1 Dáa Yezu nabula pɛ dii Yuldɛn ɛ, ye nabɛ ɛ́ Sisim na Dɛɛ moo tɔɔɔ tɔ lɛ, Sisim eezɛdul nyɛ tɔ bal, 2 é di dim mot mɛkɔŋ nakɛwa nyɛ tɔ mɛbhowal ɔ. Ye nabɛ ɛ́, nyɛ naasa mɛlu mɛkam-mɛná ààdɛ edee. Bhii tak za zokazɛsa nyɛ. 3 Dim mot mɛkɔŋ eezɛke nɛ nɛ náá: «Yɛ bɛ náá, wɔ ɛ́ Mɔn ɛ Zɛɛb ɔɔ, kea nɛ ɛkok ɛlak náá, ye liiza mapa.» 4 Yezu eezɛbɔɔza nɛ nɛ náá: «Ekwyala ɛ Zɛɛb lɛɛ ɛ́ náá: "Ye tok mapa nɛ mapa di esa náá, mot di nɛ tsik*4.4 Dɛt 8.3."»

5 Bhii tak, dim mot mɛkɔŋ eezɛbyet nɛ nɛ kɔ dwol, wɔ gwaa, nyɛ lyaal nyɛ tɔ ɛwala ɛwat mɛyoŋ mɛ di kɔ ɛko ɛ bɔs djas. 6 Dim mot mɛkɔŋ eezɛke nɛ nɛ náá: «Gwyáka, mɛ waadjɛ wɔ eghɛŋ nɛ mɛkas mɛ di tɔ mɛyoŋ mak ɛ djas. Etɛɛ náá, ye naazedjɛaa mɛ. Mɛ ɛ́ nɛ ghwyil ɛdjɛ nɛ mot mɛ aakwos ɛdjɛ ɔ. 7 Yɛ bɛ náá, wɔ eemyaal ɛkwyit mɛboŋ mɔ si duwal mɛ ɔɔ, mɛ waadjɛ wɔ esa djas.» 8 Yezu eezɛbɔɔza nɛ nɛ náá: «Ekwyala lɛɛ ɛ́ náá: "Yɛ ɛ́ Ghɛŋ, Zɛɛb’ɔ ɛ wɔ di egoka nɛ ɛduwal. Wɔ goka nɛ ɛsa ɛ́ mɛsa mɛ met*4.8 Dɛt 6.13."»

9 Bhii tak, dim mot mɛkɔŋ eebaazɛtɔ́ nɛ nɛ pɛ Yeluzalɛm, nyɛ eezɛgel nyɛ kɔ ngɛs Ndjaa-ebuwa. Nyɛy nɛ Yezu náá: «Yɛ bɛ náá, wɔ ɛ́ Mɔn ɛ Zɛɛb ɔɔ, tsela, da wɔ ɛ́ kɛduma pɛ si. 10 Deenek, etɛɛ náá, Ekwyala lɛɛ ɛ́ náá: "Kɔ ɛsu ɛ lɔ, Zɛɛb ɛ́ waalɛɛ nɛ efofop bɛ náá, bɛ baal wɔ*4.10 Mɛd 91.11-12." 11 Tin, baabela náá: "Bɛ waabɛp wɔ kɔ mɛmbɔ mɔɔ, ekaab náá, ko’ɔ ɛzɛkɛbema ɛbɛk."» 12 Tin, Yezu eezɛbɔɔza nɛ nɛ náá: «Ekwyala baalɛɛ ɛ́ náá: "Sa wɔ ààwa Ghɛŋ, Zɛɛb’ɔ tɔ mɛbhowal*4.12 Dɛt 6.16."» 13 Bhii nyɛ nazewa Yezu tɔ mɛbhowal dáa nyɛ nakwyɛl ɛ, dim mot mɛkɔŋ eezɛbet nyɛ, tɔ́ ɛtsetaɛpe, kɛbwood dhiiti kɔkɔ sis.

14 Yezu eezɛsik pɛ Ghalile, ghwyil Sisim na Dɛɛ tɔ lɛ tɔɔɔ. Duma yɛ zokakɛ kɔ mɛl mɛ nadi mbaka-mbaka nɛ tin ɛ djas. 15 Tin, Yezu moo tin elyo bot Mɛkpa ɛ Zɛɛb tɔ mendjaa mɛ mendjaala mɛ eYuda. Bot ɛ nadi egwak nyɛ ɔ, naadyeebaduduwal nyɛ.

16 Dhiiti dwoo Yezu zɛtɔ́ pɛ Nazalɛt, é di nyɛ nawyelaa ɔ. É dwoo saba, nyɛ eezɛni tɔ ndjaa mendjaala mɛ eYuda dáa nyɛ natawa nɛ ɛsesa ɛ. Nyɛ ɛ́ boowyɛl é mis mɛ bot étɛp ɛlaŋ ɛ Ekwyala ɛ Zɛɛb.

