yezu eezɛbɔɔza nɛ nɛ náá: «Yɛ ɛ́ dáa wɔy, wɔ ɛmet ke’enek.» 4 Bhii tak, kukuma Pilat eezɛke nɛ eboo bɛghaa-Zɛɛb, nɛ ɛdhuu ɛ bot nadi tin ɔ náá: «Mam ààpabee tɛp mɛ di egoka nɛ ɛkwyesal mot’ak ndjɛ sɔs ɛ.» 5 Tin, bɛ eebaazɛben gwood, tsim ɛlyelɛpe náá: «Nyɛ ɛpebesal bot, bɛ kus ɛghuub nɛ kɔkɔ mbi mɛlyo mɛ. Nyɛ nakan nɛ yɛ ɛ, pɛ kyee dik Ghalile. Nyɛ eezɛtuula nɛ yɛ pɛ kyee dik Yude. Yɛ ɛ́ nyɛ moo nɛ yɛ mos wak’aak.»

Yezu sok bhwoob ɛ mɛkoozi Eelood

6 Dáa kukuma Pilat nagwak mɛkpa menek ɛ, nyɛ ɛ́ boodji náá: «Mot’ak ɛ́ mot Ghalile?» 7 Tin, bɛ eezɛlɛɛ nyɛ náá, Yezu nadus ɛ́ pɛ kyee dik Eelood nadi ekɔk kɔ tak ɛ. Deenek nyɛ ɛ́ bookyeed Yezu pɛ daa Eelood. Etɛɛ náá, mɛkoozi Eelood naazyɛ zɛkwyɛɛg ba mɛlu tin tɔ Yeluzalɛm. 8 Mɛkoozi Eelood naadyeebamyaala ɛbuɛpe dáa nyɛ nabee Yezu ɛ. Etɛɛ náá, nyɛ naadyeebagwak menduk ɛ Yezu. Nyɛ nadi esaa ɛboma nɛ nɛ. Nyɛ nadi esuu ɛ́ náá, Yezu sa dhiiti ndem mɛbwala é mis mɛ nyɛ neebee. 9 Tin, nyɛ eezɛdji Yezu bɛtɛ nɛ mɛdjin, Yezu kadi ɛ́ gwyem, ààbɔɔza. 10 Eboo bɛghaa-Zɛɛb nɛ bɛghaŋ ɛ mɛkana mɛ etsi nadi ɛ́ tin. Bɛ nadi esu etɛp e mɛpita ɛbuɛpe kɔ lo ɛ Yezu. 11 Mɛkoozi Eelood nɛ esodja bɛ zokaduk nyɛ, gɔ nyɛ. Bɛ nabee nyɛ ɛ́ tyee ba vaŋ put mot. Bhii tak, bɛ eezɛbét nyɛ mbɛɛ wolo kaad, bɛ eezɛswaal nyɛ pɛ daa kukuma Pilat. 12 Mɛkoozi Eelood bɛ nɛ kukuma Pilat nabɛ sok ɛ́, ààgwakel. Yɛ ɛ́ dwoo lenek ɛ bɛ nakan ɛgwakel.

