1 Dupã aesti, Isusul s-dusi napãrti di amarea a Galileiljei (tsi easti acljimat a Tiberiljei). 2 Unã multsãmi mari l-urma, cã videa seamnili tsi elu fãtsea pri nipututslji. 3 Isusul s-alinã pri munti sh-aclo shidzu cu ucenitsilji a lui. 4 Pashtili, sãrbãtoarea a Iudeilor eara aproapi. 5 Isusul sculã ocljilji shi, vidzãnda cã unã multsãmi mari ma yinea la nãsu, lji dzãsi al Filip, "Iu va s-acumpãrãm pãni tra s-mãcã aeshti?" 6 Ma elu u dzãtsea aestã tra s-lu bãga tu provã Filipul, cã elu lu shtia cã tsi va s-fãtsea. 7 Filipul lji apãndisi, "Doauã suti di denari pãni nu va s-agiungã, tsi cathiun di elji s-aibã cãti unã bucatã." 8 Andrea, fratili al Simon Petru, un di ucenitsilji a lui, lji dzãsi: 9 "Aoa easti un ficior tsi ari tsintsi pãnji di ordzu sh-doi peshti njitsi, ma tsi suntu aesti ti ahãntsã oaminji?" 10 Sh-Isusul dzãsi, "Dzãtsets-lã a oaminjlor s-sheadã!" Ma tu atsel loc avea multã iarbã. Oaminjlji shidzurã sh-eara aproapi di tsintsi njilji. 11 Deapoea Isusul lo pãnjili shi, dupã tsi hãristisi, lã li deadi atsilor cai shidea, ashãtsi featsi sh-cu peshtilji, ahãt cãt vrurã. 12 Dupã tsi elji s-fãnãtirã, Isusul lã dzãsi a ucenitsilor a lui: "Adunats bucãtsili tsi armasirã, tra s-nu chearã tsiva!" 13 Li adunarã tuti, shi umplurã doisprãdzatsi di coashi cu bucãtsili di atseali tsintsi pãnji di ordzu tsi lã armasirã atsilor tsi avea mãcatã. 14 Atumtsea oaminjlji, cãndu vidzurã semnu tsi featsi Isusul, dzãsirã, "Dealihea aestu easti Prufitlu tsi va s-yinã tu lumi." 15 Ma Isusul shtinda cã ma yinea s-lu acãtsa shi s-lu fãtsea cu zori amirã, s-trapsi nãpoi pri munti singur dip.

16 Cãndu ntunicã, ucenitsilji a lui s-dipusirã cãtrã amari. 17 Intrarã tu varcã shi s-dusirã tu alantã parti a amariljei cãtrã Capernaum. Tora eara scutidisit sh-Isusul ninga nu avea vinitã la elji. 18 Amarea eara mintit, cã vimtul sufla multu vãrtos. 19 Shi dupã tsi avea datã a lupãtsilor vãrã trei icã patru milji, vidzurã Isusul tsi imna pristi amari, ma s-apruchea di varcã, sh-elji s-aspãrarã. 20 Ma elu lã dzãsi a lor: "Escu mini, nu vã aspãrats!" 21 Elji vrurã s-lu ljea tu varcã, shi trãoarã varca agiumsi la loclu cãtrã iu s-dutsea. 22 Alantã dzuã multsãmea, tsi avea armasã di alantã parti a amariljei, vidzu cã aclo nu avea altã varcã, dicãt mash unã. Ucenitsilji al Isus avea intratã la varcã, ma elu nu avea intratã cu nãshi, cã ucenitsilji a lui eara nchisitã singuri. 23 Ma vinirã alti vãrtsi di Tiberiada, aproapi di loclu iu avea mãcatã pãni, dupã tsi Domnul avea hãristisitã. 24 Multsãmea, cãndu vidzu cã Isusul nu eara aclo sh-nitsi ucenitsilji a lui, intrarã sh-nãshi prit vãrtsi sh-vinirã tu Capernaum cãftãnda Isusul.

