1 Atumtsea si sculã tutã multsãmea, sh-lu dusirã Isusul nãintea al Pilat. 2 Aclo ahurhirã s-lu acuza dzãcãnda: "Aestu om lu aflãm aljumtrãnda mintea a popului a nostru, nchidicãnda s-plãtea taxa al Cezar, dzãcãnda cã easti Hristolu amirã." 3 Atumtsea Pilatul lu ntribã: "Tini eshti amirãlu a Iudeilor?" Isusul lj-apãndisi: "Tini idyiul ma dzãtsi." 4 Atumtsea Pilatul lã dzãsi a mãrlor a preftsãlor sh-a popului: "Mini nu ma aflu vãrã cãbati la aestu om." 5 Ma elji ipiminisea dzãcãnda: "Elu ma scoalã populu tu rebilipsiri nvitsãnda oaminjlji pri tutã Iudea, apãrnjinda dit Galilea sh-pãnã aoa." 6 Cãndu Pilatul avdzã cã si zbura di Galilea, ntribã macã atsel om eara Galilean. 7 Cara lo di hãbari cã Isusul eara dit loclu tsi eara sum domniljea al Herod, lu pitricu la Herod, cai tu atseli dzãli eara sh-elu tu Ierusalem. 8 Cãndu Herodul lu vidzu Isusul, s-hãrsi multu. Elu di multu chiro vrea s-lu videa, cã avea avdzãtã multu ti nãsu, sh-avea nãdii s-lu videa fãcãnda vãrã thavmã. 9 Elu lu ntribã trã multi lucri Isusul, ma Isusul nu lj-apãndisi dip. 10 Aclo eara sh-mãrlji a preftsãlor sh-scriblji tsi lu acuza cu aspru. 11 Herodul cu suldatslji a lui lu ngiurarã sh-lu pizuirã, sh-deapoea lu nviscurã cu stranji lunjinoasi shi l-pitricurã la Pilatu. 12 Atsea dzuã Pilatul sh-Herodul s-featsirã oaspi cu un-alantu, cã ma nãinti eara dushmanji.

13 Atumtsea Pilatul acljimã arhipreftsãlji, mãrlji sh-populu 14 sh-lã dzãsi: "Voi nj-adusit aestu om tsi rebilipseashti populu. Mini lu ntribai nãintea a voastrã sh-nu aflai la aestu om vãrã cãbati trã cai voi lu acuzats, 15 sh-nitsi Herodul, cã elu lu turnã la noi. Elu nu ari faptã tsiva tsi s-u-axizeascã moartea. 16 Trã atsea dupã tsi va lu zãpãleascã, va lu alasã." 17 [La sãrbãtoarea a Pashtiljei, guvernatorlji prindea si sãlãghea un hãpsãnit.]* 18 Tu atsea oarã tuts aurlarã cu unã boatsi dzãcãnda: "Ljea-lu aestu sh-sãlãghea-nã Baraba!" 19 Aestu eara bãgat tu hapsi trã un rebilipsiri tsi eara faptã tu cãsãbã sh-trã vãtãmari. 20 Trã atsea Pilatul vrãnda s-lã sãlãgheascã Isusul, lã grãi nãpoi. 21 Ma elji aurla dzãcãnda: "Crutsisits-lu! Crutsisits-lu!" 22 Atumtsea elu lã dzãsi di a treia oarã a-lor: "Ma tsi arãu ari faptã aestu? Mini nu aflai vãrã cãbati la nãsu tsi s-axizeascã moartea. Trã atsea dupã tsi va lu zãpãlescu, va lu sãlãghescu." 23 Ma elji ipiminisea cu boatsi analtã cãftãnda s-lu crutsisea. Aurlãrili a lor s-featsirã dominanti. 24 Atumtsea Pilatul apofãsi tsi si mplineascã cãftarea a lor. 25 Elu sãlãghi atsel tsi eara hãpsãnit trã rebilipsiri sh-vãtãmari, tsi elji lu cãfta. Ma Isusul lu prideadirã dupã voljea a lor.