17 Bhii tak náá, bɛ eezɛdjɛ nyɛ mbwoob mɛkana mɛ ngoolel-Mɛkpa ɛ Zɛɛb Ezayi, nyɛ eezɛwyiiz mɛkana mɛ tak. Nyɛ kabela ɛ́, é di nakwyalaa náá:

18 «Sisim ɛ Ghɛŋ ɛ́ nɛ nam

etɛɛ náá, nyɛ naadjɛ mɛ ebotan,

étɛp mɛ neezɛtuud bɛdjel ɛ bot Mbɛɛ Bhaadal.

Nyɛ nadhis mɛ ɛ́,

mɛ zɛlɛɛ bot ɛ membok náá, bɛ moo ɛ́ etiia.

Mɛ zɛlɛɛ bɛ na edhim náá, bɛ moo zɛnyaa sok.

Mɛ zɛlɛɛ bot ɛ́ di nyalaa ɔ náá, bɛ moo ɛ́ pɛka.

19 Mɛ zɛtuud náá, mena moo ɛ́, é mɛwala ɛ Ghɛŋ di zɛtsik bot bɛ ɛ*4.19 Eza 61.1-2.»

20 Bhii tak, Yezu eezɛwol mɛkana, zɛdjɛ nɛ mot-mɛsa nakwokwom mbwoob mɛkana mɛ tak ɔ, nyɛ eezɛnɔɔ nyel, disi. Bot djas nadi tɔ ndjaa mendjaala mɛ eYuda ɔ, moo tin dhuuu, nɛ mis é nyel’ɛ.

21 É di’enek, nyɛ boozɛlɛɛ bɛ náá: «Mos Ekwyala ee bi zegwak ɛ, yɛ eedjala.» 22 Bɔɔ djas nadi etaŋal étɛp’ɛ, bɛ nadi edjoka embɛɛ etɛp ee nyɛ nadi elɛɛ bɛ ɛ. Bɛ moo tin eke náá: «Ye tok mɔn Zozɛf’aak é?» 23 Tin, Yezu eezɛke nɛ nɔɔ náá: «Tsɛɛtsɛ náá, bi ɛ́ waadjɛ kana yak: "Ngwomel bot, tsika nyel’ɔ wɔy wɔ ɛ́ ɛmet." Bi ɛ́ waabaake nɛ nam náá: "Bis eegwak menduk mɛ mɛsa mɛ wɔ nasa pɛ dɛl ɛ Kapɛlnaum ɛ. Baasa esa e tak wak kɔ ghaada yɔ met!"» 24 Bhii tak nyɛ eezɛbaabil náá: «Nɛ tsɛɛtsɛ, mɛ lɛɛ bin ɛ́ náá, ye tok nɛ dhiiti ngoolel-Mɛkpa ɛ Zɛɛb aamyaalaa kɔ dɛl ɛ lɛ met. 25 Tsɛɛtsɛ, mɛ lɛɛ bin ɛ náá: É ghɛŋ ɛ ngoolel-Mɛkpa ɛ Zɛɛb Eli, ye nabɛ ɛ́ nɛ bɛtɛ nɛ bɛkus ɛ boa tɔ Yisalaɛl, é sok ye nasa membu melɛl nɛ pes, bhi àànee ɛ, é sok boo pwom nasa kɔ dɛl djas ɛ. 26 Zɛbela náá, Zɛɛb nabɛ ɛ́ ààkyeed Eli pɛ daa kus moma dik’ena. Nyɛ nazokyeed nyɛ ɛ́ pɛ daa dhiiti kus moma, nadidi pɛ dɛl ɛ Saalɛpta ɔ, pɛ kyee dik Sidɔn. 27 Ye nabaabɛ pe ɛ́, nɛ bot ɛ nadi nɛ ɛbɛ́ ɛ zezam ɔ, ɛbuɛpe tɔ Yisalaɛl é ghɛŋ ɛ ngoolel-Mɛkpa ɛ Zɛɛb Eliize. Zɛbela náá, ye nabɛ ààbɛ nɛ mot ngɔt tɔ sama yɔɔ natsak, bhis Naaman, mot kyee dik Siili nyɛ ɛmet.»