25 Cãndu lu aflarã napãrti di amari lu ntribarã: "Rabbi, cãndu vinish aoa?" 26 Isusul lã apãndisi: "Dealihea ma vã dzãc cã voi mi cãftats nu cã vidzut seamnili, ma cã avets mãcat di pãnjili shi hits fãnãtit. 27 Nu lucrats trã hranea tsi s-aspardzi, ma trã hranea tsi armãni trã bana eternã, tsi va vã-u da Hiljilu a Omlui, cã pri nãsu Tatãl Dumnidzãlu bãgã vula a lui a aprucheariljei." 28 Atumtsea elji ntribarã: "Tsi prindi s-fãtsem tra s-adrãm lucrili a Dumnidzãlui?" 29 Isusul lã apãndisi: "Aestu easti lucrul a Dumnidzãlui: tsi voi s-pistipsits tu atsel tsi elu ari pitricut." 30 Atumtsea elji lu ntribarã: "Tsi semnu fats tini tsi noi s-lu videm shi s-ti pistipsim? Tsi lucru va s-fats tini? 31 Pãrintsãlji a noshtri mãcarã mannã tu irnjii, cum easti scriatã: ‘Elu lã deadi s-mãcã pãni dit tser.’" 32 Atumtsea Isusul lã dzãsi a lor: "Dealihea ma vã dzãc, cã nu vã ari datã Moisiul pãni dit tser, ma Tatãl a meu vã da pãnea atsea alihioasa dit tser. 33 Cã pãnea a Dumnidzãlui easti atsea tsi dipuni dit tser shi lji-da banã a lumiljei." 34 Atumtsea elji lji dzãsirã: "Doamne, dã-nã totãna pãnea aestã!" 35 Sh-Isusul lã dzãsi a lor: "Mini escu pãnea a banãljei. Cai yini la mini nu va s-aibã pute foami sh-cai pistipseashti la mini, nu va s-aibã pute seati. 36 Ma mini vã dzãsh: cã voi mi-avets vidzutã, ma nu pistipsits. 37 Tuti tsi nji-li da Tatãl va s-yinã la mini, sh-atsel tsi yini la mini, mini nu va u scotã nafoarã pute, 38 cã mini am dipunatã dit tser tra s-nu fac vrearea a mea, ma vrearea atsilui tsi mi ari pitricut. 39 Aestã easti vrearea a Tatãlui cai mi pitricu, tsi mini s-nu cher nitsiunu di tuti atselji tsi elu nji ari datã, ma s-lji nyedz tu dzua di soni. 40 Aestã easti vrearea a Tatãlui a meu, tsi caitsido tsi veadi Hiljilu sh-pistipseashti tu nãsu, s-aibã banã eternã, sh-mini va lu nyedz atsel tu dzua di soni." 41 Iudeilji, murmurea cãtrã nãsu, cã avea dzãsã: "Mini escu pãnea tsi dipunã dit tser." 42 Elji dzãtsea: "Nu easti aestu Isusul, hiljilu al Iosif, a cui lji shtim tat-su sh-mã-sa? Cum dzãtsi tora aestu: ‘Mini dipunai dit tser’?" 43 Atumtsea Isusul lã dzãsi a lor: "Nu murmurats namisa di voi. 44 Vãrã nu poati s-yinã la mini, ma fu cã Tatãl tsi mi ari pitricut nu va lu-tragã sh-mini va lu-nyedz tu dzua di soni. 45 La Prufitsilji easti scriatã: ‘Tuts va s-hibã nvitsats di la Dumnidzãlu.’✝ Caitsido, tsi ari avdzãtã sh-nvitsatã di la Tatãl, yini la mini. 46 Vãrã nu lu ari vidzutã Tatãl, mash atsel tsi easti di la Dumnidzãlu. Elu singur lu ari vidzutã Tatãl. 