26 Cãndu ma lu dutsea ti crutsisiri, acãtsarã un om cu numa Simon dit Cirena, tsi yinea dit cãmpu, lji bãgarã sh-a lui crutsea tsi s-u purta dupã Isusul. 27 Unã multsãmi mari di oaminji njidzea dupã nãsu, sh-muljerili bãtea cheptul sh-vãita trã nãsu. 28 Isusul s-turnã cãtrã eali sh-lã dzãsi: "Hiljili al Ierusalem, nu plãndzets trã mini, ma plãndzets trã voi sh-trã cilimenjlji a voshtri. 29 Ma yinã dzãlili tsi va s-dzãcã: ‘Ca hara di muljerili stearpi sh-cahara di pãntitsli tsi pute nu au amintatã sh-sinili tsi pute nu au ntricatã.’ 30 Atumtsea va s-apãrnjeascã s-lã dzãcã a muntsãlor: ‘Cãdets pristi noi!’ shi a dzenurilor: ‘Anvãlits-nã!’ 31 Cã macã s-fatsi ashã cu lemnul atsel veardili, tsi va s-fãcã cu atsel uscatlu?"

32 Elji adusirã sh-doi altsã arãu-fãcãtori deadun cu nãsu trã vãtãmari. 33 Cãndu agiumsirã tu loclu tsi s-acljima "Cafca", aclo lu crutsisirã Isusul sh-arãu-fãcãtorlji: unlu tu nandreapta a lui shi alatu tu nastãnga a lui. 34 Atumtsea Isusul dzãsi: "Tate, ljeart-lji atselji cã nu shti tsi fac." Apoea arcarã soarti sh-pãrtsãrã stranjili a lui. 35 Populu stãtea aclo sh-videa. Iarã mãrlji arãdea cu Isusul dzãcãnda: "Altsãlji lji ascãpã. Macã alihea easti Hristolu, aleptul al Dumnidzãu s-ascapã bana a lui." 36 Arãdea sh-suldatslji. Elji lji s-apruchearã sh-lji deadirã puscã, 37 sh-lji dzãtsea: "Macã tini eshti amirãlu a Iudeilor, ascapã-ti!" 38 Prisuprã di nãsu eara unã scriturã: "AESTU EASTI AMIRÃLU A IUDEILOR." 39 Ma un di arãu-fãcãtorlji crutsisit blãstimãnda lj-dzãsi: "Nu eshti tini Hristolu? Ascapã-ti tini sh-apoea nã ascapã sh-noi." 40 Ma alantu apãndisinda lu vãrghi: "Nu ai fricã di Dumnidzãlu, cã eshti tu idyia condamnã? 41 Noi him giudicatã cu ndriptati, sh-ma lom condamna tsi prindi trã atseali tsi avem faptã, iarã aestu nu ari faptã vãrã arãu." 42 Deapoea lj-dzãsi: "Isuse, adu aminti di mini cãndu va yinji tu mirãriljea a ta." 43 Isusul lj-dzãsi: "Dealihea ma ts-dzãc azã, cã va s-hii cu mini tu paradis."

44 Eara njeadzã-dzuã shi scutidlu anvãli tut loclu pãnã la oara trei dupã prãndzu. 45 Soarili si ntunicã sh-velul a templui s-pãrtsã tu doauã. 46 Atumtsea Isusul grãi cu boatsi analtã sh-dzãsi: "Tate, tu mãnjili a tali ma lu dau duhlu a meu!" Sh-cum dzãsi aestã, deadi duh. 47 Cãndu vidzu cã tsi s-featsi, tsenturionlu multumãri Dumnidzãlu dzãcãnda: "Dealihea aestu om eara ndreptu!" 48 Tut multsãmea tsi eara adunat s-videa tsi s-fãtsea, cãndu vidzu aestã, s-turnã a casã bãtãnda cheptul a lor. 49 Iarã tuts cunuscutslji a lui deadun cu muljerili a lor tsi yinea dupã nãsu di Galilea, stãtea diparti vidzãnda aesti.

50 Aclo eara un bãrbat cu numa Iosif, membru tu consiliu, om bun sh-ndreptu. 51 Elu nu avea aprovat planu sh-atsea tsi fãtsea elji. Elu eara di Arimatea, cãsãbãlu a Iudeiljei sh-ashtipta amirãriljea a Dumnidzãlui. 52 Iosiful s-dusi nãintea al Pilat sh-lji cãftã truplu al Isus. 53 Atumtsea elu lu dipunã dit crutsi, lu nfãshe cu unã pãndzã di ljin sh-lu bãgã tu un murmintu sãpat tu cheatrã, iu nu s-eara bãgat pute vãrã altu. 54 Sh-eara dzua a Etimãsiriljei sh-apãrnjea Sãmbãta. 55 Muljerili tsi avea vinit cu Isusul dit Galilea urmãnda, vidzurã murmintul sh-cum fu bãgat truplu al Isus. 56 Eali s-turnarã a casã sh-etimãsirã njurizmi buni sh-untulem njirusit. Sãmbãta s-discrumarã dupã legea.