1 Yezu eebaazɛkan ɛlii nɛ bot tɔ kana. Nyɛy náá: 2 «Beeka sa di enɔŋel nɛ Ɛyoŋ ɛ di tɔ gwoo ɛ: Dhiiti mɛkoozi naazɛdjóo ɛbyoŋ étɛp ɛba ɛ mɔn. 3 Yɛ ɛ́ nyɛ kazɛlwom bot ɛ mɛsa mɛ, bɛ kɛdjóo bot étɛp ɛdɛ edee ɛbyoŋ ɛ ɛba. Tin, bot ɛ tak ààpakakwyɛl ɛzyɛ. 4 Bhii yenek, nyɛ eebaazɛlwom bɛdhiiti bot ɛ mɛsa mɛ é yak kɔkɔ nɛ bhaadal náá, bɛ kɛlɛɛ bot náá: "Edee moo ɛ́ ndjaaba. Mɛ eezetsak engɔmbɛ nɛ etaa bam na mɛdɛl. Esa djas moo ɛ́ koobela. Dha dɛka ɛbyoŋ." 5 Tin, bot ɛ nadjóoaa ɔ, ààkobis-bisak. Mot nɛ mot naaghɛɛ yɛ nyel, tɔ́ mɛze mɛ. Nwyak tɔ́ pɛ pyeeb’ɛ, nwyak tɔ́ pɛ nyɛ di ebɔmsa esa bɛ ɛ. 6 Bak bot zokazɛmɛt bot ɛ mɛsa mɛ kukuma yenɔk nalwom ɔ, duma bɛ é mɛnyel nɛ mɛbin, bɛ ɛ́ boozɛgó bɛ. 7 Mɛkoozi zokazɛkpaa lyem: nyɛ ɛ́ bookazɛlwom esodja bɛ, bɛ gó bot ɛ nagó bot bɛ ɔ. Bhii tak, da bɛ ɛ́ dik eghaada bɔɔ. 8 É di’enek, nyɛ eezɛlɛɛ bot ɛ mɛsa mɛ náá: "Edee e ɛbyoŋ ɛ ɛba moo ɛ́ koobela. Bot ɛ djóoaa bɛ zɛdɛ ɔ, ààkɔa nɛ ɛdɛ edee e tak. 9 Wyiska, da bi ɛ́ tɔ́ kɔ eboo egba. Djóoka mot djas bi aaboma nɛ nɔɔ ɔ, bɛ zɛdɛ edee e ɛbyoŋ ɛ ɛba." 10 Bot ɛ mɛsa zokazɛtɔ́ egba nɛ egba, kɛdjóo bot djas bɛ aaboma nɛ nɔɔ ɔ, bɛmbee ɛ bot nɛ bɛmbɛɛ ɛ bot. Tin, koo ndjaa bɛ nakoobal étɛp ɛbyoŋ ɛ naalwood "kpep".

11 Tin, mɛkoozi eezɛni tɔ koo tak, étɛp nyɛ neekabee bot ɛ zyɛ zɛdɛ edee ɛbyoŋ ɔ. É di’enek, nyɛ kabee kuku bot ɛ́ dhiiti mot ààbɛ nɛ kaad di egoka nɛ ɛbɔtaa é mɛbyoŋ ɛ. 12 Nyɛ ɛ́ boodji nyɛ náá: "Mɔɔ sɔ’am, wɔ ni wak dáa, wɔy ààbɛ nɛ kaad bot di egoka nɛ ɛbɔt étɛp ɛ ɛbyoŋ ɛ?" Tin, mot’enɔk kadi ɛ́, ààbɔɔza kiya mɛkoozi menɔk. 13 Tinaak, mɛkoozi eezɛlwom bot ɛ mɛsa mɛ náá: "Mɛtka mot’enɔk, da bi ɛ́ kɔl nyɛ mɛko nɛ mɛmbɔ. Bhii tak, da bi ɛ́ mwas nyɛ pɛ kel, tɔ ghooghom. Penek aadi ɛ́ mɛgwyɛ nɛ ɛkwaal ɛ mɛtsok."»

