1 Tu anlu a tsinsprãdzatsea a amirãriljei al Tiberiu Cezar, cãndu Pontiu Pilat, eara guvernator al Iudei, sh-Herod, tetrarcu al Galilei, iarã fratili a lui, Filip tetrarcu al Iturea sh-a loclui a Traconitidiljei, sh-Lisania tetrarcu a Abileniljei, 2 tu dzãlili a arhipreftsãlor Anna sh-Caiafa, zborlu a Dumnidzãlui vini la Ioan, hiljiu al Zaharia tu irnjii. 3 Atumtsea elu tricu tutã loclu anvãrliga di Iordan, predicãnda pitedzlu a mitãnjusiriljei trã ljirtarea a amãrtiilor, 4 cum easti scriatã tu cartea a prufitlui Isaia:

"Boatsea atsilui tsi greashti tu irnjii:

‘Ndridzets calea trã Domnul,

sh-ndriptats cãljurili a lui!

5 Cathi vali va s-umplã

sh-cathi munti sh-dzeanã va s-apleacã,

locurili strãmbi va si ndripteadzã

sh-cãljurili atseali aspri va s-ashtearnã.

6 Cathi om va veadã ascãparea a Dumnidzãlui.’"

7 Ioanul lã dzãtsea a multsãmiljei tsi yinea trã pãtidzari di la nãsu: "Pulji di nãpãrtitsi! Cai vã ari nvitsatã s-fudzits di nãrirea tsi ma yini? 8 Fãtsets fruti buni di mitãnjusiri sh-nu apãrnjits s-dzãtsets nãuntru di voi: ‘Noi avem Abrahamul ca Tat,’ cã mini ma vã dzãc cã Dumnidzãlu poati s-lji da cilimenji al Abraham sh-dit chetri. 9 Tora tupoara s-bãgã tu rãdãtsina a ponjilor, sh-cathi pom tsi nu da fruti buni s-talji sh-s-arucã n-foc." 10 Sh-multsãmea lu ntriba: "Ma noi tsi s-fãtsem?" 11 Atumtsea elu lã dzãsi a lor: "Atsel tsi ari doauã tunitsi s-li partsã cu atsel tsi nu ari, sh-atsel tsi ari s-mãcã, ashã s-fãcã sh-elu." 12 Vinirã niscãntsã taxidari si s-pãteadzã sh-lu ntribarã: "Nvitsãtore, tsi s-fãtsem?" 13 Sh-elu lã dzãsi a lor: "Nu adunats ma multu dicãt vã au ursitã." 14 Atumtsea suldatslji lu ntribarã: "Ma noi, tsi prindi s-fãtsem?" Sh-elu lã dzãsi a lor: "Nu lj-loats a vãrui cu zori, nu lj-fãtsets acuzi arãdioasi a vãrui, shi s-hits hãristisits cu paga a voastrã." 15 Sh-populu eara tu ashtiptari sh-tuts minduia tu ininjli a lor cã vahi Ioanul eara Hristolu. 16 Ioanul lã apãndisi a tutulor: "Mini ma vã pitedz cu apã, ma atsel tsi ma yini easti ma vãrtos di mini, sh-mini nu escu axiu s-lji dizleg ligãturili a sandalilor. Elu va vã pãteadzã cu Duhlu Sãmtu shi cu foc. 17 Elu tsãni tu mãna a lui lupata sh-va curã grãnarlu a lui sh-va adunã grãnlu tu hãmbarea a lui, ma paljia va u-ardã tu foclu tsi nu s-astindzi pute." 18 Sh-cu multi alti moduri pindzea populu sh-lã dimãndã a lor hãbarea atsea buna. 19 Ma Herodul, tetrarclu, dupã tsi s-vãrghi di Ioanul trã itia cã si nsurã cu Herodiada, muljearea a fratilui, sh-trã tuti anapudiilji tsi avea faptã, 20 featsi sh-aestã arãutati bãgãnda Ioanul tu hapsi.

21 Cãndu s-pãtidzã tut populu, s-pãtidzã sh-Isusul. Cãndu ma s-ruga, tserlu s-discljisi, 22 Duhlu Sãmtu dipunã pri nãsu ca forma a truplui a un purumbu sh-dit tser vini un boatsi, tsi dzãtsea: "Tini eshti Hiljiu a meu vrut, tini ti am arsit!" 23 Cãndu Isusul apãrnji s-preadicã eara vãrã treidzãtsi di anji, sh-alantsãlji minduea cã eara hiljiu al Iosif, hiljiu al Eli,

24 hiljiu al Mathat, hiljiu al Levi, hiljiu al Melhi, hiljiu al Ianu, hiljiu al Iosif,

25 hiljiu al Mathati, hiljiu al Amos, hiljiu al Naum, hiljiu al Esli, hiljiu al Nagai,

26 hiljiu al Maath, hiljiu al Mathati, hiljiu al Semei, hiljiu al Ioseh, hiljiu al Ioda,

27 hiljiu al Ioanan, hiljiu al Resa, hiljiu al Zorobabel, hiljiu al Sealtiel, hiljiu al Neri,

28 hiljilu al Melchi, hiljilu al Addi, hiljilu al Cosam, hiljiu al Elmadam, sh-hiljiu al Eri,

29 hiljiu al Iozeu, hiljiu al Eliezer, hiljiu al Iorim, hiljiu al Matthat, hiljiu al Levi,

30 hiljiu al Simeon, hiljiu al Iuda, hiljiu al Iosif, hiljiu al Ionam, hiljiu al Eliakim,

31 hiljiu al Melea, hiljiu al Mena, hiljiu al Matatha, hiljiu al Natan, hiljiu al David,

32 hiljiu al Iesse, hiljiu al Obed, hiljiu al Boaz, hiljiu al Salmon, hiljiu al Nahson,

33 hiljiu al Aminadab, hiljiu al Admin, hiljiu al Arni, hiljiu al Ezron, hiljiu al Perez, hiljiu al Iuda,

34 hiljiu al Iacov, hiljiu al Isac, hiljiu al Abraham, hiljiu al Terah, hiljiu al Nahor,

35 hiljiu al Seruc, hiljiu al Reu, hiljiu al Peleg, hiljiu al Eber, hiljiu al Selah,

36 hiljiu al Cainan, hiljiu al Arfaxad, hiljiu al Sem, hiljiu al Noe, hiljiu al Lameh,

37 hiljiu al Metuselah, hiljiu al Enoc, hiljiu al Iared, hiljiu al Mahalel, hiljiu al Cainan,

38 hiljiu al Enos, hiljiu al Seth, hiljiu al Adam, sh-hiljiu al Dumnidzãu.