1 Deenek, mɛ dji ɛ́ náá: Zɛɛb eebyen bot bɛ? Yɛ aanàkwaasael deenek! Etɛɛ náá, mam ɛmet ɛ́ mot mbyak Yisalaɛl, dha ɛ Abalaam, mɛ ɛ́ ngɔt tɔ bot ɛ mbyak Bhɛzamɛ. 2 Zɛɛb ààpabyen bot bɛ nyɛ naloozesɛ́ɛ ɔ. Bi nɛ gu ɛnyɔɛpe sa Ekwyala di elɛɛ ɛ, é di ngoolel-Mɛkpa ɛ Zɛɛb Eli di emwana nɛ Zɛɛb dum nɛ mɛfulu mɛ bɔn ɛ Yisalaɛl ɔ: 3 «Ghɛŋ, bɛ naagó bɛngoolel ɛ mɛkpa mɔ, bɛ naabwak emesa e ebuwa bɔ, mɛ kalik ɛ́ mam ɛmet. Tin, bɛ ɛpesaŋ ɛgó ɛ mɛ.» 4 Tin, Zɛɛb nakayala nyɛ dáa? «Mɛ dinaa nɛ bot bɛmil ɛtɛn nɛ bɛbá (7 000) mɛ di ebaal ɔ, bot ɛ di náá, bɛ ààpakwyit mɛboŋ mɔɔ si sok bhwoob zɛɛb di edjóoaa Bhal ɔ✝.» 5 Yɛ ɛ́ tyee wat, nɛ é mɛwala mɛ bot di’aak, yɛ ɛ́ nɛ ba bim bot bwak tɔ bot ɛ Zɛɛb nasɛ́ɛ tɔ enɛm nɛ embɛɛ bɛ ɔ. 6 Nyɛ nasɛ́ɛ bɛ ɛ́ tɔ enɛm nɛ embɛɛ, ààbɛ kɔ ɛsu ɛ mɛsa mɔɔ. Yɛ ɛpedi ààdi deenek ɔɔ, pe enɛm nɛ embɛɛ Zɛɛb tokapɛ enɛm nɛ embɛɛ.

7 Bot aakake tin dáa? Bot ɛ Yisalaɛl ààpabela sa bɛ nadi esaŋ ɛ. Tin, bot ɛ Zɛɛb nasɛ́ɛ ɔ, bɛ naabela sa bɛ nadi esaŋ ɛ. Yɛ kabɛ bɛdhiiti bot ɔɔ, bɛ nabɛ ɛ́ ààbɛ nɛ ghwyil ɛmɛt etɛp binek. 8 Yɛ ɛ́ dáa Ekwyala di elɛɛ ɛ: «Zɛɛb naasa náá, esisim bɔɔ di ààmɛt etɛp tak, nyɛ naadipal mis, étɛp bɛ needi ààbee, diyal mɛlɔ mɔɔ dɔɔ nɛ dwoo pan mos’ak, étɛp bɛ needi ààgwak✝.» 9 Tin, mɛkoozi Dhavid naabaake náá:

«Mɛbyoŋ mɔɔ di nɛ nɔɔ laab,

ye di nɛ nɔɔ ɛwyet,

ye di nɛ nɔɔ ɛbɛk ɛ aakwyesal bɛ ɔ,

da bɛ ɛ́ bela feŋ bɛ di egoka nɛ yɛ ɛ.

10 Beta náá, mis mɔɔ ghomela,

bɛ di ààkanyaa sok,

bɛ gheedi nɛ ekoŋ nyaka✝.»

11 Deenek, mɛ ɛpedji náá: É ghɛŋ eYuda nabema ɛbɛk ɛ, bɛ nakadi ɛ́ tɔ ndjɛ kɔm-kɔm é? Yɛ aanàkwaasael deenek! Tin, kɔ ɛsu ɛ ɛdjak ɛ lɔɔ, tsik naadjɛaa bot ɛ di ààbɛ bot ɛ mbyak eYuda ɔ etɛɛ náá, ye neekpaa bot ɛ mbyak eYuda elyem. 12 Tin, yɛ bɛ náá, ɛdjak ɛ eYuda naasa náá, bot ɛ bɔs bela mɛvu mɛ Sisim ɔɔ, yɛ bɛ náá, ndjɛ yɔɔ naasa náá bot ɛ membyak mɛ sis bela mɛvu ɔɔ, haaa mɛvu aakadi dáa, yɛ di náá, bot ɛ mbyak eYuda eebulal elyem nɛ Zɛɛb étɛp tsik’ɔɔ ɔ?