14 Yezu eebaazɛbil náá: «Yɛ ɛ́ etɛɛ náá, bot ɛbuɛpe ɛ́ waadjóoaa. Tin, bot aasɛ́ɛaa ɔ, bɛ ààdyeebabu.»

15 EFalizyɛ zokakɛboma étɛp ɛdjek dáa bɛ di egoka nɛ ɛsa, bɛ neekwyesal Yezu nɛ mɛdjin étɛp nyɛ neebela ndjɛ kɔ mɛkpa mɛ met ɛ. 16 Bɛ ɛ́ boozɛkyeed bɛdhiiti bɛdjekel bɔɔ, nɛ bot ɛ zɛɛga ɛ mɛkoozi Eelood, bɛ zɛlɛɛ nɛ Yezu náá: «Lyoel, bis nɛ gu náá, etɛp ee wɔ di elɛɛ ɛ, yɛ ɛ́ etsɛɛtsɛ. Wɔ lyo bot ɛ́ epiki dáa mot di egoka nɛ ɛkɛ ɛ, dáa Zɛɛb di ekwyɛl ɛ. Wɔ ààbem ba nɛ mot, etɛɛ náá, wɔy ààdyeebagwyák sa bot di esa étɛp bɛ neetela mɛnyel ɛ. 17 Lɛɛa bis, tɔ yɔ egeka dáa wɔ di ebee ɛ: etsi bina lɛɛ ɛ́ náá, bot tuud lapo nɛ mɛkoozi Sezaad, Bis tuud ohoo, bis nàtuud?»

18 Dáa Yezu nadi egu mbee mɛpek mɔɔ ɛ, nyɛ ɛ́ boozɛbɔɔza nɛ nɔɔ náá: «Bot ɛ mɛdjhaaz pɛ ɛko, bhimis pɛ si! Étɛp yé bi di ekwyɛl ɛwa mɛ tɔ mɛbhowal? 19 Pookolyaalka mɛ dhenye wat bot di etuud lapo nɛ yɛ ɛ, étɛp mɛ neebee.» Wɔ gwaa, bɛ zɛzyɛ nyɛ nɛ mɔɔ pata wat. 20 Bhii tak, Yezu ɛ́ boozɛdji bɛ náá: «Kɔ ghwooz’ak, ye lulaa ɛbhwoob ɛ zɛ? Yɛ ɛ́ din ɛ zɛ di kwyala kɔ tak?» 21 Bot binɔk eezɛbɔɔza nɛ Yezu náá: «Yɛ ɛ́ yɛ mɛkoozi Sezaad.» Tin, Yezu ɛ́ boozɛke nɛ nɔɔ náá: «Djɛka Sezaad sa di náá yɛ ɛ́ yɛ Sezaad ɛ, da bi ɛ́ djɛ Zɛɛb sa di náá, yɛ ɛ́ yɛ Zɛɛb ɛ.» 22 Gwaka bɛ nagwak eyala ɛ Yezu deenek ɛ́, ye nabɛ ɛ́, bɛ naadyeebadjoka ɛlyelɛpe. Bhii tak, bɛ boozɛnɔɔ mɛnyel, tɔ́ yɔbɔ.

