1 Dáa Yezu nasul kɔ ɛtsok ɛ, zukamwaa nɛ mot naazɛdu nyɛ. 2 Wɔ gwaa, dhiiti mot nadi nɛ ɛbɛ́ ɛ zezam ɔ, zɛtiila pɛ daa lɛ. Nyɛ eezɛkwyit mɛboŋ si, zɛdjaala nɛ nɛ náá: «Ghɛŋ! Mɛ nɛ gu náá: wɔ kwyɛl ɔɔ, wɔ ɛ́ nɛ ghwyil ɛtsik mɛ, nyel’am bula dɛɛ.» 3 Tin, Yezu eezɛsɛɛb mbɔ, mɛt nyɛ. Nyɛy nɛ nɛ náá: «Mɛ eekwyɛl, tsaka!» É di tak wat, wɔ gwaa, ɛbɛ́ ɛ zezam mot’enɔk zɛsi. 4 Bhii tak, Yezu ɛ́ boozɛke nɛ nɛ náá: «Gwaka mɛ ɛnyɔɛpe: Sa wɔ ààlɛɛ mot sa dhaa wak ɛ. Tɔ́a, kɛlyaal nyel pɛ daa ghaa-Zɛɛb, da wɔ ɛ́ kɛdjɛ esa e ɛkɛɛ ɛ Zɛɛb dáa Moiiz nalyo ɛ, étɛp wɔ neelyaal bot djas náá, wɔ eetsak ɛ.»

5 Dáa Yezu nadi eni tɔ ghaada Kapɛlnaum ɛ, wɔ gwaa dhiiti boo kukuma tɔ lɔɔg esodja zɛtiila pɛ daa lɛ. Bhii tak, nyɛ eezɛke nɛ Yezu náá, nyɛ zɛkwyee nyɛ. 6 Nyɛy nɛ nɛ náá: «Ghɛŋ, mot-mɛsa mam ngɔt ɛ́ ndjaasi pɛ ndjaŋ’am, nyɛ eezesɔɔb nyɛ ɛpebɛ́ ɛlyelɛpe.» 7 Tin, Yezu eezɛbɔɔza nɛ nɛ náá: «Mɛ ɛpetɔ́, kɛtsik nyɛ.» 8 É di’enek, boo kukuma yenɔk eezɛbɔɔza nɛ nɛ náá: «Ghɛŋ, mam ɛ́ yam zɛ, wɔ neezɛni tɔ ndjaŋ’am. Ye goka ɛ́ náá, wɔ zolóo ɛkpa ɛ wat, étɛp mot-mɛsa mam neetsak. 9 Di mɛ di’aak, mɛ ɛ́ nɛ ekukuma bam mɛ di egwak esesɛɛ mɛ di goka nɛ ɛsa ɛ nɛ nɔɔ. Pɛ si mɛko mam, mɛ ɛ́ nɛ esodja. Mɛ ke nɛ ngɔt náá: "Tɔ́ak" ɔɔ, nyɛ ɛpetɔ́. Mɛ ke nɛ nwyak náá: "Bulak" ɔɔ, nyɛ ɛpebula. Tin, mɛ ke nɛ mot-mɛsa mam: "Sa dáak" ɔɔ, nyɛ ɛpesa.» 10 Dáa Yezu nagwak eyala e kukuma yenɔk ɛ, ye nabɛ ɛ́, nyɛ naadyeebamyaala. Tin, nyɛ ɛ́ booke nɛ bot ɛ nadi egyee nɛ nɛ ɔ náá: «Tsɛɛtsɛ nɛ tsɛɛtsɛ, mɛ lɛɛ bin ɛ́ náá, mɛ dinaa ààpabee kwaambi yak ɛdum koŋ nɛ Zɛɛb sok kɔ Yisalaɛl dáa yii mot’ak. 11 Betka mɛ lɛɛ bin náá, bot ɛbuɛpe ɛ́ waadus pɛ ɛbil ɛ dwoo nɛ pɛ ɛdjem ɛ dwoo. Bɛ waazyɛ, zɛdi kɔ mesa wat, bɛ nɛ bɔn ɛ Abalaam, Izak nɛ Zakɔɔb tɔ Ɛyoŋ ɛ di tɔ gwoo ɛ. 12 Tin, bot ɛ nagoka nɛ ɛdi ɛ́ bot ɛ ɛyoŋ ɛ tak ɔ, bɛ aadi ɛ́, mwasaa pɛ kel, tɔ ghooghom pɛ baadi edje mɛgwyɛ nɛ ɛkwaal ɛ mɛtsok ɛ.»

