1 Pavlu, apostul pitricut nu di la oaminji, nitsi di la un om, ma prit Isus Hristos sh-prit Dumnidzãlu Tatãl, cai lu nyie dit mortsã, 2 deadun cu tuts fratslji shi surãrili cai suntu cu mini cãtrã biseritsli di Galatia:

3 Har sh-pace pristi voi di la Dumnidzãlu, Tatãl a nostru sh-di la Domnul Isus Hristos, 4 tsi s-curbãnsi trã amãrtiili a noastri, tra s-nã ascapã di aestã etã arauã dupã vrearea a Dumnidzãlui sh-a Tatãlui a nostru. 5 A lui s-lji hibã mãrirea, tu eta a etilor! Amin!

6 Mi ciudisescu cãt trãoarã ma vã dipãrtats di Dumnidzãlu, tsi vã acljimã tu harul a Hristolui, sh-ma vã turnats tu un altu evanghelu. 7 Altu evanghelu nu easti, ma suntu niscãntsã oaminji cai vã tulburã sh-vor si strãmbã evanghelu a Hristolui. 8 Ma, sh-ca s-hibã cã vãrã di noi icã vãrã anghil dit tser vã preadicã un altu evanghelu di atsel tsi vã avem predicat, atsel s-hibã blãstimat! 9 Ashã cum vã am dzãsã, tora vã dzãc nãpoi: Macã vãrã vã preadicã un altu evanghelu di atsel tsi voi avets aprucheat, atsel s-hibã blãstimat! 10 Nacã mini ma caftu s-ljeau arsirea a oaminjlor, icã a Dumnidzãlui? Ama caftu s-lj-arsescu a oaminjlor? Macã mini ma caftu s-lj arsescu a oaminjlor, nu va s-earam huzmichearu al Hristos.

11 Mini voi tsi sã shtits, frats shi surãri, cã evanghelu tsi vã am dimãndat nu yini di la oaminjlji. 12 Nu u loai sh-nu u nvitsai di vãrã om, ma prit discupirirea di la Isus Hristos. 13 Cã voi avets avdzãtã trã bana a mea di ma nãinti tu Iudaismu, cu cãt zel lu priaĝuneam mini bisearica a Dumnidzãlui sh-vream s-u aspãrdzeam. 14 Mini ma nãintam tu Iudaismu ma multu di vãrstnitslji a farãljei a mea sh-earam multu datã dupã adetsili a pãrintsãlor a melji. 15 Ma a Dumnidzãlui, cai mi aleapsi di tu pãnticlu a mumãljei a mea sh-mi acljimã prit harul a lui, lj-arsi 16 s-discoapirã Hiljilu a lui tu mini, tra s-pot s-lu dimãndu la pãngãnjlji. Trã atsea mini nu mi urnipsii cu vãrã altu. 17 Mini nu mi alinai nsus tu Ierusalem tra s-mi adunam cu atselji cai eara apostulji nãintea a mea, ma mi dush tu Arabii. Ma nãpoi mi turnai tu Damascu. 18 Atumtsea dupã trei anji, mi dush nsus tu Ierusalem tra s-mi adunam cu Chefa sh-armash cu nãsu tsintsisprãdzatsi di dzãli. 19 Mini nu vidzui vãrã di apostulji, di cãt mash Iacovul, fratili al Domnu. 20 Mini vã siguripsescu voi nãintea a Dumnidzãlui cã aesti tsi scriu nu suntu arãdeari. 21 Deapoea mi dush tu locurili a Siriiljei sh-a Chilichiiljei. 22 Mini earam nicunuscut di biseritsli tu Iudea, cai suntu tu Hristos. 23 Elji avea avdzãtã mash cã: "Atsel tsi ma nãinti nã priaĝunea noi, tora dimãndã pistea tsi unãoarã vrea s-u-aspãrdzea." 24 Elji multumãrea Dumnidzãlu trã itia a mea.