1 Isusul ma s-ruga tu un loc. Cãndu ascãpã, un di ucenitsilji a lui lj-dzãsi: "Doamne, nveats-nã s-rugãm, ashã cum nvitsã sh-Ioanul ucenitsilji a lui." 2 Sh-Isusul lã dzãsi: "Cãndu s-vã rugats, dzãtsets:

‘Tate, si sãmtseascã numa a ta,

s-yinã amirãriljea a ta!

3 Dã-nã di cathi dzuã pãnea a noastrã.

4 Sh-nã ljeartã amãrtiili a noastri,

cã sh-noi lji ljirtãm amãrtioshlji a noshtri.

Sh-nu nã alasã s-cãdem tu cãrteari.’"

5 Deapoea lã dzãsi: "S-dzãtsem cã un di voi tsi ari un oaspi s-dutsi njeadzãnoapti la casa a lui sh-lji dzãtsi: ‘Oaspe, dã-nji trei pãnji mprumut, 6 cã nj-ari vinit di pri cali un oaspi sh-nu am tsiva s-lji bagã nãinti.’ 7 Sh-elu di nãuntru apãndiseashti: ‘Nu mi cãrtea. Usha tora easti ncljisã sh-cilimenjlji a melji suntu tu ashtirnutu cu mini. Nu pot s-mi scol shi s-tsã dau.’ 8 Mini ma vã dzãc, cu tutã cã nu va si scoalã sh-nu va s-lji da tsiva cã easti oaspili a lui, elu va si scoalã trã itia a cãftariljei fãrã arushini, sh-va lji da cãti lj-lipseashti. 9 Trã atsea ma vã dzãc: Pricãdetz sh-va vã si-da! Cãftats shi va aflats! Asunats sh-va vã si discljidã. 10 Cã cai pricadi, ljea, cai caftã, aflã, sh-atsilui tsi asunã va lji si discljidã. 11 Cai di voi easti ahtar tatã, tsi macã ficiorlu s-lji caftã un pescu, s-lji da nãpãrticã? 12 Icã ma s-lji caftã un ou, s-lji da un scrap? 13 Macã voi tsi hits arãi, shtits s-dats doari buni a hiljilor a voshtri, multu ma multu Tatãl a vostru tu tseruri va da Duhlu Sãmtu atsilor tsi lj-pricadã!"

14 Isusul ma aĝunea un demon di la un om tsi eara mut. Cãndu lj-ishi demonlu, mutlu zburã sh-multsãmea s-ciudisi. 15 Ma niscãntsã di atselji dzãsirã: "Elu lji aĝuneashti demonjlji cu fuchia al Belzebul, primarlu a demonjilor." 16 Altsã tra s-lu bãga tu provã, lj-cãfta a lui un semnu dit tser. 17 Ma Isusul, cunuscãnda minduirili a lor, lã dzãsi: "Cathi amirãrilji dispãrtsat di nãuntru si shcretueashti sh-cathi casã dispãrtsatsã va cadã. 18 Macã sh-Satanlu easti dispãrtsãt di nãuntru, cum va si s-tsãnã amirãriljea a lui? Mini vã ntribai cã voi dzãtsets tsi mini lji aĝunescu demonjlji cu Belzebul. 19 Macã mini lji aĝunescu demonjlji cu Belzebul, cu cai lji aĝunescu demonjlji urmãtorilji a voshtri? Trã atsea elji va-hibã giudicãtorlji a voshtri. 20 Macã mini lji aĝunescu demonjlji cu dzeaditlu a Dumnidzãlui, amirãriljea a Dumnidzãlui ari agiumtã la voi. 21 Cãndu un om vãrtos sh-ãrmãtusit u-veaglji ghini casa a lui, avearea a lui easti siguripsitã. 22 Ma cãndu yini un ma vãrtos di elu, alumtãseashti cu nãsu sh-amintã, atsel lji ljea armili la cai avea nãdii sh-li partsã plecichli a lui. 23 Cai nu easti cu mini, easti contra di mini, sh-cai nu adunã cu mini, dispartsã.

24 Cãndu duhlu nicurat easi di la omlu, imnã prit locuri shcreti fãrã apã, cãftãnda arihati, sh-cãndu nu-u aflã, dzãtsi: ‘Va mi tornu tu casa a mea di iu ishii.’ 25 Sh-cãndu yini, u-aflã arnitã shi stulsitã. 26 Atumtsea s-dutsi sh-ljea cu nãsu shapti duhuri alti ma arãi di nãsu, sh-elji intrã sh-bãneadzã aclo. Ashãtsi starea di ma napoi a omlui s-fatsi ma arãu di atsea di ma nãinti." 27 Cãndu ma dzãtsea aesti zboari, unã muljeari di multsãmea sculãnda boatsea dzãsi: "Ca hara di pãnticlu tsi ti tsãnu sh-tsãtsa tsi ti hrãni." 28 Ma Isusul lã dzãsi: "Ma ghini ca hara di atselji tsi ascultã zborlu al Dumnidzãu shi lu fac."

