1 Tu apãrnjitã eara Zborlu, shi Zborlu eara cu Dumnidzãlu, shi Zborlu eara Dumnidzãlu. 2 Zborlu eara tu apãrnjitã cu Dumnidzãlu. 3 Tuti lucrili s-featsirã prit nãsu shi fãrã di nãsu nu s-featsi tsiva di tuti tsi s-featsirã. 4 La nãsu eara bana sh-bana eara lunjinã trã oaminjlji. 5 Lunjina lunjineadzã tu scutidi shi scutidlu nu u azvimsi. 6 Dumnidzãlu pitricu un om cu numa Ioan. 7 Elu vini ca martir s-mãrtirsea di lunjina, tsi tuts s-pistipsea prit nãsu. 8 Elu nu eara lunjina, ma s-pitricu tra s-mãrtirsea di lunjina. 9 Zborlu eara lunjina alihioasã, tsi lunjineadzã cathi om tsi yini tu lumi. 10 Zborlu eara tu lumi sh-lumea s-adrã prit nãsu, ma lumea nu lu cunuscu. 11 Zborlu vini la oaminjlji a lui sh-atselji a lui nu lu apruchearã. 12 Ma a tuts atsilor tsi lu apruchearã sh-atsilor tsi pistipsirã tu numa a lui, elu lã deadi puteari tra si s-facã hiljilji a Dumnidzãlui. 13 Elji nu s-amintarã nitsi di sãndzili, nitsi di vrearea a truplui, nitsi di vrearea a bãrbatlui, ma suntu amintatã di la Dumnidzãlu. 14 Zborlu s-featsi trup sh-bãnã namisa di noi mplin di har sh-di alihea. Noi vidzum mãrirea a lui, ca mãrirea a Hiljilui singur-amintat di la Talãl. 15 Ioanul mãrtirsi trã nãsu sh-grãi dzãcãnda: "Aestu easti atsel di cai vã am aspusã: ‘Atsel tsi yini dupã mini easti ma mari di mini cã eara nãinti di mini.’" 16 Noi tuts lom di mplinãtatea a lui har pristi har. 17 Cã Legea s-deadi prit Moisiul, harul sh-alihea vinirã prit Isus Hristolu. 18 Vãrã nu lu vidzu Dumnidzãlu vãrãoarã, mash Hiljilu singur-amintat, tsi easti Dumnidzã tu sinul a Tatãlui, tsi elu lu featsi cunuscut.

19 Atumtsea, mãrlji a Iudeilor dit Ierusalem lji pitricurã preftsãlji shi Levitslji sh-lu ntribarã: "Cai eshti tini?" Aestã eara mãrtiria a Ioanului. 20 Elu nu lu alipidã, ma apãndisi sh-mãrtirisi: "Mini nu escu Hristolu." 21 Shi elji lu ntribarã: "Atumtsea cai eshti? Eshti tini Elia?"

Elu dzãsi: "Nu escu mini!"

"Eshti tini Prufitlu?"

Elu apãndisi: "Nu."

22 Atumtsea elji lj-dzãsirã: "Cai eshti tini? Dzã-nã s-lã dãm unã apandisi atsilor tsi nã pitricurã. Tsi dzãtsi tini trã tini?" 23 Ioanul dzãsi: "Mini escu boatsea atsilui tsi greashti tu irnjii: ‘Ndriptats-u calea a Domnului’, ashã cum dzãsi prufitlu Isaia." 24 Atselji tsi eara pitricuts, eara di Fariseilji, 25 sh-lu ntribarã: "Atumtsea cãtse pãtedz, cãndu nu eshti Hristolu, nitsi Elia, nitsi Prufitlu?" 26 Ioanul lã-apãndisi a lor: "Mini pãtedz cu apã, ma namisa di voi easti unu, tsi nu lu cunushtets. 27 Elu easti atsel, tsi yini dupã mini shi atsilui mini nu escu axiu nitsi s-lji dizlegã ligãturili a sandalilor." 28 Aesti lucri undzirã tu Betania, napãrti di Iordan, iu Ioanul ma pãtidza.