Bɛ eezɛpɛ́ɛ Yezu epɛ́ɛ e ɛsyee

13 Kukuma Pilat eezɛsɛɛga é boob bɛ nɛ eboo bɛghaa-Zɛɛb nɛ ekukuma eYuda, zɛnɔɔ bot ɛ dɛl, 14 nyɛ eezɛke nɛ nɔɔ náá: «Bi zyɛ mɛ nɛ mot’ak ɛ́, etɛɛ náá, nyɛ ɛpebesal bot, bɛ kus ɛghuub é? Deenek ye bɛ ɛ́, mɛ eedji yɛ taŋal é mis men wak, tin, mam ààpabee embee etɛp ee bi zɛpit nyɛ étɛp tak ɛ. 15 Mɛkoozi Eelood ààpabela nyɛ nɛ ndjɛ, yɛ ɛ́ étɛp tak ɛ nyɛ naswaal nyɛ wak. Deenek, mot’ak ààpasa dhiiti tɛp mena di egoka nɛ ɛgó ɛ nyɛ kɔ ɛsu ɛ tak ɛ. 16 Étɛp tak ɛ di náá, mɛ waalwom náá, bɛ bi nyɛ nɛ eghwyɛs. Bhii tak da mɛ ɛ́ bet nyɛ.» [ 17 É ghɛŋ mɛbyoŋ mɛ Pak djas di esael ɛ, kukuma Pilat nabɛ ɛ́ nɛ ɛzel ɛ ɛwyisal mot membok ngɔt.] 18 Wɔ gwaa, bɔɔ djas zokazɛtsim náá: «Góa mot’ak, da wɔ ɛ́ bet bis Bhaalabhas.» 19 Bela náá, Bhaalabhas namɛtaa é mbok ɛ́, étɛp nyɛ naagó mot, é sok bot ɛ mbyak’ɛ nabe boo dho nɛ bot ɛ Lɔm tɔ ghaada ɛ. 20 Dáa Pilat nakwyɛl ɛbet ɛ Yezu ɛ, nyɛ eebaazɛdji ɛdhuu ɛ bot. 21 Deenek, wɔ gwaa bot djas zɛtsim ɛlyelɛpe: «Bemka nyɛ é mɛlaaba! Bemka nyɛ é mɛlaaba!» 22 Pilat zokazɛbaadji bɛ tyee djia esok elɛl náá: «Mot’ak sa yaa ɛbiyo? Mɛ ààpabee gham’en bi di eke náá, nyɛ góaa ɛ. Yɛ ɛ́ étɛp tak ɛ mɛ ke náá, bɛ bi nyɛ nɛ eghwyɛs, da bɛ ɛ́ bet nyɛ.» 23 Tin, bot nadi ebesal nɛ etsim ɛlyelɛpe náá, nyɛ bemaa é mɛlaaba. Etsim bɔɔ naadhaa Pilat. 24 Deenek, Pilat zokazɛtsaal tɛp, nyɛy náá, ye zokasael dáa ɛdhuu ɛ bot kwyɛl ɛ. 25 Tin, kukuma Pilat eezɛwyisal mot bɔɔ nadi ekwyɛl náá, nyɛ wyisal ɔ. Mot tak namɛtaa é mbok ɛ́, etɛɛ náá, nyɛ naagó mot é ghɛŋ boo dho nasael nɛ bot ɛ Lɔm ɛ. Deenek, kukuma Pilat naazɛdjɛ Yezu é mɛmbɔ mɛ mɛdhuu mɛ bot. Nyɛ eezɛke nɛ nɔɔ náá: «Saka nyɛ sa bi di ekwyɛl ɛ!»

Yezu eebemaa é mɛlaaba

26 Dáa bɛ nadi etɔ́ nɛ Yezu ɛ, wɔ gwaa bɛ zɛboma nɛ Simɔŋ mot dɛl Silɛn. Nyɛ nadi edus yɛ ɛ, pɛ pyeeb. Esodja ɛboozɛmɛt nyɛ, djɛ nyɛ mɛlaaba, nyɛ kwyee Yezu é ɛbɛp ɛ yɛ, da du Yezu pɛ bhis. 27 Zukamwaa nɛ mot mɛdhuu-mɛdhuu nadi edu bɛ, zɛnɔɔ boa edje mɛgwyɛ nɛ etsim kɔ ɛsu ɛ lɛ. 28 Tin, Yezu zokazɛliig mis, gwyák bɛ. Nyɛy nɛ nɔɔ náá: «Boa ɛ Yeluzalɛm, nàdjeka kɔ ɛsu ɛ lam! Bi goka nɛ ɛdje ɛ́ étɛp’en nɛ étɛp bɔn bin! 29 Etɛɛ náá, ɛwala ɛpezyɛ, ɛwala di náá, mot aake: "Mɛnyɔ nɛ bɛkwyiid ɛ boa, mɛnyɔ nɛ boa di náá, bɛ dinaa ààpabya ɔ, mɛnyɔ nɛ boa di ààgu dáa mɔn di edjɛaa ɛbel ɛ!" 30 É di’enek, bot ɛ́ waake nɛ mɛtsok náá: "Dha dumaka kɔ les!" Nɛ eghooda náá: "Dha syelka bis!" 31 Etɛɛ náá, kwyii le bes saaa dáak, gwyata nɛ syeela le? Bɛ aakasa dáa nɛ yɛ?»