47 Dealihea ma vã dzãcã, cai pistipseashti tu mini ari bana eternã. 48 Mini escu pãnea a banãljei. 49 Ntãnjilji a voshtri mãcarã mannã tu irnjii sh-murirã. 50 Aestã easti pãnea tsi dipuni dit tser, sh-cai va s-mãcã, nu va s-moarã. 51 Mini escu pãnea atsea yii tsi dipunã dit tser. Macã vãrã va s-mãcã di aestã pãni, va s-bãneadzã di totãna. Aestã pãni easti truplu a meu, tsi mini va u-dau trã bana a lumiljei." 52 Atumtsea Iudeilji ahurhirã si ncãcea cu un-alantu dzãcãnda: "Cum poati aestu s-nã da s-mãcãm truplu a lui?" 53 Atumtsea Isusul lã dzãsi atsilor: "Dealihea ma vã dzãc, ma s-nu mãcats truplu a Hiljilui a Omlui shi s-nu bets sãndzili a lui, nu avets banã tu voi. 54 Cai l-mãcã truplu a meu sh-u bea sãndzili a meu, ari banã di totãna sh-mini va lu nyedz dzua di soni. 55 Cã truplu a meu easti dealihea hranã sh-sãndzili a meu easti dealihea biuturã. 56 Cai l-mãcã truplu a meu sh-u bea sãndzili a meu, armãni tu mini sh-mini tu nãsu. 57 Ashã-cum Tatãl atsel yiulu mi ari pitricut sh-mini bãnedz di la Tatãl, ashã sh-atsel tsi va mi mãcã mini va s-bãneadzã sh-elu di la mini. 58 Aestã easti pãnea tsi dipunã dit tser. Nu easti ca manna tsi mãcarã ntãnjilji a voshtri sh-murirã. Cai mãcã di aestã pãni va s-bãneadzã di totãna." 59 Aesti dzãsi Isusul nvitsãnda tu sinagogã tu Capernaum.

60 Cãndu li avdzãrã aesti, multsã di ucenitsilji a lui dzãsirã: "Greu easti aestu zbor, cai poati s-lu ascultã?" 61 Ma Isusul, shtinda cã ucenitsilji a lui ma murmurea di aestã, lã dzãsi a lor: "Aestã vã cicãrdiseashti? 62 Tsi va s-eara ma s-lu videat Hiljilu a Omlui alinãnda aclo iu eara ma nãinti? 63 Easti Duhlu tsi da banã, truplu nu s-hãrzãeashti tsiva. Zboarili tsi mini vã am dzãsã suntu Duh sh-banã. 64 Ma suntu niscãntsã namisa di voi tsi nu pistipsescu." Isusul lu shtia di tu ahurhitã cai eara atselji tsi nu pistipsea, shi cai eara atsel tsi va lu pridea. 65 Sh-elu dzãtsea: "Trã aestã vã dzãsh, cã nitsiun nu poati s-yinã la mini, macã nu lji easti datã di la Tatãl a meu." 66 Di atumtsea multsã di ucenitsilji a lui s-trapsirã nãpoi sh-nu imna ma cu nãsu. 67 Atumtsea Isusul lã ntribã di doisprãdzatslji: "Voi nu vrets s-vã dipãrtats?" 68 Sh-Simon Petrul lj-apãndisi: "Doamne, la cai s-nã dutsem? Tini ai zboarãli a banãljei eternã. 69 Noi avem vinit s-pistipsim shi s-cunushtem cã tini eshti Sãmtul a Dumnidzãlui." 70 Isusul lã apãndisi a lor: "Nu vã-am aleaptã mini voi, di doisprãdzatsi? Ma un di voi easti drac!" 71 Sh-elu dzãtsea ti Iuda, hiljilu al Simon Iscariotul, cã aestu va s-lu prida, sh-cãtse eara un di doisprãdzatslji.