29 Alantã dzuã, Ioanul lu vidzu Isusul tsi ma yinea cãtrã nãsu sh-dzãsi: "Ia, Njelu a Dumnidzãlui, tsi ljea amãrtiili a lumiljei! 30 Elu easti atsel di cai mini dzãsh: ‘Dupã mini yini un om tsi easti ma mari di mini, cã elu eara ma nãinti di mini!’ 31 Mini nu lu cunushteam, trã atsea vinj tsi s-pãtedz tu apã, tsi elu s-aspunã tu Israel." 32 Shi Ioanul mãrtirisi dzãcãnda: "Lu vidzui Duhlu dipunãnda dit tser ca un purumbu tsi stãtu pri nãsu. 33 Mini nu lu cunushteam, ma atsel tsi mi pitricu tsi s-lu pãtedz tu apã, nji-dzãsi: ‘Pristi atsel pri cai va s-vedz tsi s-dipunã Duhlu sh-va armãnã pristi nãsu, elu easti tsi pãteadzi cu Duhlu Sãmtu.’ 34 Mini vidzui sh-mãrtirsi cã aestu easti Hiljilu a Dumnidzãlui."

35 Alantã dzuã, Ioanul stãtea nãpoi aclo cu doi di ucenitsilji a lui. 36 Sh-cãndu lji arcã ocljilji pri Isusul, tsi ma imna, dzãsi: "Ia, Njelu a Dumnidzãlui." 37 Doi ucenitsilji avdzãrã atsel tsi ma grea sh-lu urmarã Isusul. 38 Atumtsea Isusul s-turnã sh-cãndu vidzu tsi ma lu urma, lã dzãsi a lor: "Tsi cãftats?" Sh-elji dzãsirã: "Rabbi" (tsi tradus va s-dzãcã Nvitsãtor) "iu stai?" 39 Elu lã dzãsi a lor: "Haidets shi videts." Vinirã sh-vidzurã iu stãtea elu, shi shidzurã atsea dzuã deadun cu nãsu. Eara oara patru dupã prãndzu*. 40 Andrea, fratili al Simon Petru, eara un di atselji doilji tsi lu avdzãrã di la Ioanul aestã sh-lu urmarã Isusul. 41 Elu lu aflã prota fratili a lui, Simonul shi lj-dzãsi: "Lu aflãm Mesia!" (tsi tradus va s-dzãcã: Hristos). 42 Sh-lu adusi la Isusul. Atumtsea Isusul lu vidzu sh-lji dzãsi: "Tini eshti Simonul, hiljilu al Ioan. Tini va s-hii acljimat Chefa" (tsi tradus va s-dzãcã cheatrã).

43 Alantã dzuã, Isusul vrea s-dutsea tu Galilea. Aflã Filipul sh-lji dzãsi: "Urmeadzã-mi!" 44 Filipul eara di Betsaida, di cãsãbãlu al Andrea sh-a Petrului. 45 Filipul aflã Natanaelul sh-lji-dzãsi: "Lu aflãm atsel, di cai ari scriatã Moisiul tu Lege sh-Prufitsilji tutashã: Isusul di Nazaret, hiljilu al Iosif!" 46 Natanaelul ntribã: "Poati s-easã tsiva bunã di Nazaretul?" Filipul lji dzãsi: "Haidi s-vedz!" 47 Isusul vidzu Natanaelul tsi ma yinea cãtrã nãsu sh-lji dzãsi: "Ia, un Israelit alihios, la cai nu ari arãdeari." 48 Natanaelul lji dzãsi: "Di iu mi cunoshti?" Isusul lji-apãndisi: "Ti vidzui cãndu earai sum pomlu a hiclui, nãinti tsi s-ti acljima Filipul." 49 Natanaelu apãndisinda dzãsi: "Rabbi, tini eshti Hiljilu a Dumnidzãlui, tini eshti amirãlu al Israel!" 50 Isusul lj-apãndisi: "Cã ts-dzãshu cã ti vidzui sum hic, tini pistipseashti, va s-vedz lucri ma mãri di aesti!" 51 Deapoea lji-dzãsi: "Dealihea ma vã dzãc: voi va s-videts tserlu discljis sh-anghilji a Dumnidzãlui alinãnda shi dipunãnda pristi Hiljilu a Omlui."✝