1 Eara nãinti di sãrbãtoarea a Pashtiljei. Isusul u shtia cã avea vinit oara a lui s-tritsea dit aestã dunjeauã cãtrã Tatãl. Elu lji vru oaminjlji a lui tsi eara tu lumi, sh-lji vru pãnã tu soni. 2 Shi mãcãnda tsinã, draclu lj-avea bãgat tu inima al Iuda, hiljilu al Simon Iscariotul, tra s-lu vindea Isusul. 3 Isusul lu shtia cã Tatãl lji-li-avea datã tuti tu mãnã sh-cã elu avea ishit di la Dumnidzãlu sh-la Dumnidzãlu ma s-turna, 4 si sculã di la tsinã, bãgã dinãparti stranjili shi lo un pischir, sh-lu lãgã tu mesi anvãrliga di nãsu. 5 Atumtsea turnã apã tu unã vasi sh-ahurhi trã aspilari cicioarili a ucenitsilor, shi s-lã-li ashteargã cu pischiru tsi avea ligat tu mesi. 6 Vini la Simon Petrul sh-elu lji-dzãsi: "Doamne, tini s-nji aspelji cicioarili?" 7 Isusul lj-apãndisi: "Atsea tsi ma fac mini, tini tora nu u-shtii, ma va u-aducheshti dupã aestã." 8 Petrul lji dzãsi: "Pute nu va nji-li aspelji cicioarili!" Isusul lj-apãndisi: "Ca s-nu ts-li aspel, nu va s-ai parti cu mini." 9 Simon Petrul lji-dzãsi: "Doamne, nu mash cicioarili ma sh-mãnjili sh-caplu." 10 Isusul lji-dzãsi: "Cai easti aspilat, nu ari ananghi dicãt s-aspealã cicioarili sh-easti tut curat. Shi voi hits curats, ma nu tuts." 11 Cã elu shtia cã cai va s-lu vindea sh-trã atsea dzãsi: "Nu hits tuts curats." 12 Sh-dupã tsi aspilã-cicioarili a lor, lo napoi stranjili a lui, acãtsã loc la measã sh-lã ntribã: "Aduchits cã tsi vã am faptã? 13 Voi mi acljimats ‘Nvitsãtor’ shi ‘Domnu’, sh-ghini dzãtsets cã escu. 14 Macã mini, Domnul shi Nvitsãtorlu, vã aspilai cicioarili a voauã sh-voi prindi s-aspilats cicioarili a unui-alantu. 15 Vã-am datã exemplu cã ashã cum vã am faptã mini a voauã, s-fãtsets sh-voi. 16 Dealihea ma vã dzãc, huzmichearlu nu easti ma mari dicãt nicuchirlu a lui, nitsi pitricutlu ma mari dicãt atsel tsi lu ari pitricut. 17 Tora tsi li shtits aesti lucri, ghinicuvintats va-hits voi, macã va li fãtsets."

18 "Nu ma grescu ti voi tuts. Mini shtiu cai am aleaptã. Ma aestã s-fatsi tra si mplineascã Scritura: ‘Atsel tsi mãcã pãni cu mini, sculã cãlcãnjilu contra mini.’ 19 Ma vã dzãc di tora, nãinti tsi s-undzeascã, cã, cãndu s-undzeascã, voi s-pistipsits cã mini escu. 20 Dealihea ma vã dzãc, cai aproachi atsel tsi am pitricut mini, mi aproachi mini. Cai mi aproachi mini, aproachi atsel tsi mi ari pitricut." 21 Dupã tsi li dzãsi aesti, Isusul s-tulburã tu duh sh-mãrtirsi: "Dealihea ma vã dzãc cã un di voi va mi prida." 22 Atumtsea ucenitsilji videa un-alantu shi eara ciudisits cã di cai ma zbura. 23 Un di ucenitsilji a lui, tsi Isusul lu vrea, eara ndupirat tu cheptul al Isus. 24 Atumtsea Simon Petrul lji-featsi semnu a uceniclui tra s-lu ntriba cã cai eara atsel trã cai grãi. 25 Ma elu aplicãnda tu cheptul al Isus, lu-ntribã: "Doamne, cai easti?" 26 Isusul lji-apãndisi: "Easti atsel a cui mini va lji-u dau mãshcãtura di pãni, dupã tsi s-u am muljeatã." Sh-u mulje mãshcãtura sh-lji-u deadi al Iuda, hiljilu al Simon Iscariotul. 27 Sh-dupã tsi lo mãshcãtura di pãni, atumtsea intrã Satanlu tu nãsu. Atumtsea Isusul lji-dzãsi: "Tsi ai ti fãtseari, fã-u trãoarã!" 28 Ma vãrã di atselji tsi eara la measã nu aduchi, cãtse Isusul lji-u-dzãsi atsilui aestã. 29 Niscãntsã minduea cã, metsi Iuda tsãnea punga di pãradzi, Isusul lji avea dzãsã: "Acumpãrã tsi nã hãrzãeashti di sãrbãtoari", icã s-lã dãdea tsiva a niavutslor. 30 Elu dupã tsi lo mãshcãtura, ishi afoarã trãoarã. Eara noapti.

31 Ma cãndu ishi Iuda, Isusul dzãsi: "Tora Hiljilu a Omlui easti multumãrit sh-Dumnidzãlu easti multumãrit tu nãsu. 32 Macã Dumnidzãlu easti multumãrit tu nãsu, Dumnidzãlu va s-lu multumãreascã Hiljilu tu nãsu, sh-va lu multumãreascã trãoarã. 33 Hiljilji a melji, ninga putsãn escu cu voi. Voi va mi cãftats, sh-ashã cum lã am dzãsã a Iudeilor, ashãtsi tora ma vã dzãc sh-a voauã: Aclo iu mi duc mini voi nu putets s-yinits.

34 Ma vã dau unã dimãndari noauã: s-vã vrets cu un-alantu! Ashã cum mini vã am vrut, ashã sh-voi s-vã vrets cu un-alantu. 35 Di aestã va vã cunoascã tuts cã hits ucenitsilji a melji, macã avets vreari unu cu-alantu." 36 Simon Petrul lu ntribã: "Doamne, iu ti duts?" Isusul lji-apãndisi: "Aclo iu mi duc mini, tini nu pots s-mi urmedzi tora, ma, ma amãnat va mi urmeshti." 37 Petrul lji-dzãsi: "Doamne, cãtse nu pot s-ti-urmescu tora? Mini va u-dau bana a mea trã tini." 38 Isusul lji-apãndisi: "Tini va s-u alash bana a ta trã mini? Dealihea ma tsã-dzãc, cucotlu nu va s-cãntã, pãnã cãndu tini mi aleapidz di trei ori."