28 Tin, wɔ gwaa ɛbuk zɛmɛt bɔɔ djas tɔ ndjaa mendjaala mɛ eYuda, bhii bɛ nazegwak deenek ɛ́. 29 Wɔ gwaa, bɛ zɛwyɛl, bhii tak bɛ eezɛwyis, tɔ́ nɛ Yezu é di sis ààbɛ kɔ dɛl, pɛ kɔ ngɛs boo ɛtsok ɛ Nazalɛt nasumaa kɔ tak ɛ, étɛp bɛ neekɛzyeegal nyɛ, nyɛ neeges tɔ toŋ. 30 Tin, Yezu zokazɛsyela tɔ lɔɔ, nɔɔ nyel’ɛ, tɔ́ yɛ.

31 Dhiiti dwoo, Yezu naatɔ́ pɛ Kapɛlnaum, dɛl ɛ Ghalile. Nyɛy é lelyo bot Mɛkpa ɛ Zɛɛb, dwoo saba. 32 Bot naadyeebadjodjoka dáa nyɛ nadi elelyo ɛ, etɛɛ náá, nyɛ nalelyo ɛ́ nɛ eghɛŋ. 33 Tɔ ndjaa mendjaala mɛ eYuda, ye nadi ɛ́ nɛ dhiiti mot nadi nɛ mbee sisim nadi edhedhek ɔ. Mot’enɔk moo zɛtsim ɛlyelɛpe. 34 Nyɛy náá: «Haaa! Mena ɛ́ nɛ yaa tɛp, Yezu, mot Nazalɛt? Wɔ zyɛ, zɛtwak bis é? Mɛ nɛ gu náá: Wɔy ɛ́ mot na dɛɛ Zɛɛb nadhis ɔ.» 35 Yezu eezɛbhɛm nyɛ ɛlyelɛpe. Nyɛy náá: «Dia gwyem, wyisa tɔ nyel mot’ak!» Mbee sisim zɛghɛɛg mot’enɔk si é mis mɛ bot. Bhii tak, nyɛ eezɛwyis tɔ lɛ, ààzuk nyɛ é dhiiti di. 36 Bot djas naadjoka ɛlyelɛpe, bɛ moo tin elelii pak’ɔɔ náá: «Yak ɛ́ yaa kɔkɔ lii nɛ nwyak mot? Nyɛ ɛ́ nɛ eghɛŋ nɛ ghwyil ɛbatake nɛ embee esisim náá, bɛ wyis, bɔɔ ɛ́ batawyis.» 37 Wɔ gwaa, dék din ɛ lɛ zɛdjala kɔ kyee dik’enek djas.

38 Yezu eezɛwyis tɔ ndjaa mendjaala mɛ eYuda, tɔ́ pɛ daa Simɔŋ. Ghuna tsi ɛ Simɔŋ yii moma nadi ɛ́ nɛ mɛkosa ɛkpaŋɛpe. Bɛ eezɛke nɛ Yezu náá, nyɛ sa sonok étɛp’ɛ. 39 Nyɛ eezɛmalal é ngwoob’ɛ, tinaak nyɛ zɛbhɛm mɛkosa, nyɛ wyis. Wɔ gwaa, mɛkosa zɛwyis tɔ lɛ. E di tak wat, moma yenɔk eezɛwyɛl, nyɛ moo ebe bɛ.

40 É ɛbil ɛ dwoo, bot ɛ nadi nɛ membel membi-membi ɔ, naazyɛ nɛ nɔɔ pɛ daa Yezu, nyɛ ɛ́ bookɛl mɛmbɔ kɔ lɔɔ. Bhii tak náá, bɛ eezɛtsak. 41 Embee esisim nadi ewyis tɔ bɛtɛ nɛ membel, bɔɔ é tsitsim náá: «Wɔ ɛ́ Mɔn ɛ Zɛɛb!» Yezu ɛ́ boozɛlyak bɛ náá, bɛ diyal enuub, etɛɛ náá, bɛ nadi egu náá, nyɛy ɛ́ di Mɛsia.

42 Dáa mɛlem nalem ɛ, Yezu eezɛdus tɔ ghaada tɔ́ pɛ kyee di ààbɛ nɛ bot ɛ. Tin, zukamwaa nɛ mot moo zɛsaa nyɛ, wɔ gwaa, bɛ zokazɛbela nyɛ. Ɛkwosak ɛ lɔɔ nabɛ ɛ́, bɛ nɛ bɛnɔɔ di é di wat, nyɛ nàkabaalik bɛ. 43 Nyɛ eezɛke nɛ nɔɔ náá: «Ye goka ɛ́ náá, mɛ tɔ́, kɛgoola Mbɛɛ Bhaadal dum nɛ Ɛyoŋ ɛ Zɛɛb pɛ edhiiti eghaada e sis, etɛɛ náá, mɛ nadhisaa ɛ́, étɛp tak.» 44 Tin, nyɛ nadi egoola Mɛkpa ɛ Zɛɛb tɔ mendjaa mɛ mendjaala mɛ eYuda kyee dik Yude.