1 Tu prota dzuã a stãmãnãljei, curund dimineatsa, muljerili loarã njurizmili atseali buni etimãsiti sh-vinirã la murmintu. 2 Eali aflarã cheatra arãsturnatã dit murmintu. 3 Deapoea intrarã nãuntru, ma nu lu aflarã truplu al Domnul Isus. 4 Ashãtsi cum eara cihtisiti di aestã, ia, doi bãrbats nviscuts cu stranji lunjinoasi, stãturã ningã eali. 5 Muljerili s-aspãrarã sh-apunarã caplu nghios. Ma bãrbatslji lã dzãsirã: "Cãtse cãftats yiulu ntrã mortsãlji? 6 Nu easti aoa, easti nyeat. Adutsets-vã aminti cum vã dzãsi cãndu ninga eara tu Galilea: 7 ‘Hiljilu a Omlui prindi si s-da tu mãnjili a amãrtioshilor, va si s-crutsiseascã sh-va si nyeadzã a treia dzuã.’" 8 Eali adusirã a minti zboarili a lui. 9 Cãndu s-turnarã di la murmintu, li aspusirã tuti aesti a Unsprãdzatsilor sh-a tuts alantsãlor. 10 Eali tsi aspusirã a apostuljilor aesti eara: Maria Magdalena, Ioana, Maria, muma al Iacov sh-alanti muljeri tsi eara cu nãshi. 11 Zboarili aesti a muljerilor lã si pãrurã ca zboari goali sh-nu li pistipsirã. 12 Cu tut atsea Petrul si sculã shi s-dusi trãoarã la murmintul. S-aplicã sh-vidzu nãuntru. Aclo eara singur fãshili di ljin adunati. Deapoea fudzi, ciudisitã di atseali tsi avea undzit.

13 Tu idyia dzuã, doi di atselji ma njidzea tu unã hoarã cu numa Emaus, shapti milji diparti di Ierusalem. 14 Elji ma zbura cu un-alantu ti atseali tsi avea undzitã. 15 Cãndu elji zbura sh-cuvinta, Isusul s-apruche sh-imnã deadun cu elji. 16 Ma ocljilji a lor eara nviscuti tra s-lu cunushtea. 17 Elu lã ntribã: "Tsi suntu aesti muabeti tsi fãtsets cu un-alantu imnãnda?" Elji stãturã mproshtsã shi s-videa ca nvirinats. 18 Atumtsea un di atselji cu numa Cleopa, apãndisinda lj-dzãsi: "Tini eshti singur xen tu Ierusalem tsi nu ai loat di hãbari atseali tsi au undzitã aclo aesti dzãli?" 19 Elu lã ntribã: "Tsi?" Elji lj-dzãsirã: "Atseali al Isus di Nazaret, tsi eara un prufit puternic tu zboari sh-tu fapti nãintea al Dumnidzãu sh-a tut popului. 20 Arhipreftsãlji sh-mãrlji a noshtri lu deadirã s-giudicã cu moarti sh-lu crutsisirã. 21 Noi aveam nãdii cã elu eara atsel tsi va s-arãscumpãr Israelul. Cu tut atsea azã easti a treia dzuã di cãndu undzirã aesti. 22 Niscãnti muljeri di a noastri nã ciudisirã, cãndu s-dusirã dimineatsa tahina la murmintu. 23 Eali nu aflarã aclo truplu a lui sh-vinirã dzãcãnda cã avea vidzutã un viziuni di anghilji, cai dzãtsea cã elu easti yiu. 24 Niscãntsã di noi s-dusirã la murmintu sh-lu aflarã ashã cum dzãsirã muljerili, ma Isusul nu lu vidzurã." 25 Atumtsea elu lã dzãsi a lor: "Nimintimenji sh-aĝalnitsi tu inimã tra s-pistipsitsã itsido tsi au dzãsã prufitsilji! 26 Nu prindea tsi Hristolu si s-munduia shi s-intra tu mãrirea a lui?" 27 Deapoea elu apãrnji cu Moisiul sh-cu tuts Prufitsilji s-lã aspunea a lor tuti Scriturili tsi grea trã nãsu. 28 Cãndu s-apruchearã la hoarã iu ma njidzea, Isusul featsi canda va s-fudzea ma nclo. 29 Atumtsea elji lji featsirã rigeai sh-lji dzãsirã: "Shedz cu noi, cã ma yini seara sh-dzua s-apridunã." Atumtsea elu intrã tra s-armãnea cu nãshi. 30 Cãndu eara la measã cu elji, Isusul lo pãnea, u ghinicuvãntã, u frãmsi sh-lã u pãrtsã a-lor. 31 Atumtsea a-lor lã si discljisirã ocljilji sh-lu cunuscurã, ma elu fudzi di la elji. 32 Atumtsea elji dzãsirã cu un-alantu: "Nu nã ardea inima di nãuntru, cãndu elu nã grea pri cali sh-cãndu nã discljidea Scriturili?" 33 Tu atsea oarã si scularã shi s-turnarã la Ierusalem, sh-aflarã adunats atselji unsprãdzatsi sh-alantsãlji tsi eara cu nãshi. 34 Elji dzãtsea: "Domnul easti nyeat dealihea sh-lji si fãnirusi al Simon." 35 Atumtsea atselji dolji aspusirã atseali tsi undzirã pri cali sh-cum lu avea cunuscutã la frãndzearea a pãniljei.