32 Esodja eebaazɛtɔ́ nɛ botom ɛbá, bɛmbee ɛ bot, bɛ neegó bɛ sama nɛ Yezu. 33 É ghɛŋ bɛ nakum é di bɛ di edjóo, «Bhoobo Lo» ɛ, esodja zokazɛbem Yezu é mɛlaaba, nɛ bɛmbee ɛ bot ɛbá, nwyak pɛ mbɔ eghɛŋ, nwyak dhiiti pɛ mbɔ ɛmyɛl.

34 Tin, Yezu eezɛke: «Saagam, pela bɛ, etɛɛ náá, bɛ ààgu sa bɛ di esa ɛ.» É di’enek, esodja eezɛkaa ekaad bɛ, bhii bɛ nazesa ɛgwyeeg ɛ. 35 Mɛdhuu mɛ bot nadi ɛ́ tin ebee. Wɔ gwaa, ekukuma eYuda moo tin, eduk Yezu. Bɔɔ náá: «Nyɛ naatsik bot ɛ sis, nyɛ katsik nyel’ɛ met, yɛ bɛ náá, nyɛ ɛ́ Mɛsia Zɛɛb natɔ ɔɔ!» 36 Dɔɔ nɛ esodja pe nadi eduk nyɛ. Bɛ zokazɛtiila, wɔ gwaa, bɛ djɛ nyɛ mɛnyok mɛ na bwaaz-bwaaz. 37 Bɔɔ nɛ nɛ náá: «Yɛ bɛ náá, wɔ ɛ́ mɛkoozi mɛ eYuda ɔɔ, tsika nyel’ɔ wɔy wɔ ɛmet!» 38 Pɛ ɛko ɛ mɛlaaba ɛ Yezu, ye nabɛ ɛ́, bɛ naabɛk mɔɔ pes le kwyala kɔ tak náá: «Nwyak ɛ́ Mɛkoozi mɛ eYuda.»

39 Tɔ bɛmbee ɛ bot ɛbá nabemaa é mɛlaaba ɔ, ngɔt naabyasal Yezu. Nyɛy nɛ nɛ náá: «Wɔ paalɛɛ ɛ́ náá, wɔ ɛ́ Mɛsia. Deenek, tsika nyel’ɔ tɔ ɛsyee, da wɔ ɛ́ baatsik bisɔ.» 40 Tinaak, wɔ gwaa nwyak dhiiti mbee mot zɛdjɛ sɔ mɛbɛ. Nyɛy nɛ nɛ náá: «Wɔ ààkaab Zɛɛb é, wɔy mot di ebee mezuk mɛ wat dáa nyɛy’aak? 41 Yenabɛl mezuk eegoka nɛ nena, etɛɛ náá, mena gwyɛ ɛ́, étɛp embee esesɛɛ bina. Bela náá, mot’ak ààpasa dhiiti sa ɛbiyo.» 42 Bhii tak, nyɛ eebaazeke náá: «Yezu, sa wɔ ààdjisa mɛ, dwoo wɔ aaboozyɛ dáa mɛkoozi tɔ Ɛyoŋ ɛ lɔ ɛ.» 43 Yezu eezɛbɔɔza nɛ nɛ náá: «Tsɛɛtsɛ nɛ tsɛɛtsɛ, mɛ lɛɛ wɔ ɛ́ náá: Mos, wɔ aadi ɛ́ nɛ nam sama tɔ paladi.»