13 Bhii tak, Yezu eezɛke nɛ kukuma esodja binɔk náá: «Sika pɛ ndjaŋ’ɔ etɛɛ náá, kɔ ɛdum ɛ koŋ ɛ lɔ nɛ Zɛɛb, Zɛɛb eedjɛ wɔ sa lyem’ɔ di ekwos ɛ!» É di tak wat, ye nabɛ ɛ́, mot-mɛsa ɛ kukuma esodja binɔk naatsak.

14 Yezu eezɛwyis, tɔ́ pɛ daa Pyɛɛd. Ghuna tsi ɛ Pyɛɛd yii moma nadi ɛ́ ndjaasi nɛ mɛkosa ɛkpaŋɛpe. 15 Nyɛ eezɛmɛt nyɛ é mbɔ, mɛkosa eezɛsi. É di tak wat, moma yenɔk eezɛwyɛl, nyɛ moo zɛbe bɛ.

16 Dáa dwoo nadi ye moo esila ɛ, wɔ gwaa bɛ zɛzyɛ nyɛ nɛ bot ɛ embee esisim nadi edhek ɔ. Dáa Yezu nadi elii kɔ membel menɔk ɛ, embee esisim nadi ewyis tɔ lɔɔ, tin, nyɛ naatsik dɔɔ nɛ bot ɛ mɛbɛ́ djas. 17 Nyɛ nasa deenek ɛ́, etɛɛ náá, esesɛɛ ngoolel-Mɛkpa ɛ Zɛɛb Ezayi nalɛɛ ɛ́, neebela ɛsuk. Nyɛ nake ɛ́ náá: «Nyɛ naanɔɔ edjam bina nɛ mɛbɛ́ mena*8.17 Eza 53.4.»

18 Bhii tak, dáa Yezu nabee ɛdhuu ɛ bot ɛ nadi edu nyɛ ɔ, nyɛ ɛ́ boozɛke nɛ bɛdjekel bɛ náá, bɛ sɛɛ dhaa pɛ yii kyiid boo soob na djato-djato. 19 Wɔ gwaa, dhiiti ghaa-mɛkana mɛ etsi zɛzyɛ pɛ daa lɛ. Nyɛy nɛ nɛ náá: «Lyoel, mɛ ɛpekwyɛl ɛdu ɛ wɔ é mɛze djas wɔ aadi etɔ́ ɛ.» 20 Deenek Yezu eezɛbɔɔza nɛ nɛ náá: «Bɛbhɛk ɛ́ nɛ eku, enen ɛ́ nɛ mɛk. Yɛ kabɛ Sɛɛŋɛlɛ Mɔn Mot ɔɔ, nyɛ tok nɛ zeza di ɛdjaasi nɛ ɛwala.»

21 Dhiiti mot ngɔt pak bɛdjekel bɛ eezɛke nɛ nɛ náá: «Ghɛŋ, ɛsok nɛ mɛ nɛ du wɔ, pookobet mɛ, mɛ pookokɛdel Saagam.» 22 Tin, Yezu eebɔɔza nɛ nɛ náá: «Dua mɛ, beta bot ɛ zegwyɛ ɔ, bɛ del myoŋ mɛ bot bɔɔ.»