13 Mɛ kalii wak nenak ɛ́ nɛ biyɔ bot ɛ di ààbɛ bot ɛ mbyak eYuda ɔ: Mɛ ɛ́ mot-lwoma, étɛp bot ɛ di ààbɛ bot ɛ mbyak eYuda ɔ. Dáa ye di deenek ɛ́, mam, mɛ ɛpemyaala nɛ mɛsa mam. 14 Mɛ sa deenek ɛ́, étɛp ye neekpaa bɔn-nyɛɛg bam bot ɛ mbyak eYuda elyem. Yɛ ɛ́ etɛɛ náá, ba bim bot pak’ɔɔ neetsak. 15 Etɛɛ náá, é ghɛŋ Zɛɛb nalum bot ɛ mbyak eYuda koŋ ɛ, ye naasa náá, bot ɛ bɔs bulal ɛgwakel nɛ Zɛɛb. Haaa yɛ aakadi dáa, é ghɛŋ Zɛɛb aasa náá, ɛgwakel bula-bula sis nɛ bot ɛ mbyak eYuda ɔ? Nɛ tsɛɛtsɛ, yɛ aadi ɛ́ dáa bot aadus tɔ ɛsyee bula tɔ tsik ɛ!

16 Yɛ bɛ náá, tom mapa eedjɛaa nɛ Zɛɛb ɔɔ, ye lɛɛ ɛ́ náá, djas ɛ tak moo ɛ́ yɛ. Yɛ bɛ náá, ekaŋal e le ɛ́ yii Zɛɛb ɔɔ, deenek, elɛɛ e le tak pe ɛ́ yɛ. 17 Bot ɛ Yisalaɛl ɛ́ dáa le oliv Zɛɛb natsaal edhiiti elɛɛ ɛ. Tin, wɔy mot di ààbɛ mot mbyak eYuda ɔ, wɔ ɛ́ dáa lɛɛ le oliv dik, wɔ eezɛbotelaa pak elɛɛ e le tak. Nenak, biyɔ djas lɔɔg bi ɛ́ nɛ ghwyil ɛdɛ mbɛɛ mɛdii mɛ le yenek di edus tɔ ekaŋal ɛ. 18 Étɛp tak ɛ di náá, sa wɔ ààbyasal elɛɛ natsaalaa ɛ. Haaa yɛ ɛ́ yaa ɛbet wɔ aakosa? Ye tok wɔy di edjɛ ekaŋal ghwyil, yɛ ɛ́ ekaŋal ɛ di edjɛ wɔ ghwyil.

19 Deenek, wɔ ɛ́ nɛ ghwyil ɛke náá: «Elɛɛ bak natsaalaa ɛ́ étɛp mɛ neebotelaa é di yɔɔ.» 20 Yɛ ɛ́ tsɛɛtsɛ. Elɛɛ binek natsaalaa ɛ́ etɛɛ náá, ye nabɛ ɛ́ ààbɛ nɛ ɛdum ɛ koŋ nɛ Zɛɛb. Wɔy botelaa é di’enek ɛ kɔ ɛsu ɛ ɛdum ɛ koŋ ɛ lɔ nɛ Zɛɛb. Tin, sa wɔ ààsa ɛbet, kaaba Zɛɛb. 21 Tin, tyee wat nɛ dáa Zɛɛb natsaal elɛɛ e le nabɛaa ɛ, wɔ ɛ́ koobaka ekaab náá, nyɛ ɛzɛkɛbaasa nɛ nɔ deenek. 22 Beea dáa Zɛɛb di elyaal é ɛwala wat, enɛm esa bɛ, nɛ ɛlyel ɛ mɛtiŋ mɛ ɛ: Nyɛ nɛ lyel mɛtiŋ nɛ bot ɛ di esa mesyem ɔ, nyɛ nɛ tel wɔ enɛm esa bɛ. Tin, wɔ goka ɛ́ nɛ ɛwa ɛbwaalel tɔ enɛm esa bɛ, yɛ di ààbɛ deenek ɔɔ, wɔ aatsaalaa dáa lɛɛ le. 23 Bot ɛ mbyak eYuda ɛ bulal ɛdum ɛ koŋ ɛ lɔɔ nɛ Zɛɛb ɔɔ, bɛ waabomelaa é di bɛ nadi sok ɔ, etɛɛ náá, Zɛɛb ɛ́ nɛ ghwyil ɛbaabomal bɛ bomela sis. 24 Wɔy, wɔ ɛ́ tɛtɛ lɛɛ le oliv dik ee Zɛɛb natsaal da botal ɛ. Ààbɛ tyee le oliv nabɛaa-bɛak ɛ. Yɛ kabɛ bot ɛ mbyak eYuda ɔɔ, bɛ ɛ́ dáa etɛtɛ elɛɛ e le oliv nabɛaa-bɛak ɛ. Zɛɛb ɛ́ nɛ ghwyil ɛbomal bɛ bomela sis é di bɛ nadi sok ɔ.

