1 Deapoea tuts taxidarlji sh-amãrtioshlji lji s-apruchea al Isus trã avdzãri. 2 Fariseilji shi scriblji murmurea: "Aestu aproachi amãrtioshlji sh-mãcã cu nãshi." 3 Atumtsea elu lã dzãsi aestã parabolã: 4 "Cai di voi, tsi ari unã sutã di oi sh-cãndu unã di eali s-chearã, nu li alasã di noudzãtsinoauli tu irnjii shi s-dutsi dupã atsea tsi chiru, pãnã cãndu s-u aflã? 5 Sh-cãndu u-aflã, u ljea deanumirea cu harauã. 6 Cãndu yini acasã, acljeamã oaspilji sh-vitsinjlji a lui sh-lã dzãtsi: ‘Hãrsits-vã deadun cu mini, cã u aflai oaia tsi avea chirutã.’ 7 Mini ma vã dzãc cã ashãtsi easti sh-tu tser. Aclo ari ma multã harauã trã un amãrtios tsi s-mitãnjiuseashti, dicãt trã noaudzãtsinoauã ndreptsã, tsi nu au ananghi s-mitãnjiuseascã."

8 "Icã, cai muljeari tsi ari dzatsi dhrahmadz sh-cheari un dhrahmiu, nu aprindi cãndila, nu areashti casa sh-deapoea caftã cu cãshtigã pãnã cãndu s-lu aflã? 9 Sh-cãndu lu aflã, acljeamã soatsili sh-vitsinili dzãcãnda: ‘Hãrsits-vã deadun cu mini, cã aflai dhrahmiulu tsi aveam chirutã.’ 10 Tutashã vã dzãc cã ashãtsi s-hãrseascã sh-anghilji a Dumnidzãlui trã un amãrtios tsi s-mitãnjiuseashti."

11 Deapoea Isusul dzãsi: "Un om avea doi hilji. 12 Ma tinirlu lj-dzãsi a tatãlui: ‘Tate, dã-nji partea a aveariljei tsi easti a mea.’ Sh-tatãl lã-u pãrtsã avearea. 13 Dupã niscãnti dzãli hiljilu atsel ma njiclu adunã tuti lucrili tsi avea shi s-dusi tu un loc diparti. Aclo hãrgiui tutã avearea, cã fãtsea unã banã disfãrnatã. 14 Dupã tsi asparsi tutã avearea, tu atsel loc vini un foami mari sh-elu apãrnji s-aibã ananghi. 15 Deapoea s-dusi sh-aflã lucru la un bãnãtor a atsilui loc. Elu l-pitricu tu agrili a lui s-pãshtea portslji. 16 Elu vrea s-hrãnea cu frutili a purnãrilor tsi mãca portslji, ma vãrã nu lji dãdea. 17 Atumtsea vini tu minti sh-dzãsi: ‘Multsã di lucrutorlji a tatãlui a meu au multã pãni trã mãcari, iarã mini mor di foami! 18 Va mi scol sh-va mi duc la tatã-njiu a meu sh-va lji dzãc: Tate, am amãrtisitã nãintea a tserlui sh-nãintea a ta. 19 Nu escu ma axiu s-mi acljem hiljiu a tãu. Mi tsãn ca un di huzmichearlji a tãlji.’ 20 Ashãtsi si sculã shi s-dusi la tatã-su. Ma cãndu eara ninga diparti, tatã-su l-vidzu sh-sãmtsã dor. Trãoarã s-dusi la nãsu lu amvãrti cu bratsãli a lui sh-lu bãshe. 21 Atumtsea hilji-su lj-dzãsi: ‘Tate, am amãrtisitã nãintea a tserlui sh-nãintea a ta. Nu escu axiu s-mi acljem hiljiu a tãu.’ 22 Ma tatã-su lã dzãsi a huzmichearilor a lui: ‘Adutsets aoa stranjilu atsel ma bunlu sh-nvishtets-lu. Bãgats-lji nel tu dzeadit sh-sandali tu cicioari. 23 Loats yitsãlu atsel graslu sh-tãljeats-lu. S-mãcãm shi s-nã hãrsim, 24 cã hiljiu a meu eara mortu shi s-turnã tu banã, eara chirut shi s-aflã.’ Sh-apãrnjirã s-hãrseascã.

25 Hiljilu a lui atsel ma marili eara tu agru. Cãndu s-apruche di casã, avdzã muzicã sh-giocuri. 26 Atumtsea acljimã un di sclayilji sh-lu ntribã cã tsi easti tut atsea. 27 Elu lj-apãndisi: ‘Fratili a tãu vini sh-tatãl a tãu tãlje yitsãlu atsel graslu, cã fratili a tãu s-turnã sãnãtos sh-ghini.’ 28 Atumtsea elu s-nãrãi sh-nu vrea s-intra. Ma tatã-su ishi afoarã sh-lji fãtsea rigeai s-intra. 29 Elu lj-apãndisi a tatã-sui: ‘Ia, mini am lucrat ca huzmichear ahãntsã anji trã tini sh-pute nu ts-am ncãlcatã vãrã ordin, sh-cu tut atsea tini nu nj-ai dat macari un ied tra s-mi hãrsescu cu sotslji a melji. 30 Iarã cãndu vini hiljiu a tãu, aestu tsi hãrgiui avearea a ta cu putãnji, tini tãljeashi trã nãsu yitsãlu atsel graslu!’ 31 Atumtsea tatã-su lj-dzãsi: ‘Hilje, tini eshti totãna cu mini, sh-itsido tsi am mini suntu a tali. 32 Ma noi prindi s-nã hãrsim shi s-fãtsem chefi, cã fratili a tãu eara mortu shi s-turnã tu banã, eara chirut shi s-aflã.’"