1 Isusul shasi dzãli nãinti di Pashti vini tu Betania, iu bãna Lazarul, atsel tsi avea murit sh-Isusul lu avea nyeat dit mortsã. 2 Sh-aclo lji adrarã unã tsina. Marta chirnãsea, iarã Lazarul eara unu di atselji tsi shidea la measã cu Isusul. 3 Atumtsea Maria lo un litru di untulem di bunã-njurizmã di nardu curat sh-multu scumpu. Aumsi cicioarili al Isus shi lji ashtearsi cicioarili a lui cu perlu a ljei. Casa s-umplu cu njiurizma a njirlui. 4 Atumtsea un di ucenitsilji a lui, Iuda Iscariotul, atsel tsi va lu vindea, dzãsi: 5 "Cãtse nu s-vindu njirlu aestu cu trei suti di denari* shi si s-dea a oarfãnjlor?" 6 Ma aestã u dzãsi, nu cã s-minduea di oarfãnjlji, ma cã eara fur. Elu avea punga di pãradzi shi loa di atsea tsi s-bãga nãuntru. 7 Isusul dzãsi: "Alãsats-u. Ea u ari vigljeatã ti dzua a ngrupariljei a mea. 8 Oarfãnjlji lji-avets totãna cu voi, ma mini nu va mi avets totãna." 9 Atumtsea unã multsãmi mari di Iudei nvitsã cã Isusul eara aclo, sh-vini nu mash di nãsu, ma shi s-videa Lazarul, tsi elu lu-avea nyeatã dit mortsã. 10 Atumtsea arhipreftsãlji apofãsirã s-lu vatãmã sh-Lazarul, 11 cã di itia a lui, multsã di Iudeilji ma fudzea sh-pistipsea la Isusul.

12 Alantã dzuã, unã multsãmi mari tsi avea vinit la sãrbãtoari, cãndu avdzã cã Isusul ma yinea tu Ierusalem, 13 loarã dedzi di palmã shi lji ishirã nãinti s-lu ashtipta aurlãnda:

"Hosana! Ghinicuvintat atsel tsi yini tu numa a Domnului, Amirãlu al Israel!"✝

14 Isusul aflã un gumãric shi ncãlicã pri nãsu, cum easti scriatã:

15 "S-nu ai fricã, populu a Sionlui, ia, amirãlu a tãu ma yini ncãlicat pri un cãriciu di gumarã!"✝

16 Tu ahurhitã ucenitsilji a lui nu li-aduchirã aesti, ma, cãndu Isusul eara multumãritã, atumtsea adusirã aminti cã aesti eara scriati trã nãsu, sh-cã lji avea faptã aesti trã nãsu. 17 Ashãtsi multsãmea, tsi eara cu nãsu cãndu elu lu avea acljimat nafoarã Lazarul di tu murmintu, sh-lu avea nyeatã dit mortsã, dãdea dipriunã mãrtirii trã atsea. 18 Trã atsea sh-multsãmea lji-ishi nãinti, cã avea avdzãtã cã elu avea faptã aestã thavmã. 19 Atumtsea Fariseilji dzãsirã cu un-alantu: "Videts, cã nu putets s-fãtsets tsiva? Ia, lumea s-dutsi dupã nãsu."