Ɛsyee ɛ Yezu

44 Dáa dwoo nadi ye moo kuku mwos ɛ, wɔ gwaa gwyes zɛsila, ɛgwyitok zɛgwyiidela kɔ kyee dik djas, kɛkum ɛwala elɛl yii bikoko. 45 Kasɛka ɛ́, boo lɛmbɛ na pip-pip nadi tɔ Di na Dɛɛ, étɛp ɛbɛk dhɛŋ nɛ koo tɔ Ndjaa-ebuwa ɔ, zokanyɛɛ kuku tak, kan pɛ ɛko, kɛkum pɛ si. 46 Yezu zokazɛtsim ɛlyelɛpe, nyɛ náá: «Saagam, mɛ eenɔɔ sisim’am, djɛ é mɛmbɔ mɔ*23.46 Mɛd 31.6.» Bhii nyɛ nalii mɛkpa menek ɛ, nyɛ eezɛsil eswos. 47 Dáa kukuma lɔɔg esodja nabee etɛp binek ɛ, nyɛ naaduwal Zɛɛb é ɛke náá: «Nɛ tsɛɛtsɛ, mot’ak nabɛ ɛ́ mot epiki.» 48 Mɛdhuu mɛ bot ɛ nazyɛ, zɛbee etɛp ee nadi esael é di tak ɔ, naabee esesɛɛ binek djas. Bhii tak, bɛ eezɛsik mɛmbɔ kɔ elo, nɛ ghoŋ tɔ elyem. 49 Bɛsɔ ɛ Yezu djas nɛ boa nadus bɛ nɛ bɛnɔɔ pɛ kyee dik Ghalile ɔ, nadi ɛ́, ba ɛtsetaɛpe ebee esa djas nadi esael ɛ.

Muu ɛ Yezu eedelaa

50,51 Ye nabɛ ɛ́ nɛ dhiiti mot, din ɛ lɛ Zozɛf. Nyɛ nadi ɛ́, mot dɛl Aelimate, dhiiti ghaada eYuda. Nyɛ nabɛ ɛ́ tɛtɛ mot epiki. Nyɛ nadi ebwood náá, Ɛyoŋ ɛ Zɛɛb zyɛ. Ye nakoozodi náá, nyɛ nabɛ ɛ́ ngɔt tɔ bɛdhil ɛ bot ɛ boo kwan eYuda, nyɛ nabɛ ɛ́ ààmyaal egeka ee boob ekukuma nanɔŋ ɛ nɛ sa bɛ nasa ɛ. 52 Nyɛ ɛ́ boozɛtɔ́ pɛ daa Pilat kɛwaab muu ɛ Yezu. 53 Bhii tak, Zozɛf zokasil muu ɛ Yezu é mɛlaaba, zɛwol yɛ tɔ bheeza na puu, nɛɛg yɛ tɔ ɛvit ɛ nakpakaa tɔ ghu ɛkok ɛ di náá, dhiiti muu dinaa ààpawaaa tin ɛ. 54 Ye nabɛ ɛ́, dwoo ɛkoobal ɛ esonok étɛp dwoo saba. Tin, ye nabɛ ɛ́ saba moo aakan. 55 Boa nadus bɛ nɛ Yezu pɛ kyee dik Ghalile ɔ eezɛtɔ́ lɔɔg wat bɛ nɛ Zozɛf. Bɔɔ zokabee ɛvit ɛ Yezu nɛ dáa bɛ nanɛɛg muu’ɛ tɔ tak ɛ. 56 Bhii tak, bɛ eezɛsik pɛ ghaada kɛkoobal bɛmul nɛ bɛmɛnanas. Dwoo saba, bɛ eezɛwala dáa etsi di elɛɛ ɛ.