23 Yezu eezɛni tɔ boo elɛɛd sama wat nɛ bɛdjekel bɛ. 24 Ààbɔya deenek, kasɛka ɛ́, boo ghuu na lyel-lyel eezɛkan ɛpupal kɔ boo soob na djato-djato. Mɛpupal mɛ tak eezɛghɛɛ ɛbhyeeb ɛ mɛdii, zɛghɛɛg é elɛɛd. Ye kabela tin ɛ́, Yezu edja gɔ́. 25 Tin, bɛdjekel bɛ zokazɛtiila pɛ pak nyɛ nadi tɔ elɛɛd ɛ, bɛ eezɛdjem nyɛ nɛ etsim: «Ghɛŋ, tsika bis! Ɛsyee ɛ́ yak!» 26 É di’enek, ye nabɛ ɛ́ Yezu naazɛbɔɔza nɛ nɔɔ náá: «Étɛp yé bi di nɛ kɛŋ? Ɛbwaalel ɛ len nɛ Zɛɛb nɛ tɔɔl!» Bhii tak, nyɛ eezɛwyɛl, zɛbhɛm ghuu, nɛ dii, nyɛ eezɛlyak ghuu. Nyɛy nɛ dii náá: «Sila ghulal’ɔ ye di gwyem.» Wɔ gwaa, ghuu zɛsila, bhwak moo tin kup. 27 Bɔɔ djas nabɛ ɛ́, bɛ naadyeebadjoka. Tin, bɔɔ náá: «Nwyak ɛ́ nwyaa kwaambi mot di náá, dɔɔ nɛ ghuu nɛ boo soob na djato-djato ɛpegwak nyɛ?»

28 Dáa Yezu nasɛɛ pɛ yii kyiid boo soob na djato-djato pɛ kyee dik bot ɛ Ghadhaala ɛ, wɔ gwaa bot ɛbá zɛtuula tɔ mɛvit, bɛ neezɛboma nɛ nɛ. Ye nabɛ ɛ́ bot ɛ embee esisim nadi dhek ɔ, bɛ nadi ɛ́, nɛ mbee mɛnyan dhaa tyɛ, bot nabɛ ɛ́ ààbɛ nɛ ghwyil ɛdhaa é ngwoob mɛvit mɛ tak. 29 Bot binɔk moo tin etsim náá: «Bis sa wɔ yé, wɔy Mɔn ɛ Zɛɛb? Wɔ zyɛ wak ɛ́ zɛzɛm bis, sonok ɛwala ɛ tak dinaa ààdjala?»

30 Ba ɛtsetaɛpe nɛ di tak, ye nabɛ ɛ́ nɛ boo ɛsaŋ ɛ bɛghwyee nadi egɔɔ tin ɔ. 31 Embee esisim eezɛdjaala nɛ Yezu, bɔɔ náá: «Wɔ kwyɛl ɛsɔ bis ɔɔ, kyeeda bis tɔ ɛsaŋ ɛ bɛghwyee bak.» 32 Yezu eezɛmyaal, nyɛ eezɛke nɛ nɔɔ náá, bɛ tɔ́. Tin, wɔ gwaa embee esisim zɛwyis tɔ bot binɔk, zɛni tɔ ɛsaŋ ɛ bɛghwyee. Bhii tak, ɛsaa djas eezɛsul ɛtsok pɛ bɛ nadi ɛ́, kaab, kɛghaaga tɔ dii, diida. Bɔɔ djas si na bhɛɛɛ. 33 Bot ɛ nadi ebaal ɛsaŋ ɛ bɛghwyee tak ɔ, zokazɛkaab, sik pɛ dɛl. Bɛ moo tin ebaŋa bot ɛ dɛl edjema bɛ bee penek dum nɛ bot ɛbá binɔk ɛ. 34 Tin, wɔ gwaa bot ɛ dɛl djas zokazɛwyis, kɛboma nɛ Yezu. Dáa bɛ naboma nɛ nɛ ɛ, bɛ naazɛdjaala nɛ Yezu náá, nyɛ dus kɔ kyee dik’ɔɔ.