1 Cãndu Isusul ma tritsea, elu vidzu un om tsi eara orbu di cãndu eara amintat. 2 Ucenitsilji a lui lu ntribarã: "Rabbi, cai ari amãrtisit, aestu icã pãrintsãlji a lui, tsi elu s-ari amintat orbu?" 3 Isusul apãndisi: "Nitsi aestu nu ari amãrtisit, nitsi pãrintsãlji a lui, ma aestã s-featsi tsi la elu si aspunã faptili a Dumnidzãlui. 4 Noi prindi s-fãtsem faptili atsilui tsi mi ari pitricut pãnã cãndu easti dzuã. Noaptea ma yini, sh-vãrã nu poati s-lucreadzã. 5 Pãnã cãndu mini escu tu lumi, escu lunjina trã lumea." 6 Dupã tsi li avea dzãsã aesti, scuche mpadi sh-featsi muzgã sh-deapoea aumsi ocljilji a orbului cu muzgã. 7 Deapoea lji dzãsi: "Du-ti, aspeal-ti la ascãldãtoarea al Shiloam" (tsi va s-dzãc "Pitricut"). Elu s-dusi, s-aspilã shi s-turnã vidzãnda. 8 Atumtsea vitsinjlji sh-atselji tsi ma nãinti lu avea vidzut cã eara orbu sh-cãfta, dzãsirã: "Nu easti aestu atsel tsi shidea mpadi sh-cãfta cu mãna teasã?" 9 Niscãntsã dzãtsea: "Elu easti." Ma altsãlji dzãtsea: "Lj-undzeashti a lui." Elu dzãtsea: "Mini escu." 10 Atumtsea elji lu ntribarã: "Cum tsã si discljisirã ocljilji?" 11 Elu apãndisi: "Un om, tsi s-acljima Isus, featsi muzgã, nji-li aumsi ocljilji shi-nji dzãsi: ‘Duti la ascãldãtoarea al Shiloam shi aspealã-ti!’ Sh-mi dush aclo, mi aspilai sh-nji-si turnã lunjina a ocljilor." 12 Shi elji lu ntribarã: "Iu easti atsel?" Elu apãndisi: "Nu shtiu."

13 Atumtsea elji lu dusirã la Fariseilji atsel tsi ma nãinti eara orbu. 14 Shi eara Sãmbãtã cãndu Isusul adrã muzgã shi lji discljisi ocljilji. 15 Sh-Fariseilji lu ntribarã napoi cum u amintã lunjina a ocljilor. Sh-elu lã dzãsi a lor: "Nji-bãgã muzgã pri oclji, mi aspilai sh-ved." 16 Atumtsea niscãntsã di Fariseilji dzãsirã: "Aestu om nu easti di-la Dumnidzãlu, cã nu tsãni Sãmbãta!" Altsã dzãtsea: "Cum poati s-facã ahtãri seamni un om amãrtios?" Sh-avea un ngrãnji ntrã elji. 17 Elji lu ntribarã napoi orbul: "Ma tini tsi dzãts ti atsel tsi s-discljisi ocljilji?" Ma elu dzãsi: "Easti un prufit!" 18 Mãrlji a Iudeilor nu pistipsirã cã elu fu orbu sh-avea amintat lunjina a ocljilor, trã atsea acljimarã pãrintsãlji a lui. 19 Sh-lji ntribarã: "Easti aestu hiljilu a vostru, di cai voi dzãtsets cã s-amintã orbu? Cum poati tora tsi veadi?" 20 Pãrintsãlji a lui apãndisirã: "Shtim cã aestu easti hiljilu a nostru shi cã s-amintã orbu, 21 ma noi nu shtim cã cum veadi tora icã cai lji discljisi ocljilji a lui. Elu easti criscut, ntribats-lu, elu va-vã aspunã singur." 22 Aesti dzãsirã pãrintsãlji a lui, cã avea fricã di mãrlji a Iudeilor, cã elji avea apofãsitã cã, macã vãrã va lu cunushtea Isusul ca Hristos, va lu scutea nafoarã dit sinagogã. 23 Trã atsea pãrintsãlji a lui dzãsirã: "Easti criscut, ntribats-lu!" 24 Atumtsea elji acljimarã napoi omlu tsi fu orbu sh-lji dzãsirã, "Dã-lji mãriri a Dumnidzãlui sh-dzã alihea. Noi shtim cã atsel om easti amãrtios." 25 Elu atumtsea apãndisi, "Macã easti amãrtios, nu shtiu, ma un tsiva shtiu, cã earam orbu sh-tora ved." 26 Ma napoi lu ntribarã, "Tsi s-featsi? Cum tsã si discljisirã ocljilji?" 27 Elu apãndisi a lor, "Mini tora vã am dzãsã sh-voi nu avets avdzãtã, cãtse vrets s-u avdzãts napoi? Vrets vahi s-vã fãtsets sh-voi ucenitsilji a lui?" 28 Ma elji lu ngiurarã shi lj-dzãsirã: "Tini eshti uceniclu a lui, ma noi him ucenitsilji a Moisiului. 29 Noi shtim cã Dumnidzãlu lji grãi a Moisiului, ma atsel nu shtim cã di iu easti." 30 Omlu apãndisi sh-lã dzãsi a lor: "Ia, aestã easti trã ciudii tsi voi s-nu shtits cã di iu easti, cu tutã cã elu nji discljisi ocljilji! 31 Noi shtim cã Dumnidzãlu nu lji ascultã amãrtioshlji. Ma macã vãrã ari fricã di Dumnidzãlu sh-fatsi vrearea a lui, elu aestu lu ascultã. 32 Di tu ahurhita a lumiljei nu easti avdzãtã tsi vãrã s-lji aibã discljisã ocljilji a unui om amintat orbu. 33 Ma s-nu eara aestu di la Dumnidzãlu, nu va s-putea s-fãtsea tsiva." 34 Elji lj-apãndisirã: "Tini ti-ai amintatã ntreg tu amãrtii sh-vrei s-nã nvets noi?" Sh-lu scoasirã nafoarã.

35 Isusul avdzã cã lu scoasirã nafoarã shi cãndu u aflã, lj-dzãsi: "Pistipseashti tini tu Hiljilu a Omlui?" 36 Elu apãndisi: "Cai easti, Doamne? Dzã-nji tra s-pistipsescu la elu?" 37 Shi Isusul lji dzãsi: "Lu ai vidzut, atsel tsi ma greashti cu tini. Elu easti." 38 Atumtsea elu dzãsi: "Mini pistipsescu, Doamne!" Shi lji-si aplicã a lui. 39 Deapoea Isusul dzãsi: "Mini am vinit tu aestã dunjeauã tra s-facã giudicatã, tsi atselji tsi nu ved s-veadã, sh-atselji tsi veadã, s-urgheascã." 40 Sh-niscãntsã di Fariseilji tsi eara cu elu li avdzãrã aesti sh-lu ntribarã: "Him orghi sh-noi?" 41 Isusul lã dzãsi a lor: "Ma s-earat orghi nu va s-aveat armasã tu amãrtii, ma tora dzãtsets: ‘Noi videm,’ trã atsea amãrtia a voastrã armãni."