1 "Dealihea, ma vã dzãc, atsel cai nu intrã prit poartã la strunga a oilor, ma s-alinã prit unã altã parti, atsel easti fur sh-furcudar. 2 Atsel cai intrã prit poartã, easti picurarlu a oilor. 3 Atsilui lji-u discljidi portarlu, sh-oili u ascultã boatsea a lui. Elu li acljeamã oili a lui pi numã sh-li scoati nafoarã. 4 Shi, dupã tsi li ari scoasã oili a lui, s-dutsi nãintea a lor, sh-oili lu urmeadzã, cã cunoscu boatsea a lui. 5 Un xen nu-lu urmeadzã, ma va s-fug di la nãsu, cã nu-u cunoscu boatsea a xenjilor." 6 Isusul lã-u spusi a-lor aestã parabolã, ma elji nu aduchirã tsi eara atsea tsi ma lã spunea. 7 Trã atsea Isusul lã dzãsi a-lor napoi: "Dealihea, ma vã dzãc, mini escu poarta trã oili. 8 Tuts atselji cãts vinirã nãintea a mea suntu furii shi furcudari, sh-oili nu lji ascultarã. 9 Mini escu poarta, macã vãrã intrã prit mini, va s-ascapã. Elu va s-intrã, sh-va s-easã, shi va aflã livãdzi. 10 Furlu yini mash s-furã, s-vatãmã, shi s-aspargã. Mini am vinit tsi elji s-aibã banã shi s-u aibã mplinã. 11 Mini escu picurarlu atsel bunlu. Picurarlu atsel bunlu da bana a lui ti oili. 12 Ma plãtitlu, cai nu easti picurar, sh-oili nu suntu a lui, cãndu l-veadi luplu tsi yini, li alasi oili sh-fudzi, sh-luplu li arãcheashti oili sh li scurpiseashti. 13 Plãtitlu fudzi, cã easti plãtit sh-nu va sã shti di oili. 14 Mini escu picurarlu atsel bunlu, li cunoscu oili a meali shi eli mi cunoscu mini 15 ashã cum mi cunoashti mini Tatãl sh-mini lu cunoscu Tatãl. Mini u dau bana a mea trã oili. 16 Mini am sh-alti oi tsi nu suntu di aestã strungã. Prindi s-li aduc sh-atseli, tra s-u ascultã boatsea a mea sh-va hibã unã singurã cupii sh-un singur picurar. 17 Trã atsea Tatãl mi va, cã mini u dau bana a mea tsi s-u ljeau napoi. 18 Vãrã nu u ljea di la mini, ma voi s-u dau mini. Mini am autoritati s-u alasã sh-am autoritati s-u ljeau napoi. Aestu ordin mini lu am loat di la Tatãl a meu." 19 Atumtsea s-featsi napoi unã mpãrtsãri namisa di Iudeilji trã itia a zboarilor aesti. 20 Sh-multsã di elji dzãtsea: "Elu ari un demon sh-nu easti ghini! Cãtse lu ascultats?" 21 Altsã dzãtsea: "Aesti nu suntu zboarili a unui demonizat. Poati un demon s-discljidã ocljilji a orghilor?"

22 Eara sãrbãtoarea a lunjinilor* tu Ierusalem sh-eara iarnã. 23 Isusul ma imna tu templu sum porticlu al Solomon. 24 Lu anvãrligarã Iudeilji shi lji dzãsirã: "Pãnã cãndu va-u alashã mintea a noastrã nisigurã? Macã tini eshti Hristolu, dzã-nã-u ntr-oclji." 25 Isusul lã apãndisi a lor: "Mini vã-u am dzãsã, ma voi nu pistipsits. Faptili tsi fac mini tu numa a Tatãlui a meu, atseali mãrtirsescu trã mini. 26 Ma voi nu pistipsits, cã nu hits dit oili a meali. 27 Oili a meali u ascultã boatsea a mea, sh-mini li cunoscu sh-mi urmeadzã. 28 Mini lã dau a lor bana eternã sh-nu va s-chearã pute, sh-vãrã nu va-li arãcheascã di mãna a mea. 29 Tatãl a meu, cai nji li-ari datã, easti ma marli di tuts, sh-vãrã nu poati s-li arãcheascã dit mãna a Tatãlui a meu. 30 Mini sh-Tatãl him un." 31 Trã atsea Iudeilji loarã napoi chetsri s-lu vãtãma. 32 Isusul lã apãndisi a lor: "Vã spush multi lucri buni di la Tatãl a meu. Ti cai di aesti lucri mi agudits cu chetri?" 33 Iudeilji apãndisirã: "Noi nu ti agudim cu chetsri ti lucru bun, ma ti blãstenji. Cã tini, hiinda om, vrei s-ti fats Dumnidzã." 34 Isusul lã apãndisi a lor: "Nu easti scriatã tu Legea a voastrã: ‘Mini dzãsh voi hits dumnidzã’?✝ 35 Scritura nu poati s-ncalcã. Macã elu lji acljeami dumnidzadz atselji a cui lji-si dzãsi zborlu a Dumnidzãlui, 36 voi dzãtsets cã elu, tsi Tatãl lu ari sãmtsãtã sh-lu ari pitricut tu lumi: ‘Blastimã,’ cã ari dzãsã: ‘Mini escu Hiljilu a Dumnidzãlui’? 37 Macã mini nu fac faptili a Tatãlui a meu, nu mi pistipsits. 38 Macã li fac, sh-ma s-nu mi pistipsits mini, pistipsits la faptili, tsi s-cunushtets shi s-aduchits cã Tatãl easti tu mini shi mini tu nãsu." 39 Atumtsea cãftarã napoi s-lu acãtsa, ma elu ascãpa di mãnjili a lor. 40 Shi s-turnã napãrti di Iordan, tu loclu iu ma nãinti Ioanul pãtidza, sh-armasi aclo. 41 Multsã oaminji vinirã la elu sh-dzãtsea: "Ioanul dealihea nu featsi nitsiun semnu, ma itsido tsi dzãsi di aestu eara alihioasã." 42 Sh-aclo multsã oaminji pistipsirã la elu.