23 Dwoo tak wat, bɛdhiiti eSaduseɛ zokazyɛ pɛ daa Yezu. ESaduseɛ ɛ́, bot ɛ di eke náá, bot aanàkwaagom bhis ɛsyee ɔ. Bɛ eezɛdji kiya, 24 bɔɔ nɛ Yezu náá: «Lyoel, mɛkana ɛ Moiiz lɛɛ ɛ́ náá: "Mot ɛ gwyɛ ààlik mɔn ɔɔ, ye goka ɛ́ náá, dhyeeb mot lik ɔ, ba kus myɛl étɛp nyɛ neekwyiida tel gwyɛ ɔ*." 25 Bela tin, tɔ lɔɔg’es, ye nabɛ ɛ́ nɛ bɔn-nyɛɛg bɛtɛn nɛ bɛbá. Mɔn mɛgwyak eezɛba moma, tin, nyɛ eezɛgwyɛ, ààlik mɔn. Nyɛ kalik kus myɛl nadi ààbɛ nɛ mɔn ɔ nɛ dhyeeb. 26 Mot na bhɔɔba mɔn mɛgwyak ɔ, kanɔɔ moma bhii koŋ’ɛ. Nyɛy eebaakpaa nɛ mɛsyee, gwyɛ, ààlik mɔn. Tyee wat nɛ mot elɛl. Tin, bɔɔ djas bɛtɛn nɛ bɛbá kadi ɛ́, ààbya nɛ moma yenɔk. 27 Bhis ɛsyee ɛ bɔɔ djas, moma eebaazɛkpaa nɛ mɛsyee, gwyɛ. 28 Dwoo bot aagom bhis ɛsyee ɛ, moma yenɔk tin aakadi mwaa zɛ pak bɔɔ bɛtɛn nɛ bɛbá? Etɛɛ náá, bɔɔ djas nabɛ ɛ́ botom bɛ!» 29 Yezu eezɛbɔɔza nɛ nɔɔ náá: «Bi ɛ́ tɔ ɛdjak, etɛɛ náá, bi ààsiiza ɛnyɔɛpe sa di kwyala tɔ Mɛkana ɛ Zɛɛb ɛ. Baanɔɔ náá, bi ààgu ghwyil ɛ Zɛɛb! 30 Etɛɛ náá, é ghɛŋ bot aagom bhis ɛsyee ɛ, botom aanàkwaakabaaba boa. Boa pe ààkwaani mɛba, etɛɛ náá, bot djas aakadi ɛ́, dáa efofop tɔ gwoo. 31 Dum nɛ tɛp ɛgom bhis ɛsyee, bi dinaa ààpalaa sa Zɛɛb lɛɛ kɔ ɛsu ɛ tak ɛ? Nyɛ naake ɛ́: 32 "Yɛ ɛ́ mam, Zɛɛb ɛ Abalaam, nɛ Zɛɛb ɛ Izak, nɛ Zɛɛb ɛ Zakɔɔb*."» Yezu eebaazɛke náá: «Zɛɛb tok Zɛɛb bot ɛ zegwyɛ ɔ. Nyɛ ɛ́ Zɛɛb bot ɛ di nɛ tsik ɔ.» 33 Ye nabɛ ɛ́, mɛlyo mɛ tak naadyeebakwyɛsa tɔ elyem e mɛdhuu mɛ bot ɛ nadi egwak nyɛ ɔ.

34 Dáa eFalizyɛ nagwak náá, Yezu naadiyal eSaduseɛ enuub ɛ, bɛ ɛ́ boozɛsɛɛga. 35 Dhiiti lyoel etsi e Zɛɛb naazɛkwyɛl ɛbowal Yezu. Nyɛy nɛ nɛ náá: 36 «Lyoel, yaa tsi di edhaa etsi djas?»

37 Yezu kabɔɔza nɛ nɛ náá: «"Wɔ goka ɛ́, wɔ kwyɛl Ghɛŋ Zɛɛb’ɔ, nɛ lyem’ɔ djas, nɛ sisim’ɔ djas, nɛ mɛtselal mɔ djas*." 38 Yenek ɛ́ di boo tsi. Yɛ ɛ́ tsi di edhaa etsi djas ɛ. 39 Gwaka tsi di ebhɔɔba yii mɛkɛn ɛ: "Wɔ goka ɛ́, wɔ kwyɛl sɔ’ɔ mot dáa wɔ di ekwyɛl nyel’ɔ met ɛ*." 40 Etsi ɛ Moiiz djas nɛ mɛlyo mɛ bɛngoolel ɛ Mɛkpa ɛ Zɛɛb pyet ɛ́ kɔ etsi binek ebá.»

41 Efalizyɛ nadi ɛ́, tɔ yɔbɔ zɛɛga. Yezu ɛ́ boozɛdji bɛ náá: 42 «Tɔ yebɔ egeka, Mɛsia ɛ́ zɛ?» Bɛ ɛ́ boozɛbɔɔza nɛ nɛ náá: «Nyɛ ɛ́ dha ɛ mɛkoozi Dhavid.» 43 É di’enek, Yezu ɛ́ boozɛke nɛ nɔɔ náá: «Ye nakosa dáa náá, Dhavid nɛ ghwyil Sisim na Dɛɛ djóo nyɛ "Ghɛŋ"? Etɛɛ náá, Dhavid naake náá:

44 "Ghɛŋ Zɛɛb nake nɛ Ghɛŋ’am ɛ náá:

Dha disi pɛ mbɔ eghɛŋ bam.

Mɛ aalwom bot ɛ mɛbhuka mɔ lwoma bhel náá,

bɛ zɛdhaa si mɛko mɔ*."

45 Yɛ bɛ náá, Dhavid nyɛ ɛmet naadjóo nyɛ "Ghɛŋ" ɔɔ, é yaa tyɛ Mɛsia aakabaadi dha’ɛ?»

46 Bɔɔ djas moo tin kup, ààbɛ nɛ ɛkpa ɛlóo bhis etɛp djas Yezu nalii ɛ. Kana dwoo ɛlenek, bɛ moo ekyee ɛdji ɛ nyɛ ekiya.