1 Tu oara atsea vinirã niscãntsã oaminji la Isusul sh-lji aspusirã trã Galileanjilji, tsi sãndzili a cãror Pilatul lu avea misticat cu curbãnjlji a lor. 2 Isusul lji ntribã: "Minduits voi cã atselji Galileanji eara ma mãri amãrtioshi dicãt alantsã Galileanji? Trã atsea pãtsãrã aestã? 3 Mini ma vã dzãc, nu! Ma, macã nu vã mitãnjusits, sh-voi tutashã va murits tuts. 4 Minduits voi cã atselji optusprãdzatsi pristi cai cãdzu cula al Shiloam sh-lji vãtãmã, eara cãbãetsi ma mãri dicãt bãnãtorlji al Ierusalem? 5 Mini ma vã dzãc, nu! Ma, macã voi nu vã mitãnjusits sh-voi tutashã va murits." 6 Atumtsea Isusul aspusi aestã parabolã: "Un om avea un hic siminat tu ayinjea a lui. Elu vini sh-cãftã frut, ma nu aflã. 7 Atumtsea lj-dzãsi a ayinjearlui: ‘Ia, am trei anji tsi caftu frut la aestu hic sh-nu ma aflu. Talji-l! Cãtse s-acatsã loclu digeaba?’ 8 Ma ayinjearlu lj-apãndisi: ‘Doamne, alasu-l sh-aestu an, s-lu prãshescu di-anvãrliga shi s-lj-arucã cuprii. 9 Vahi da frut anlu tsi yini. Macã nu va da, atumtsea talji-l.’"

10 Unã Sãmbãtã Isusul ma nvitsa tu sinagogã. 11 Shi ia, aclo eara unã muljeari, tsi di optusprãdzatsi di anji eara putut di un duh, sh-ea eara cãmburã sh-nu putea cu tsiva s-ndripta truplu. 12 Isusul u vidzu, u acljima ningã nãsu sh-lji dzãsi: "Muljeari eshti vindicatã di lãngoarea a ta." 13 Apoea bãgã mãnjili pristi nãsã, sh-ea trãoarã si ndriptã sh-alãvdã Dumnidzãlu. 14 Atumtsea marli a sinagogãljei nãrãit cã Isusul avea vindicatã tu dzua di Sãmbãtã, lji gri a multsãmiljei: "Shasi suntu dzãlili cãndu omlu prindi s-lucreadzã. Yinits s-vã vindicats tu atseali dzãli, nu tu dzua di Sãmbãtã." 15 Atumtsea Domnul lj-apãndisi: "Ipucrits! Vahi nu s-dizleagã dit grajdu boulu icã gumarlu tu dzua di Sãmbãtã sh-cathi un di voi s-lji da apã ti beari? 16 Ma aestã hiljea al Abraham tsi eara di optusprãdzatsi di anji ligatã di Satanlu, nu prindea s-dizliga di atseli prãnghi tu dzua di Sãmbãtã?" 17 Dupã tsi li dzãsi aeasti zboari, tuts atselji tsi eara contra a lui armasirã arushinats, iarã multsãmea s-hãrsea trã tuti lucrili atseali thãvmãtisiti tsi elu avea faptã.

18 Atumtsea Isusul ntribã: "A cui lj-undzeashti amirãriljea a Dumnidzãlui? Cu tsi s-u undzescu? 19 Ea undzeashti cu un gãrnuts di sinapi, tsi un om lu lo sh-lu arcã tu grãdina a lui. Gãrnutslu criscu shi s-featsi cãt un pom. Puljilji a tserlui fãtsea fuljeauã tu dedzili a lui." 20 Deapoea ntribã nãpoi: "Cu tsi s-u undzescu amirãriljea a Dumnidzãlui? 21 Ea undzeashti cu mãeaua tsi ljea unã muljeari sh-u minteashti cu trei misuri di fãrinã pãnã cãndu aloatlu s-yinã ghini."

22 Sh-Isusul ma tritsea cãsãbadzi sh-hoari, sh-ashã nvitsãnda ma s-apruchea la Ierusalem. 23 Un om lu ntribã: "Doamne, suntu putsãnji atselji tsi va s-ascapã?" Elu lã dzãsi a-lor: 24 "Munduits-vã s-intrats prit usha atsea strimta, cã mini ma vã dzãc, cã multsã va caftã s-intrã, ma nu va s-poatã. 25 Cãndu nicuchirlu a casiljei easti sculat shi u-ari ncljisã usha, atumtsea voi tsi avets armas nafoarã, va s-ahurhits s-asunats pri ushã, dzãcãnda: ‘Doamne, discljidi-nã.’ Ma elu apãndisinda va vã dzãcã: ‘Nu vã cunoscu di iu hits.’ 26 Atumtsea va apãrnjits s-dzãtsets: ‘Noi mãcãm sh-bium deadun cu tini shi tini nã nvitsash tu cãljurili a noastri.’ 27 Ma elu va vã dzãcã: ‘Mini nu vã shtiu di iu yinits. Dipãrtats-vã di la mini tuts voi arãu-fãcãtori!’ 28 Aclo va hibã plãngul sh-cãrtsãnirea a dintsilor, cãndu va videts Abrahamul, Isacul, Iacovul sh-tuts prufitsilji tu amirãriljea a Dumnidzãlui, ma voi va vã scoatã nafoarã. 29 Atumtsea va yinã dit rãsãrit sh-dit ascãpitat, dit nord sh-dit sud sh-va s-apunã la measã tu amirãriljea a Dumnidzãlui. 30 Sh-ia, atselji di soni va-hibã protslji, sh-atselji protslji va-hibã tu coadã."

31 Tu atsea dzuã niscãntsã Farisei vinirã sh-lji dzãsirã al Isus: "Eshi sh-dipãrtedzã-ti di aoatsi, cã Herodul caftã s-ti vatãmã." 32 Elu lã apãndisi a lor: "Dutsets-vã sh-lji dzãtsets a vulpili atsiljei: ‘Ia, azã sh-mãni ma aĝunescu demonjlji sh-ma vindicã, sh-tu a-treia dzuã ma l-bitisescu lucrul a meu.’ 33 Cu tutã atsea, azã, mãni sh-pãimãni prindi s-imnã, cã nu poati tsi un prufit s-moarã nafoarã di Ierusalem. 34 Ierusalem, Ierusalem, tini tsi vatsãnji prufitsilji sh-cu chetri vatsãnji pitricutslji a Dumnidzãlui! Di cãti ori am vrut s-adunã hiljilji a tãlji, ashã ca clocea tsi aduni puljilji sum areapitli a ljei, ma voi nu vrut! 35 Ia, casa a voastrã va s-armãnã shcretã. Mini ma vã dzãc cã nu va mi videts ma, pãnã cãndu s-yinã chirolu s-dzãtsets: ‘Ghinicuvintat easti atsel tsi yini tu numa a Domnului.’"✝