29 Iarã multsãmea ma s-adãvga, Isusul ahurhi s-dzãcã: "Aestã farã easti arauã. Ea caftã un semnu, ma a ljei nu va lji si da, dicãt semnul a prufitlui Iona. 30 Cã ashã ca Iona fu un semnu trã Niniveanjlji, ashã sh-Hiljiu a Omlui va hibã un semnu trã aestã farã. 31 Amirãroanjea di Sud va si scoalã la giudicatã deadun cu oaminjlji a farãljei aishtei sh-va lji giudicã, cã ea vini dit mardzina a loclui trã avdzãri mintimeniljea al Solomon. Sh-ia, aoa easti un ma mari dicãt Solomonlu. 32 Niniveanjlji, va si scoalã la giudicatã cu atsea gheneratã sh-va l-giudicã, cã elji s-mitãnjiusirã cãndu Iona predicã. Sh-ia, aoa easti un ma mari dicãt prufitlu Iona."

33 "Vãrã nu aprindi cãndila shi s-lu bagã tu un loc ascumtu icã sum unã cofã. Ea s-bagã pristi un purtãtor di lunjinã, tsi s-veadã atselji tsi va intrã. 34 Lunjina a truplui a tãu easti ocljiul. Macã ocljiul a tãu easti curat, tut truplu a tãu va hibã lunjinat, ma macã ocljiul a tãu easti arãu, sh-truplu a tãu va hibã tu scutidi. 35 Trã atsea s-ai cãshtiga tsi lunjina tsi easti la tini s-nu hibã scutidi. 36 Macã truplu a tãu easti lunjinat sh-fãrã unã chicutã di scutidi, va hibã iutsido lunjinatã, ashãtsi cum s-fatsi, cãndu lunjina ti lunjineadzã cu strãlutsirea a ljei."

37 Cãndu Isusul ascãpã zburarea, un Fariseu lu acljimã di prãndzari la casa a lui. Elu intrã sh-s-apunã la measã. 38 Fariseul s-ciudisi cãndu vidzu Isusul tsi nu aspilã mãnjili nãinti di mãcari. 39 Atumtsea Domnul lj-dzãsi: "Tora voi Farisei curats partea di nafoarã a cupãljei sh-a tipsiiljei, iarã voi di nãuntru hits mplin di arãchiri sh-di arãutati. 40 Zurlji! Atsel tsi featsi partea di nafoarã, vahi nu featsi sh-atsea di nãuntru? 41 Trã atsea, dats dit inimã atsilor tsi au ananghi, sh-ashãtsi tuti va hibã curati trã voi. 42 Ma cavai di voi, Farisei! Voi plãtits a dzatsea parti di mentã, di yiazmã, sh-di cathi virdeatsã, ma-alãsats dupã mãnã ndriptatea sh-vrearea a Dumnidzãlui. Aesti prindi s-li fãtsets sh-alantãli s-nu li alãsats. 43 Cavai di voi, Farisei! Voi vrets protili locuri tu sinagogã sh-ncljinãciunji prit pãdzi. 44 Cavai di voi, cã hits ca murmintsãlji fãrã seamni, sh-oaminjlji imnã prisuprã fãrã si shtibã."*

45 Un nvitsãtor di lege apãndisi: "Nvitsãtore, dzãcãnda aesti, tini ma nã rushinedzi sh-noi." 46 Sh-Isusul dzãsi: "Cavai di-voi, nvitsãtori di lege! Cã lji ncãrcats oaminjlji cu ncãrcãturi greali, ma voi idhyilji nu bãgats nitsi dzeaditlu la aestã ncãrcãturã. 47 Cavai di voi! Cã voi adrat murmintsãlji a prufitsilor tsi pãrintsãlji a voshtri lji vãtãmarã. 48 Ashãtsi voi mãrtirsits sh-pricunushtets faptili a pãrintsãlor a voshtri, cã elji lji vãtãmarã sh-voi adrats murmintsãlji a lor. 49 Trã atsea mintimeniljea a Dumnidzãlui dzãsi: ‘Mini va vã pitrec prufits sh-apostulji, sh-elji va s-vatãmã niscãntsã di nãshi sh-altsãlji va lji priaĝuneascã.’ 50 Ashãtsi aestã farã s-ljea cãbãtsili trã sãndzili virsatã a tuts prufitsilor di tu apãrnjita a lumiljei, 51 di la sãndzili al Abel pãnã la sãndzili al Zaharia, tsi lu vãtãmarã namisa di altarlu sh-di templu. Trã atsea mini ma vã dzãc cã di la aestã farã va si s-caftã lugurii. 52 Cavai di voi, nvitsãtori di lege! Cã voi u loatã cljeaia a shtintsãljei. Ashãtsi voi idyilji nu intrat sh-avets nchidicat sh-atselji tsi ma intra."

53 Cãndu Isusul ishi afoarã di aclo, scriblji sh-Fariseilji ahurhirã s-ncuntreadzã multu shi s-lu ambuliseascã cu ma multi ntribãri. 54 Deapoea elji ashtipta tsi s-lu acãtsa cu vãrã zbor tsi va s-dzãtsea dit gura a lui.