36 Cãndu elji ma zbura trã aesti, Isusul dãnãsi namisa di elji sh-lã dzãsi: "Pacea cu voi!" 37 Elji tulburats sh-lãhtãrsits minduia cã ma videa un duh. 38 Atumtsea elu lã dzãsi: "Cãtse hits tulburats sh-trã tse tu ininjli a voastri ma amintã ahãnti shubei? 39 Videts mãnjili a meali sh-cicioarili a meali. Mini escu! Ahulits-mi sh-videts. Duhlu nu ari carni sh-oasi, ashãtsi cum am mini." 40 Sh-cum dzãsi aesti, lã aspusi mãnjili sh-cicioarili. 41 Metsi elji nu ma pistipsea ninga di haraua shi s-ciudisea, Isusul lã dzãsi: "Avets aoa tsiva trã mãcari?" 42 Elji lji deadirã unã bãcatã di pescu friptu. 43 Elu lu lo sh-mãcã nãintea a lor. 44 Deapoea lã dzãsi: "Aesti suntu zboarili tsi mini vã dzãtseam cãndu earam ninga cu voi, cã prindi si mplineascã tuti atseali tsi suntu scriati trã mini tu Legea al Moisiu, la Prufitsilji sh-tu Psalnjili." 45 Apoea lã-u discljisi mintea tra s-li aducheascã Scriturili, 46 sh-lã dzãsi: "Ashãtsi easti scriat sh-ashãtsi prindea s-munduea Hristolu shi-s-nyea dit mortsã a treia dzuã. 47 Ashãtsi apãrnjinda di Ierusalem, s-preadicã tu numa a lui la tuti natsiunili mitãnjiusirea sh-ljirtarea a amãrtiilor. 48 Voi hits martiri trã aesti. 49 Ia, mini ma pitrec pri voi cã tsi tãxi Tatãl a meu, ma voi armãnets tu cãsãbãlu al Ierusalem pãnã-cãndu s-vã nvishtets cu puteari di nsus."

50 Deapoea lji sotsãsi nafoarã cãtrã Betania sh-sculãnda mãnjili, lji ghinicuvãntã. 51 Anda lji ghinicuvãntã, s-dispãrtsã di elji shi lu anãltsarã tu tser. 52 Elji si ncljinarã shi s-turnarã tu Ierusalem cu harauã mari. 53 Elji eara dipriunã tu templu alãvdãnda Dumnidzãlu.