1 Dáa dwoo saba nadhaŋ ɛ, kɛɛŋ tɔ mɛlem mɛ dwoo mɛkɛn mɛ yenga, wɔ gwaa, Maali moma dɛl ɛ Makdala, nɛ nwyak dhiiti Maali zɛtɔ́, kɛbee ɛvit. 2 Dáa bɛ nakatɔ́ ɛ, bɛ kasɛka ɛ́, bɔs moo edheegel ɛlyelɛpe. Fofop ɛ Ghɛŋ ngɔt eedus pɛ tɔ gwoo, sul é bɔs, nyɛ eezɛbiŋal boo ɛkok ɛ bɛ nadiyal ɛbɛ ɛ ɛvit nɛ yɛ ɛ. Bhii tak, nyɛ eezɛnɔɔ nyel, disi kɔ ɛkok ɛ tak. 3 Nyɛ nadi ɛ́, ɛkasɛpe dáa ngwyes bhi, ekaad bɛ mɛpum dhaa nyel. 4 Tin, esodja ee nazɛbaal ɛvit ɔ, moo tin esyeela nɛ bɛbebwol, bɛ moo tin gbegbaagba epwak nɛ bwoo, saa dáa bɛ sa. 5 É di’enek, wɔ gwaa, fofop zokake nɛ nɔɔ náá: «Nàdika nɛ bwoo, mɛ nɛ gu náá, bi saŋ ɛ́ Yezu, mot nabemaa é mɛlaaba ɔ. 6 Nyɛ tokapɛ wak. Nyɛ eezegom dáa nyɛ nalɛɛ bin é ghɛŋ nyɛ nadi, nyɛ dinaa nɛ nen é di wat ɛ. Dha beeka di bɛ nakɛl muu’ɛ ɔ. 7 Lelka, tɔ́ka, kɛlɛɛ bɛdjekel bɛ náá: "Nyɛ eezegom! Nyɛ eetɔ́, kɛbwood bin pɛ Ghalile. Yɛ ɛ́ penek ɛ bi aakɛboma nɛ nɛ." Bhaadal mɛ kwyɛl mɛ neelɛɛ bin ɛ, yɛ ɛ́ yenek.»

8 É di tak wat, boa binɔk eezɛwyis tɔ ɛvit, bɛ eezɛsum kaab. Tɔ elyem bɔɔ, ye nabɛ ɛ́ nɛ bwoo nɛ mɛmyaala ɛlyelɛpe. Bɔɔ zokasik kɛgoola lɛŋ pɛ daa bɛdjekel ɛ Yezu. 9 É di tak wat, Yezu zokazɛboma nɛ boa binɔk. Nyɛy nɛ nɔɔ náá: «Mɛ eeswos bin!» Tin, boa binɔk eezɛtiila pɛ daa Yezu, bɛ eezɛmɛt nyɛ é mɛko, bɛ moo tin eduwal nyɛ. 10 Yezu ɛ́ booke nɛ nɔɔ náá: «Sa bi ààdi nɛ bwoo. Kɛlɛɛka nɛ bɔn-nyaagam náá, bɛ tɔ́ pɛ Ghalile. Yɛ ɛ́ penek ɛ bɛ aakɛbee mɛ.»

11 Boa binɔk dinaa é ze, bɛdhiiti bot tɔ lɔɔg esodja ee nanɛɛgaa étɛp ɛbaal ɛvit ɔ eezɛkum pɛ dɛl. Bɛ moo tin elɛɛ eboo bɛghaa-Zɛɛb esesɛɛ ee nadhaa penek ɛ djas. 12 Bot ɛ nadi kɔ elo e bɛghaa-Zɛɛb ɔ, nɛ bɛpaa ɛ eYuda zokasɛɛga é kwan. Bhii bɛ nazegwakel ɛ, wɔ gwaa, bɛ djɛ esodja binɔk bɛtɛ nɛ epata. 13 Bɛ eezɛke nɛ nɔɔ náá: «Bi lɛɛ bot ɛ náá: "Bɛdjekel bɛ eezyɛ é pum, zɛdjii muu mot’ɔɔ, bisɔ é gɔ́." 14 Tin, kukuma yen ɛ gwak ɔɔ, yɛ aanàkwaasa sonok, etɛɛ náá, bis ɛ́ waagu dáa bis aasil nyɛ lyem ɛ. Bis ɛ́ waasa náá, bi nàbela etɛp pɛ edi mɛsa men.» 15 Esodja e tak ɛ́ boonɔɔ epata e tak. Sika bɛ nakasik ɛ́, bɛ ɛ́ bookɛsa dáa bɛ nalɛɛ bɛ náá, bɛ sa ɛ. Deenek, ye nabɛ ɛ́ menduk mɛ etɛp binek naagék tɔ mɛlɔ mɛ bot ɛ mbyak eYuda djas, kɛkum dwoo pan mos’aak.

16 Bɛdjekel bɛ kam nɛ ngɔt nalik ɔ, nadi etɔ́ pɛ ze Ghalile, pɛ kɔ ɛtsok ɛ Yezu nalyo bɛ ɛ. 17 Dáa bɛ nakum ɛ, bɛ eezɛbee nyɛ. Bhii tak bɛ moo tin eduwal nyɛ. Ye kabela tin ɛ́, bɛdhiiti nadi ɛ́, nɛ mɛso tɔ elyem bɔɔ. 18 Yezu ɛ́ bootiila pɛ bɛ nadi ɛ, nyɛ ɛ́ booke nɛ nɔɔ náá: «Ye nabɛ ɛ́, Zɛɛb eedjɛ mɛ eghɛŋ nɛ mɛbwala mɛ djas pɛ tɔ gwoo nɛ kɔ bɔs. 19 Deenek, tɔ́ka pɛ daa bot ɛ membyak djas di kɔ ɛko ɛ bɔs ɔ, da bi ɛ́ kɛsa náá, bɔɔ djas liigel, da bɛ ɛ́ di bɛdjekel bam. Duuka bɛ Zɛɛb nɛ din ɛ Sɛɛg, nɛ Mɔn, nɛ Sisim na Dɛɛ. 20 Lyoka bɛ, bɛ kɛlooba nɛ esesɛɛ djas mɛ nalyaal bin ɛ. Tin, bi ɛ́ waabee náá, mena waadika lɔɔg wat mɛlu djas, kɛkum dwoo bɔs’ak aabookɛsi ɛ.»