25 Bɔn-nyɛɛg bam, mɛ ɛpekwyɛl náá, bi gu etɛp e Zɛɛb di syela ɛ, deenek ɛ́ bi aagu náá, bi tok bɛtsoŋ ɛ bot. Mɛlyel mɛ elyem mɛ bɛdhiiti bot tɔ sama bot ɛ Yisalaɛl aabɔya kɛkum ɛlu ɛ bot ɛ membyak mɛ sis djas aabela tsik ɛ. 26 Yɛ ɛ́ deenek ɛ́ bot ɛ Yisalaɛl djas aabela tsik, dáa Ekwyala di elɛɛ ɛ:

«Mot aazɛpɛk bot ɔ, aadus ɛ́ pɛ Siyɔn,

nyɛ waadis mɛlyel mɛ elyem mɛ bɛdha ɛ Zakɔɔb. 27 Yenek ɛ́ ɛbhɛŋ ɛ lam mɛ aasa nɛ nɔɔ ɛ,

é ghɛŋ mɛ aadis mesyem mɔɔ ɛ✝.»

28 Yɛ bɛ náá, nɛ tsɛɛtsɛ bɛ eebyen Mbɛɛ Bhaadal ɔɔ, bɛ ɛ́ bot ɛ mɛbhuka ɛ Zɛɛb étɛp enɛm bin. Tin, yɛ kabɛ nɛ dáa Zɛɛb sɛ́ɛ bɛ ɔɔ, Zɛɛb nɛ kwyɛl bɛ kɔ ɛsu ɛ bɛbhaab bɔɔ. 29 Etɛɛ náá, Zɛɛb ààdɛk ɛkɛɛ ɛ nyɛ nazedjɛ bɛ ɛ, nyɛ ààswoola esiiza bɛ dum nɛ bot ɛ nyɛ nazedjóo ɔ. 30 É ghɛŋ sok, bi naabyen ɛlooba nɛ Zɛɛb, nenak yak, bi eezegu boo lyem ghoŋ ɛ Zɛɛb, etɛɛ náá, bot ɛ mbyak eYuda naabyen ɛlooba nɛ Zɛɛb. 31 Tyee wat nɛ bɔɔ pe, nenak bɛ eebyen ɛlooba etɛɛ náá, boo lyem ghoŋ ɛ Zɛɛb needi nɛ nen. Deenek, bɔɔ pe neebela boo lyem ghoŋ tak nenak*. 32 Etɛɛ náá, Zɛɛb eezesa náá, bot djas byen ɛlooba, étɛp nyɛ neelyaal bot djas boo lyem ghoŋ’ɛ.

33 Ekum e Zɛɛb nɛ bɔk! Nyɛ nɛ bu etsoŋ, nyɛ nɛ bu ɛgu! Ɛzɛ di nɛ ghwyil ɛpɛs epɛ́ɛ bɛ? Ɛzɛ di nɛ ghwyil ɛpiibal mɛze mɛ✝? 34 Dáa Ekwyala di elɛɛ ɛ:

«Ɛzɛ di egu esiiza e Ghɛŋ?

Ɛzɛ aakodi lyoel yɛ?

35 Ɛzɛ nakonyɛl ɛdjɛ nyɛ sonok sok?

Etɛɛ náá, mot tak neebela efute bhii tak✝?»

36 Etɛɛ náá, esonok djas dus ɛ́ pɛ daa lɛ, yɛ ɛ́ kɔ ɛsu ɛ lɛ ɛ esonok djas di kɔ bɔs, esonok djas ɛ́ yɛ.

Duu di nɛ nɛ kɔm-kɔm sii nɛ kɔm! Amɛn.