20 Namisa di atselji tsi eara alinatã ti ncljinari tu sãrbãtoari eara sh-niscãntsã Elinji. 21 Elji s-apruchearã di Filipul, tsi eara di Betsaida a Galileiljei shi s-rugarã dzãcãnda: "Doamne, vrem s-videm Isusul." 22 Filipul vini sh-lji dzãsi al Andrea. Apoea Andrea sh-Filipul lji dzãsirã al Isus. 23 Ma Isusul lã-apãndisi a lor: "Ari vinit oara, tsi Hiljilu a Omlui va si s-multumãreascã. 24 Dealihea ma vã dzãc, macã gãrnutslu a grãnui cãdzut tu loc, nu moari, atsel armãni singur. Ma, macã moari, da multu carpo. 25 Cai u va bana a lui, va u chearã, sh-cai u aurashti bana a lui tu aestã dunjauã, va u veaglji tu bana di totãna. 26 Sh-macã vãrã mi huzmitipseashti, s-mi urmeadzã. Iu escu mini, aclo va hibã sh-huzmichearlu a meu. Macã vãrã mi huzmitipseashti, Tatãl va lu tinjiseascã. 27 Tora suflitlu a meu easti tulburat, sh-tsi s-dzãc: ‘Tate mi ascapã di aestã oarã’? Ma trã atsea vinj tu aestã oarã. 28 Tate, multumãrea numa a ta!" Atumtsea unã boatsi vini dit tser: "U am multumãrit sh-napoi va-u multumãrescu!" 29 Multsãmea tsi eara aclo avdza sh-dzãtsea cã eara un bumbunidzari. Altsã dzãtsea: "Un anghil lj-grãi." 30 Isusul apãndisi: "Boatsea aestã nu ari vinit ti mini, ma ti voi. 31 Tora easti giudicata aishtei lumi. Tora va si s-arucã nafoarã domnitorlu aishtei lumi! 32 Sh-mini, cãndu va hiu anãltsat nsus dit loc, va li trag tuts cãtrã mini." 33 Elu li dzãtsea aesti tra sã spunea cã di tsi soi di moarti va s-murea. 34 Multsãmea lji apãndisi: "Noi avem avdzãtã di legea cã Hristolu armãni di totãna. Tora cum pots s-dzãts tini cã Hiljilu a Omlui prindi si s-analtsã nsus? Cai easti aestu ‘Hiljilu a Omlui’?" 35 Atumtsea Isusul lã dzãsi a lor: "Lunjina easti cu voi ninga putsãn chiro, imnats pãnã cãndu avets lunjinã, tsi s-nu vã acatsã scutidlu. Cai imnã tu scutidi nu shtii iu neadzi. 36 Pãnã cãndu avem lunjinã, s-lji pistipsits a lunjinãljei, tsi s-vã fãtsets hiljilji a lunjinãljei." Cãndu Isusul dzãsi aesti, s-dipãrtã shi s-ascumsi di elji.

37 Ma cu tuti cã avea faptã multi thavmati nãintea a lor, elji nu pistipsea la nãsu, 38 tra si mplineascã zborlu a prufitlui Isaia tsi dzãsi:

"Doamne, cai lji-ari pistipsitã a predicariljei a noastrã? Sh-a cui lji si discupiri bratslu a Domnului?"✝

39 Trã atsea elji nu putea s-pistipsea, cã cum Isaia nãpoi dzãsi:

40 "Li ari urghitã ocljilji a lor sh-li ari nchitritã ininjli a lor, tra s-nu veadã cu ocljilji, shi s-aducheascã cu ininjli, shi s-toarnã sh-mini s-li vindicã!"✝

41 Aesti dzãsi Isaia cãndu vidzu mãrirea al Isus sh-grãi trã elu. 42 Cu tutã atsea, sh-namisa di mãrlji, multsã pistipsirã la elu. Ma trã itia a Fariseilor, elji nu mãrtirsea ti Isusul, tra nu s-lji scutea di sinagogã, 43 cã vrurã alãvdarea a oaminjlor ma multu dicãt alãvdarea a Dumnidzãlui. 44 Ma Isusul grãi cu boatsi analtã, "Cai pistipseashti tu mini, nu pistipseashti mash tu mini, ma tu atsel tsi mi pitricu. 45 Sh-cai mi veadi mini, veadi atsel tsi mi pitricu. 46 Mini am vinit ca lunjinã tu lumi, tsi caitsido tsi pistipseashti tu mini s-nu armãnã tu scutidi. 47 Macã vãrã li avdã zboarili a meali sh-nu li veaglji, mini nu lu giudic, cã mini nu am vinit s-giudicã lumea, ma s-lu ascapã lumea. 48 Cai mi aleapid mini sh-nu li aproachi zboarili a meali, ari cai s-lu giudicã. Zborlu tsi am grãitã, aestu va lu giudicã dzua di soni. 49 Cã mini nu grãi di la mini, ma Tatãl tsi mi pitricu elu mi ari dimãndatã cã tsi prindi sã spun shi tsi sã zburãscu. 50 Mini u shtiu cã dimãndarea a lui adutsi banã eternã. Atseli tsi grãescu mini, li dzãc ashãtsi cum nji-li ari dzãsã Tatãl."