1 Isusul, mplin di Duhlu Sãmtu, s-turnã dit Iordan sh-Duhlu lu dusi tu irnjii. 2 Aclo di patrudzãtsi di dzãli lu cãrti draclu. Tu atseali dzãli elu nu mãcã tsiva sh-cãndu tricurã atseali dzãli, elu avea foami. 3 Sh-draclu lj-dzãsi: "Macã eshti Hiljiu al Dumnidzãu, dzãlji a cheatrãljei aishtei si s-facã pãni." 4 Ma Isusul lj-apãndisi: "Easti scriatã: ‘Omlu nu va bãneadzã mash cu pãni.’"✝ 5 Deapoea draclu lu dusi tu un munti analtu sh-dinãoarã lji aspusi tuti amirãrilji a lumiljei, 6 sh-lji dzãsi: "Mini ma tsã dau tutã putearea sh-mãrirea a lor, cã a njia nji suntu datã sh-mini li dau a cui voi. 7 Macã tini va ti ncljinji la mini, tuti va s-hibã a tali." 8 Ma Isusul lj-apãndisi: "Easti scriat: Alavdã Domnul, Dumnidzãlu a tãu sh-mash a lui va lji huzmitipseshti."✝ 9 Deapoea draclu lu-dusi tu Ierusalem, lu-bãgã pri mãyeaua a templui sh-lji dzãsi: "Macã eshti Hiljiu a Dumnidzãlui, arucã-ti nghios di aoa, 10 cã easti scriatã:

‘Elu va s-urseascã anghilji a lui

anvãrliga di tini tra s-ti veaglji.

11 Sh-elji va ti tsãnã tu mãnjili a lor

tsi cicioarili a tali s-nu s-agudeascã di vãrã cheatrã.’"✝

12 Sh-Isusul lj-apãndisi: "Easti scriatã: ‘Nu cãrtea Domnul, Dumnidzãlu a tãu!’"✝

13 Sh-cãndu draclu bitisi tutã cãrtearea, s-dipãrtã di nãsu di putsãn chiro.

14 Sh-Isusul cu putearea a Duhlui s-turnã tu Galilea sh-anamea trã nãsu s-arãspãndea tu tutã loclu di-anvãrliga. 15 Sh-elu lã-nvitsa tu sinagodzãli a lor alãvdat di tuts. 16 Deapoea Isusul vini tu Nazaret, aclo iu fu criscut. Dzua di Sãmbãtã cum eara adetea intrã tu sinagogã shi si sculã trã cãntari. 17 Lji deadirã cartea a prufitlui Isaia, u discljisi sh-aflã loclu iu eara scriat:

18 "Duhlu a Domnului easti pristi mini,

cã elu mi aumsi trã evanghelizari niavutslji,

trã hãbãrsiri sãlãghirea a hãpsãnitslor

sh-turnarea a videariljei a orghilor,

sh-trã alãsari liberi atselji tsi suntu disuprits,

19 sh-trã dimãndari anul actseptabil a Domnului."

20 Deapoea u ncljisi cartea lji u deadi a huzmichearlui shi shidzu. Ocljilji a tutulor tu sinagogã eara pristi nãsu. 21 Atumtsea elu apãrnji s-lã dzãcã: "Azã si mplini aestã Scriturã tu urecljili a voastri." 22 Tuts grea ghini sh-eara ciudisits di zboarili cu har tsi isha dit gura a lui, sh-ntriba: "Ma aestu, nu easti hiljilu al Iosif?" 23 Isusul lã dzãsi a lor: "Sigur cã voi va s-nji lu ticnits zborlu aestu: ‘Doctore, vindicã-ti tini!’ shi: ‘Atseali tsi avdzãmu cã ai faptu tu Capernaum, fã-li sh-aoatsi tu vãtanea a ta.’" 24 Ma elu dzãsi: "Dealihea ma vã dzãc, cã vãrã prufit nu easti ghini-ashtiptat tu vãtanea a lui. 25 Ma, dealihea ma vã dzãc, cã eara multi veduvi tu Israel tu chirolu al Elia, cãndu tserlu si ncljisi di trei anji shi shasi meshi shi s-featsi un foami mari di pãni tu tut loclu. 26 Sh-la vãrã di eali nu fu pitricut Elia, mash la unã muljeari veduvã tu Sarepta a Sidonlui. 27 Sh-tu chirolu a prufitlui Elise avea multsã leproshi tu Israel, sh-vãrã di elji nu s-curã, mash di cãt Naaman Sirianlu." 28 Cãndu li avdzãrã aesti zboari, tuts atselji cai eara tu sinagogã s-nãrãirã multu. 29 Si scularã, lu aĝunirã dit cãsãbã sh-lu dusirã aproapi di mãyeaua a dzeanãljei, iu eara adratã cãsãbãlu a lor, tsi s-lu arucã di mãeauã a cheatrãljei nghios. 30 Ma elu, tricãnda namisa di elji, s-dipãrtã.

31 Shi s-dipunã tu Capernaum, cãsãbãlu di Galilea sh-lji nvitsa oaminjlji cathi Sãmbãtã. 32 Sh-elji s-ciudisea di nvitsãtura a lui, cã zborlu a lui eara cu autoritati. 33 Tu sinagogã eara un om acãtsat di un duhlu, un demon nicurat. Elu aurlã cu boatsi analtã dzãcãnda: 34 "Ah, tsi ai cu noi, Isus Nazareane? Ai vinit s-nã dãrãnji? Mini shtiu cai eshti tini: Sãmtul al Dumnidzãu!" 35 Ma Isusul lu vãrghi: "Tats sh-eshi di-la elu!" Sh-demonul, dupã tsi lu plãscãni nãintea a lor, ishi di-la nãsu sh-nu lji featsi vãrã arãu. 36 Atumtsea tuts s-ciudisirã sh-dzãsirã un cu alantu: "Tsi zbor easti aestu? Elu urseashti cu autoritati sh-puteari duhurili nicurati sh-elji easã!" 37 Sh-anamea trã nãsu s-arãspãndea tu tuti locurili di avãrliga.

38 Dupã tsi ishi di sinagogã, Isusul intrã tu casa al Simon. Soacra al Simon eara lãndzit cu heavrã mãri sh-elji s-pãrãcãlsirã al Isus trã nãsã. 39 Isusul s-aplicã pri nãsã, vãrghi heavra sh-atsea u-alãsã. Ea si sculã dinãoarã sh-ahurhii s-huzmitipsea atsilor. 40 Tu ascãpitata a soarilui, tuts atselji tsi avea lãndzitsi cu lãngoari soi di soi lji adusirã a lui sh-elu lji vindicã bãgãnda mãnjili pri cathiunu di elji. 41 Dit multsã isha demonjlji tsi zghilea sh-dzãtsea: "Tini eshti Hiljilu al Dumnidzãu." Ma elu lji vãrghea sh-nu lji alãsa s-grea, cã elji lu shtia cã elu eara Hristolu. 42 Cãndu alghi dzua, elu ishi shi s-dusi tu un loc ermu. Unã multsãmi marã lu cãfta sh-cãndu lu aflarã vrurã s-lu tsãnea s-nu fudzea di la elji. 43 Ma Isusul lã dzãsi a lor: "Mini prindi s-dimãndu hãbarea atsea buna a amirãriljei al Dumnidzãu sh-tu alti cãsãbadz, cã trã aestã escu pitricut." 44 Sh-elu predica prit sinagodzãli a Iudeiljei.